1. ¿Imaraykutaj Jehovalla agradecekunapaj jina?

JEHOVAMAN agradecekunchej ‘tukuy ima allin kajta, kʼacha kajta’ ruwasqanrayku (Sant. 1:17). Payqa, munakuyniyoj Michejninchej kasqanrayku tukuy ima necesitasqanchejta qowanchej (Sal. 23:1-3). Chantapis llakiykunapi kashajtinchej “jarkʼawanchej, kallpachawanchej” ima (Sal. 46:1). Chayrayku salmista jina niyta atinchej. Pay nerqa: “Tata Diosta agradecekuychej, imaraykuchus payqa kʼachamin, khuyakuynimpis wiñaypajpuni”, nispa (Sal. 106:1).

2, 3. 1) ¿Imaraykutaj Jehová bendeciwasqanchejta mana pisipajchu qhawana tiyan? 2) ¿Ima tapuykunamantaj kay yachaqanapi kutichisun?

² ¿Imaraykutaj agradecekojkunachus, manachus kasqanchejta qhawarikunanchej tiyan? Imaraykuchus kay qhepa pʼunchaykunapi runasqa “mana graciasta qoyta yachajkuna” kananku karqa (2 Tim. 3:2-4). Ashkha runasqa, Jehová imatachus paykunapaj ruwasqanta pisipaj qhawanku. Imaraykuchus kay sajra pachaqa, kapuyniyoj kayta maskʼayman runasta tanqan. Chayraykutaj ashkha runas kapuyninkuwan mana kusisqachu  kanku. Noqanchejpis ajinallapitaj rikukusunman. Israelitas jinataj, Dioswan allinpi kasqanchejta, bendeciwasqanchejta ima pisipaj qhawasunman, manañataj Jehovaman agradecekusunmanchu (Sal. 106:7, 11-13).

³ Sinchʼi llakiykunapi rikukojtinchej, imachus kananpi tʼukurina. Chay llakiynillanchejpi anchata yuyaspaqa, Jehová bendeciwasqanchejmanta qonqapusunman (Sal. 116:3). ¿Imataj tukuy sonqo agradecekunallapajpuni yanapawasun? ¿Imataj llakiykunapi kashajtinchej ñaupajman rinallapajpuni yanapawasun? Chaykunata qhawarina.

4. ¿Imatataj tukuy sonqo agradecekunallapajpuni ruwana tiyan?

⁴ Tukuy sonqo Jehovaman agradecekunallapajpuneqa, tukuy imata noqanchejpaj ruwasqanpi tʼukurinanchej tiyan. Chantapis tʼukurinallanchejtaj tiyan imaynatachus khuyakuyninta, munakuyninta ima rikuchiwasqanchejpi. Uj salmista chayta ruwarqa, Jehová payrayku tukuy imata ruwasqanpi tʼukurispataj, ¡mayta tʼukorqa! (Salmo 40:5; 107:43 leey.)

5. ¿Imaynatá Pabloj ruwasqan, agradecekuyta yachanapaj yanapawanchej?

⁵ Apóstol Pablomanta yachakoyqa, agradecekuyta yachanapaj yanapawanchej. Payqa Jehovaj bendicionesninpi tʼukurej, tukuy sonqotaj Jehovaman agradecekoj. Chantapis yacharqa, ñaupajpi ‘Cristoj contranta rimasqanta, chejnispa qhatiykachasqanta, paypaj millayta parlasqanta’ ima. Ajinata Pablo ruwajtinpis, Jehová, Jesucristo ima paymanta khuyakorqanku, uj sumaj ruwaytataj qorqanku. Chayraykutaj payqa may agradecesqa kasharqa (1 Timoteo 1:12-14 leey). Chantapis Pabloqa hermanosta mayta munakoj, chayraykutaj ashkha kutispi Jehovaman agradecekorqa hermanos kʼacha kaykunasta rikuchisqankumanta, Jehovaman cheqa sonqos kasqankumanta ima (Fili. 1:3-5, 7; 1 Tes. 1:2, 3). Llakiypi kashajtin hermanos yanapasqankumantapis chay rato Jehovaman agradecekoj (Hech. 28:15; 2 Cor. 7:5-7). Chayrayku mana tʼukunapajchu Pablo cristianosman kayta yuyaychasqan: “Diosman graciasta qoychej. [...] Agradecekuychej tukuy sonqo salmoswan, himnoswan, Espirituman jina, takiykunawan ima” (Col. 3:15-17).

