1, 2. 1) Qhepa pʼunchaykunapi imachus kananmanta, ¿imatataj Jesús nerqa? 2) ¿Imatataj kay yachaqanapi yachakusunchej?

JESUSQA Pedrowan, Andreswan, Santiagowan, Juanwan ima Olivos Orqopi kasharqa, chay cheqamantataj Jerusalén templo rikukoj. Payqa Diospa Reinonpi kamachishajtin imachus qhepa pʼunchaykunapi kananta sutʼincharqa. Nerqataj chay pʼunchaykunapi allin kamachi yuyayniyoj sutinpi kananta. Chay kamachitaj tukuy cristianosman cheqa yachachiykunata mikhunata jina maychus tiemponpi qonan karqa (Mat. 24:45-47).

² Allin kamachi yuyayniyojmanta parlaytawan, Jesusqa chunka sipaskunamantañataj parlarqa (Mateo 25:1-13 leey). Kay yachaqanapitaj chay rijchʼanachinamanta kay kinsa tapuykunaman kutichisunchej. ¿Imastataj Jesús chay rijchʼanachinawan yachachiyta munarqa? ¿Imaynatataj ajllasqa cristianos chay yuyaychaywan yanapachikunku, chantá imatá chayta ruwasqankurayku japʼinku? ¿Imaynatataj chay yuyaychaywan yanapachikusunman?

3. ¿Imaynatataj publicacionesninchej chunka sipaskunamanta rijchʼanachinata sutʼinchaj, chayta entiendeyta atillajchu kanchej?

³ Ñaupaj yachaqanapi yachakorqanchej kay qhepa wataspi allin kamachi yuyayniyojqa, Bibliapi pimantachus chayri imamantachus parlakusqanta, manaña anchata imawanchus ninakusqanta sutʼinchasqanta. Astawanpis kunanqa chaykunamanta imatachus yachakuyta atisqanchejmanta astawan sutʼinchan. Chunka sipaskunamanta rijchʼanachinapi tʼukurina. Publicacionesninchejpi, chay rijchʼanachinamanta kʼanchanas, aceite, yurus, imaswanchus ninakusqanta astawan sutʼinchakoj. Ajinata sutʼinchakusqantaj, Jesuspa yachachiyninta sutʼita entiendenapaj ichapis mana anchata yanapawajchu kanchej. Chayrayku kay yachaqanapi imatachus chay rijchʼanachinamanta yachakuyta atisqanchejta qhawarisunchej.

4. 1) ¿Piwantaj novio ninakun? 2) ¿Pikunawantaj chunka sipaskuna ninakunku?

⁴ Jesús rijchʼanachinanpi imatachus yachachiyta munasqanta qhawarina. Payqa rijchʼanachinanpi uj noviomanta, chunka sipaskunamantawan parlarqa. Chay rijchʼanachinamanta novioqa, Jesuswan ninakun, imaraykuchus pay waj kutipi uj noviowan kikinchakorqa (Luc. 5:34, 35). Chunka sipaskunataj Jesuspa “juchʼuy tropa” ovejasninmanta kajkunawan ninakunku, nisunman ajllasqa cristianoswan. ¿Imaraykutaj chayta ninchej? Jesuspa rijchʼanachinanpi chay chunka sipaskuna kʼanchanasninkuta japʼichisqata japʼinanku karqa novio chayamunanpaj. Kunanqa imatachus Jesús ajllasqa yachachisqasninman nisqanpi tʼukurina, pay nerqa: “Chumpisniykichej matʼisqa kachunku, kʼanchanasniykichejpis japʼichisqa. Qankunataj, patronninkuta casamientomanta kutimunanta suyajkuna runas jina kaychej”, nispa (Luc. 12:32, 35, 36). Apóstol Pablopis waj kutipi ajllasqa cristianosta, qharej mana chayasqan sipaskunawan kikincharqa (2 Cor. 11:2). Chayrayku nisunman Mateo 25:1-13 versiculospi chunka sipaskunaman yuyaychakusqanqa, ajllasqa cristianospaj kasqanta.

5. ¿Imaynatá yachanchej Jesús rijchʼanachinanpi yuyaychasqan maykʼajpajchus kasqanta?

⁵ Jesús rijchʼanachinanpi yuyaychasqan, ¿maykʼajpajtaj karqa? Chayta entiendenapaj Jesús rijchʼanachinanpi imatachus nisqan yanapawanchej. Pay nerqa: “Casarakoj runa chayamu[n]”, nispa (Mat. 25:10). Kay 15 de julio de 2013 Torremanta Qhawaj revistapi sutʼinchakorqa Mateo 24, 25 capitulospi Jesús kutimuyninmanta, chayamuyninmanta, jamuyninmanta ima parlasqanta. Jesús chaykunamanta parlashaspaqa, manchay ñakʼariy tiempopi juzgananpaj, kay sajra pachata chinkachinanpaj ima jamunanmanta parlasharqa. Chayrayku nisunman Jesuspa rijchʼanachinan kay qhepa tiempopaj kasqanta, astawantaj manchay ñakʼariy tiempopaj.

