Bibliap yachachiykunasnin

¿Imaraykutaq Diosmanta yachakuna tiyan?

Kay yachaqanaqa tapuykunasniykiman Bibliaykipi kutichiykunasta tarinaykipaq yanapasunqa. Munaptiykiqa Jehovamanta sutʼinchaqkunawan kay yachaqanata ukhunchayta atiwaq.

1. ¿Imaraykutaq Diosmanta yachakuna tiyan?

Dios kay pachapi runaspaq, juk suyakuymanta willan. Chaytaq Diospa Palabranpi tarikun. Bibliaqa janaq pachapi kaq Tatanchikpa juk cartata apachimuwasunmanjina. (Jeremías 29:11, ñawiriy.)

2. ¿Imatataq Dios willayta munawanchik?

Ni mayqin kamachiqpis, saqra kaqta, pantasqa ruwaykunata, unquyta, wañuyta ima, tukuchiyta atinchu. Chaywanpis Diosqa, chiqanta ruwaq kamachiqta sayachinanta nin, mayqinchus tukuy runaspa ñakʼariyninta tukuchinqa. (Daniel 2:44, ñawiriy.)

3. ¿Imaraykutaq may sumaq kay tiempopi Diosmanta yachakuy?

Diosqa tumpamantawan tukuy saqra runasta tukuchinqa. Manaraq chay chayamuchkaptintaq, may chhika runasta, sumaqta kawsakuyta, runa masinkuta munakuyta ima yachachichkan. Bibliaqa imaynatachus chʼampaykunata atipanapaq, kusisqa kawsakunapaq, Diospa ñawpaqinpi allin qhawasqa kanapaq ima, yachachiwanchik. (Sofonías 2:3, ñawiriy.)

  4. Biblia qillqakunanpaq, ¿pitaq yuyaycharqa?

Bibliaqa 66 librosniyuq, yaqha 40 runas qillqarqanku. Ñawpa kaq phichqa librostaqa Moisés qillqarqa, chaymanta kunankama 3.500 wataña pasan, qhipa kaq librota apóstol Juan qillqasqanmantataq 1.900 watasña pasan. Chay qillqaq runasqa mana yuyasqankutachu qillqarqanku, manaqa Diospa yuyayninta. Chayrayku Bibliaqa Paypa yuyaychasqan. (2 Timoteo 3:16; 2 Pedro 1:21, ñawiriy.)

¿Imaraykutaq Biblia chiqa kasqanta nisunman? Qhipaman imachus kananta mana pantaspa willawanchik, runastaq chayta mana yachankuchu (Isaías 46:9, 10). Chayrayku Bibliap paginasninpiqa, Diospa kʼacha kaykunasninmanta rikuchin. Runaspa kawsaynintapis tikrachiyta atin. Chayta rikuspa may chhika runas mana iskaychakuspa Biblia, Diospa Palabranpuni kasqanta ninku. (Josué 23:14; 1 Tesalonicenses 2:13, ñawiriy.)

5. ¿Imataq Bibliata entiendenapaq necesitakun?

Jesusqa Diospa Palabranmanta sumaqta yacharqa. Chay tiempomanta runas Diospa Palabranmanta yachallarqankutaq chaywanpis mana entienderqankuchu. Runas sumaqta entiendenankupaq Jesús juk pʼitimanta parlaspa, sutʼinchaq. Kay yachaqana kikillantaq ruwasqa kachkan, Bibliap yachachiyninta sumaqta entiendenaykipaq. (Lucas 24:27, 45, ñawiriy.)

Diosmanta, imapaqchus kawsasqanchikta ima, yachayta munasqaykita reparayku. Bibliamanta yachakuyta munasqaykimanta mana tukuychu kusikunqanku. Chaywanpis allin kanman yachakunayki, imaraykuchus Biblia yachachin, Dios wiñay kawsayta qunanta yachakuqkunaman. (Mateo 5:10-12; Juan 17:3, ñawiriy.)

Astawan yachakuyta munaspaqa, kay ¿Imatapunitaq Biblia yachachin? librop 2 yachaqananta ñawiriy. Kaytaqa Jehovamanta sutʼinchaqkuna urqhunku.