¿YACHANKICHU imachus envidioso kay? Kaypi tʼukuriy: ¿Maykʼaqllapis, kay runaqa may kʼacha, allin rikchʼayniyuq, may yachayniyuq nisqankurayku phiñakurqankichu? *... Imaraykuchus wakinqa envidiarayku chayri celosrayku phiñakunkuman.

Familia ukhupipis envidianakuyqa kallanmantaq, tatas juk wawallankuta aswan allinpaq qhawasqankurayku. Biblia, juk familia ajina chʼampayniyuq kasqankumanta willawanchik. Juk sumaq yachakuyta yachakunapaq, chay familiamanta sutʼincharina.

Joseqa, Jacobpa 12 wawasninmanta juknin karqa, tatallankumantataq hermanos karqanku, tatanpaq aswan munasqa kasqanraykutaq, Josemanta envidiakurqanku. Jacobqa, Joseta mayta munakusqanrayku, juk kʼacha pʼachata ruwachipurqa, “imaraykuchus chay wawanta rejserqa machuyaynimpi”, chantá Raquelpa munakusqan kuraq wawan karqa.

Bibliap nisqanmanjina Josep hermanosninqa, paykunamanta nisqa, tatanku ‘José churinta astawan munakusqanta’ reparaspa, Joseta chiqniyta qallarirqanku. Juk pʼunchay, Joseqa, tukuy hermanosnin —tatan ima— paypa ñawpaqinpi qunqurikusqankuta, musquyninpi rikusqanta willarqa. Chayta uyarispataq, tatanqa kʼamirqa, ‘hermanosnintaq chaymanta astawan chhuqunakurqanku’ (Génesis 37:1-11).

José 17 watayuq kachkaptintaq, juk pʼunchay Josep kuraq hermanosninqa cabrasta, ovejasta ima karupi michichkarqanku, Jacobtaq, hermanosninta watukamunanpaq Joseta kacharqa. Joseta rikuspa, hermanosnin, ¿imapichus tʼukurisqankuta  yachankichu?... ¡Wañuchiypi tʼukurichkarqanku! Rubén, Judá imataq, mana wañuchinankuta saqirqankuchu.

Chayllapi, comerciantes Egipto llaqtaman richkasqankuta rikuspa Judá nirqa: “Vendeykuna”, nispa. Josetataq venderqanku. Chantá juk cabrata wañuchispa, chay yawarninman, Josep pʼachasninta chhapurqanku. Chayta Jacob rikuspataq, qhaparispa nirqa: “¡Ima sajra animalchari wawaytaqa mithaspa, mikhuykun!”, nispa (Génesis 37:12-36).

Tiempo pasasqanmanjinataq, Joseqa Egiptomanta reywan allinpaq qhawachikurqa, imaraykuchus Joseqa, Faraonpa iskay musquykunasninta, Diospa yanapayninwan sutʼincharqa. Ñawpaqta Faraonqa, 7 wira wakasta, chantá 7 tullu wakastawan musquyninpi rikusqa. Chaymanta 7 sumachaq kʼacha trigo umasta, chantá 7 chʼaki chʼusu trigo umastawan, musquyninpi rikullasqataq. Josetaq, 7 wata sumaq mikhuna puqunanta chantá 7 wata yarqhay kananta, Faraonman sutʼincharqa. Chayrayku Faraonqa, chay allin wataspi mikhunata tantananpaq Joseta akllarqa.

Tiempo pasasqanmanjina, 7 watata sinchi yarqhay chayamurqa, Josep hermanosnin, tatan imataq, mana mikhunayuq qhipakapuchkarqanku. Chayrayku Jacobqa, Josep chunka kuraq hermanosninta mikhunata rantiq rinankupaq Egiptoman kacharqa. Egiptopi, Joseta, hermanosnin rikuspataq mana riqsirqankuchu. Josetaq, pichus kasqanta mana willaspalla, payta ruwasqankumanta pesachikusqankutachus manachus yachananpaq pruebaman churarqa. Pesachikusqankuta rikuspataq, pichus kasqanta willarqa, abrazaykurqataq. ¡Tukuyninkutaq mayta kusikurqanku! (Génesis, 40 tʼaqamanta 45 tʼaqakama.)

Bibliap nisqanmanjina, ¿imatá envidiamanta yachachiwanchik?... Envidiaqa, saqra ruwaykunata ruwanapaq tanqawasunman. ¡Envidiaqa, hermanonchiktapis saqra kaqta ruwanapaq tanqawasunman! Kay Hechos 5:17, 18 chantá Hechos 7:54-59 pʼitikama ñawirisunchik. Jesuspa discipulosninta, envidiarayku chay runas, ¿imatá ruwarqanku?... ¿Reparankichu imaraykuchus mana envidiosos kanata?...

Joseqa, 110 watasta kawsarqa, wawasniyuq, allchhisniyuq ima karqa. Chiqamantachá payqa, munanakunankuta, nitaq envidiakunankuta yachachirqa (Génesis 50:22, 23, 26).