1 Juan 5:1-21
5 Jesús salvamaqnintsi Cristo kashqanta criyiqkunaqa lapanpis Tayta Diospa wamrankunami karkaykan. Tayta Diosta *kuyarqa wamrankunatapis kuyantsimi.
2 Wamrankunata kuyashqantsita musyantsi Tayta Diosta kuyar mandamientunkunata cumplirmi.
3 Tayta Diosta kuyarqa mandamientunkunata cumplintsimi.* Mandamientunkunaqa manami sasatsu kaykan.*
4 Tsayno sasatsu kaykan Tayta Diospa wamrankuna *Satanásta vincishqa kaptinmi.* Tsayno vincintsi Tayta Diosman yärakurmi.
5 ¿Pitaq Satanásta vincin? Jesucristo Tayta Diospa Tsurin kashqanta criyiqkunalami vincin.
Jesucristo salvamaqnintsi kashqan
6 Jesucristo Diospa Tsurin kashqanta musyantsi bautizakushqan höra wamran kashqanta Tayta Dios nimushqa kaptin* y yawarninta jichar wanushqa kaptinmi.* Manami bautizakuptin Tayta Dios nimushqa kaptilantsu musyantsi, sinöqa yawarninta jichar wanushqa kaptinmi. Tsaynöpis Diospa Tsurin kashqanta musyantsi Espíritu Santu tantiyatsimaptintsimi. Espíritu Santu tantiyatsimashqantsiqa rasun kaqmi kaykan.
7 Jesucristo Diospa Tsurin kashqanta musyatsimantsi [jana patsacho kaykaq] kimsa testïgukunami. [Tsay testïgukuna kaykan Tayta Dios, Tsurin Jesucristo y Espíritu Santumi. Paykunaqa kimsaq karpis juklaylami kaykan.
8 Tsaynölami kay patsachöpis kimsa testïgukuna musyatsimantsi.] Tsay testïgukuna kaykan Espíritu Santu, Jesucristo bautizakushqan y wanur yawarninta jichashqanmi. Tsay kimsa testïgukuna tsay yarpaylatami musyatsimantsi.
9 Runa wilapämashqantsita criyiykarqa Tayta Dios nimashqantsita masraq criyishun. Tsurin Jesucristupita Tayta Dios nimashqantsiqa masmi välin runakuna wilapämashqantsipitapis.*
10 Jesucristo Diospa Tsurin kashqanta criyiq kaqqa Tayta Dios tantiyatsishqanta criyinmi. Jesucristo Diospa Tsurin kashqanta mana criyiq kaqmi itsanqa Tayta Dios tantiyatsishqantapis mana criyintsu. Mana criyirmi Tayta Diosta manakaqman churan.
11 *Mana ushakaq kawayta qomashqantsitami Tayta Dios tantiyatsimashqantsi. Tsay kawaytaqa tarintsi Tsurin Jesucristuta chaskikurmi.
12 Tayta Diospa Tsurinta chaskikuq kaqqa mana ushakaq kawaytami tarin. Mana chaskikuq kaqmi itsanqa tsay kawayta mana tarinqatsu.*
Carta ushanan
13 Tayta Diospa Tsurinman yärakäriptikimi kay cartata apaykätsimü *mana ushakaq kawayta tarishqaykita musyapäkunaykipaq.*
14 Tayta Dios munashqanno kananpaq imatapis manakuptintsiqa mayamashqantsitami musyantsi.
15 Mayamashqantsita musyarmi manakushqantsino yanapamänantsipaq kashqantapis musyantsi.*
16 Mayqaykipis wawqi panikuna jutsa rurashqanta musyarqa paykunapaq Tayta Diosta manakäriy. Perdonananpaq kaq jutsa kaptinqa Tayta Dios perdonanqami. Mana perdonananpaq kaq jutsa kaptinqa Tayta Diosta ama manakäriytsu.*
17 Mana ali rurayqa lapanpis jutsami kaykan. Tsayno kaptinpis Tayta Dios mana perdonananpaq kaq jutsa kaykanmi.*
18 Musyantsimi Tayta Diospa wamran kashpantsi jutsa ruraylacho mana kawashqantsita. Tsaynöpis Tayta Diospa Tsurin Jesucristumi *Satanáspita tsapaykämantsi.
19 Musyantsimi Tayta Diospa wamranna kashqantsita. Tsaynöpis musyantsimi intëru kay patsa Satanáspa munaynincho kaykashqanta.
20 Musyantsimi Tayta Diospa Tsurin Jesucristo kay patsaman shamur Tayta Diosta *reqinantsipaq tantiyatsimashqantsita. Tsaymi Tayta Diospa y Tsurin Jesucristupa makincho kawaykantsi. Jesucristuqa kikin Diosmi kaykan. Paymi mana ushakaq kawayta qomantsi.*
21 Kuyay wamräkuna, ima ïdulukunamanpis ama yärakäriytsu. [Amén.]
Ichic wilacuycuna
^ kuyay, Diosta kuyay Tayta Diosta kuyarqa lapan nishqankunatami cäsukuntsi (Deut. 6.5; 11.1; Juan 14.15, 21; 1Juan 5.3). Tsaynöpis Tayta Diosta kuyarqa runa mayintsitapis kuyantsimi (1Juan 4.20-21; 5.1).
^ 5.3a Juan 14.15; 2Juan 6.
^ 5.3b Deut. 30.11; Mat. 11.30.
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 5.4 Juan 16.33.
^ 5.6a Mat. 3.17; Juan 1.31-34.
^ 5.6b Mar. 15.39.
^ 5.9 Juan 5.32-37; 8.18.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 5.13 Juan 20.31.
^ 5.17 Mana perdonananpaq kaq jutsaqa jutsa rurayta mana kacharishqanmi kaykan. Tsay jutsata ruraq runaqa manami Tayta Diosta perdonta manakuntsu. Jutsa rurashqanpita lakikur perdonta manakuptinmi itsanqa Tayta Dios perdonanqapaq (1Juan 1.9).
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
