Kawsayta aswan jatunpaq qhawayta yachakuni

NI JAYKʼAQ 2007 WATATA, ABRIL KILLAMANTA 16 PʼUNCHAYTA QUNQASAQCHU. Ñuqaqa, kay Virginia Tech (Instituto Politécnico y Universidad Estatal de Virginia, Estados Unidos) nisqapi, Norris Hall sutiyuq wasipi, kimsa kaq pisopi pakaykuchkarqani. Chay paqarinqa, juk kutitawan sapa pʼunchay kawsaymanta pachis ninayta, yachachiwarqa.

Ñuqaqa, cartasta apamunay kasqanrayku, oficinaymanta iskay kaq pisoman uraykunaypaq kachkarqani. Chayllapi juk yachachiq computadoranwan yanapanayta mañariwarqa. Oficinanman yaykuchkaptiykutaq, iskay kaq pisopi pistolaswan baleanakuchkasqankuta uyarirqayku. Usqhayllata oficina ukhuman yaykuspa, punkuta sumaqta wisqʼaykurqayku. Mana yacharqaykuchu imachus chay urapi kachkasqanta. Maytapuni mancharikurqayku. ¿Imataq ñuqaykumanta kanman karqarí? Juk kʼuchupi pakaykukuspa, tukuy kallpaywan Jehová Diosmanta mañakurqani, ima chʼampaypis jamuptin sinchita sayachinawanpaq.

Chaypi suyakuchkaptiytaq, 15 wata ñawpaqta mecanicomanta llamkʼanaypi accidentakusqayta yuyarikurqani. Chaypitaq, llamkʼay masiy, gasolinayuq juchʼuy valdeta japʼichkarqa, jinallapi nina japʼiykukurqa. Paytaq mayta mancharikuspa, pataman chay lawrachkaq valdeta chuqarqa. Chaytaq, uyayman chayamuwarqa, cuerpoymanta khuskanninmanta pataman, sinchitapuni ruphaykuwarqa. Chaymanta juk helicopteropi ruphasqasta jampinku chayman apawarqanku, kimsa killa khuskanniyuqtapuni jampichkawaptinku wañuy patapi kachkarqani. Phichqa killanpitaq, kawsayniymanta mayta agradecekuspa, sanoyarispa wasiyman kutipurqani. Chaymantapacha, sapa pʼunchay kawsayniyta may jatunpaq qhawayta yachakurqani. Chaypaqqa, Jehovamanta sutʼinchaqña karqani. Chaywanpis, chay kutimantapacha aswan sinchimanta kawsayniyta Jehová Diosninchikman qunaypaq kallpachawarqa, pichus kawsayta sapa pʼunchay quwanchik (Salmo 90:12; Isaías 43:10).

Kay accidenterayku manaña mecanicomanta llamkʼayta atirqaniñachu, chayrayku computadorasmanta yachakuyta qallarirqani, ajinamanta Virginia Tech nisqapi llamkʼachkarqani. Chayrayku, chay paqarinpi pistolaswan baleanakuchkaptinku, Norris Hall wasipi kachkarqani.

Mana yacharqaykuchu, uraykupi may jatun wañuchinaku ruwakuchkasqanta, chayjina ruwaytaq, ni jaykʼaq Estados Unidospi rikukurqachu. Chay runaqa, 32 runasta wañuchiytawan pay kikinta wañuchichikurqa. Chay kasqanmanta 20 minutosmanqa, policiasta pasillopi purichkapta uyarirqayku. Waqyaptiykutaq, jarkʼanawaykupaq pusawarqayku.

Kay rikusqayqa, kawsay maykʼaqllapis usqhayllata ripusqanta, chantapis imachus qhipaman kananmanta mana yachayta atisqanchikta, yachachiwarqa (Santiago 4:14). Chayrayku, Jehová Diosllapi atienekuna, pay kawsayta quwanchik, sapa pʼunchay kawsayniyuq rikchʼarisqanchiktataq, jatunpaq qhawana (Salmo 23:4; 91:2).

[28 paginapi maymantachus foto urqhukusqan]

AP Photo/The Roanoke Times, Alan Kim