KINGSLEYQA Diosmanta Parlayta Yachanapaj tantakuypi wasitanpi laqʼarisqankutawan Bibliata leeyta qallarin. Chaytataj ñaupaj kutirayku ruwarqa. Ni uj letrata pasaspataj, sumajta leerqa. Chaywanpis, ¿imaraykutaj Bibliata mana qhawaspalla leerqa?

Kingsleyqa Sri Lanka nisqapi tiyakorqa, payqa cieguito karqa, mana allintachu uyarej, silla de ruedaspitaj kasharqa. ¿Imaynatá Jehovamanta yachakorqa? ¿Imaynamanta Diosmanta Parlayta Yachanapaj tantakuypi umalliricherqa? Chayta qhawarina.

Kingsleyta rejsishaspaqa, Bibliamanta yachakuyta munasqan mayta tʼukuchiwarqa. Payqa Jehovaj testigosninwan Bibliamanta yachakusqaña, nitaj ñaupajman risqachu. Chantapis El conocimiento que lleva a vida eterna nisqa libro braillepi kaporqa, may thantitañataj karqa. * Noqawan yachakunanta nejtiytaj, yachakuyta munarqa. Chaywanpis iskay jatuchaj chʼampaykuna karqa.

Kingsleyqa pay jina onqosqasta, machitusta qhawanapaj wasipi tiyakoj. Chaypi ashkha runas kasqankuraykutaj, jatunmanta paywan parlanay karqa. Parlasqaytataj tukuy uyarej kanku.

 Kingsleymanqa mana anchata leesqanrayku, nitaj allinta entiendesqanrayku pisillata yachachej kani. Astawan yachakunanpajtaj sumajta wakichikoj, libronta kutin kutita leej, Bibliaj versiculosnintapis braillepi maskʼaj, tapuykunaman kutichinanpajpis sumajta tʼukurej. Chaytaj may sumaj karqa. Yachachej rejtiytaj alfombra patapi chakisninta cruzaytawan tiyarikoj, pampata takariytawantaj imatachus yachakusqanta may kusiywan, jatunmanta ima sutʼinchawaj. Pisi tiemponmantaj semanapi iskay kutita yachachej rej kani, sapa rejtiytaj iskay horata jina yachachej kani.

Kingsleyqa, tantakuykunaman riyta mayta munasharqa, chaywanpis mana atillarqachu. Imaraykuchus silla de ruedasman tiyaykunanpaj, automan wicharinanpaj, tantakuna wasiman yaykunanpaj ima yanapata necesitaj. Chaywanpis hermanosqa ujtaj, ujtaj yanapaj kanku, chay ruwayta jatunpaj qhawasqankurayku. Kingsleyqa sumajta uyarinanpaj uj parlantej ladonpi tiyakoj, tapuykunamanpis kutichej.

Unaytaña yachakushaspataj Diosmanta Parlayta Yachanapaj tantakuypaj qhelqachikorqa. Ñaupaj kutirayku chay tantakuypi Bibliata leerinanpaj, iskay semana faltashajtin wakichisqañachus manachus kasqanta tapurerqani. Paytaj “kinsa chunka kutistaña leeni”, nispa niwarqa. Mayta kallpachakusqanmantataj “sumajta ruwanki” nerqani, leeripunawantataj nerqani. Paytaj Biblianta kichariytawan, ima versiculostachus leenan karqa chayman dedosninta churaykuytawan leeyta qallarerqa. Chaywanpis repararqani mana cieguitos jinachu dedosninta leenanpaj kuyuchishasqanta. ¿Imaraykutaj ajinata leesharqa? Yuyayninpi japʼisqanrayku.

Ajinata leesqanqa mayta tʼukuchiwarqa, waqachiwarqa ima. Leeyta tukusqantawantaj tapurerqani imaynatachus kinsa chunka kutisllata leerispapis yuyayninpi japʼisqanta. Kingsleytaj, sapa pʼunchay kinsa chunka kutista leesqanta niwarqa. Payqa, yuyayninpi chay versiculosta japʼinanpaj kutin kutita uj killataña leesqa.

Umallirichinan pʼunchay chayamun. Kingsley leeyta tukusqantawan, hermanosqa manchayta tʼajllarikorqanku, wakintaj waqarqanku Kingsley mayta kallpachakusqanmanta. Uj hermana, manchachikusqanrayku Diosmanta Parlayta Yachanapaj tantakuypi manaña umallirichejchu, chaywanpis watejmanta umallirichiyta munarqa. ¿Imaraykutaj chayta ruwayta munarqa? Chay hermana nin: “Kingsley atin chayqa, noqapis atiyman”, nispa.

Kingsleyqa kinsa watata Bibliamanta yachakuytawan 6 de septiembre de 2008 watapi bautizakorqa. Wañupunankamataj Diosta tukuy sonqo sirverqa, wañupuntaj 13 de mayo de 2014 watapi. Payqa mosoj pachapi manaña ni imamanta onqosqa kaspa Diosta sirvinallantapuni yacharqa (Isa. 35:5, 6). (Paul McManus, willariwanchej.)