6. ¿Imasmantataj qan Jehovaman agradecekunki?

⁶ Jehová imatachus noqanchejrayku ruwasqanpi tʼukurispaqa, Pablo jina ruwasunchej (Sal. 116:12). Pillapis ima bendicionestachus japʼisqanchejta tapuriwajtinchej, ¿imatá kutichisunman? ¿Jehovawan allinpi kasqanchejmantachu parlarisunman? Chayrí, ¿Jesucristo kausayninta qosqanrayku juchanchejmanta perdonasqa kayta atisqanchejmantachu? ¿Llakiypi kashajtinchej hermanos yanapawasqanchejmantachu parlarisunman? Chayrí, ¿qosanchejmanta, warminchejmanta, wawasninchejmanta agradecesqa kashasqanchejtachu nisunman? Chayrayku Jehová tukuy imata qowasqanchejpi tʼukurina. Ajinamantataj sapa pʼunchay Payman agradecekuyta atisunchej (Salmo 92:1, 2 leey).

7. 1) ¿Imaraykutaj Jehovamanta mañakushaspa agradecekunanchej tiyan? 2) ¿Imapajtaj yanapawasun Jehovaman agradecekuy?

⁷ Ima bendicionestachus Jehová Dios qowasqanchejpi tʼukurisun chayqa, Paymanta mañakushaspa agradecekusunchej (Sal. 95:2, 3; 100:4, 5). Ashkha runasqa Jehová Diosman tukuy imata mañakunallankupaj  kʼumuykukunku. Noqanchejtajrí kapuwasqanchejmanta Jehovaman agradecekuspa, Payta kusichisqanchejta yachanchej. Bibliapeqa Diospa kamachisninpa mañakuykunasninkuta tarinchej, Anajta, Ezequiaspata jina, pikunachus mañakuyninkupi Jehovaman agradecekorqanku (1 Sam. 2:1-10; Isa. 38:9-20). Paykuna jina noqanchejpis Jehovaman tukuy imata qowasqanchejmanta agradecekuna (1 Tes. 5:17, 18). Ajinata ruwasunchej chayqa, astawan Jehovata munakusunchej, astawantaj payman qayllaykusunchej (Sant. 4:8).

8. ¿Imataj pisipaj qhawachiwasunman Jehová imatachus noqanchejrayku ruwasqanta?

⁸ Mana graciasta qoyta yachajkuna kasunchej chayqa, Jehovaj khuyakuyninta pisipaj qhawayta qallarisunman. ¿Imaraykú? Juchata herenciata jina ñaupa tatasninchejmanta japʼisqanchejrayku. Paykunaqa mana agradecekojkuna karqanku, chantapis uj paraisopi tiyakorqanku, tukuy ima necesitasqanku tiyaporqa, wiñaypajtaj kausayta aterqanku (Gén. 1:28). Chaywanpis Adanwan Evawanqa kapusqanmanta astawan munarqanku, Jehovaj qosqantataj pisipaj qhawarqanku, munapayayninkuwantaj atipachikorqanku. Ajina kasqankuraykutaj ni imayoj qhepakorqanku (Gén 3:6, 7, 17-19). Mana agradecekuyta yachaj runas chaupipi tiyakusqanchejrayku, Jehová tukuy imata noqanchejrayku ruwasqanmanta agradecekuyta qonqapusunman. Chantapis pisipaj qhawasunman Jehovaj amigosnin kasqanchejta, pachantinpi hermanosniyoj kasqanchejta ima. Chayta ruwaspataj Jehovamanta karunchakusunman (1 Juan 2:15-17). Diosmanta mana karunchakunapajqa, bendeciwasqanchejpi tʼukurinanchej, llajtanpi kasqanchejmantataj agradecekunanchej ima tiyan (Salmo 27:4 leey).

