SIDNEI, uj joven Brasilmanta, 24 watayojtaj, jinata tapukoj: “¿Imaraykú noqapunirí? ¿Imaraykú Dios saqen kay pasanawanta?”, nispa. Payqa accidentakusqanrayku manaña puriyta aterqachu.

Runasqa uj accidenterayku, onqoyrayku, wañuyrayku, jatun llakiyrayku chayri guerrasrayku ñakʼarispa, Dios saqerparisqanta yuyanku. Ajinataqa mana kunallanchu yuyanku. Diospa kamachin Jobpis, ashkha llakiykunapi rikukuspa Diosta juchacharqa. Nerqataj: “Qanmanta, Diosníy, yanapata mañakuyki, manataj uyariwankichu. Qanman qayllamuyki nitaj qhawarillawankipischu. Qanqa noqapaj mana sonqoyoj kanki. Makiykej atiyninwan qhatiykachawanki”, nispa (Job 30:20, 21).

Jobqa mana yacharqachu pichus ñakʼarishasqanta, imaraykutajchus ñakʼarishasqanta. Chaywanpis Bibliaqa sutʼinchawanchej imaraykuchus ñakʼariy kasqanta, imatachus ruwana kasqantataj.

Bibliaqa Jehová Diosmanta jinata nin: “Ruwasqasnenqa may sumajpuni. Tukuy ñankunanqa cheqampuni. Payqa mana llullakoj Dioschu. Payqa mana jaykʼajpis pantanchu. Payqa cheqanmin, cheqa kajta ruwajtaj”, nispa (Deuteronomio 32:4). Jina kajtenqa, qhasillata yuyasunman Dios ñakʼarichiwasqanchejta, sajra ruwaykunawan castigawasqanchejta chayri cheqanchawasqanchejta.

Astawanpis Bibliaqa nin: “Mayqellampis juchaman urmanapaj tanqasqa kashaspa, ama nichunchu Diospuni juchaman urmanampaj tanqasqanta, imaraykuchus Diosqa mana juchaman tanqasqa kayta atinchu nitaj pitapis tanqanchu juchaman urmanankupaj”, nispa (Santiago 1:13). Bibliaqa nillantaj, runata mana juchayojta Dios ruwasqanta. Chayrayku Adanwan Evawanqa, kʼacha huertapi tiyakorqanku, sumaj llankʼayniyoj karqanku. Kusisqa kausakunankupajtaj tukuy imayoj karqanku. Diostaj paykunaman nerqa: “Miraychej, kay pachaman juntʼaychej; atiyniyojtaj kaychej”, nispa (Génesis 1:28). Chayrayku paykunaqa, ni imarayku yuyanankuchu karqa Dios sajra kasqanta.

Jinapis kunanqa kausay mana allinchu. Runasqa sinchʼi ñakʼariypi rikukunku. Chayraykuchá Bibliaqa jinata nin: “Kunankama Diospa tukuy ruwasqan nanaywan ayqoshan, uj nacechikoj warmi jina”, nispa (Romanos 8:22). ¿Imaraykú?

Uj ángel Diospa contranpi sayaykusqanrayku. Chay angelqa Kuraj Supay, Satanasman tukorqa. Chantapis Adantawan Evatawan, Diospa kamachisqanta mana kasukunankupaj tanqarqa. Paykunaqa “allin kajta mana allin kajta yachanamanta sachʼaj” poqoyninta mikhuspaqa Diospa kamachisqanta mana kasukorqankuchu. Paykunallamantañataj ajllarqanku allin kajta, mana allin kajtapis. Satanasqa, Evata nerqa chay sachʼaj poqoyninta mikhuspaqa mana wañunankuta, jinamanta Dios llullakushasqanta nisharqa. Satanasqa nillarqataj, paykunallamanta allin kajta mana allin kajta ajllayta atisqankuta Dios pakashasqanta (Génesis 2:17; 3:1-6). Satanasqa nisharqa Diosmanta karunchakojtinchej allin rinawanchejta. Chay tukuy ima pasasqanrayku, ¿Dios kamachinanpaj jinachu karqa?

