UNAYMANTAPACHA iglesiamanta papasta, manchachikunapaj jina peliculasta ima anticristo ninku. Chayrayku, ¿pitaj anticristo? ¿Imaraykú anticristomanta yachana tiyan? Anticristo palabraqa Bibliapi phishqa kutista rikhurin, kunantaj chaymanta parlarina.

Bibliapeqa apóstol Juanlla anticristo palabrata oqharin. Pay nerqa: “Ñapis tukukuy pʼunchaykunaña kanku; uyarerqankichej Cristoj contranta oqharikoj jamunanta. Kunanqa, ashkha anticristos rikhurimunkuña. Chaynejta yachanchej tukukuy pʼunchaykunaña kasqankuta. Chay runasqa noqanchej ukhumanta llojserqanku. [...] Pitaj llullari, manachu Jesusta mana Cristochu nej? Chay runamá anticristoqa; imaraykuchus Dios Tatata, Churintawan qhesachan”, nispa (1 Juan 2:18, 19, 22, Qheshwa Biblia).

Apóstol Juanqa ashkha anticristosmanta parlarqa. Chaywantaj rikuchiwanchej ashkha runas anticristo kanankuta. Juan nisqanman jina anticristowan ninakojkunaqa llulla yachachiykunata yachachinku. Sutʼincharinapaj, Jesucristomanta, Tatanmanta ima mana cheqatachu yachachinku. Ninkutaj Jesusqa mana Cristochu kasqanta. Anticristoqa Cristo kasqankuta yuyakoj runas chayri Cristoj sutinpi purej organizaciones kankuman. Kallankumantaj Jesuspa kamachisninta chejnikojkuna. Juan nillarqataj: “Noqanchej ukhumanta llojserqanku”, nispa. Chaytaj rikuchin chay runas cheqa yachachiykunata qhesachajkuna kasqankuta. Chay jina runastaj Juanpa tiemponpi karqankuña. Juanqa “tukukuy pʼunchaykunaña” nispaqa, ichapis Jesuspa qhepa kaj apostolnin wañupunanmanta parlasharqa.

Juanqa, Diosmanta llulla yachachiykunata anticristo yachachinanta nillarqataj, pay nerqa: “Pichus willan Jesucristo runaman tukuspa kay pachaman jamusqanta, chay runamin Diosmanta jamun. Pitajchus Jesucristota qhesachajqa manapuni Diosmantachu, manachayqa payqa Cristoj contrampi sayarejpa [chayri anticristoj] yuyaychasqan. Qankuna uyarerqankichejña pay jamushasqanta, kunantaj payqa kay pachapiña kashan”, nispa (1 Juan 4:2, 3). Aswan qhepaman nerqa: “Ashkha pantachej runas kay pachapi rikhurishanku. Paykunaqa ninku Jesucristo mana runaman tukuspachu kay pachaman jamusqanta. Chayta nejqa pantachej, Cristoj contrampi sayarejtaj [anticristotaj]”, nispa (2 Juan 7). Juanqa allinta yacharqa anticristo, Jesucristomanta, imatachus Jesús yachachisqanmanta ima llulla yachachiykunata yachachinanta.

Juan niraj anticristomanta qhelqashajtin, Jesucristo yachachisqasninman nerqa: “Llulla profetasmanta allinta qhawakuychej; paykunaqa  jamusunkichej ovejas jina pʼachallisqa, ukhunkupitajrí suwa atojkuna kanku”, nispa (Mateo 7:15). Apóstol Pablopis Tesalonicamanta cristianosman nerqa: “Ni imarayku piwampis chʼawkiyachikuychejchu. Manaraj chay pʼunchay chayamushajtin, ñawpajta runasqa Diospa contrampi sinchʼita oqharikonqanku; jinallataj Diosta mana kasoj juchasapa runaqa sutʼiman rikhurenqa, pichus wiñay chinkayman rinampaj churasqa kashan, chay”, nispa (2 Tesalonicenses 2:3).

Kaytaj rikuchiwanchej ñaupa tiempopipis llulla profetas cristianosta chʼaukiyayta munasqankuta. Juanqa Jesusmanta, Jesús imatachus yachachisqanmanta ima llullata yachachejkunata anticristos kasqankuta nerqa. Pablotaj “wiñay chinkayman rinampaj churasqa kashan[ku]”, nispaqa sutʼita rikucherqa imaynatachus Jehová chay runasta qhawasqanta.

Anticristoqa kunanpis kallantaj. Imaraykuchus kay tiempopipis tiyan Cristoman, yachachiykunasninman ima churanakoj runas, organizaciones ima. Paykunaqa yachashaspa Cristomanta llullata yachachinku, ajinamanta runas mana yachanankupaj Jesuswan, Jehovawan mana ujllachu kasqankuta. Paykunawan mana chʼaukiyachikunapaj allinta qhawarikuna. Kunantaj iskay llulla yachachiykunata qhawarina.

Unaymantaña cristiano nichikoj iglesias Trinidadmanta yachachinku. Ninkutaj Jesuswan, Dioswan ujlla kasqankuta. Chayta yachachispaqa chay iglesias anticristo jina ruwanku, imajtinchus Jesusmanta, Jehovamantawan mana cheqatachu yachachinku. Chayrayku ashkha runasqa Diosta mana rejsiyta atinkuchu, nillataj Jesusmanta Biblia nisqanman jina yachakuyta atinkuchu (1 Corintios 11:1; Santiago 4:8).

Chantapis runasta chʼaukiyallankutaj Bibliamanta Diospa sutin Jehovata orqhospa, mayqen Bibliaspichus chay suti rikhurin chay Bibliaspaj rimaspa ima. Bibliapeqa 7.000 kutista jina Diospa sutin rikhurin. Diosta mana manchachikuspataj chay sutita Bibliamanta orqhorqanku. Chayraykutaj ashkha runasqa Diosta mana rejsiyta atinkuchu.

Ashkha llampʼu sonqo runasta Diospa sutinta yachay yanaparqa Diosman astawan qayllaykunankupaj. Sutʼincharinapaj, Richardqa yuyarikullanpuni Jehovaj testigosninmanta uj qhariwarmiwan parlarisqanmanta, nintaj: “Bibliapi Diospa sutin Jehová kasqanta rikuchiwasqankoqa tʼukuchiwarqa. Nipuni yuyarqanichu Diosqa sutiyoj kasqanta”, nispa. Chaymantapacha Richardqa, Jehovata kusichiyta munaspa Bibliaj nisqanman jina kausayninta tijracherqa. Pay nillantaj: “Diospa sutinta yachayqa payman astawan qayllaykunaypaj yanapawarqa”, nispa.

Ashkha watastaña anticristoqa, may chhika runasta chʼaukiyashan. Bibliamanta yachakuspaqa, pichus anticristo kasqanta allinta yachasun, niñataj llulla yachachiykunasninwan chʼaukiyachikusunchu (Juan 17:17).