1, 2. 1) ¿Maykunapitaj ñaupa tiempomanta Diospa kamachisnin Diosta yupaychaj kanku? 2) ¿Imaynatataj Jesús Jerusalenpi kaj templota qhawarqa? 3) ¿Imatataj kay yachaqanapi yachakusunchej?

DIOSPA kamachisnenqa unaymantaña Diosta uj cheqapi yupaychanku. Sutʼincharinapaj, ichapis Abelqa jaywananta Jehovaman uj altar patapi jaywarqa (Gén. 4:3, 4). Noé, Abraham, Isaac, Jacob, Moisés ima, altaresta ruwallarqankutaj (Gén. 8:20; 12:7; 26:25; 35:1; Éxo. 17:15, 16). Chantapis Jehovaqa israelitasman uj toldota yupaychanankupaj ruwanankuta kamacherqa (Éxo. 25:8). Aswan qhepamantaj uj templota ruwanankuta kamachillarqataj (1 Rey. 8:27, 29). Israelitasqa Babiloniamanta Jerusalenman kutipojtinku sinagogaspi tantakorqanku (Mar. 6:2; Juan 18:20; Hech. 15:21). Ñaupa cristianosqa, wasispi tantakoj kanku (Hech. 12:12; 1 Cor. 16:19). Kunantaj Jallpʼantinpi may chhika Tantakuna Wasispi Jehová Diosta yupaychananchejpaj tantakunchej.

² Jesusqa, Jerusalenpi kaj templota may jatunpaj qhawaj. Yachachisqasnenqa chayta rikuspa imatachus Salmo libropi nisqanta yuyarikorqanku, chaypi nin: “Wasiykita sinchʼita munakusqayrayku, tukukushaniña”, nispa (Sal. 69:9; Juan 2:17).  Tantakuna Wasisqa mana Jerusalenpi Jehovaj templo karqa ajinachu kanku (2 Cró. 5:13; 33:4). Chaywanpis Tantakuna Wasista jatunpaj qhawananchej tiyan, imaraykuchus chaykunapi Diosta yupaychanapaj tantakunchej. Kay yachaqanapeqa yachakusunchej Tantakuna Wasispi kashaspa imaynachus kananchej kasqanta, imaynatachus qhawanata, imaynatachus Tantakuna Wasis ruwakunallanpajpuni yanapakunata ima. *

3-5. 1) ¿Imatataj Tantakuna Wasipi ruwanchej? 2) ¿Imaynatataj tantakuykunasninchejta qhawananchej tiyan?

³ Tantakuna Wasipeqa Jehovata yupaychanapaj tantakunchej. Tantakuykunasninchejqa Jehová Diosmanta uj sumaj regalo kanku, imaraykuchus chaykunaqa Jehovawan astawan masichakunapaj yanapawanchej. Chaykunanejta Diospa llajtan necesitasqanchej kamachiykunata qowanchej, kallpachawanchej ima. May sumajpuni Jehová, wawan Jesús ima, Jehovaj “mikhunanmanta” sapa semana mikhunanchejpaj wajyariwasqanchejqa (1 Cor. 10:21). Wajyarisqa kasqanchejtataj ni jaykʼaj qonqananchejchu tiyan.

⁴ Jehovaqa payta yupaychanapaj, hermanosninchejwan kallpachanakunapaj ima, tantakuykunaman rinanchejta Biblianejta niwanchej (Hebreos 10:24, 25 leey). Jehovata jatunpaj qhawasqanchejraykutaj tukuy tantakuykunaman rinapaj kallpachakuna, ichá tantakuykunaman mana riyta atillasunchu onqosqa kasqanchejrayku chayri waj imasrayku. Tantakuykunamanta Jehovaman agradecesqas kasqanchejta, tantakuypi tapuykunaman kutichinapaj wakichikuspa rikuchinchej (Sal. 22:22).

⁵ Jehovata jatunpaj qhawasqanchejta rikuchinchej, tantakuykunapi kashaspa sumajta uyarispa, Tantakuna Wasita sumajta qhawaspa ima. Munanchejtaj runas ruwayninchejta rikuspa Diospa sutinta jatunchanankuta, chay suteqa rikhurin Tantakuna Wasej letreronpi (1 Reyes 8:17 kikinchay).

