Éxodo 3:1-22
3 Moisésnami suedrun Jetrupa* uyshankunata y cabrankunata mitsiq. Jetruqa madianita runakunapa cüranmi karqan. Juk kutimi Moisés mitsikuq aywarqan chunyaq jirkapa. Tsayno aywarmi chayarqan Tayta Dioswan tinkuna Horeb jirkaman.*
2 Tsaychömi TAYTA DIOSPA *angilnin Moisésta yuriparqan shiraka rupaykaqcho. Moisés tantiyaykunanpaqqa tsayjina rataykarpis manami shirakata ruparqantsu.
3 Tsawraqa kayno nirqan: “¡Imaraq taqay! Mä aywashaq jinanman rikamunäpaq. ¡Imanirtaq nina ratarpis shirakata mana ushantsu!”
4 Moisés rikaq aywaykaptinmi nina rupaykaqpita TAYTA DIOS qayakurqan kayno nir: “¡Moisés, Moisés!”
Tsawraqa Moisés nirqan: “¿Imata, Tayta?”
5 Tsawraqa Tayta Dios kayno nirqan: “Ama witimuytsu. Kay ichirashqayki patsaqa *sagrädumi kaykan. Tsayno kaykaptinqa lanqikita jorquy”.
6 Mastapis kayno nirqan: “Unay ayluykikuna Abrahampa, Isaacpa y Jacobpa Diosninmi kaykä”.
Tsayno niptinmi Diosta rikayta mantsakushpan Moisés qaqlanta tsapakurqan.
7 Nirkurnami TAYTA DIOS kayno nirqan: “Kuyashqä runakuna Egiptucho fiyupa lakikur kawarkaykaqtami rikashqä. Tsaynöpis mayashqä capatazninkuna pasaypa nakatsiptin quejakamar manakamashqanta. Tsaynölami musyaykä amatar nakarkaykashqanta.
8 Tsaymi noqa shamushqä Egipto runakunapa makinpita jorqamunäpaq. Jorqarkamurmi pushashaq maypis täkuypaq jatunkaray partiman. Tsaychöqa lëchipis abëjapa mishkinpis yakunöraqmi atska kaykan. Tsay markakunachömi tarkaykan cananeo runakuna, heteo runakuna, amorreo runakuna, ferezeo runakuna, heveo runakuna y jebuseo runakunapis.
9 Noqa mayashqämi Israel runakuna manakamashqanta. Tsaynöpis rikashqämi paykunata Egipto runakuna fiyupa nakaykätsishqanta.
10 Tsaymi Faraón kaqman kanan kachashayki kuyashqä Israel runakunata jorqamunaykipaq”.*
11 Tsayno niptinmi Tayta Diosta Moisés kayno nirqan: “Noqa manami valurätsu Faraónpa nawpanman aywayta, Tayta. Tsaynöpis manami valurätsu Israel runakunata Egiptupita jorqamuyta”.
12 Tsawraqa Tayta Dios kayno nirqan: “Noqami qamwan kaykäshaq. Egiptupita Israel runakunata jorqarkamurmi kay jirkaman shapäkamunki noqata adoramänaykipaq. Tsaymi qamwan kaykashqäta musyankipaq”.*
13 Tsayno niptinmi Moisés kayno nirqan: “Egiptuman chayaykur Israel mayïkunata kaynömi nishaq: ‘Unay ayluntsikuna yärakushqan Tayta Diosmi qamkunaman kachamashqa’.* Tsayno wilaptï paykuna kayno nirmi tapumanqa: ‘¿Imataq paypa jutin?’ Tsayno tapumaptin ¿imatataq nishaq?”
14 Tsawraqa Tayta Dios kayno nirqan: “Noqaqa: ‘NOQAMI KÄ’.* Israel runakunata kayno ninki: ‘NOQAMI KÄ niqmi qamkunaman kachamashqa’ ”.
15 Tsaynölami Moisésta Tayta Dios kayno nirqan: “Israel runakunata kaynöpis ninki: ‘*Yahwehmi kachamashqa. Payqa unay ayluntsi Abrahampa, Isaacpa y Jacobpa Diosninmi kaykan’ ”.
Mastami Tayta Dios kayno nirqan: “Noqapa jutïqa Yahwehmi imayyaqpis kanqa”.
