1 Crónicas 21:1-30
21 *Satanásmi* Israel runakunapa contran sharkushpan Davidpa yarpayninman churarqan Israel runakunata censananpaq.
2 Tsawraqa Joabta y Israel runakunapa mandaqninkunata qayaykur rey David kayno nirqan: “Lapan trïbu Israel runakuna tashqanpa aywar Beersebapita hasta Danyaq censamunki ayka runakuna kashqantapis musyanäpaq”.
3 Tsawraqa Joab kayno nirqan: “Qampa makikicho lapanï kaykaptïqa ¿imanirtaq runakunata censayta munaykanki, tayta? TAYTA DIOSTA manakuptintsiqa pachak (100) kuti mastapis kawashqaykiyaqqa runakunata rikakätsimunmanmi. Mana cäsukuypa censaptikiqa Tayta Dios castigamäshunmi”.*
4 Tsayno niptinpis rey Davidqa manami cäsukurqantsu. Tsaymi runakunata censapäkamunanpaq intëru Israel nacionpa Joab aywarqan. Tsaypita Jerusalénman
5 kutiykur rey Davidta wilarqan ayka runakunata censamushqantapis. Israelcho taq runakunata* censar tarirqan juk millón pachak waranqa (1,100,000) runakunata. Judácho taq runakunata censarnami tarirqan chusku pachak qanchis chunka waranqa (470,000) runakunata. Lapan tsay censashqan runakunaqa guërraman aywapäkunanpaq kalpanchönami karqan.
6 David censatsir lutanta ruraykashqanta tantiyarmi Joab mana censarqantsu *levitakunata y Benjamín trïbu runakunata.
7 David censatsishqanpita rabyakurmi Israel runakunata Tayta Dios castigayta qalaykurqan.
8 Tsaymi jutsata rurashqanta tantiyakur Tayta Diosta manakushpan David kayno nirqan: “Runakunata censatsir pasaypami jutsata rurashqä. Tsayno rurashqäpita perdonaykalämay. Tsaytaqa upa ruraytami rurashqä”.
9 Tayta Dios imata nishqantapis musyananpaqmi profëta Gadta David imaypis tapukuq. Tsaymi Gadta TAYTA DIOS kayno nirqan:
10 “Davidman aywaykur wilanki kimsa castïgupita mayqantapis jukta akrananpaq. Akrashqan castïguwanmi castigashaq”.
11 Tsayno niptinmi David kaqman aywaykur Gad kayno nirqan: “TAYTA DIOSMI nimashqa
12 kimsa castïgupita mayqantapis jukta akranaykipaq. Jukshi kaykan kimsa wata kay nacioncho muchuy kaptin runakuna nakananpaq, juknashi kaykan contraykikuna kimsa killa qatikachäshunaykipaq y juknashi kaykan intëru Israel nacioncho kimsa junaq fiyu qeshyawan TAYTA DIOSPA *angilnin runakunata wanutsinanpaq. Kachamaqnï Tayta Diosta wilanäpaq shumaq yarpachakurir mayqantapis akrarkur wilamay”.
13 Tsawraqa Gadta David kayno nirqan: “¡Kananchi kananlaqa! Kananqa manami mayqantapis akrayta kamäpakütsu. Imano kaptinpis pasaypa kuyapäkuq kar TAYTA DIOS kikin castigamätsun. Conträ runakunapa munayninman itsanqa ama kachaykalämätsuntsu”.
14 Tsaymi Israel runakunata pesti qeshyawan TAYTA DIOS castigarqan. Tsayno castigaptinmi qanchis chunka waranqa (70,000) runakuna wanupäkurqan.
15 Kachamushqan ángel Jerusaléncho taq runakunatapis wanutsinanpaqna kaykaptinmi TAYTA DIOS lakikurqan runakunata tsayno wanutsishqanpita. Tsaymi angilta kayno nirqan: “Amana wanutsiynatsu”.
Tsay höra TAYTA DIOSPA angilnin kaykarqan jebuseo runa Ornánpa ëran kaqchömi.
16 Jana patsapa rikachakushqanchömi David rikarqan TAYTA DIOSPA angilnin espädan aptashqa kaykämuqta. Tsay espädantaqa Jerusalénmanmi toqriraykarqan. Tsawraqa Davidpis mayor runakunapis fiyupa mantsakashpan qachqa röpata jatikur pampaman lätakaykärirqan.
17 Tayta Diosta manakushpanmi David kayno nirqan: “TAYTA DIOSNILÄ, manami Jerusalén runakunatsu jutsayuq kaykan, sinöqa noqalami. Runakunata censatsir jutsata rurashqäpitaqa noqata y aylükunata castigaykalämay. Kuyashqayki Israel runakunataqa ama wanuykatsilaytsu”.
