1 Crónicas 28:1-21
28 Tsaypitanami Jerusalénman David qayatsirqan lapan mandäshiqninkunata, cada trïbupa mandaqninkunata, soldädukunapa capitanninkunata waranqa (1,000) soldädukunapa mandaqninkunata y pachak (100) soldädukunapa mandaqninkunata. Tsaynölami qayatsirqan Davidpa y tsurinkunapa chakrancho arutsiq capatazninkunata, Davidpa y tsurinkunapa uywankunata mitsitsiqkunata, yanapaqninkunata y ali chölu kaq soldädukunatapis.
2 Lapan juntakaykuptinnami ichirkur David kayno nirqan: “Taytakuna, shumaq mayapäkamay. TAYTA DIOSNINTSIPA *Pactu Babulnin imayyaqpis churaränanpaq y TAYTA DIOS tänanpaq templuta sharkatsiyta munarmi lapanta kamarishqä.
3 Tsayno kamariykaptïmi Tayta Dios kayno nimashqa: ‘Juk nación runakunawan guërracho atska runakunata wanutsishqa karmi qamqa templüta mana sharkatsinkitsu’.
4 “Tsayno kaptinpis yärakushqantsi TAYTA DIOSMI lapan trïbu Israel runakunapa mandaqnin rey kanäpaq akramashqa. Puntataqa Judá trïbutami akrashqa. Tsay trïbupitami taytä ayluta akrashqa. Wawqïkunapitanami noqata akramashqa.
5 “TAYTA DIOSPA bendicionninwanmi tsurïkuna atska kaykan. Paykunapitanami tsurï Salomónta TAYTA DIOS akrashqa wanukuptï TAYTA DIOS mandaykashqan Israelcho rey kananpaq.
6 Akrashpanmi Tayta Dios kayno nimashqa: ‘Tsuriki Salomónmi templüta y patiunkunata ruratsinqapaq. Paytami akrashqä wamrä kananpaq. Noqami taytan kashaq.
7 Mandamientükunata y leynïkunata kanan cumplishqanno cumpliptinqa paypita miraqkunalami rey imaypis kanqa’.*
8 “TAYTA DIOSNINTSI rikaykämaptintsimi lapaykipa nawpaykicho qamkunata kayno nï: Tayta Diospa lapan mandamientunkunata mana qonqaypa cumplipäkuy. Tsaynöpami kay nacionnintsi imayyaqpis qamkunapaq y tsurikikunapaq kanqa.
9 “Kuyay tsurilä Salomón, Tayta Diosta cäsukushqäno qampis cäsukuy, hïju. TAYTA DIOS musyanmi imata shonquntsi yarpaykashqantapis. Tsayno kaptinqa lapan shonquykiwan y lapan voluntänikiwan payta cäsukuy. Payta *ashirqa tarinkipaqmi. Payta kachariptikiqa qamtapis kachariykushunkipaqmi.
10 Qamtami Tayta Dios churashushqanki täkunan templunta ruratsinaykipaq. Tsayno kaykaptinqa jukla arutsiyta qalaykatsiy”.
11 Nirkurmi tsurin Salomónta David entregarqan templuta imano arutsinanpaqpis rurashqan plänuta. Tsay plänuchömi kaykarqan templuman yaykunan patiuta imano ruratsinanpaq, patiu kuchuncho kaykaq wayikunata imano ruratsinanpaq, imaykatapis churakuna wayikunata imano ruratsinanpaq, altuscho jatun cuartukunata imano ruratsinanpaq, patsacho kaq cuartukunata imano ruratsinanpaq y Lugar Santïsimuta imano ruratsinanpaqpis.
12 Tsaynöpis plänuta entregarqan templupa patiunkunata y templu patiu kuchunkunacho kaykaq cuartukunata imano ruratsinanpaq, tesörukunata churananpaq kaq cuartukunata imano ruratsinanpaq y Tayta Diospaq ofrenda apashqanta churananpaq kaq cuartukunata imano ruratsinanpaqpis.
