Jehovaqa akllaqta saqiwanchik

Deuteronomio 30:11-20

JUK cristiana, wawitallaraq kachkaspa saqra ruwaykunata ruwachisqankurayku Diosman chiqa sunqu kayta mana atinanta yuyarqa, nirqataq: “Imallapipis juchallikuspa Jehovata wasanchanayta manchachikuni”, nispa. Chaywanpis, ¿allintachu yuyachkarqa? ¿Niraq Diosta riqsichkaspa saqra ruwaykunata ruwasqanchikraykuchu, Diosman chiqa sunqu kayta mana atinanchikta yuyana kanman? Mana, imaraykuchus Diosqa kawsayninchikwan imatachus ruwayta munasqanchikta akllaqta saqiwanchik. Chaywanpis allinta akllananchikta munan. Chayrayku Palabranniqta sumaqta yuyaychawanchik. Qhawarinachik imatachus Moiseswan Deuteronomio libropi, 30 tʼaqanpi qillqachisqanta.

Ichá wakin kuti yuyarqanki, Diosta kasukuy, imatachus ruwananchikta munasqanta entiendey ima, mana atikullasqanta. * Chaywanpis Moisesniqta Dios nirqa: “Kay kamachisqata kunan qoshaykichej, chayqa ruwanapaj jinalla, nitaj qankunamantaqa karupichu kashan”, nispa (11 pʼiti). Arí, Jehovaqa, atisqallanchikta mañawanchik. Paypa kamachiykunasninqa, kasukuyta atinapaqjinalla. Tukuypis imatachus Dios ruwananchikta munasqanta yachayta atisunman. Chaypaqqa mana ‘janaqpachamanchu’ nitaq ‘mama quchap chimpanmanchu’ rinanchik tiyan (12, 13 pʼitikuna) Bibliaqa, imatachus ruwananchikta sutʼita willawanchik (Miqueas 6:8).

Jehovaqa, mana tanqawanchikchu payta kasukunanchikpaq. Moisesniqta nirqa: “Ñawpaqeykichejpi churani kawsayta, allin kajtawan; chantá churallanitaj wañuyta, mana allin kajtawan”, nispa (15 pʼiti). Kay pʼiti nisqanmanjina, Jehovata kasukuspa bendicionesninta japʼikuytachus chayri mana kasukuspa ñakʼariytachus, akllayta atinchik. Sapa jukninchikmantataq kachkan, kawsaytachus chayri wañuytachus akllananchikqa (16-18 pʼitikuna; Gálatas 6:7, 8).

¿Imatachus akllananchikmanta Jehová dakunchu? Arí. Chayrayku Moisés Diospa yuyaychasqanmanjina jinata nirqa: “Kawsayta ajllakuychej ari”, nispa (19 pʼiti). ¿Imata ruwaspataq kawsayta akllasunman? Moisesllataq kay tapuyman kutichirqa: “Señorniykichej Tata Diosta munakuychej, kasuychejtaj”, nispa (20 pʼiti). Arí, Diosta munakusqanchikqa, ima ñakʼariypipis kachkaspa payta kasukunanchikpaq, payman chiqa sunqu kananchikpaq ima yanapawanchik. Ajinata ruwaspataq kusiy kawsayta akllanchik, chaytaq ni imawan kikinchakunchu. Chantapis Diosman chiqa sunqu kaspaqa, paraisopi wiñay kawsayta japʼisunchik (2 Pedro 3:11-13; 1 Juan 5: 3).

Moisespa nisqanqa, mayta sunquchawanchik. Arí, niraq Diosta riqsichkaspa saqra ruwaykunata ruwaspapis, Diosman chiqa sunqu kayta akllayta atinchik. Jehová imatachus ruwanata akllaqta saqiwasqanchikqa, mana pisipaqchu qhawawasqanchikta rikuchin. Chayrayku payta kasukuyta, payman chiqa sunqu kayta ima munanchik. Jinata ruwaptinchiktaq Dios bendeciwasunchik.

Qallariypi juk cristianamanta parlarqanchik, payqa, tukuypis Diosman chiqa sunqu kayta akllayta atisqanchikta yuyarikuspa sunquchakurqa, nirqataq: “Wakin kuti, Jehová Diosta munakusqayrayku payman chiqa sunqullapuni kayta atisqayta qunqakapuni”, nispa. Ñuqanchikpis Jehovap yanapayninwan payman chiqa sunqu kayta atinchik.

[Sutʼinchaynin]