1 Juan 3:1-24
3 ¡Tantiyakäriy! ¡Tayta Dios pasaypami kuyamantsi! Kuyamashpantsimi “wamräkunami karkaykanki” nimantsi.* Rasunpami wamrankuna kaykantsi. Wamran kashqantsitaqa Tayta Diosta mana chaskikuq runakuna manami tantiyapäkuntsu. Tsayno tantiyapäkuntsu Tayta Diosta mana *reqirmi.
2 Kuyay wawqi panikuna, Tayta Diospa wamran kashqantsita kanan musyarpis manami musyantsiraqtsu imano kanantsipaq kashqantapis. Tsayno kaptinpis musyantsimi Jesucristo kutimuptin paywan tinkur kikin niraqman tikranantsipaq kashqanta.*
3 Tsayno kanantsipaq kashqanta shuyaraykarqa Jesucristo jutsaynaq *püru kashqanno noqantsipis jutsaynaq püru kashun.
4 Pipis jutsata rurarqa Tayta Diospa leyninkunata manami cäsukuykantsu.
5 Musyantsimi jutsaynaq kanantsipaq Jesucristo kay patsaman shamushqanta. Payqa manami imaypis jutsata rurashqatsu.
6 Tsaymi Jesucristupa makincho kawaqkunaqa jutsa rurayta kacharin. Jutsa rurayta mana kachariqkunaqa manami Jesucristuta chaskikushqatsu ni reqintsu.
7 Kuyay wamräkuna, pipis “Tayta Diostami cäsukü” nirqa Jesucristunömi alikunata rurar kawatsun. Cäsukuq kashqanta niykar jutsata ruraptinqa yachatsishushqaykita ama chaskipäkuytsu.
8 Jutsa rurayta mana kachariq kaqqa diablupa munayninchömi kaykan. Diabluqa kay patsa qalaykushqanpita patsami jutsata ruran. Diablu rurashqankunata ushakätsinanpaqmi Tayta Diospa Tsurin Jesucristo shamushqa.*
9 Tayta Diospa wamran kaqkunaqa manami jutsata rurannatsu, sinöqa Tayta Dios munashqannönami kawapäkun. Tayta Diospa wamran karmi jutsa ruraykunata kacharin.
10 Pipis jutsata rurar y runa mayinta chikirqa manami Diospa wamrantsu kaykan, sinöqa diablupa wamranmi. Tsaynöpami musyantsi Diospa wamran pï kashqanta y diablupa wamran pï kashqantapis.
Pïmaywanpis kuyanakunantsipaq nishqan
11 Juknintsi juknintsipis kuyanakunantsipaq kashqantaqa unaypitanami musyantsi.*
12 Ama kashuntsu Caínnöqa. Payqa diablu munashqanta rurarmi wawqin Abelta wanutsirqan.* ¿Imanirtaq wanutsirqan? Kikinpa rurayninkuna mana ali kaptin y wawqinpa rurayninkuna ali kaptinmi wanutsirqan.
13 Wawqi panikuna, musyantsimi jutsa ruraq runakuna chikimashqantsita.
14 Tsaynöpis musyantsimi wanushqano kashqantsipita *mana ushakaq kawaytana tarishqantsita. Tsayta musyantsi wawqi panikunawan kuyanakur kawarmi.* Mana kuyaq kaqqa wanushqanömi kaykan.
15 Lapanpis runa mayinta chikiqkunaqa wanutsiqnömi kaykan. Musyashqantsinöpis wanutsikuqkunaqa manami Tayta Diospa nawpanman chayanqatsu.
16 Kuyakuq kanantsipaqqa Jesucristo noqantsi rayku wanushqanta tantiyakushun.* Noqantsipis kuyakuq karqa runa mayintsi rayku wanunantsipaq listu kaykäshun.
17 Imantsipis kaykaptin runa mayintsi nisidächo kaykaqta mana yanaparqa manami Tayta Dios kuyakuq kashqannötsu kuyakuq kantsi.
18 Kuyay wamräkuna, janan shonqulaqa ama kuyanakushuntsu, sinöqa imaypis yanapanakur rasunpa kuyanakushun.
19 Tsayno kuyanakurmi musyantsi Tayta Diospa wilakuyninta rasunpa chaskikushqantsita y jutsantsipita perdonamashqantsita.
20 Mana perdonamashqantsita yarpaptintsipis payqa jutsantsipita lakikushqantsita musyarmi perdonamantsi.
21 Kuyay wawqi panikuna, perdonashqana kashqantsita musyaykarnaqa mana mantsakuypa Tayta Diosta manakushun.
22 Mandamientunkunata cäsukur pay munashqanno kawarqa imata manakushqantsitapis chaskishunmi.
23 Tayta Diospa mandamientunmi niykan Tsurin Jesucristuman yärakunantsipaq y juknintsi juknintsipis kuyanakunantsipaq.
24 Mandamientunkunata cumplirqa paywanmi kaykantsi y paypis noqantsiwanmi kaykan. Noqantsiwan pay kaykashqanta musyantsi kachamushqan Espíritu Santuta chaskikushqa karmi.*
Ichic wilacuycuna
^ reqiy, Diosta reqiy Tayta Diosta reqirqa payman yärakuntsi y pay munashqanno kawar kushikuntsi. Tsaynöpis tantiyantsi kuyakuq kashqanta, munayniyuq kashqanta, jutsaynaq santu kashqanta, juzgakuq kashqanta, alilata ruraq kashqanta y promitishqanta imaypis cumpliq kashqanta.
^ püru, impüru Püru ninanqa ima qanrapis mana kashqan ninanmi. Tsaymi Tayta Dios munashqanno jutsaynaq kawaq runapis püru kashqanta Bibliacho nin (1Juan 3.3).
^ 3.8 Heb. 2.14-15.
^ 3.11 Juan 13.34; 15.12.
^ mana ushakaq kaway Mana ushakaq kawayqa Tayta Diospa nawpancho imayyaqpis kawanantsipaqmi kaykan. Tsay kawayta tarirqa Tayta Diosta reqintsimi (Juan 17.3). Mana ushakaq kawayqa kay patsachömi qalaykun (Juan 5.24). Tsay kawayta tarintsi Jesucristuta chaskikurmi (Juan 3.16, 36; 6.40, 47; 14.6; 20.31).
^ 3.16 Juan 15.13.
^ 3.23 Juan 13.34; 15.12, 17.
