Ñawiriqkuna yachayta munanku

¿Juk laya runasllatachu Dios allinpaq qhawan?

▪ Mana, Biblia nin: “Diosqa mana wakillantachu allimpaj qhawan, manachayqa mayqen nacionllamantapis pichá Diosta manchachikoj, cheqa kajtataj ruwaj runatamin Diosqa allin ñawiwan qhawan”, nispa (Hechos 10:34, 35).

Ruwawaqninchikpa yuyayninqa runaspa yuyayninmanta aswan patapi kachkan. Achkha runas paykunap layankumanta runaslla allinpaq qhawasqa kasqankuta yuyanku. Jinata yuyasqankuqa Charles Darwin nisqanman rikchʼakun, pichus kayta qillqarqa: “Qhipaman [...] llaqtamanta runas, chiqamanta monte runasta chinkachinqanku”, nispa. Chayrayku achkha runas, mana layankumanta chayri suyunkumanta runasta ñakʼarichinku.

¿Allinchu jinata yuyasqanku? ¿Ciencia nisqa juk laya runaslla aswan sumaq kasqankuta rikuchinchu? Mana, runap kawsayninmanta yachaq, Universidad de Oxford nisqapi yachachiq ima, Bryan Sykes nirqa: “Ima ayllumantachus chayri ima laya runamantachus jamusqanchikta manapuni yachasunmanchu. [...] Kay ADN nisqa griego chayri italiano kanchu nispa sapa kuti tapuwaq kanku, mana kasqantataq nini. [...] Tukuypis juk tatamamayuqlla kanchik”, nispa.

Chayta nisqanqa Bibliap yachachisqanwan kikinchakun, Diosqa juk qharillata, juk warmillata ruwarqa, pikunamantachus miraynin kanchik (Génesis 3:20; Hechos 17:26). Chayrayku Diospa ñawpaqinpiqa juk laya runaslla kanchik.

Jehovaqa mana runap colornintachu, nitaq rikchʼaynintachu qhawan, manaqa sunqunchik ukhuta. Payllataq nin: “Runaqa ñawisnimpa rikusqallanta qhawan, noqatajrí mana runa jinallachu qhawani, manachayqa sonqota qhawani”, nispa (1 Samuel 16:7). Kayta yachayqa mayta sunquchawasunman. ¿Imaraykutaq? Qhawarina.

Ima laya runasmantachus jamusqanchikta mana yachaspapis, ichapis rikchʼayninchikwan mana kusisqachu kanchik. Chaytataq mana tikrayta atisunmanchu. Chaywanpis aswan sumaq yuyayninchikta, sunqunchikta ima tikray, tukuy imamanta nisqaqa (Colosenses 3:9-11). Allinta qhawarikuspa ichapis wak laya runasmanta aswan sumaq chayri pisipaq qhawakusqanchikta reparakusunman. Chayjina yuyaytaqa Diospa yuyasqanwan churanakusqanrayku, sunqumantapacha urqhunapaq mayta kallpachakuna tiyan (Salmo 139:23, 24).

Jehovajina runasta qhawanapaq kallpachakusun chayqa, pay yanapawasun. Biblia nin: “Tata Diosqa sumajta qhawamushan tukuy kay pachata, kallpachanampaj tukuy sonqowan payllapi atienekunku, chaykunata”, nispa (2 Crónicas 16:9). Dios tukuy laya runasta qhawamuchkasqanta yachayqa mayta kusichiwanchik.