Chantapis Satanasqa nillarqataj, runasqa allinninkuraykulla Diosta sirvisqankuta. Jobmantapis jinata nerqa Diosman: “Manachu qan payta waqaychanki tukuy imamanta, ayllunta, tukuy imasnin kajtapis? [...]. Kunanqa qhechuy tukuy kapusqanta, rikunkitaj uyaykipi maldecisusqanta”, nispa (Job 1:10, 11). Satanasqa Jobmanta ajinata nispapis, tukuy runas interesraykulla Diosta sirvisqankuta nisharqa.

¿Imaynatá Satanaspa nisqanta sutʼinchakunman karqa? Diosqa may jina yachayniyoj kasqanrayku, imaynatachus allinchananta sumajta ajllarqa (Romanos 11:33). Diosqa saqerqa uj tiempota runas  kamachinakunankuta, chaypitaj rikukunan karqa mayqenchus allin kamachej kasqanta.

Kay pacha imaynachus kashasqanqa rikuchin, runa mana kamachinanpaj jinachu kasqanta. Gobiernosqa mana allin kausayta apamunkuchu, nitaj kusiytapis. Astawanqa paykuna juchayoj kanku Jallpʼa chinkananpaj jinaña kashasqanmanta. Chayraykuchá Biblia nin: “Runaqa kawsayninmanta mana dueñochu kasqanta”, nispa (Jeremías 10:23). Jallpʼantinta Dios kamachejtillan allinta, kusisqataj kausakusun. Diosqa chayta munan tukuy runaspaj (Isaías 45:18).

¿Imatá Dios chaypaj ruwanqa? Jesusqa discipulosninman jinata mañakunankuta yachacherqa: “Reinoyki jamuchun, munayniykitaj ruwasqa kachun, imaynachus janaj pachapi, ajinallatataj kay pachapipis”, nispa (Mateo 6:10). Arí, Diosqa maychus tiemponpi, Reinonnejta tukuy ima ñakʼarichiwasqanchejta chinkachenqa (Daniel 2:44). Wajchayay, onqoy, wañuypis chinkanqa. Diosqa “wajchata salvanqa paymanta mañakojtin” (Salmo 72:12-14). Chantapis Biblia nisqanman jinaqa “mana pipis nenqachu: onqosqa kani, nispaqa” (Isaías 33:24). Wañupojkunamantapis Biblia jinata nin: “Hora chayamonqa, chaypachataj tukuy pʼampasqa kajkunaqa Runaj Churimpa parlasqanta uyarenqanku [jatarimonqankutaj]” (Juan 5:28, 29). ¡Chayqa may sumajpuni kanqa!

Sidnei pimantachus qallariypi parlarerqanchej, accidentekusqanmanta 17 watasninman jina nerqa: “Accidentakusqaymantaqa ni jaykʼaj Diosta juchacharqanichu, jinapis qallariypeqa Dios saqerpariwasqanta yuyarqani. Wakin kutisqa llakikuni, mana puriyta atisqaymantataj waqarikuni. Chaywanpis Bibliata leespaqa yachani accidentakusqay mana Diospa castigonchu kasqanta. Bibliaqa nin ‘tiempo chayamojtin, wakimpaj allin imas tiyan, wakimpajtaj mana’. Jehovamanta mañakuy, Bibliapi wakin versiculosta leeytaj kusisqa kanaypaj, Diosmanta mana karunchakunaypajtaj yanapawan” (Eclesiastés 9:11; Salmo 145:18; 2 Corintios 4:8, 9, 16).

Imaraykuchus Dios ñakʼarinanchejta saqesqanpi tʼukurispa, tumpamantawan chinkanantataj yachaspaqa, Diospi atienekullasunpuni. Diosqa “tukuy sonqo maskʼanku, chaykunaman sumaj tʼinkata qonanta” nin. Paypi, Jesuspitaj atienekojqa ni jaykʼaj chʼaukiyasqachu rikhurenqa (Hebreos 11:6; Romanos 10:11).