9. ¿Imaraykutaj llakiypi kashaspa Jehovaj bendicionesninpi tʼukurinanchej tiyan?

⁹ Agradecekuyta yachayqa sinchʼi llakiykunata atipanapaj yanapawasunman. Sutʼincharinapaj, qosanchej chayri warminchej wasanchawajtinchej, sinchʼi onqosqa kajtinchej, familianchejmanta pillapis wañupojtin, jatun ñakʼariy kajtin imaqa, ni imata ruwayta atisqanchejta yuyasunman. Ajina llakiypi kaspa Jehovaj bendicionesninpi tʼukurisunchej chayqa, sonqochakusun, kallpachakusun ima. Kunantaj wakin  hermanosninchejpa kausayninkumanta parlarina.

10. ¿Imaynatá Irinata yanaparqa Jehovaj bendicionesninpi sapa pʼunchay tʼukurisqan?

¹⁰ Irina sutiyoj hermanaqa * Norteamericapi precursora regular. Qosanqa anciano karqa, chaywanpis hermananchejta wasanchaytawan saqerparerqa, jinallataj kinsa wawasnintapis. ¿Imataj hermananchejta yanaparqa Jehová Diosta cheqa sonqollapuni sirvinanpaj? Pay nin: “Jehovaman agradecekuni jarkʼawasqanmanta, noqamanta llakikusqanmanta ima. Sapa pʼunchay bendeciwasqanpi tʼukurispaqa, Jehová uj sumaj tata jina sumajta rejsiwasqanta, jarkʼawasqanta ima reparani. Yachanitaj Jehová ni jaykʼaj saqerparinawanta”, nispa. Hermananchej ajina llakiypi rikukuspapis kusisqallapuni karqa, chaytaj yanapan mana llakiyninwan atipachikunanpaj, wajkunata kallpacharinanpaj ima.

11. ¿Imataj yanaparqa uj hermanata onqosqa kashaspapis llakiyninwan mana atipachikunanpaj?

¹¹ Asiapi tiyakoj Kyung-sook sutiyoj hermanaqa, qosanwan khuska iskay chunka watasmanta astawan precursora karqa. Jinallapi pulmonninpi cancerniyoj kasqanta yacharqa, pisi killasllataña kausananta ima. Ñaupajtaqa chʼampaykunasniyoj kajtinkupis ni imamanta onqospa kausakoj kanku. Hermana nin: “Onqosqa kasqayta yachaspaqa mayta llakikorqani. Niñataj imatapis ruwanayta yuyarqani, maytataj manchachikorqani”, nispa. ¿Imataj llakiyninta atipananpaj yanaparqa? Pay nin: “Sapa chʼisi niraj puñukapushaspa, chay pʼunchaypi ima phishqa imaschus noqapaj may allin kasqanmanta Jehovaman agradecekuni. Chaytaj mana llakikunaypaj, Jehovaman munakuyniyta rikuchinaypaj ima yanapawan”, nispa. ¿Imaynatá sapa chʼisi mañakusqan yanaparqa? Pay nin: “Kunanqa yachani llakiypi kashajtinchej Jehová yanapawasqanchejtapuni, chantapis yachallanitaj kausayninchejpi llakiykunamanta nisqaqa, aswan bendiciones kasqanta”, nispa.

12. ¿Imataj Jasonta yanapan llakiyninwan mana atipachikunanpaj?

¹² Jasonqa, África sucursalpi llankʼashan. Paytaj kinsa chunka watas kurajtaña Diospaj astawan llankʼashan. Pay nin: “Qanchis wataña kashan warmiy wañupusqanmanta. Warmiy cancerniyoj kashaspa ñakʼarisqanta sapa kuti yuyarispa mayta llakikoj kani”, nispa. ¿Imataj llakiyninta atipananpaj yanaparqa? Pay nin: “Uj pʼunchay yuyarikorqani, warmiywan khuska uj imata ruwasqaykumanta. Chayta ruwasqaykumantataj Jehovaman agradecekorqani. Chaytaj mana anchata llakikunaypaj yanapawarqa. Chaymantapachataj warmiywan khuska kashaspa imastachus ruwasqaykumanta mana saykʼuspa Jehovaman agradecekullanipuni. Chaytaj mayta yanapawarqa mana llakikunaypaj. Warmiyta mana qonqayta atispapis, Jehovaman mayta agradecekuni qhariwarmi kausayniypi kusisqa kausakusqaymanta, Diosta khuska yupaychasqaykumanta ima”, nispa.

