Ñawiriqkuna yachayta munanku

¿Tukuy chiqa sunqu cristianoschu janaqpachaman rinku?

▪ Jesuspa sumaq parlaykunasninta achkha runas maykʼaqllapis kayta ñawirirqanku: “Diosqa chay jinatapuni kay pachapi kaj chhikata munakusqanrayku, uj kʼata Churinta qorqa. Ajinamanta pillapis paypi creejqa mana chinkayman renqachu, astawanqa wiñay kawsayniyoj kanqa” (Juan 3:16). ¿Jehovap tukuy kamachisnin janaqpachaman wiñaypaq, kusisqa kawsanankupaq ima rinankutachu Jesús niyta munachkarqa?

Jesuspa nisqanta qhawarina: “Mana pipis janaj pachaman wicharerqachu. Runaj Churillan janaj pachamanta uraykʼamorqa” (Juan 3:13). Chayrayku ñawpa tiempomanta Diospa chiqa sunqu kamachisnin Noé, Abraham, Moisés, David ima janaqpachaman mana wicharisqankuta yachanchik (Hechos 2:34, 35). Chantá, ¿maypí kachkanku? Wañuypi puñusqajina, manataq imatapis yachankuchu, kawsarimuy pʼunchay chayamunankama (Eclesiastés 9:5, 6; Hechos 24:15).

Biblia ninjina, wañuspa janaqpachaman riyta atikusqanta Jesús ñawpaq kutirayku nirqa, apostolesninpaq juk chiqata wakichinanta ima (Juan 14:2, 3). Kay yachachiyqa Diospa kamachisninpaq musuq karqa. Apóstol Pablo aswan qhipaman, Jesús wañusqanwan, kawsarimusqanwan, janaqpachaman wicharisqanwan ima, discipulosninpaq “mosoj kawsay ñanta kicha[risqanta]” nirqa, chay ñantataq ni pipis ñawpaqta risqachu (Hebreos 10:19, 20).

Chay kutimantapacha tukuy chiqa sunqu cristianos janaqpachaman riyta atisqankutachu, ¿niyta munachkarqa? Mana, janaqpachapi kawsarimuyqa wakin runasllapaq, pikunachus sumaq llamkʼayta japʼinqanku. Jesús wañunanpaq kachkaptin ñawpaq chʼisi, apostolesninman janaqpacha Reinonpi “kamachina tiyanaspi [...] juzgana[nku]paj” tiyakunankuta nirqa. Jesuswan khuska janaqpachapi kamachinankupaq karqa (Lucas 22:28-30).

Kay llamkʼayqa mana apostolesllapaqchu. Apóstol Juan, Jesusta, kawsarimusqa runaswan janaqpachapi musquypijina rikusqanmanta qillqarqa: “Uj reinota ruwarqanki, sacerdotestataj paykunata churarqanki [...] kay pachapitaj kamachenqanku”, nispa (Apocalipsis 3:21; 5:10). ¿Machkha runastataq rikurqa? Imaynatachus juk suyuta mana tukuy runaschu kamachinku, kikillantaq Diospa Reinonpi kanqa. Jesús Diospa corderonjina, “runas ukhumanta rantisqa” 144.000 reyeswan kamachinqa (Apocalipsis 14:1, 4, 5).

Ñawpa tiempomanta kunankama chiqa kamachisninmanta, kay 144.000 runasqa juk chhikalla kanku. Arí, paykunalla sumaq ruwayta juntʼanankupaq janaqpachaman rinqanku. Sutʼincharina: Wasita ruwachiyta munasqaykipi tʼukuriy. Lugarniykimanta, ¿tukuynin sumaq albañilestachu contratakuwaq? Mana, machkhatachus necesitasqallaykita contratakuwaq, ¿icharí? Kikillantataq Diosninchikqa, chiqa sunqu kamachisnimanta Cristowan khuska kamachinankupaq mana tukuytachu akllan.

Dios imatachus qallariypi runaspaq munarqa, kay Reinoqa juntʼanqa. Jesús, 144.000 ima kamachiptinku Jallpʼa tʼikapachaman tukunanpaq yanapanqanku, maypichus Diospa chiqa sunqu kamachisnin wiñaypaq, kusiypitaq kawsanqanku (Isaías 45:18; Apocalipsis 21:3, 4). Diospa yuyayninpi kaqkunataq kawsarimunqanku (Juan 5:28, 29).

Diospa tukuy chiqa sunqu kamachisnin, ñawpa tiempomanta, kunanmanta ima, wiñay kawsayta regalotajina japʼiyta atinku (Romanos 6:23). Juk chhikalla sumaq ruwayta juntʼanankupaq janaqpachapi kawsanqanku, may chhika runastaq tʼikapacha Jallpʼapi kawsanqanku.