1. ¿Imaraykú Diospa kamachisnin ashkha ñakʼariykunapi rikukunku?

NIRAJ wiñay kausayta japʼishaspa, ashkha ñakʼariykunapi rikukunanchej, ¿tʼukunapajchu? Mana. Kunallanraj chayri unayña cheqa kajta rejsejtinchejpis, Satanaspa sajra pachanpi tiyakusqanchejrayku, ñakʼariykunapi rikukunchejpuni (Apo. 12:12).

2. 1) Tukuy runas ñakʼariykunapi rikukojtinchejpis, ¿ima ñakʼariykunapiwan Diospa kamachisnin rikukunku? (Patapi kaj dibujota qhawariy.) 2) ¿Pitaj qhatiykachasqa kananchejpaj juchayoj, imaynatá chayta yachanchej?

² Tukuy runas ñakʼariykunapi rikukunchejpuni. Diosta yupaychajkunataj astawanraj (1 Cor. 10:13). Sutʼincharinapaj, Diosman cheqa sonqo kasqanchejrayku qhatiykachasqa kaspa mayta ñakʼarinchej. Jesús yachachisqasninman nerqa: “Kamacheqa patronninmanta mana aswan kurajchu, nispa. Noqatachus chejnikuywan qhatiykachawarqanku chayqa, qankunatapis chejnikuywan qhatiykachallasonqachejtaj”, nispa (Juan 15:20). ¿Pitaj qhatiykachay kananpaj juchayoj? Kuraj Supay. Biblia nin jinataj, Supayqa “phiña león jina” kashan, Diospa kamachisninta “oqoykunanpaj” jina (1 Ped. 5:8). Satanasqa Jehovata wasanchananchejpaj tukuy imata ruwan. Qhawarinachej imapichus apóstol Pablo rikukusqanta.

3-5. 1) ¿Imapitaj Pablo Listrapi rikukorqa? 2)  ¿Imaynatá Pablo creejkunata kallpacharqa astawan ñakʼarinankuta nispa?

³ Apóstol Pabloqa, Diospi creesqanrayku ashkha kutispi qhatiykachasqa karqa (2 Cor. 11:23-27). Sutʼincharinapaj, Listrapi kashaspa uj suchu runata jamperqa, pichus nacekusqanmantapacha suchu karqa. Chayraykutaj chay llajtamanta runasqa Pablota, Bernabetawan dioskuna kasqankuta yuyasqankurayku yupaychayta munarqanku. Paykunataj mana yupaychachikunankupaj mana dioskunachu kasqankuta sutʼincharqanku. Jinallapi judiospa religionninkuta kamachejkuna chayaytawan paykunamanta llullata parlarqanku. Chay runastaj chay llulla yachachejkunata creespa, Pablota rumiswan chʼanqaykorqanku parte wañusqata saqenankukama (Hech. 14:8-19).

⁴ Derbeta waturiytawantaj, Pablo, Bernabé ima “kutirerqanku Listraman, Iconioman, Antioquiaman ima. Chay llajtaspitaj creejkunata kallpacharqanku creesqankupi sinchʼita sayanankupaj, nerqankutaj: Noqanchejqa tukuy imasta ñakʼarinanchejpuni tiyan, Diospa reinonman yaykunanchejpaj”, nispa (Hech. 14:21, 22). Pabloj nisqanqa ichapis uj jina rijchʼawasunman. Imaraykuchus ñakʼarinanchej kasqanta nisqanqa, llakikunapaj jina, manataj kallpachanawanchejpaj jinachu. ¿Imaynatá creejkunata “kallpacharqanku” astawan ñakʼarinankuta nispa?

⁵ Chayta sumajta entiendenapaj, Pabloj nisqanta qhawarina. Payqa mana nerqachu: “Noqanchej tukuy ima ñakʼariykunata muchunanchej tiyan”, nispa. Manaqa, “noqanchejqa tukuy imasta ñakʼarinanchejpuni tiyan, Diospa reinonman yaykunanchejpaj”, nispa nerqa. Rikunchej jina, Pabloqa cristianosta kallpacharqa, ima bendicionestachus cheqa sonqo kasqankurayku japʼinankupi tʼukurichispa. Chay bendicionestataj japʼinankupuni karqa. Jesús nerqa: “Pichus tukukuykama sumajta sayanqa, chay salvasqa kanqa”, nispa (Mat. 10:22).

6. ¿Ima bendicionesta japʼenqanku tukukuykama sinchʼita sayajkuna?

⁶ Tukukuykama sinchʼita sayasunchej chayqa ashkha bendicionesta japʼisun. Sutʼincharinapaj, ajllasqa cristianosqa janaj pachapi ni jaykʼaj wañoj kausayta japʼenqanku, Jesuswan khuskataj kamachimonqanku. “Waj ovejasmanta” kajkunatajrí, wiñay kausayta kay Jallpʼapi japʼenqanku, “maypichus cheqan kawsaylla kanqa” (Juan 10:16; 2 Ped. 3:13). Chay bendicionesta japʼinakamataj, Pablo nin jina imaymana ñakʼariykunapi rikukullasunpuni. Kunantaj qhawarinachej imaynasmantachus cristianos ñakʼarichisqas kasqankuta.