6. ¿Imatataj wakin runas ninku Tantakuna Wasiman rispa? (27 paginapi dibujota qhawariy.)

⁶ Runasqa Tantakuna Wasita may jatunpaj qhawasqanchejta reparanku. Sutʼincharinapaj, Turquiamanta uj runaqa Tantakuna Wasita llimphuta, kʼuchunchasqata ima qhawaspa mayta tʼukusqanta nin. Chantapis tukuyta sumaj pʼachallisqasta rikuspa, kusisqas napaykusqankumanta ima tʼukullasqataj. Chay runaqa tukuy tantakuykunaman riyta qallarisqa, pisi tiemponmantaj bautizakusqa. Indonesiaj ujnin llajtanpipis uj Tantakuna Wasita hermanos ruwallarqankutaj. Chay Tantakuna Wasita ruwayta tukuytawantaj hermanosqa vecinosta, alcaldeta, waj runastawan ima, qhawarinankupaj wajyarisqanku. Alcaldetaj may tʼukulla kasharqa Tantakuna Wasi sumaj ruwasqa kasqanmanta, kʼachitu jardinniyoj kasqanmanta ima. Llimphitu kasqantaj cheqa Diosta yupaychasqanchejta rikuchisqanta nisqa.

7, 8. ¿Imaynatataj Tantakuna Wasipi kashaspa Jehovata jatunpaj qhawasqanchejta rikuchisunman?

⁷ Jehová tantakuykunaman wajyariwasqanchejrayku, tantakuyman rinapaj maychus kajllata pʼachallikuna tiyan, yachachikusqantapis sumajta uyarina tiyan. Nitaj pimanpis niyta atisunmanchu imaynatapunichus pʼachallikunankuta, nillataj noqanchejpis imayna pʼachallisqapis rillasunmanchu. Jehovaqa munan tantakuykunaman tukuy rejkuna kusikunankuta. Chayrayku mana imatapis ruwayta munanchejchu  Jehovata pisipaj qhawachinanpaj jinaqa. Chayraykutaj maychus kajta pʼachallikuna tiyan. Nitaj tantakuna horapi mensajesta apachinachu, nitaj wajkunawan parlanachu, nillataj imatapis mikhunachu chayri ujyanachu. Chantapis tatasqa wawasninkuman yachachinanku tiyan Tantakuna Wasipi mana pujllanankuta, mana correykachanankuta ima (Ecl. 3:1).

⁸ Tantakuykunamanqa Jehovata yupaychaj rinchej, paymanta yachakoj ima. Chayrayku tantakuykunapeqa mana negociosmanta parlanachu tiyan (Nehemías 13:7, 8 kikinchay). Jesusqa mayta phiñakorqa templopi runas vendeshasqankuta rikuspa, chayraykutaj chay runasta wijchʼumorqa (Juan 2:13-17).

9, 10. 1) ¿Imatataj Jehovaj testigosnin ruwanku Tantakuna Wasista ruwanankupaj? 2) ¿Imastaj karqa mayta kallpachakusqankurayku? 3) ¿Imaynatataj Diospa llajtan yanapan wakin qotuchakuykuna mana Tantakuna Wasita ruwayta atejtinku?

⁹ Jehovaj testigosnenqa pachantinpi Tantakuna Wasista ruwaspa mayta llankʼanku. Paykunaqa mana imata cobraspalla Tantakuna Wasista ruwanankupaj planosta dibujanku, Tantakuna Wasista ruwanku, allinchanku ima. Ajinata ruwasqankuraykutaj 1 de noviembre de 1999 watamantapacha, Jallpʼantinpi 28.000 Tantakuna Wasismanta astawanña ruwakun, chayrayku nisunman sapa pʼunchay 5 Tantakuna Wasis ruwakusqanta.

