Dios, ¿wañuyta atipayta atinmanchu? ¡Arí! Ni wañuy, nitaj mayqen enemigopis, Tukuy Atiyniyoj Diosta atipanmanchu (1 Corintios 15:26; Éxodo 6:3). Diosqa wañusqasta kausarichispa wañuyta atipanqa, chaytataj mosoj pachapi ruwananta nin. * ¿Chay nisqanpi atienekusunmanchu? Diospa Wawan Jesusqa, suyakuyniyoj kanapaj jina chay tapuyman kuticherqa. (Mateo 22:31, 32 leey.)

Saduceosqa wañusqas kausarimunankupi mana creejchu kanku. Jesustaj paykunaman nerqa: “Wañusqakunaj kawsarimuyninmantaqa, manachu leerqankichej Dios imatachus nisqanta? Kay jinata nerqa: Noqa Abrahampa Diosnin kani, Isaacpata, Jacobpata ima nispa. Diosqa mana wañusqaspa Diosninchu, manachayqa kawsajkunajta”. Jesusqa, Jehová Moiseswan 1514 watapi (J. n. j.) * kʼajaj sachʼaj ñaupaqenpi parlasqanmanta yuyarikusharqa (Éxodo 3:1-6). Jesús nisqanman jina, Jehová, “Noqa Abrahampa Diosnin kani, Isaacpata, Jacobpata ima” nisqanqa, wañusqas kausarimunankutapuni rikuchin. ¿Imaraykú chayta ninchej?

Jehová, Moiseswan parlashajtin, Abrahamqa 329 watataña wañusqa kasharqa, Isaactaj 224 watasta, Jacobtaj 197 watasta. Chaywanpis Jehovaqa mana nerqachu: Noqa “Diosnin karqani” nispa. Manaqa, Noqa “Diosnin kani” nerqa. Arí, paykunamanta kausashankumanpis jina parlarqa. ¿Imajtin?

Jesús sutʼincharqa: “Diosqa mana wañusqaspa Diosninchu, manachayqa kawsajkunajta”, nispa. Chay nisqanpi tumpata tʼukurina. Wañusqas mana kausarimunkumanchu chayqa, Abraham, Isaac, Jacob ima wiñaypaj wañusqa kankuman, Jehovataj wañusqaspaj Diosninku kanman. Jina kajtintaj, Jehovaqa cheqa sonqo kamachisninta mana wañuymanta kacharichiyta atinmanchu, wañuytaj Jehovamanta aswan atiyniyoj kanman.

Jina kajtin, ¿imá kanqa Diospa wañupoj cheqa sonqo kamachisninmanta, nisunman Abrahammanta, Isaacmanta, Jacobmanta, wajkunamanta ima? Jesús sutʼita nerqa: “Paypajqa tukuy kawsashanku”, nispa (Lucas 20:38). Arí, Jehovaqa tukuyninkuta kausarichenqa, chayrayku paykunamanta kausashankumanpis jina yuyan (Romanos 4:16, 17). Payqa tukuyninkuta jatun yuyayninpi jallchʼashan, kausarichimunan pʼunchay chayamunankama.

¿Wañupoj familiaresniykita watejmanta rikuyta munawajchu? Jina kajtin, wañuymanta nisqaqa, Jehová aswan atiyniyoj kasqanta ama qonqaychu. Ni imapis wañusqasta kausarichimunanpaj jarkʼanqachu. Chayrayku imaynatachus wañusqas kausarimunankumanta, chayta ruwaj Diosmanta ima, astawan yachakuy. Jinamanta ‘kausajkunaj’ Diosnin Jehovaman astawan qayllaykunki.