Marta: Imaynalla doña Sofía. Walejtapuni wasipi taripayki.

Sofía: Imaynalla.

Marta: Ñaupaj semanapi parlarerqanchej, ñakʼarejtinchej Dios llakikusqanmanta. Mamitayki accidentakusqanmantapacha, chayta yachaytapuni munasqaykita niwarqanki. ¿Imayná pay kashan? *

Sofía: Kunanqa allillan kashan. Pero wakin kutis sinchʼita nanallanpuni.

Marta: Pisimanta pisi sanoyakapullanqa.

Sofía: Jinachá kanqa. ¿Maykʼajkamataj ñakʼarisunri?

Marta: Chaytaqa yachaytapuni munanchej. Kay ñaupaj semanapi Dios may atiyniyoj kasqanta nerqanchej. Chayraykutaj tapukorqanchej: “¿Imaraykutaj ñakʼariykuna kananta saqeshallanpuni?”, nispa.

Sofía: Ah, yuyarikushani.

Marta: Niraj chay tapuyman Bibliawan kutichishaspa, imamantachus parlarisqanchejta tumpata yuyarina.

Sofía: Ya.

Marta: Qallarinapaj, ñaupa tiempopi Diospa kamachin Habacuc, imaraykuchus Dios ñakʼariykuna kananta saqesqanta tapukusqa. Diostaj chay tapukusqanmanta mana phiñakorqachu, nitaj mana creeyniyoj kasqantachu nerqa.

Sofía: Chayta mana yacharqanichu.

Marta: Chantapis, ñakʼarejtinchej Diospa sonqon nanasqanta yachakorqanchej. Bibliaqa, “Israelitas llakisqa kashajtinku, [Diospis] llakisqallataj karqa” nin. * Dios llakikojtinchej, llakisqallataj kasqanta yachay, ¿maytacharí sonqochawanchej?

Sofía: Arí.

Marta: Chantá Dios may atiyniyoj kasqanrayku ñakʼariykunata chinkachiyta atisqanta nerqanchej.

Sofía: Chayta mana entiendenichu. Dios may atiyniyoj kaspa, ¿imaraykutaj ñakʼariykunata mana chinkachinchu?

Marta: Chayta yachanapaj, Bibliaj ñaupaj libronta qhawarinachej. ¿Ichapis Adanmanta, Evamantawan parlajta uyarerqanki?

Sofía: Ah arí, uyarerqani. Dios ama mikhunkichejchu nisqa chay sachʼamanta mikhuykusqanku, ¿i?

Marta: Arí. Niraj chayta mikhushajtinku imachus kasqanta qhawarina. Ajinallamanta imaraykuchus ñakʼarishasqanchejta yachasunchej.  Kunantaj kay Génesis libroj, 3 capitulonpi 1-5 versiculokama, ¿leeripuwankimanchu?

Sofía: Ya, nin: “Katareqa may jina yuyaysapa karqa, Tata Diospa tukuy monte animalesta ruwasqasninmanta nisqaqa. Chantá payqa warmita taporqa: Huertapi kaj tukuynin sachʼaspa poqoyninta ama mikhunkichejchu, nispachu Diosqa nisunkichej? nispa. Warmitaj kuticherqa: Atiyku mikhuyta tukuynin sachʼaspa poqoyninta. Huerta chawpipi kaj sachʼallamanta Diosqa niwayku amapuni mikhunaykuta, ni llojchirinallaykutapis. Chaymantachus mikhunkichej chayqa, wañunkichej, niwayku. Kataritajrí warmita nerqa: Chayqa mana jinachu; mana wañunkichejchu. Dios allinta yachan, chay sachʼaj poqoyninta mikhuspa, sumaj yachayniyojman tukunaykichejta. Ajinamanta chaywan qankunaqa Dios jina kankichej, yachankichejtaj imachus allin kajta, mana allin kajtapis, nispa”.

Marta: Gracias. Kunanqa kay versiculosta ukhuncharina. Qallariypi, uj katari Evawan parlasqanta nin. Bibliamanta waj versiculopitaj, Kuraj Supay chay katarinejta parlasqanta nin. * Supayqa, Evata taporqa tukuynin sachʼasmantachus mikhunanku kasqanta chayri manachus. ¿Yuyarikunkichu imatachus Dios Adanman, Evamanwan nisqanta? Mana kasukojtinku, ¿imataj kanman karqa?

Sofía: Wañunkuman karqa.

Marta: Arí. Imatachus Kuraj Supay nisqanta qhawarina. Kaypi nin: “Chayqa mana jinachu; mana wañunkichejchu”. Chayta nispaqa, ¡Diosta llulla nisharqa!

Sofía: Chayta mana yacharqanichu.

Marta: Diosta llulla nispataj, qhasimanta payta juchachasharqa. Chay sutʼinchakunanpajtaj tiempo pasanan karqa.

