Junio 2022 watacho, presidente caj Grupo Banco Mundial nishganpita juc wilacuycho nergan “may chaycho ima necesitashganchicunata ratinapaj chanin pasaypa miraycashganta”. “Lapancunapa preciun más wichaycan, ichanga producciunga walcalami caycan”.

 Fondo Monetario Internacional nishganno “gas, petrolio, gasolina y micuycunapa preciun jucla wichashga, chayraycur waccha marcacunacho tiyaj runacunapäga pasaypa sasami caycan”.

 Bibliaga tantiachimanchi imanir guellayraycur nacaycanchi, consejucunatapis gomanchi imata ruranapaj chaycunapa pasar y wilamanchipis imano cay lapancuna alchacänanpaj.

•   Cawaycashganchi wichanpaj Biblia parlarga nin “ultimo tiempucho” caycashganchita (2 Timoteo 3:1).

•   Jesusga nergan ushanan junajcunacho “manchariypag imaycacunapis” cananpaj (Lucas 21:11). Y cayga rasunmi, imacunapa preciun wichaptenga, runacuna manchacärin imano cawananpaj, ‘imanotaj familiäta mantenishaj’ nir yarpachacärin.

•   Apocalipsis libruchopis wilacamun canan wichan micuycunapa preciun alapa wichananpaj. Chaycho nin: “Juk junaq arur gänashqan aypanqa juk kïlu trïguta o kimsa kïlu cebädata rantinalanpaq” (Apocalipsis 6:6, Margos-Yarowilca-Lauricocha).

 Maslata musyayta munar “ultimo tiempucho” nishganpita y Apocalipsis librucho caycaj profeciapitaga, En 1914 el mundo cambió de rumbo videuta ricäriy y “¿Qué representan los jinetes del Apocalipsis?” yachachicuytapis leiriy.

•   “Wayinkunata ruraykurmi kuyashqä runakuna tsaycho tanqa. Üvata plantarmi wayuyninta mikupäkushpan kawanqa. Wayita sharkatsishqanchöpis manami juk runakunatsu tanqa, sinöqa kikinkunami tsaycho tanqa” (Isaías 65:21, 22, MYL).

•   “Mandashqan nacioncho trïgu shumaq wayuykulätsun. Intëru jirkakunachöpis kichkiyparaq kaykulätsun” (Salmo 72:16, MYL).

•   “Tsaymi TAYTA DIOS kayno nin: ‘Waktsakunata y humildikunataqa aläpami nakarkaykätsin. Nakatsiptinmi pasaypa waqarkaykan. Tsaymi paykunata jukla yanapashaq. Manakamashqannömi paykunata salvashaq’” (Salmo 12:5, MYL). a

 Diosninchipa Gobiernunchoga aypala micuy cangapaj, y manami juc naciunlachochu, sino entero munducho; chaypäga ichiclanami pishin. Y imano rurananpaj musyayta munarga “¿Imaylapis lapanchicunapaj micuy aypangachuraj?” yachachicuyta leiriy.

 Pero Diosninchi chay lapanta alchanancama, Bibliaga yanapäshunquimi yarpachacuycarla mana cawanayquipaj. ¿Imano? Shumaj consejucunata gomanchi guellayninchita imano utilizanapaj (Proverbios 23:4, 5; Eclesiastés 7:12). Maslata musyanayquipäga “Cuide su economía” y “Cómo vivir con menos” yachachicuycunata leiriy.