Tayta Diosta adorananpaq altarta David rurashqan
2 Samuel 24.18-25
18 Tsay junaqmi profëta Gadta TAYTA DIOSPA *angilnin kayno nirqan: “David kaqman aywaykur niy jebuseo runa Ornánpa ërancho TAYTA DIOSTA adorakunan *altarta rurananpaq”.
19 Ángel nishqannöla Gad niptinmi David aywarqan TAYTA DIOS nishqanta rurananpaq.
20 Tsay hörami trïguta Ornán jaruykätsiptin chuskun tsurinkuna payta yanapaykarqan. Aruykashqancho Ornán tikraykur rikarqan ángel tsaycho kaykaqta. Tsayta rikaykurmi tsurinkunapis qeshpir pakakärirqan.
21 Rey David aywaykämuqta rikaykurmi Ornán taripaykur nawpanman qonqurpakuykurqan urkunpis pampaman töpashqanyaq.
22 Tsaymi Ornánta David kayno nirqan: “Ëraykita rantikamay TAYTA DIOSPAQ altarta tsaycho ruranäpaq. Ayka chanin kaptinpis pägashaykimi. Tsay altarchömi sacrificiukunata rupatsishaq pesti qeshyawan runakuna manana wanunanpaq”.
23 Tsawraqa Ornán kayno nirqan: “Tayta, kaycho ëra kaykan. Sacrificiuta rupatsinaykipaq törükunapis kaykanmi. Yantata nistaptikipis jurquëtakuna kaykanmi. Tsaki mikuy ofrendata rupatsinaykipaqpis trïgu kaykanmi. Tsaykunataqa lapantami kamaripäshayki, tayta”.
24 Tsayno niptinmi rey David kayno nirqan: “Yusulpalä, tayta. Alichari kanman. Imano kaptinpis qaramänaykipa* trukanqa rantikaykalämay. Mana rantikamaptikiqa manami TAYTA DIOSPAQ altarta rurämantsu. Dembaldila tarishqätapis manami sacrificiuta rupatsïmantsu”.
25 Tsayno nirmi tsay ërata David rantirqan soqta pachak (600) qori qellaywan.
26 Nirkurnami tsay ëracho altarta David rurarkatsir rupatsina sacrificiukunata y jawka kawakuy sacrificiukunata altarman churarkur TAYTA DIOSTA manakurqan. David manakushqanta chaskishpan ninata ciëlupita TAYTA DIOS altarman ratatsimurqan.
27 Tsaypitami TAYTA DIOS angilninta nirqan espädanta churaräkunanman kutitsinanpaq.
28 Manakushqanta TAYTA DIOS contestashqanta rikarmi uywakunata pishtarkur tsay altarcho mas sacrificiukunata David rupatsirqan. Tsaykunata rupatsirqan jebuseo runa Ornánpa ëranchömi.
29 Tsay witsanqa TAYTA DIOSWAN Tinkuna Toldu y sacrificiuta rupatsina altarpis Gabaón markalachöraqmi kaykarqan. Tsay tolduta y altarta Moisés ruratsirqan chunyaq tsaki jirkacho Israel runakuna karkaykaptinmi.
30 Tsayno kaptinpis espädan aptashqa angilta mantsakurmi Tayta Diosta tapukuq Gabaónman David mana aywarqantsu.
Ichic wilacuycuna
^ Satanás Satanásqa supaykunapa mandaqninmi kaykan. Payqa manami Diosnötsu maytsaychöpis kaykan. Satanáspa wakin jutinkunami kaykan diablu y Beelzebú (Mar. 1.13; Hech. 13.10).
^ 21.1 Job 1.6; Zac. 3.1; Apoc. 12.10.
^ 21.3 Éxo. 30.12.
^ 21.5 Israelcho taq runakunapaq parlarqa norti läducho y Jordán mayu wak tsimpancho taq chunka trïbukunapaqmi parlarqan. Judácho taq runakunapaq parlarqa Judá y Simeón trïbu runakunapaqmi parlarqan.
^ levita Levita runakunaqa karqan Jacobpa tsurin Levípita miraq runakunami. Paykunami templucho cürakunata yanaparqan (Núm. 1.47-54; 3.5-39). Templu manaraq kaptinmi Dioswan Tinkuna Tolducho yanaparqan (1Crón. 24–26). Levitakunatami rey Josafat kacharqan markan markan Diospa leyninkunata yachatsipäkunanpaq (2Crón. 17.7-9).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 21.24 Wakin runakunaqa regalamänaykipa nipäkun.
