Éxodo 33:1-23
33 TAYTA DIOS mastapis Moisésta kayno nirqan: “Kananqa Egiptupita jorqamushqayki runakunata pusharkur ayway Abrahamta,* Isaacta* y Jacobta* promitishqä nacionman. Tsay naciontami promitirqä paykunapita miraqkunata qoykunäpaq.
2 Qamkunata yanapashunaykipaqmi *angilnïta kachamushaq. Tsayman chayaptikinami cananeo runakunata, amorreo runakunata, heteo runakunata, ferezeo runakunata, heveo runakunata y jebuseo runakunatapis qarqushaqpaq.
3 Yakunöraq atska lëchipis abëjapa mishkinpis kashqan nacionman aywapäkuy. Mana cäsukuq runakuna kaptikimi qamkunawan mana aywashaqtsu. Qamkunawan aywarqa ushakätsishaykimi”.
4 TAYTA DIOS tsayno nishqanta Moisés wilaptinmi Israel runakuna fiyupa lakikushpan ali röpata ni alhäjakunata pipis mana jatikurqannatsu.
5 Tsayno lakikärirqan Moisésta TAYTA DIOS kayno nishqanpitami: “Qamkunaqa mana wiyakuq runakunami karkaykanki. Tsaymi qamkunawan juk rätulapis aywarqa usharpis ushakätsïman. Alhäjaykikunata y ali röpaykita amana jatikäriynatsu. Yarpachakushaqraqmi qamkunata imano castiganäpaq kashqantapis”.
6 Tsayno niptinmi Horeb* jirkapita aywakushqanpita patsa alhäjankunata y ali kaq röpakunatapis Israel runakuna mana jatikurqannatsu.
Tinkuna Tolducho Moiséswan Tayta Dios parlashqan
7 Israel runakunapa campamentunpita mas karu niraqchömi Moisésqa juk tolduta ichitsirqan. Tsaypa jutintami churaparqan Tinkuna Toldu jutin kananpaq.* Pipis TAYTA DIOSTA *ashiyta munarqa tsay toldumanraq aywapäkuq.
8 Moisés tsayman aywaptinmi Israel runakunaqa toldunkuna punkunman ichiykur rikarpaq Tinkuna Toldu rurinman yaykunanyaq.
9 Moisés yaykuptinna tsay toldu punkuman ichiraykaq pukutay urämuq. Nirkur Moiséswan TAYTA DIOS parlashqanyaq toldu punkucho pukutay ichiraq.
10 Tsay toldu punkucho pukutay ichiraykaqta rikarmi lapan runakuna toldunkuna punkulacho TAYTA DIOSTA adorapäkuq.
11 Amïgunwan runa parlaqnömi Moiséswan TAYTA DIOS parlaq. Tsayno parlarkurmi Moisésqa campamentuman kutiq. Moisésta yanapaq mözu Josuémi itsanqa Tinkuna Toldulacho imaypis mana yarquypa täkuq. Josuéqa karqan Nunpa tsurinmi.
Tayta Diospa cäranta Moisés rikayta munashqan
12 TAYTA DIOSTA Moisés kayno nirqan: “Kay runakunata pushanäpaq nimashqanki, Tayta. Tsayno kaptinpis manami nimashqankitsu pï yanaqämänanpaq kashqantapis. Tsaynöpis nimashqanki amïguyki kaptï kuyapämashqaykita.
13 Rasunpa kuyapämashpaykiqa imata yarpashqaykitapis wilaykalämay. Tsaynöpami kuyapämashqaykita musyashaq. Ama qonqaykulaytsu kay runakunata kikiki akrashqaykita, Tayta”.
14 Tsawraqa TAYTA DIOS kayno nirqan: “Kikïmi yanaqäshayki. Noqami jamayta qoshayki”.*
15 Tsawraqa Moisés kayno nirqan: “Mana yanaqämänaykipaq kaptinqa kaypita ama jorqapäkamaytsu.
16 Mana yanaqämaptikiqa ¿imanöpataq musyapäkushaq noqakunata kuyapämashqaykita? Tsaynöpis ¿imanöpataq musyapäkushaq wakin casta runakunapita noqakunata mas kuyamashqaykita?”
17 Niptin TAYTA DIOS kayno nirqan: “Amïgü kaptikimi kuyapashpä manakamashqaykino qamkunata yanaqäshayki”.
18 Tsawraqa Moisés kayno nirqan: “Tayta, ruwakuläshayki. Kikikitami rikayta munaykä”.
19 Tsayno niptin Moisésta TAYTA DIOS kayno nirqan: “Kuyapashqä kaqta kuyapämi. Perdonayta munashqä kaqtaqa perdonämi. Tsaymi nawpaykipa pasar kuyapäkuq kashqäta musyatsishayki. Tsaynöpis jutï *Yahweh kashqantami wilashayki.
20 Itsanqa qaqläta manami rikankimantsu. Pipis qaqläta rikaq kaqqa wanunqami”.*
21 Mastapis TAYTA DIOS kayno nirqan: “Qaqa jananman witsarkamur nawpächo ichiray.
22 Nawpaykipa pasarmi qaqa kichakashqa kaykaqman yaykatsishayki. Nirkurmi makïwan tsapashayki pasanäyaq.
23 Pasarirraq makïta jorquptïmi waqtalätana rikamankipaq. Qaqlätami itsanqa mana rikankipaqtsu”.
Ichic wilacuycuna
^ 33.1c Gén. 28.13.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
Angilkunaqa (1) Tayta Dios nishqankunata wilakärin (Gén. 18.16–19.29; Dan. 8.15-17; 9.21-23; Mat. 1.20-24; Luc. 1.11-20, 26-38), (2) Tayta Diospa favornin pelyapäkun (2Rey. 6.15-17; Dan. 10.13-14; Apoc. 12.7-9) y (3) Diosman yärakuqkunata tsapan y yanapan (Sal. 91.11-12; Heb. 1.14).
Satanáspa angilninkunaqa supaykunami karkaykan (Mat. 25.41; Apoc. 9.11).
^ 33.6 Horeb jirka y Sinaí jirka tsaylami kaykan.
^ 33.7 Kay Tinkuna Tolduqa manami campamentu chawpincho kaq Tinkuna Toldutsu, sinöqa jukmi.
^ ashiy, Diosta ashiy Tayta Diosta ashirqa lapan shonquntsiwanmi payta manakuntsi (Sal. 105.3-4; 2Crón. 7.13-14). Manami templulachötsu Tayta Diosta Israel runakuna ashipäkurqan, sinöqa maytsaychöpis ashipäkurqanmi (Deut. 4.27-31; Jer. 29.12-14). Tayta Diosta ashirqa jutsata rurashqantsipita perdonta manakuntsi (Ose. 3.5) y payta imaypis cäsukuntsi (Sof. 2.3). Tayta Diosta ashirqa tarishunpaqmi (Deut. 4.29-31; 2Crón. 15.2; Isa. 45.19). Tayta Dios nimantsi payta ashinantsipaq (1Crón. 16.10-11; 22.19; Amós 5.4). Mana ashirqa manami pay munashqannötsu kawantsi (2Crón. 12.14).
^ 33.14 Mat. 11.28-29.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