6. ¿Imatataj Jesuspa rijchʼanachinanmanta yachakunchej?

⁶ ¿Imatá Jesuspa rijchʼanachinanmanta yachakunchej? Chayta yachanapajqa, Mateo 24 capitulopi imatachus Jesús nisqanta qhawarina. Jesusqa allin kamachi yuyayniyojmanta parlarqa. Chay allin kamachi yuyayniyojqa uj juchʼuy qotu ajllasqa cristianos kanku. Paykunataj kay qhepa pʼunchaykunapi Jesuspa yachachisqasninta ñaupajman apashanku. Paykunaman Jesús cheqa sonqosllapuni kanankuta yuyaycharqa. Mateo 25 capitulopitaj chunka sipaskuna rijchʼanachinamanta parlarqa, chay rijchʼanachinawantaj tukuy ajllasqa cristianosman yuyaychasharqa kay qhepa pʼunchaykunapi wakichisqapuni kanankuta, janaj pachapi kausakuyta suyakushasqankuta  mana chinkachinankupaj (Mat. 25:13). Kunantaj chay rijchʼanachinamanta astawan yachakuna, qhawarinataj imaynatachus ajllasqa cristianos chay yuyaychayman jina ruwasqankuta.

7, 8. 1) ¿Imaraykutaj yuyayniyoj sipaskuna wakichisqas kasharqanku? 2) ¿Imayna wakichisqastaj ajllasqa cristianos kashanku?

⁷ Jesusqa rijchʼanachinanpi rikucherqa yuyayniyoj sipaskunalla novio chayamunanpaj rijchʼarisqas, wakichisqas ima kasqankuta. Chay chunkantin sipaskunaqa rijchʼarisqas, kʼanchanasninkuta japʼichisqasta tutantin japʼinanku karqa. Yuyayniyoj sipaskunataj wakichisqas kasharqanku, kʼanchanasninkupi, yurusninkupi ima aceiteta apakusqankurayku. ¿Imaynatataj ajllasqa cristianos Jesuspa kutimuyninpaj wakichikorqanku?

⁸ Ajllasqa cristianosqa kay pachaj tukukuyninkama ruwayninkuta juntʼanankupaj wakichisqas kashanku. Diosta sirvinankuraykutaj kay pachaj imasninta qhesachananku kasqanta reparanku, chaytataj tukuy sonqo ruwanku. Paykunaqa Jehovata cheqa sonqollapuni sirvishanku, mana kay pachaj tukukuynin qayllitapiña kasqanta yachasqankuraykuchu, manaqa Jehovata, Churinta ima munakusqankurayku. Chantapis paykunaqa juntʼa sonqollapuni kanku, manataj kay pachamanta runas jinachu qhapajyayta maskʼanku, nitaj khuchichakunkuchu, nitaj imatapis paykunallapajchu maskʼanku. Yuyayniyoj sipaskuna jinataj kanku, pikunachus kʼanchanasninkuta japʼichisqata japʼispa wakichisqas kasharqanku. Kikillantataj ajllasqa cristianospis pacienciawan suyakushanku novio chayamunanta, novio mana chayamoj jina kajtinpis (Fili. 2:14, 15).

9. 1) ¿Imatataj ajllasqa cristianosman Jesús yuyaycharqa? 2) ¿Imatataj ajllasqa cristianos ruwashanku “casarakoj runa chayamushanña”, nejta uyarispa? (Sutʼinchayninta qhawariy.)

⁹ Yuyayniyoj sipaskunaqa, rijchʼarisqas kasqankurayku wakichisqas kasharqanku novio chayamunanpaj. Jesuspa rijchʼanachinanpeqa novio mana usqhayta chayamusqanrayku, tukuynin sipaskuna “puñuywan atichikuspa, puñurparisqanku”. Kaytaj rikuchin, uj ajllasqa cristiano Jesucristo chayamunanta suyashaspa puñurpariyta atisqanta. Jesusqa sumajta yacharqa, uj runa mana puñurpariyta munaspapis, puñurpariyta chayri creeyninpi llauchʼiyayta atisqanta. Chayraykutaj ajllasqa cristianosqa mana puñurparinankupaj mayta kallpachakorqanku. ¿Imaynamantá? Jesuspa rijchʼanachinanpeqa tukuynin sipaskuna “casarakoj runa chayamushanña” nejta uyarerqanku. Chaywanpis yuyayniyoj sipaskunalla rijchʼarisqas kasharqanku (Mat. 25:5, 6; 26:41). Ajinallatataj cheqa sonqo ajllasqa cristianospis “casarakoj runa chayamushanña”, nisqata kay qhepa pʼunchaykunapi uyarinku. Paykunaqa mana iskayrayankuchu Jesús chayamunanpaj jinaña kashasqanmanta, chayamunanpajtaj wakichisqas kashanku. * Kunantaj qhawarinachej, imapichus Jesuspa rijchʼanachinan tukukusqanta.

