Éxodo 29:1-46
29 “Aarón y tsurinkuna sirvimaq cürakuna kananpaq churashpayki akranki sänu turituta y ishkay sänu carnikunata.
2 Tsaynöpis ruranki alinnin harinapita levadüraynaq tantata, aceitiwan masarashqa levadüraynaq tantata y aceitiwan lushipashqa levadüraynaq lapsha tantatapis. Lapan tsay tantakunata ruranki trïgu harinapita.
3 Tsay rurashqayki tantakunata canastaman winarkur apamunki. Tsaynöpis turituta y ishkan carnita Tinkunantsi Tolduman apamunki.
4 “Nirkur Aarónta y tsurinkunata Tinkunantsi Toldu patiuman pushaykamur armatsinki.
5 Nirkur Aarónta jatipanki tünicata, sotänata, *efodta y pechërata. Tsaykunata jatiparkur efodpa wachkunwan wachkapanki.
6 Tsaynöpis umanman görrata jatiparkur *sagrädu vinchata* jananman churapanki.
7 Tsayno jatiparkur noqata sirvimaq cüra kananpaq Aarónpa umanman sagrädu aceitita winapanki.
8 Nirkur Aarónpa tsurinkunata qayaykur tünicata jatipanki.
9 Aarónta wachkunwan wachkapashqaykino paykunatapis wachkapanki. Görratapis jatipanki. Tsaynöpami noqata sirvimaq cüra kapäkunanpaq churanki. Paykuna y paykunapita miraqkuna imayyaqpis sirvimaq cürakuna kanqapaq.
10 “Tsaypita turituta apamunki Tinkunantsi Toldu patiuman. Tsaychömi Aarón y tsurinkunapis turitupa umanman makinta churapäkunqa.
11 Nirkurna Tinkunantsi Toldu patiucho tsay turituta nawpächo pishtanki.
12 Yawarninman dëduykita töparkatsir *altarpa waqrankunata lushinki. Nirkurna putsuq kaq yawarta altar chakinman talinki.
13 Pacha wiranta, natincho kaykaq wiranta y ishkan rurunta wirantinta altarcho rupatsinki.
14 Aytsanta, qaranta y ashashninkunataqa campamentupita juk läduman apaykur rupatsinki. Turituta altarcho rupatsishqaykiqa purificatsina sacrificiumi kanqa.
15 “Tsaypitanami jukaq carnipa umanman Aarón y tsurinkuna makinta churanqa.
16 Tsaypitana pishtarkur yawarninwan altarpa chuskun lädunkunata tsaqtsupanki.
17 Aytsantana cuartutsarkur aqishninta y atakshunkunatapis maylanki. Tsaypitana altarman umantinta churarkur
18 lapanta rupatsinki. Tsay rupatsishqaykipa ali asyayninta* mayarmi noqa TAYTA DIOS kushikushaqpaq.*
19 “Jukaq carnipa umanmanpis Aarón y tsurinkuna makinta churarkuptin
20 tsay carnita pishtanki. Yawarninta shuntarkur ichiklata lushinki Aarónpa y tsurinkunapa alawqa kaq rinrinpa ura puntanta. Tsaynöpis yawarwan lushinki alawqa kaq makinpa y chakinpa maman dëduntapis. Putsuq kaq yawartana altarpa chuskun waqtankunaman tsaqtsupanki.
21 Altarta tsaqtsupashqayki yawarta shuntarkur putsuq kaq aceitiwan Aarónta y röpankunatapis tsaqtsupanki. Tsaynöla tsurinkunata y röpankunatapis tsaqtsupanki. Tsaynöpami Aarón y tsurinkuna noqata sirvimaqnï cüra kananpaq consagrädu kanqa. Röpankunapis listuna kanqa jatikurkur sirvimänanpaq.
22 “Nirkurna jorqunki pishtashqayki carnipa chupa wiranta, pacha wiranta, natincho kaykaq wiranta, ishkan rurunta wirantinta y alawqa kaq chankantapis. Tsayno jorqunki Aarón y tsurinkuna cüra kananpaq pishtashqayki carni kaptinmi.
23 NOQAPA nawpächo kaykaq canastapita jorqunki juk jatun tantata, aceitiwan masarashqa juk tantata y juk lapsha tantatapis. Lapanpis tsay tantakunaqa levadüraynaqmi kanqa.
24 Lapan tsaykunata Aarónta y tsurinkunata aptapanki NOQAPA nawpäman joqarir wakman kayman kuyutsinanpaq.
25 Tsayno rurarkuptin tsay tantakunata shuntanki. Nirkur jukaq carnita rupatsina sacrificiupaq rupatsishqaykinöla tsaykunatapis altarcho rupatsinki. Tsay rupatsishqaykipa ali asyayninta mayarmi noqa TAYTA DIOS kushikushaqpaq.
26 Aarónta sirvimaq cüra kananpaq churar pishtashqayki carnipa pëchuntapis NOQAPA nawpäman joqarir wakman kayman kuyutsinki. Tsay aytsaqa qampaqmi kanqa.
27 “Tsay joqarimushqayki pëchunta y alawqa kaq chankantaqa rakinki
28 Aarónpaq y paypita miraqkunapaq. Cadala jawka kawakuy sacrificiu noqapaq kaptin tsaykunata Israel runakunapita imaypis chaskipäkunqa. Tsay nishqäkunaqa qamkunapaq imayyaqpis leymi kanqa.