¹⁰ Bibliaqa ashkha kapuyniyojkuna, pisi kapuyniyojkunata yanapanankuta nin. Chayrayku Diospa llajtanqa, Tantakuna Wasista ruwachinanpaj yanapakuyta munaj hermanosta churan, hermanos qolqeta churasqankuwantaj maypichus Tantakuna Wasis necesitakun chay lugarespi ruwachin (2 Corintios 8:13-15 leey). Ajinata ruwakusqanraykutaj, ashkha Tantakuna Wasis ruwakorqa mana pagayta atej qotuchakuykunapaj.

11. 1) ¿Imatataj wakin hermanosninchej ninku paykunapaj mosoj Tantakuna Wasi ruwakojtin? 2) Chay hermanospi tʼukurispa, ¿kusikunkichu? Sutʼinchay.

¹¹ Costa Ricapi ujnin qotuchakuymanta hermanos uj mosoj Tantakuna Wasi ruwakusqanmanta kayta nerqanku: “Mosoj Tantakuna Wasita rikuspa mayta kusikuyku, mana creenapaj jinataj pusaj pʼunchaykunallapi ruwarqayku. Chaytaj Jehovaj yanapayninwan, llajtanpa yanapayninwan, hermanospa yanapayninkuwan ima ruwakorqa. Chay Tantakuna Waseqa noqaykupaj Jehovamanta uj sumaj regalo. Chayraykutaj may kusisqapuni kashayku”, nispa. Kay nisqankuta uyareyqa mayta kusichiwanchej. Jallpʼantinpi hermanosninchejpis may agradecesqas, may kusisqas kashallankutaj. Sutʼi rikukun Jehová bendecishawasqanchej  Tantakuna Wasista ruwaypi. Imaraykuchus uj mosoj Tantakuna Wasi ruwakojtin ashkha runas Jehovamanta yachakunankupaj tantakuykunaman riyta qallarinku (Sal. 127:1).

12. ¿Imaynatá yanapakusunman Tantakuna Wasis astawan ruwakunanpaj?

¹² ¿Imaynatá yanapakusunman Tantakuna Wasis astawan ruwakunanpaj? Wakenqa Tantakuna Wasista ruwaypi yanapakusunman. Tukuytaj Tantakuna Wasis ruwakunanpaj qolqenchejmanta qoyta atisunman. Yanapananchejpaj tukuy atisqanchejta ruwaspataj, astawan kusisqas kasunchej. Astawantaj Diosta jatunchasunchej. Munanchejtaj ñaupa tiempomanta Diospa kamachisnin jina ruwayta. Paykunaqa Jehová Diosta yupaychanapaj lugares ruwakunanpaj, qolqenkumanta tukuy sonqo qorqanku (Éxo. 25:2; 2 Cor. 9:7).

13, 14. Biblia nisqanman jina, ¿imaraykutaj Tantakuna Wasita llimphuta, sumaj kʼuchunchasqata japʼinanchej tiyan?

¹³ Jehovaqa may santo, llimphutaj. Munantaj sumaj wakichisqa kananchejta. Chayrayku Tantakuna Wasita llimphuta, sumaj kʼuchunchasqata ima japʼinanchej tiyan (1 Corintios 14:32, 33, 40 leey). Jehová jina santo, llimphu kanapajqa, yuyasqanchej, yupaychasqanchej ima llimphu kanan tiyan. Cuerponchejpis llimphullataj kanan tiyan (Apo. 19:8, Mosoj Testamento 1956).

¹⁴ Tantakuna Wasita llimphuta japʼisunchej chayqa, runastapis wajyariyta atillasunchej. Paykunataj rikonqanku cheqamantapuni mosoj pachapi kausakuyta munasqanchejta, mayqenchus may llimphu kanqa. Chantapis llimphu Diosta yupaychasqanchejta rikonqanku, pichus Jallpʼata uj kʼachitu  paraisoman tukuchenqa (Isa. 6:1-3; Apo. 11:18.

15, 16. 1) ¿Imaraykutaj Tantakuna Wasita llimphuta japʼiy mana atikullanchu? 2) ¿Imaraykutaj Tantakuna Wasita llimphuta, kʼuchunchasqata ima japʼinanchej tiyan? 3) ¿Imaynatataj qotuchakuyniykipi Tantakuna Wasita llimphuta japʼinaykichejpaj wakichikun? 4) ¿Imatataj tukuypis ruwayta atinchej?