13. ¿Imataj yanaparqa Sherylta llakiyninwan mana atipachikunanpaj?

¹³ Sherylqa 13 watayoj kashaspa ni imayoj qhepakorqa, 2013 watapi sinchʼi muyoj wayra Haiyan sutiyoj, Filipinaspaj ujnin lugarninpi kasqanrayku. Pay nin: “Mana wasiyoj qhepakorqani, familiaymanta wakinpis wañuporqanku”, nispa. Tatasnin, kinsa hermanosnin ima chay sinchʼi muyoj wayrapi wañorqanku. ¿Imataj payta yanapan llakiyninwan mana atipachikunanpaj? Jehovaman agradecekuyta yachasqan, Jehovaj bendicionesninmanta yuyarikusqan ima. Pay nin: “Jehovaj llajtan,  yanapanawaykupaj, kallpachanawaykupaj ima, imastachus ruwasqanta rikorqani. Yacharqanitaj tukuynejpi noqaykurayku hermanos mañakushasqankuta. Mayta agradecekuni Jehovata yupaychasqaymanta, Jehovaqa imatachus necesitasqanchejta qowanchejpuni”, nispa. Arí, Jehová bendeciwasqanchejpi tʼukureyqa, llakiykunasninchejta atipanapaj yanapawasun. Tukuy sonqo agradecekuyta yachaytaj, llakiypi kaspapis ñaupajllamanpuni rinapaj yanapawasunchej (Efe. 5:20; Filipenses 4:6, 7 leey).

14. ¿Imatataj suyakushanchej? (8 paginapi dibujota qhawariy.)

¹⁴ Unaymantapachaña Jehovaj bendicionesnenqa, llajtanta mayta kusichin. Sutʼincharinapaj, israelitasqa Puka Qochapi faraonmanta, soldadosninmantawan kacharichisqas kasqankurayku may kusiywan Jehovaman agradecekorqanku takiykunasta takispa (Éxo. 15:1-21). Kunanpis Diospa kamachisnenqa mayta suyakushanchej llakiykunamanta, onqoykunamanta ima kacharichisqa kayta. Chay suyakuyninchejtataj may jatunpaj qhawanchej (Sal. 37:9-11; Isa. 25:8; 33:24). Jehová enemigosninta chinkachejtin, kay Jallpʼata uj paraisoman tukuchejtin ima, mayta kusikusunchej. Jehovamantaj chayta ruwasqanmanta mayta agradecekusunchej (Apo. 20:1-3; 21:3, 4).

15. ¿Imatataj 2015 watapi ruwananchej tiyan?

¹⁵ Kay 2015 watapi Jehová mayta bendecinawanchejta suyakushallanchejtaj. Ichapis chʼampaykunata atipanallataj kanqa. Jina kajtinpis yachanchej Jehová ni jaykʼaj saqerparinawanchejta (Deu. 31:8; Sal. 9:9, 10). Jehovaqa payman cheqa sonqo kanapaj tukuy ima necesitasqanchejta qollawasunpuni. Chayrayku profeta Habacuc jina ruwana. Pay nerqa: “Chaypachamari kusiywan juntʼa kasaj Salvawajniy Tata Diosrayku. Amapis higo sachʼas tʼikachunkuchu, amapis uvas poqochunchu nitaj olivospis; amapis chajras poqochunkuchu, tropamanta ovejaspis tukukapuchunku, amañapis wakas kachunkuchu corralespi. Chay tukuywampis Tata Diosta yupaychasajpuni”, nispa (Hab. 3:17, 18). Jehová bendeciwasqanchejpi tʼukurina, 2015 watapaj texto nisqanman jinataj ruwana. Chay texto nin: “Jehová Diosta agradecekuychej, imaraykuchus payqa kʼachamin”, nispa (Sal. 106:1).