BIBLIAJ chay nisqan, ¿cheqapunichu? ¿Runas ujllapichu ashkha qallusta parlayta qallarerqanku? Wakin runasqa, Biblia nisqanmanta asikunku. Paykunamanta ujqa, libronpi nerqa: “Babelmanta cuentoqa, wampusta creechinallapaj”, nispa. Uj yachachej judiopis, Biblia imaynatachus llajtas qallarisqankuta willasqanmanta nerqa: “Mana yuyayniyoj runaspa sutʼinchasqallanku”, nispa.

¿Imaraykutaj ashkha runas Bibliaj sutʼinchasqanta mana creeyta munankuchu? Runaj yachachiyninwan churanakusqanrayku. Sutʼinchanapaj, wakin yachayniyoj runasqa, tukuynin qallus uj qallullamanta pisimanta pisi tijrakusqanta ninku, manataj ashkha qallus ujllapi rikhurisqankutachu. Wakintaj, sapa qallu chʼajwaysitusllamanta qallarisqanta ninku. Kay jina yachachiykunanejta, ashkha runas, profesor W. T. Fitch jina yuyanku. Payqa parlaykunaj qallariyninta sutʼinchaj libronpi nerqa: “Kunankama manaraj sutʼita yachakunchu”, nispa (The Evolution of Language).

¿Imatataj yachayniyoj runaspa tarisqanku rikuchin? ¿Runaj yachachisqantachu chayri Bibliaj nisqantachu cheqata jina qhawachin? Bibliaj nisqanta ñaupajta qhawarina.

Bibliaqa runaspa parlayninku “Sinarpi” chajrurpakusqanta, chaymantataj chʼeqerakusqankuta nin. Chay lugarqa aswan qhepaman Babilonia sutiwan rejsikorqa (Génesis 11:2). ¿Maykʼajtaj chay karqa? Biblia nisqanman jina, runasqa Pelegpa tiemponpi “kay pachapi tʼaqakorqanku”. Paytaj Abrahammanta 250 watas ñaupajta nacekorqa. Jina kajtintaj, runaspa parlayninkoqa, 4.200 watas ñaupajta chajrukorqa (Génesis 10:25; 11:18-26).

 Wakin yachayniyoj runasqa, kay tiempopi parlakusqan qallus uj qallullamanta llojsisqanta ninku, mayqenchus 100.000 watas ñaupajtaña parlakoj. * Wakinkunataj, ashkha qallusmanta qallarisqanta yuyanku, mayqenkunachus 6.000 watas ñaupajmanta jinaña parlakoj. Chaywanpis, ¿imaynatá chay chinkasqa qallus tijrakorqanku? ¿Imaynatataj yachayniyoj runas chayta yachankuman? The Economist nisqa revista nin: “Mana atikullanchu. Kausayta ukhunchajkunaqa, tullusta, waj imasta ima tarikusqanrayku, kausay imaynachus ñaupajpi kasqanta yachayta atinku. Chaywanpis waj qallusta ukhunchajkunapajqa, mana imapis tarikunchu”, nispa. Chantapis nillanpuni: Ujnin yachayniyoj runaqa, “yuyayninman jinalla imaynachus kasqanta sutʼincharqa”, nispa.

Chaywanpis ñaupa tiempomanta qhelqasqas tiyan. ¿Mayqenkunataj kanku? ¿Imatataj runaj parlaynin imaynatachus qallarisqanmanta rikuchiwanchej? Uj libro (The New Encyclopædia Britannica) nin: “Aswan unayniyoj tarikusqan qhelqasqasqa, 4.000 chayri 5.000 watasniyoj kanku”, nispa. ¿Maypitaj chay qhelqasqasta tarerqanku? Mesopotamiaj uranejninpi, maypichus ñaupajta Sinar llajta karqa chaypi. * Chay qhelqasqasmanta nisqaqa, mana astawan pruebas kanchu. Bibliaj nisqan cheqa kasqantataj rikuchin.

Biblia nisqanman jina, Dios nerqa: “Kunanqa jaku, [Babelman] uraykʼunachej parlayninkuta chajroj, parlasqankuta ama entiendenakunankupaj”, nispa (Génesis 11:7). Chaynejtataj Babel llajtata “ruwayta saqeporqanku”, “tukuynejman[taj]” chʼeqerakorqanku (Génesis 11:8, 9). Biblia nisqanman jina, kay tiempopi parlakoj qallusqa, mana uj qallullamantachu rikhurerqanku. Astawanpis tukuynin qallus ujllapi rikhurerqanku, ni mayqentaj wajwan kikinchu. Chantapis tukuyninkupi imachus runaj yuyayninpi, sonqonpi ima kasqanta niyta atikun.