Sofía: ¿Imarayku?

Marta: Chayta entiendenapaj kaypi tʼukurina. Qanmanta aswan kallpayoj kasqayta niykiman chay, ¿imaynatá yachasunman mayqenninchejchus aswan kallpayoj kasqanta?

Sofía: Ichá uj llasa qʼepita oqharispa.

Marta: Arí. Mayqenchus aswan kallpayoj kasqanchejta yachanapajqa, chayta ruwasunman.

Sofía: Arí, ¿i?

Marta: Llulla kasqaykita niyman chayrí, ¿nicharí chay ratochu sutʼinchasunman?

Sofía: Arí.

Marta: Chayqa mana llasa qʼepita oqharispa sutʼinchay jinachu.

Sofía: Cheqata ninki.

Marta: Llullachus manachus kasqaykitaqa tiempo sutʼinchanan tiyan, wajkunapis reparananku tiyan.

Sofía: Hmmm arí, ¿i?

Marta: Walej, kunanqa Génesis librota ukhuncharinallapuni. Kuraj Supay, ¿Diosmanta aswan kallpayoj kasqantachu nerqa?

Sofía: Mana.

Marta: Arí. Chaytachus ninman karqa chayqa, Diosqa chay rato mana jinachu kasqanta rikuchinman karqa. Chayrayku Diosmanta aswan kallpayoj kasqanta ninanmantaqa, Dios llulla kasqanta nerqa.

Sofía: Chayqa tʼukunapaj.

Marta: Diosninchejqa may yachayniyoj. Chayrayku Kuraj Supaypa nisqan cheqachus manachus kasqan yachakunanpaj, tiempo pasananta saqerqa. Jinamantataj mayqenchus llulla kasqan sutʼi rikukunman karqa.

Sofía: Chantá Eva wañupojtin, ¿manachu Dios cheqata parlasqan sutʼinchakorqaña?

Marta: Arí. Chaywanpis Satanasqa, Diosta mana llullallamantachu tumparqa. Kay 5 versiculoj nisqanta qhawariy. ¿Imatawan Supay, Evaman nerqa?

 Sofía: Sachʼaj poqoyninta mikhuspa, “sumaj yachayniyojman tukuna[nku]ta”.

Marta: Arí. Chantapis Satanasqa nillarqataj: “Dios jina kankichej, yachankichejtaj imachus allin kajta, mana allin kajtapis”, nispa. Chayta nispataj, Diosta sajra nisharqa.

Sofía: Hmmm.

Marta: Diostaqa ujtawan qhasimanta juchachasharqa.

Sofía: ¿Imaynataj chayri?

Marta: Chay nisqanwan, Evaman jinallataj tukuy runasmanpis, kaytapis nishanman jina karqa: “Mana Diospa yanapaynillanwan aswan allinta kausakunkichej”, nispa. Chay nisqan sutʼinchakunanpajtaj Jehovaqa, Satanás kay pachapi uj tiempota kamachinanta saqerqa. Mana Dioschu kay pachata kamachishan, chayrayku may chhika ñakʼariykunata rikushanchej. * Jinapis sumaj willaykuna tiyan.

Sofía: ¿Sumaj willaykuna?

Marta: Arí. Bibliaqa iskay sumaj willaykunata Diosmanta willawanchej. Ujqa kay kashan: Jehovaqa, ñakʼarejtinchej chayri llakikojtinchej mana saqerpariwanchejchu. Astawan sutʼincharinapaj, qhawarina imatachus rey David Salmo 31:7 versiculopi nisqanta. Davidqa maytapuni ñakʼarerqa, jinapis Diosman jinata nerqa. ¿Leeriwajchu?

Sofía: Ya, nin: “Khuyakuyniykipi maytapuni kusikusaj. Qan rikunki llakiyniyta, yachankitaj phutikuyniyta”.

Marta: Leerinki jina, Davidqa llakiyninta Dios rikusqanta yachaspa, mayta sonqochakorqa. ¿Manachu qantapis Jehová ñakʼarisqanchejta rikusqan, llakiyninchejtapis entiendesqan sonqochasunki?

Sofía: Arí, sonqochawan.

Marta: Iskay kaj sumaj willaytaj, kay kashan: Diosqa mana wiñaypajchu ñakʼarinanchejta saqenqa. Pisimantawantaj Satanaspa sajra kamachiyninta chinkachenqa. Chantapis Diosqa, Satanás rikhurichisqan ñakʼariykunata, qanwan mamaykiwan rikukorqankichej jina llakiykunatapis, tukuchinanta nin. Munajtiykeqa qhepan semanata kutirimuyman. Chaypitaj yachakusunman, imaraykuchus Diospa nisqasninpi atienekuyta atisqanchejta. *

Sofía: Ya, kutimullanki.