Éxodo 19:1-25
19 Egiptupita yarqushqanpita kimsa killatami Sinaí chunyaq jirkaman Israel runakuna chayapäkurqan.
2 Tsayman chayananpaqmi Refidimpita yarqupäkamurqan. Sinaí chunyaq jirkaman chayaykurmi punta chakincho toldunkunata ichitsipäkurqan patsakärinanpaq.
3 Tsaypitami jirkaman Moisés witsarqan Tayta Dioswan tinkunanpaq. Tsay jirka puntapitami Moisésta qayakamur Tayta Dios kayno nirqan: “Israel runakunata kayno wilanki:
4 ‘Qamkuna rikashqankimi Egipto runakunata imano ushakätsishqätapis. Musyapäkunkimi makïcho kanaykipaq qamkunata imano shuntakushqätapis. Wawankunata anka apashqannömi qamkunatapis Egiptupita apamushqä.
5 “ ‘Tsaymi nishqäkunata cäsukamar qamkunawan *pactu rurashqäta cumpliptikiqa wakin runakunapitapis mas qamkunata kuyashayki. Intëru kay patsacho taq runakunata noqa kamashqa karpis qamkunatami mas kuyashayki.*
6 Qamkunataqa nacionninpami churashayki sirvimaq cürakunano kanaykipaq. Tsaymi *santu kar noqalatana sirvipäkamankipaq’.* Tsayno nishqäta Israel runakunata wilanki”.
7 Tsaymi Moisés kutiykur mayor runakunata shuntaykur wilarqan TAYTA DIOS nishqankunata.
8 Wilaptinmi Israel runakuna kayno nirqan: “TAYTA DIOS nishqantaqa lapantami rurapäkushaq”.
Paykuna tsayno nishqantami puntaman kutiykur TAYTA DIOSTA Moisés wilarqan.*
9 Tsayno wilaptinmi Moisésta TAYTA DIOS kayno nirqan: “Israel runakuna mayananpaq yanawyaykaq pukutay rurinpitami parlapäshayki. Tsaynöpami paykuna imaypis criyipäkunqa qamta parlapashqäta”.
Israel runakuna awnishqanta TAYTA DIOSTA Moisés wilaptinmi
10 TAYTA DIOS kayno nirqan: “Aywaykur runakunata wilanki kanan junaq y wara junaq purificakunanpaq* y röpankunata taqshakärinanpaq.
11 Kananpita kimsa junaqtami lapan rikaykämaptin Sinaí puntaman urämushaq. Tsaypaq kamarikushqala shuyarpaykämätsun.
12 “Runakuna puntaman mana witsämunanpaq punta chakinman señalta tumaypa churanki. Nirkur wilanki tsayman pipis mana witimunanpaq. Tsay señalta pasaq kaqtaqa wanutsipäkunki.
13 Runa kaptinpis o uywa kaptinpis karulapita saqmaypa o flëchaypa wanutsipäkunki. *Cornëtata tukamushqanta mayarraqmi runakunaqa tsay señal kashqanyaq witsämunqa”.*
14 TAYTA DIOS tsayno niptinmi Sinaí jirkapita Moisés urarqan runakunata kamarikatsinanpaq. Tsaymi runakuna kamarikur röpankunata taqshakärirqan.
15 Tsaychömi runakunata Moisés kayno nirqan: “Kananpita kimsa junaqpaq lapayki kamarikäriy. Tsay paqaskunaqa warmikitapis ama yatapankitsu”.
16 Tsaypita kimsa junaqta patsa wararkuptinnami elquypis räyupis* fiyupa karqan. Yanawyayparaqmi jirkatapis pukutay tsapakurkurqan. Cornëtata tukamushqanpis mayakämurqanmi. Tsaymi lapan Israel runakuna mantsarishpan pasaypa siksikyarqan.
17 Tsaypita Tayta Dioswan tinkunanpaq runakunata Moisés pushaptinmi jirka chakinman chayaykur shuyarparqan.
18 Sinaí jirkaman nina chawpincho TAYTA DIOS urämushqa kaptinmi hornupitanöraq yanawyayparaq qoshtay sharkurqan.* Jirkapis fiyupami siksikyarqan.