10. ¿Imatataj tapurikusunman yuyayniyoj sipaskunawan, mana yuyayniyoj sipaskunawan parlarisqankumanta?

¹⁰ Niraj novio chayamushajtin, yuyayniyoj  sipaskunawan, mana yuyayniyoj sipaskunawan parlarinku (Mateo 25:8, 9 leey). Chay parlarisqankutaj kay tapuyta rikhurichin: “¿Maykʼajtaj Diospa cheqa sonqo kamachisnin yanapata mañakojkunata mana yanaparqankuchu?”. Chayta entiendenapajqa, maykʼajchus chay sipaskuna parlasqankuta entiendenanchej tiyan. Yuyarikunataj chay rijchʼanachinamanta novio, nisunman Jesús manchay ñakʼariy tiempo niraj tukukushajtin runasta juzgananpaj chayamunanta nisqanchejta. Chayrayku nisunman chay rijchʼanachinapi sipaskuna parlarisqankoqa, Jesús juzgananpaj niraj chayamushajtin kasqanta. ¿Imaraykutaj chayta ninchej? Imaraykuchus chay tiempopajqa ajllasqa cristianos wiñaypaj sellasqaña kanqanku.

11. 1) ¿Imataj kanqa niraj manchay ñakʼariy tiempo qallarishajtin? 2) ¿Imatataj yuyayniyoj sipaskuna niyta munasharqanku, mana yuyayniyoj sipaskunaman aceiteta rantikamunankuta nispa?

¹¹ Manchay ñakʼariy tiempo niraj qallarishajtin, Jallpʼapi kaj tukuy cheqa sonqo ajllasqa cristianos wiñaypaj sellasqa kanqanku (Apo. 7:1-4). Sellasqa kasqankoqa cieloman ripunankutapuni rikuchin. Chaywanpis uj ajllasqa cristiano manchay ñakʼariy tiempo niraj qallarishajtin mana wakichisqa kajtin, nitaj cheqa sonqochu kajtin, ¿imataj paymanta kanqa? Mana wiñaypaj sellasqachu kanqa, imaraykuchus cuentanmanta waj cheqa sonqo hermano ajllasqa kanqa. Manchay ñakʼariy tiempo qallarejtin, llulla religionesta chinkachikojtin ima, mana cheqa sonqo kajkunaqa tʼukulla qhepakonqanku. Ichapis chaypiraj reparanqanku Jesuspa kutimuyninpaj mana wakichisqachu kasqankuta. Chay kutipi yanapata mañakojtinku, ¿imataj kanqa? Chayta yachanapaj chunka sipaskunamanta Jesús parlasqanta qhawarina. Yuyayniyoj sipaskunaqa, mana yuyayniyoj sipaskuna aceiteta mañakojtinku, mana qoriyta munarqankuchu, astawanpis “rispa qhatojkunamanta rantikamuychej ari” nispa nerqanku. Chaywanpis khuskan tutaña kasqanrayku mana pimantapis aceiteta rantiyta aterqankuchu. Waj parlaypi, yuyayniyoj sipaskunaqa, mana yuyayniyojkunaman manaña imatapis ruwayta atisqankuta nisharqanku.

12. 1) Manchay ñakʼariy tiempo qallarejtin, ¿imataj kanqa ajllasqa cristianosmanta mayqellanpis manaña cheqa sonqo kajtin? 2) ¿Imataj kanqa mana yuyayniyoj sipaskuna jina kajkunawan?

¹² Manchay ñakʼariy tiempopi cheqa sonqo ajllasqa cristianosqa manaña yanapayta atenqankuchu mana cheqa sonqo kajkunata. ¿Imataj kanqa mana cheqa sonqo kajkunawan? Mana yuyayniyoj sipaskunapi tʼukurina. “Paykuna aceiteta rantej rinankukama, casarakoj runa chayamusqa, yuyayniyoj sipaskunataj paywan khuska casamiento wasiman yaykusqanku, punkutaj wisqʼakapusqa”. Jesús jatun kayninpi niraj manchay ñakʼariy tiempo tukukushajtin chayamuspa, cheqa sonqo ajllasqa cristianosta janaj pachapi tantaykonqa (Mat. 24:31; 25:10; Juan 14:1-3; 1 Tes. 4:17). Jesustajrí, mana cheqa sonqo kajkunata qhesachanqa. Ichapis chay mana cheqa sonqosqa mana yuyayniyoj sipaskuna jina nenqanku: “Wiraqochi, wiraqochi, kicharimuwayku”, nispa. Jesustaj “cheqatapuni niykichej: Qankunataqa mana rejsiykichejchu”, nispa nenqa (Mat. 7:21-23; 25:11, 12).