¿Imatá uj mamayojlla kaj qallusmanta nikunman? ¿Kikinchu chayri waj jinachu kanku? Runaj yuyayninta ukhunchaj Lera Boroditsky nin: “Waj qallusta allinta rejsej runas, Jallpʼantinpi kaj qallusta astawan ukhunchasqankuman jina (7.000 jina tiyan, chaykunamantataj ni khuskantapis ukhunchasqankuchu), sapa kuti astawan imaspi mana kikinchu kasqanta repararqanku”, nispa. Uj mamayojlla qallus (qhechuawan, aymarawan jina) wakin imaspi rijchʼakojtinkupis, waj mamayoj qallusman (castellanoman chayri portuguesman jina), ni imapi rijchʼakunkuchu.

Ima qallutachus parlakusqanchejman jina yuyanchej. Chayman jinallataj coloresmanta, numerosmanta, maypichus imapis kasqanmanta, waj imasmanta ima parlanchej. Sutʼinchanapaj, qhechuapeqa ninchej: “Kay jallpʼaqa arroba sarapaj”, nispa. Chaywanpis castellanopeqa ninku: “Kay jallpʼaqa 3.600 metrosniyoj jina”, nispa. Sapa qallupi imapis waj jinamanta nikusqanqa, umata muyuchinapaj jinapuni. Chantachá Babel torreta  ruwajkunaqa, niña llankʼayninkuta tukuchiyta aterqankuchu.

Qallariypi parlakusqan qallu, ¿imaynataj karqa? Biblia nisqanman jina, ñaupaj runa Adanqa animalesta sutichananpaj mosoj palabrasta yuyaychakunan karqa (Génesis 2:20). Chantapis warminta munakusqanta kʼacha palabraswan niyta aterqa. Warminpis Diospa kamachisqanta sutʼita willakuyta aterqa, mana kasukojtinku imapichus rikukunankutapis (Génesis 2:23; 3:1-3). Qallariypi parlakoj qallupeqa, sutʼita parlarikuyta atej kanku, mosoj yuyasqasninkutapis niyta atej kanku.

Uj qallullata parlasqankurayku, runasqa uj sonqolla llankʼayta aterqanku. Chaywanpis parlayninku Babelpi chajrurpakojtenqa, manaña jinachu karqa. Jinapis chay mosoj qalluspeqa, ñaupa qallupi jinallataj tukuy imata sutʼita niyta atej kanku. Chayrayku pisi tiempollapi, jatuchaj llajtasta sayacherqanku, ashkha soldadosta tantarqanku, waj llajtaswan ranqhanapajpis ñankunata kicharerqanku (Génesis 13:12, 13; 14:1-11; 37:25). Runas mana sutʼita parlarikuyta atinkumanchu karqa chay, ¿jinata ñauparinkumanchu karqa? Mana. Biblia nisqaman jina, qallariypi parlakoj qallu, Babelpi rikhurej qalluspis, tukuy imamanta sutʼita parlanapaj jina karqa, manataj animalespa chʼajwayninku jinachu.

Kay tiempopi tarikusqantaj, chayllatataj rikuchin. Uj libro sutʼinchan: “May pisi imasllawan kausakoj aylluspis, qallunkupi tukuy imamanta sutʼita parlarikuyta atinku”, nispa (The Cambridge Encyclopedia of Language). Harvard nisqa universidadpi yachachej Steven Pinkerpis, jinallatataj yuyan. Chayrayku El instinto del lenguaje nisqa libronpi qhelqarqa: “Ni mayqen qallupis waj qallusmanta nisqa aswan pisichu”, nispa.

Ñaupa qhelqasqas mashkha unayniyojchus, maypitajchus tarikusqanta yachanchejña. Nitaj mayqen qallupis kikinchu. Chantapis ñaupa tiempomanta qalluspeqa, tukuy imamanta parlayta atej kanku. ¿Imatá tukuy chaykuna rikuchiwanchej? Ashkha runas, Biblia Babelmanta parlasqan cheqa kasqanta ninku.

Bibliaman jina, Jehovaqa runas contranpi oqharikusqankurayku parlayninkuta chajrurparqa (Génesis 11:4-7). Chaywanpis pisimantawan, tukuy runasman ‘llimphu parlayta’ qonqa. ¿Imapaj? Pay nin: “Tukuyninku noqaj sutiyta oqharispa Diosninkupaj rejsikapunawankupaj, tukuy runastaj noqata uj sonqolla sirvinawankupaj”, nispa (Sofonías 3:9). Chay llimphu parlayqa, Palabranpi yachachiykunasnin. Chaytaj Jallpʼantinmanta runasta ujchashan. Chayrayku qhepaman Jehová tukuy runaspa parlayninkuta watejmanta ujchananpi atienekusunman, imaynatachus Babel ñaupajta karqa ajinata.