19 Cornëtata tukamushqanpis mas fuerti mas fuertimi mayakämurqan. Tsaychömi Moisés parlapaptin räyuno Tayta Dios contestamurqan.
20 Sinaí jirka puntaman Tayta Dios urämurmi tsayman witsänanpaq Moisésta qayarqan. Tsaymi Moisés witsarqan jirka puntaman.
21 Tsaychömi TAYTA DIOS kayno nirqan: “Kutiykur runakunata wilanki rikamayta munarpis señalpita mana pasamunanpaq. Señalta pasamuq kaqqa lapanmi wanunqa.
22 Nawpäman shamuq cürakunapis purificakutsun. Mana purificakuptinqa paykunatapis ushakätsishaqmi”.
23 Tsayno niptinmi TAYTA DIOSTA Moisés kayno nirqan: “Kikikimi nimashqanki señalta pipis mana pasamunanpaq. Tsaymi kay *sagrädu Sinaí puntaman runakuna mana witsämunqatsu”.
24 Tsawraqa TAYTA DIOS kayno nirqan: “Ayway wawqiki Aarónta pushakurkur kutimunaykipaq. Cuidädu cürakunapis y runakunapis señal churashqaykita pasamur noqa kaykashqäman witsämunman. Pasamuq kaqtaqa lapantami ushakätsishaq”.
25 Tsaymi puntapita Moisés urarpur runakunata wilarqan Tayta Dios nishqankunata.
Ichic wilacuycuna
^ pactu Pactuqa promitinakushqanta cumplinanpaq nishqanmi kaykan. Unay Testamentuchöqa Israel runakunawanmi pactuta Tayta Dios rurarqan. Tsaymi Tayta Dios promitirqan Israel runakunapa Diosnin kar paykunata imaypis yanapananpaq. Israel runakunanami Tayta Diosta promitirqan mandamientunkunata y leyninkunata cumplipäkunanpaq (Éxo. 6.7; 19.5-6; Lev. 26.3-12). Pactuta rurarmi uywata pishtar shuntashqan yawarta Israel runakunaman Moisés tsaqtsuparqan (Éxo. 24.8). Tsaynölami Jesucristo noqantsi rayku wanur yawarninta jichashpan mushuq pactuta rurarqan payta chaskikuqkunata jutsankunapita perdonar salvananpaq (Luc. 22.20; Heb. 10.16-17).
^ 19.5 Deut. 7.6; 14.2; 26.18; Tito 2.14.
^ santu; sagrädu Tayta Dios santu kashqanta nirqa jutsaynaq kashqanta y pipis ni imapis payman mana tinkushqantami niykan (Isa. 5.16; 6.3; Apoc. 4.8; 15.4).
Runakuna santu kashqanta nirqa Tayta Dios akrashqan runakuna kashqanta (Deut. 7.6) y pay munashqanno jutsaynaq kawashqantami niykan (Lev. 20.7-8).
Sitiukuna y manëjukuna Tayta Diospaq kaptinqa sagrädu kashqantami niykan. Tsaymi Israel nacionpis (Zac. 2.12), Jerusalén markapis (Isa. 48.2) y templupis (Sal. 68.5) sagrädu kaykan. Tsaynölami jamay junaqpis (Éxo. 31.14) y fiestakunapis (Lev. 23.2) sagrädu kaykan.
^ 19.6 1Ped. 2.5, 9; Apoc. 1.6; 5.10.
^ 19.8 Éxo. 24.3; Deut. 5.27.
^ 19.10 Éxo. 19.14-15.
^ cornëta Cornëtaqa carnipa waqranpita rurashqami karqan. Cornëtata cüra tukashqanta rikanaykipaq rikanki Lev. 25.9 versïculucho kaykaq dibüjuta. Qellaypita rurashqa cornëtapis karqanmi (Núm. 10.1-10).
^ 19.12-13 Heb. 12.18-20.
^ 19.16-18 Deut. 4.11-12; 5.4.
^ sagrädu Liyinki santupita tantiyatsikuyta.