¹⁵ Tantakuna Wasita llimphuta japʼeyqa, mana atikullanchu. Imaraykuchus mana tukuychu llimphuchaymanta kikinta yuyanchej. Chantapis wakin runasqa ashkha polvo, tʼuru ima kan chay lugarespi tiyakunku. Wakintaj pisi yaku kan chay lugarespi, llimphuchanankupaj mana imapis kanchu chay lugarespi ima tiyakunku. Chantapis imayna uywasqachus kasqanchej llimphuchayta uj jinamanta qhawanapaj tanqawasunman. Maypi tiyakuspapis, llimphuchaymanta runas mana kikinta yuyajtinkupis, Tantakuna Wasitaqa llimphuta, kʼuchunchasqata ima japʼinanchej tiyan. ¿Imaraykú? Imaraykuchus Diosta chaypi yupaychanchej (Deu. 23:14).

¹⁶ Tantakuna Wasi llimphu kananta munanchej chayqa maykʼajchus, ima horachus llimphuchana kasqanta wakichikusqanman jina ruwana. Chaytaqa ancianos wakichinku, paykunallataj llimphuchanapaj tukuy ima kananta qhawarinku. Chantapis Tantakuna Wasita sumajta llimphuchanankupaj hermanosta churanku. Wakin imastaqa sapa tantakuy tukukusqantawan llimphuchana tiyan, wakin imastataj mana. Chaywanpis tukuyninchej Tantakuna Wasi llimphu kananpaj yanapakuyta atinchej.

17, 18. 1) ¿Imatataj ñaupa tiempomanta Diospa kamachisninmanta yachakusunman? 2) ¿Imaraykutaj Tantakuna Wasita sumaj allinchasqata japʼinanchej tiyan?

¹⁷ Ñaupa tiempomanta Diospa kamachisnin templota allinchasqata japʼej kanku. Sutʼincharinapaj, rey Joasqa Judamanta sacerdotesta kamacherqa Diospa llajtanmanta kajkuna qolqeta qosqankuwan templota allinchanankuta (2 Rey. 12:4, 5). Chaymanta 200 watasninmantaj rey Josiaspis Diospa llajtan qolqeta qosqanwan templota allincharqa (2 Crónicas 34:9-11 leey). ¿Imatataj kaymanta yachakusunman? Tantakuna Wasita llimphuta japʼina kasqanta, imapis allinchana kajtin allinchana kasqanta ima.

¹⁸ Wakin sucursalesqa, suyunkupi runas wasisninkuta, chaypi kaj imasta mana allinchasqata japʼisqankuta reparanku. Wakin kutisqa chay rikukun pisi runaslla allinchayta atisqankurayku, wakin kutistaj allinchanankupaj mana qolqeyoj kasqankurayku. Tantakuna Wasita mana allinchajtinchejqa, ichapis urmaykunman. Ajinata runas rikuspataj mana allintachu noqanchejmanta parlankuman. Chayrayku mayta kallpachakunanchej tiyan Tantakuna Wasita sumaj allinchasqa japʼinapaj. Ajinamanta Jehovata jatunchasunchej, nitaj hermanosninchej qolqeta churasqankuta usuchisunchu.

19. ¿Imatataj qan ruwanki Tantakuna Wasita jatunpaj qhawasqaykita rikuchinaykipaj?

¹⁹ Kay yachaqanapi Bibliaj versiculosninta ukhunchasqanchej Tantakuna Wasita jatunpaj qhawanapaj yanapawanchej. Yuyarikuna Tantakuna Wasisqa Jehová Diospata kasqanta, manataj mayqen runajtachu, nitaj qotuchakuypatachu. Jehovata jatunpaj qhawasunchej chayqa, Tantakuna Wasita, tantakuykunata ima jatunpaj qhawasunchej. Chantapis Tantakuna Wasis ruwakunanpaj tukuy sonqo qolqeta churasun. Kallpachakusuntaj Tantakuna Wasita llimphuta, allinchasqata ima japʼinapaj. Chayrayku Jesús jina ruwanallapuni, Diosta yupaychanchej chay lugartapis jatunpaj qhawasqanchejta rikuchina (Juan 2:17).