29 “Aarón wanuptin sagrädu röpankuna paypita miraqkuna jatikunanpaqmi kanqa. Tsay röpakunata jatikärinqa sagrädu aceitita tsaqtsupar cüra kananpaq churashqan hörami.
30 Tinkunantsi Tolduman yaykunanpaq mayqanpis Aarón aylupita cüra kananpaq churaptin qanchis junaq tsay röpata jatiranqa.
31 “Pishtashqan carnipa wakin aytsanta yanunki sagrädu lugarcho.*
32 Tsay aytsata y canastacho putsuq tantata Aarón y tsurinkunami mikunqa Tinkunantsi Toldu patiucho.
33 Cüra kananpaq churashqanpita purificatsina sacrificiu kaptinmi tsay aytsa y tantakuna paykuna mikunanpaq kanqa. Cüra mana karqa tsay sagrädu mikuykunata pipis ama mikunqatsu.
34 Tantata y aytsata tsay junaq mana ushaptinqa putsuq kaqta rupatsinki. Tsaytaqa sagrädu kaptin pipis ama mikunqatsu.
35 “Aarónta y tsurinkunatapis cüra kananpaq churashpaykiqa nishqänöla lapan tsaykunata ruranki. Cüra kananpaq churapäkunki qanchis junaqyaq.
36 Tsay qanchis junaqyaq waran waran juk turituta pishtarkur rupatsinki Aarón y tsurinkuna purificashqa kananpaq. Tsaynöpis tsay rupatsishqaykikunaqa altar purificashqa kananpaqmi kanqa. Nirkur altar jananman aceitita winapanki sagrädu kananpaq.
37 Tsayno sacrificiuta waran waran rupatsinki qanchis junaqyaq. Tsaynöpami altar sagrädu kaptin tsayta töpaq kaqqa imapis sagrädu rikakunqa.
Altarcho waran waran rupatsinanpaq tantiyatsishqan
Números 28.1-8
38 “Mana qonqaypa waran waran juk watayuq ishkay carnishta pishtarkur *altarcho rupatsipäkunki.
39 Jukaq carnishta rupatsipäkunki patsa waraykaptin y jukaqtana rupatsinki patsa tsakaykaptin.
40 Punta kaq carnishpa aytsanta altarcho rupatsishpayki ishkay kïlu alinnin harinata juk litru olïvupita rurashqa aceitiwan pichuykur rupatsipäkunki. Tsay jananman winapanki juk litru vïnuta.
41 Tutapa rupatsishqaykinöla jukaq carnishtapis pichushqayki harinatawan altarcho tardipa rupatsipäkunki. Tsayno rupatsir vïnutapis jananman winapanki. Tsay rupatsishqaykipa ali asyayninta mayarmi noqa TAYTA DIOS kushikushaqpaq.
42 “Tsayno rupatsipäkushqaykiqa noqapaq rupatsina sacrificiumi kanqapaq. Tsaytaqa qamkuna y qamkunapita miraqkunapis Tinkunantsi Toldu patiuman apaykur imaypis nawpächo rupatsipäkunki. Tsaychömi imaypis tinkushun parlanantsipaq.
43 Tsaychömi Israel mayikikunawanpis tinkushaq. Kikï tsaycho kaptïmi tsay patiu *sagrädu kanqapaq.
44 “Tinkunantsi Toldupis y patiucho kaq altarpis sagrädumi kanqa. Aarónta y tsurinkunatapis noqami churashaq cüra kashpan sirvimänanpaq.
45 Israel runakuna kashqancho tarmi paykunapa Diosnin kashaq.
46 Tsaynöpami TAYTA DIOSNIN kashqäta musyapäkunqa. Noqami Egiptupita jorqamushqä paykuna kaqcho tänäpaq. Paykunapa TAYTA DIOSNINMI noqa kaykä.
Ichic wilacuycuna
^ efod Efodqa cüra jatikunan mandilmi karqan. Tsaytaqa Israelcho mas mandaq cürami röpan jananman jatikuq (Éxo. 28.6-14). Tsay efodchömi laqararqan chunka ishkay rumikuna. Cada rumichömi kaykarqan Israel trïbupa juk jutin. Wakin runakunapis mas jukniraq efodta jatikuqmi. Tsay runakuna karqan Samuel (1Sam. 2.18), David (2Sam. 6.14), Nobpita kaq cürakuna (1Sam. 22.18) y Micaía (Jue. 17.5).
^ sagrädu Liyinki santupita tantiyatsikuyta.
^ 29.6 Éxo. 28.36; 39.30.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ 29.18 Wakin runakunaqa mushkuyninta nipäkun.
^ 29.31 Tsay sagrädu lugarqa altar nawpankunami karqan. Tsayta musyanaykipaq liyinki Lev. 10.12-13.
^ altar Altarkunaqa karqan rumiwan perqashqa y qerupita ruraykur jananpa y rurinpa bronciwan enchapashqami. Tsay altarkunachömi uywakunata rupatsir runakuna jutsankunapita perdonashqa kananpaq cürakuna Tayta Diosta manakäriq. Tsaynölami templu rurincho qoripita rurashqa taksha altarpis karqan. Tsaychömi cürakuna inciensuwan qoshtatsiq. Rumipita perqashqa altar imano kashqanta musyanaykipaq rikanki 2Sam. 24.18-cho kaq dibüjuta. Tayta Diosta mana cäsukuq runakunapis altarkunata ruraykurmi ïdulukunata adorapäkuq (Éxo. 30.1-10; Deut. 27.5-6; 2Rey. 16.10-16; 2Crón. 4.1).
^ sagrädu Liyinki santupita tantiyatsikuyta.