13 Tsaynölami tsurin Salomónta rey David tantiyatsirqan cürakuna y *levitakuna templucho imata rurananpaq y templucho kaq *sagrädu manëjukunata imano manijananpaqpis.
14 Templupa manëjunkunata ruratsinanpaq shuntashqan qorita y yoraq qellayta tsaytsikatami Salomónta entregarqan.
15 Candelabrukunata y mechërukunata ruratsinanpaqpis qorita y yoraq qellayta tsaytsikatami entregarqan. Ayka pësananpaq kashqantapis tantiyaykurmi kamariparqan.
16 Mësakunata ruratsinanpaqpis qorita y yoraq qellayta pësaypami entregarqan. Tsay mësakunaqa qaqaylanpa sagrädu tantakunata churananpaqmi karqan.
17 Trinchikunata, tazonkunata y puyñukunata ruratsinanpaqpis qorita y yoraq qellaytami entregarqan.
Väsukunata ruratsinanpaqpis cada ünun ayka lasänanpaq kashqanta tantiyaykur qorita y yoraq qellayta kamariparqan.
18 Inciensuwan qoshtatsikuna *altarta ruratsinanpaqpis alinnin kaq qoritami kamariparqan.
Tsaynölami qorita kamariparqan Tayta Diospa carrëtanta ruratsinanpaq. Paypa carrëtanqa *querubinkunami karqan. TAYTA DIOSPA Pactu Babulnin jananpami tsay querubinkunapa älankuna mashtaraykarqan.
19 Nirkurmi tsurin Salomónta David kayno nirqan: “Lapan tsay plänukunata dibujashqä revelacioncho TAYTA DIOS rikatsimashqannölami. Plänucho dibujaraykashqantanöla lapantapis ruratsinki”.
20 Mastapis tsurin Salomónta David kayno nirqan: “Kananqa mana qelanaypa y mana mantsakuypa jukla arutsiyta qalaykuy. Templuta y templucho kananpaq kaqkunata ruratsiyta ushanaykipaqmi noqa sirvishqä TAYTA DIOS mana kachaypa yanapashunkipaq.
21 Templucho trukanakuypa arunanpaqmi cürakuna y levitakuna kaycho karkaykan. *Artesänukunapis yanapashunaykipaq kaychömi karkaykan. Lapan mandaqkunapis y común runakunapis listumi karkaykan imatapis mandashqaykita rurapäkunanpaq”.
Ichic wilacuycuna
^ Pactu Babul Pactu Babulqa jananpa y rurinpa qoriwan enchapashqa cajonmi karqan. Tsay babulpa jananchönami qoripita rurashqa ishkay angilkuna kaykarqan. Tsay babulchömi churaraykarqan ishkay läjaman Tayta Dios qelqashqan chunka mandamientukuna, Aarónpa tukrun y Tayta Dios kamaripashqan maná mikuypis. Pactu Babultami Tayta Dioswan Tinkuna Toldu ruriman churarqan. Castellänuchöqa Pactu Babultami “arca del pacto” nipäkuq (Éxo. 25.10-22; 37.1-9).
^ 28.7 2Sam. 7.11b-14; 1Crón. 17.11-14.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ sagrädu Liyinki santupita tantiyatsikuyta.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ querubín Querubinqa älayuq angilkunami karkaykan. Querubinkunatami Tayta Dios churarqan Edén huertata täpananpaq (Gén. 3.24). Tsaynölami Pactu Babulpa tsapanan jananchöpis qoripita rurashqa ishkay querubinkuna ichiraykarqan (Éxo. 25.18-22; Heb. 9.5). Salomón ruratsishqan templuchöpis ishkay querubinkunami qoriwan enchapashqa karqan. Tsay querubinkunapa altunmi karqan chusku metru pulan (1Rey. 6.23-29). Profëta Ezequielpis revelacionchömi querubinkunata rikarqan (Eze. 10.1-22; 41.18-19).
^ artesänu Artesänukunaqa kaykan carpintërukuna, suëlapita obrakunata ruraqkuna, awaqkuna, mankata ruraqkuna y mas imatapis shumaq yachaq runakunapis.