Israel runakunata jorqamunanpaq Moisésta tantiyatsishqan
16 “Egiptuman chayaykushpayki Israel mayor runakunata shuntaykur kayno ninki: ‘Unay ayluntsi Abraham, Isaac y Jacob yärakushqan TAYTA DIOSMI yuriparkamar kayno nimashqa: “Noqa rikaykämi Israel runakunata Egipto runakuna fiyupa nakaykätsishqanta”.
17 “ ‘Tsaynöpis nimashqa nakaykashqaykipita jorqushushpayki cananeo runakuna, heteo runakuna, amorreo runakuna, ferezeo runakuna, heveo runakuna y jebuseo runakuna tashqan nacionman pushashunaykipaq kashqanta. Tsaychöqa lëchipis abëjapa mishkinpis yakunöraqmi atska kaykan’.
18 “Tsayno niptikiqa Israel mayor runakuna cäsukushunkipaqmi. Tsawraqa paykunawanna aywanki Egipto nacionpa mandaqnin reywan parlanaykipaq. Chayaykurna kayno ninki: ‘Hebreo runakunapa* TAYTA DIOSNINMI noqakunata yuripämashqa. Tsaymi chunyaq jirkaman kimsa junaq aywayta munarkaykä sacrificiuta rupatsir payta adorapäkunäpaq’.
19 “Tsayno niptikipis Egipto nacionpa mandaqnin rey manami kachapäshunkitsu yarqupäkamunaykipaq. Fiyupa nakatsiptïraqmi kachapäshunkipaq.
20 Tsaymi Egipto runakunataqa munayniyuq kashqäta musyatsishaq mantsariypaq castïgukunawan. Tsaynöparaqmi Faraón kachapäshunki yarqupäkamunaykipaq.
21 “Yarqamuptikimi Egipto runakuna imatapis qarashunaykipaq* shakyätsishaq. Tsaynöpami jinaylaqa mana yarqamunkipaqtsu.
22 Tsaymi warmikunapis vecïnankunata y vecïnancho taq warmi mayinkunata manakärinqa imatapis qellaypita kaqta o qoripita kaqta qarananpaq. Tsaynölami röpakunata manakärinqa wawankunata jatipänanpaq. Tsaynöpami Egipto runakunapa imaykantapis apakärinkipaq”.*
Ichic wilacuycuna
^ 3.1b Horeb jirkapa jukaq jutinmi kaykan Sinaí.
^ ángel Kay patsata manaraq kamarmi angilkunata Tayta Dios kamarqan payta sirvinanpaq. Angilkunaqa manami imaypis wanuntsu. Tayta Diospa nawpancho karmi imaypis alabarkaykan (Isa. 6.1-3; Apoc. 5.11-12).
Angilkunaqa (1) Tayta Dios nishqankunata wilakärin (Gén. 18.16–19.29; Dan. 8.15-17; 9.21-23; Mat. 1.20-24; Luc. 1.11-20, 26-38), (2) Tayta Diospa favornin pelyapäkun (2Rey. 6.15-17; Dan. 10.13-14; Apoc. 12.7-9) y (3) Diosman yärakuqkunata tsapan y yanapan (Sal. 91.11-12; Heb. 1.14).
Satanáspa angilninkunaqa supaykunami karkaykan (Mat. 25.41; Apoc. 9.11).
^ sagrädu Liyinki santupita tantiyatsikuyta.
^ 3.2-10 Hech. 7.30-34.
^ 3.13 Éxo. 6.2-3.
^ 3.14 Juan 8.24, 58; 18.5-6, 8.
^ Yahweh Yahwehtami wakin traduccionkuna castellänucho traducin Jehová nir, wakinmi traducin Yavé nir, wakinmi traducin Yahweh nir y wakinnami traducin EL SEÑOR nir. Quechua Bibliachöpis Yahweh atska kutimi traduciraykan TAYTA DIOS nir.
^ 3.18 Hebreo runakunaqa Israel runakunami karqan. Tsaymi Moiséspis hebreo runa karqan.
^ 3.21 Wakin runakunaqa regalashunaykipaq nipäkun.
^ 3.21-22 Éxo. 12.35-36.