13. 1) ¿Nisunmanchu ashkha ajllasqa cristianos mana cheqa sonqoschu kanankuta? 2) ¿Imaraykutaj nisunman Jesús ajllasqa cristianospi atienekusqanta? (12 paginapi dibujota qhawariy.)

¹³ ¿Jesús rijchʼanachinanwan nisharqachu ashkha ajllasqa cristianos mana cheqa sonqochu kanankuta, cuentankumantataj wajkuna ajllasqa kanankuta? Mana.  Chayta sutʼita entiendenapajqa, Mateo 24 capitulopi Jesús allin kamachi yuyayniyojman yuyaychasqanpi tʼukurina, payqa yuyaycharqa mana sajra kamachiman tukunanta. Chaywanpis mana nisharqachu chay kamachi sajramanpuni tukunanta. Kikillantaj chay chunka sipaskunamanta rijchʼanachinanwanpis, Jesusqa ajllasqa cristianosman yuyaychashallarqa. Imaynatachus chay rijchʼanachinamanta phishqa sipaskuna yuyayniyoj kayta ajllarqanku, phishqataj mana yuyayniyoj kayta, ajinallatataj sapa uj ajllasqa cristiano rijchʼarisqa kaytachus manachus ajllanan tiyan. Apóstol Pablopis kikillantataj ajllasqa cristianosman yuyaycharqa (Hebreos 10:29, 39 leey; kikinchaytaj Deuteronomio 30:19). Yuyaychasqanqa sutʼi karqa, chantapis cheqa sonqo kanankupi atienekusqanta nerqa. Jesuspis kikillantataj chunka sipaskunamanta rijchʼanachinanpi, ajllasqa cristianospi atienekusqanta rikucherqa. Yachantaj sapa uj ajllasqa cristiano cheqa sonqo kayta, janaj pachapi kausayta japʼiyta ima atisqanta.

14. ¿Imaraykutaj waj ovejasmanta kajkunapis chunka sipaskunamanta rijchʼanachinawan yanapachikunkuman?

¹⁴ Jesús rijchʼanachinanpi yuyaychasqanqa ajllasqa cristianospaj karqa. Chay yuyaychay, ¿waj ovejasmanta kajkunata yanapanchu? (Juan 10:16.) Arí. Jesusqa “wakichisqapuni kaychej”, nerqa. Chantá nillarqataj: “Imatachus qankunaman niykichej, chayllatataj runasmampis nini: Ama puñuspa wakichisqapuni kaychej”, nispa (Mar. 13:37). Jesusqa tukuy yachachisqasnin wakichisqas, rijchʼarisqastaj kanankuta munan. Tukuy cristianostaj, ajllasqa cristianosmanta mayta yachakusunman, imaraykuchus paykunaqa Reinomanta willamuyta kausayninkupi ñaupajman churanku. Yuyarikunachej, mana yuyayniyoj sipaskunaqa, yuyayniyoj sipaskunamanta aceiteta mañakusqankuta. Chaytaj yuyarichiwanchej sapa ujninchejmanta kashasqanta Diosman cheqa sonqo kananchej, rijchʼarisqas kananchej, wakichisqas kananchej ima. Chaytataj ni pi noqanchejrayku ruwayta atinchu. Imaraykuchus tumpamantawan sapa ujninchej Jesusman cuentata qonanchej kanqa, chayrayku wakichisqapuni kananchej tiyan.

15. ¿Imaraykutaj tukuy cristianos janaj pachapi casamiento kananta suyakushanchej?

¹⁵ Jesusqa chunka sipaskunamanta rijchʼanachinanpi casamientomanta parlarqa, tukuy cristianostaj chayta suyashanchej. Armagedón maqanakuy pasasqantawan, ajllasqa cristianosqa Jesucristoj novian kanqanku (Apo. 19:7-9). Jesucristoj casamientonqa kay Jallpʼapi kajkunatapis yanapanqa. Imaraykuchus chay casamientoqa rikuchin, Jesuswan tukuy ajllasqa cristianos Diospa Reinonpi janaj pachamanta kamachimunankuta. Chayrayku ajllasqa cristianos kaspapis chayri manapis sumaj wakichisqa, rijchʼarisqa kanapaj mayta kallpachakuna. Ajinallamanta Jehová, wiñay kausayta qowasunchej.