7. ¿Mayqentaj Satanaspa ujnin tojllan? Sutʼinchay.

⁷ Jesús nerqa: “Qankunata japʼichispa, juntasninkuman pusasonqachej, sinagogaspitaj jasutʼisonqachej. Noqarayku kuraj kamachejkunaman, reyesman ima qhatatisonqachej”, nispa (Mar. 13:9). Jesús nisqanman jina wakin cristianostaqa, religionta kamachejkuna chayri gobiernos qhatiykachananku karqa (Hech. 5:27, 28). Pabloj ruwasqanpi watejmanta tʼukurinallataj. Pablo qhatiykachasqa kananta yachaspa, ¿manchachikorqachu? ¡Ni imarayku! (Hechos 20:22, 23 leey.)

8, 9. ¿Imaynatá Pablo qhatiykachasqa kayta mana manchachikusqanta rikucherqa? ¿Imaynatá wakin cristianos Pablo jina ruwanku?

⁸ Pabloqa mana manchachikuspa Supaypa contranpi sinchʼita sayarqa. Pay nerqa: “Chaykunataqa mana manchachikunichu, nitaj wañuytapis; astawanqa kusiywan kawsayniyta tukuchiyta munani Señor Jesucristo kamachiwasqanta juntʼaspa,  willaspataj Diospa qhasilla kʼacha yanapaynin evangeliomanta”, nispa (Hech. 20:24). Rikunchej jina, Pabloqa mana manchachikorqachu qhatiykachasqa kayta. Astawanpis sinchʼita sayayta munarqa. Sumaj willaykunamantataj llakiy kajtinpis, willallaytapuni munarqa.

⁹ Kunanpis Pablo jinallataj ashkha hermanosqa ruwanku. Sutʼincharinapaj, uj suyupi wakin Jehovaj testigosnenqa politicaman mana satʼikusqankurayku, iskay chunka watasta jina carcelpi wisqʼasqas karqanku. Chaypi kashajtinkutaj, mana saqerqankuchu paykunata familiaresninku waturikunankuta. Chantapis paykunaqa tukuy imaymanamanta ñakʼarichisqas, maqasqas ima karqanku.

10. ¿Imaraykú ujllata ñakʼariykunapi rikukuyta mana manchachikunachu tiyan?

¹⁰ Wakin hermanosninchej ujllata ñakʼariykunapi rikukunku. Ajinapi rikukunki chayqa, ama manchachikuychu. Josepi tʼukuriy. Payqa wata runa kananpaj vendesqa karqa, Jehovataj “Joseta tukuy ñakʼariyninmanta orqhorqa” (Hech. 7:9, 10). Joseta jinallataj qantapis yanapasunkiman. Chayrayku ama jaykʼajpis qonqaychu, “cheqan kajman jina kawsajkunata [Jehová] ñakʼariymanta[...] librayta” atisqanta (2 Ped. 2:9). Arí, Jehová yanapanawanchejpi atienekuna. Qhatiykachasqa kashaspataj mana manchachikunachu. Imaraykuchus yachanchej kay sajra pachamanta librayta, wiñay kausayta qoyta ima atiwasqanchejta (1 Ped. 5:8, 9).

11. ¿Qhatiykachasqa kay, mana reparayllata urmachej tojllaswan kikinchu? Sutʼinchay.

¹¹ Wakin kutisqa ichapis mana reparayllata urmachej tojllaspi urmasunman. Qhatiykachasqa kay, mana reparayllata urmachej tojllaswan, ¿kikinchu? Chayta entiendenapaj kaypi tʼukurina. Qhatiykachasqa kayqa uj sinchʼi granizo jina. Imaraykuchus granizoqa chajrata ujllapi apakapun. Mana reparayllata urmachej tojllastaj, chajrapi rikhurej onqoy jina. Imaraykuchus onqoyqa mana reparayllata chajraman yaykun, chayta reparaytawantaj, niña imata ruwayta atinchejchu onqoyta chajramanta chinkachinapaj.

12. 1) ¿Satanás mayqen tojllanwantaj ashkha runasta Diosmanta karunchan? 2) ¿Imaraykutaj Pablo llakisqa kasharqa?

¹² Satanasqa manaña Jehovawan masichakunanchejpaj tukuy imata ruwan. Chaypajqa enemigosninchejwan qhatiykachachiwanchej. Wakin kutistaj mana reparayllata urmachiyta munawanchej. Mana reparayllata tojllanman urmachinawanchejpajtaj, llakiywan atipachikunanchejta munan, imajtinchus ajinapi rikukuspaqa pisimanta pisi Jehovamanta karunchakusunman. Pablopis wakin kutis llakiykunapi rikukusqanta nerqa (Romanos 7:21-24 leey). ¿Imaraykutaj llakiykunapi rikukorqa? Payqa Dioswan allinpi kasharqa. Chantapis Diospa Llajtanta Kamachejkunamanta ujninsina karqa. Imayna kajtinpis, Pabloqa juchasapa runa kasqanrayku mayta ñakʼarerqa. Allin kajta ruwayta mayta munaspapis mana atillarqachu. Pablo jina ñakʼarispaqa, imaynatachus chayta atipananpaj mayta kallpachakusqanta yachay sonqochasonqa.

13, 14. 1) ¿Imaraykú wakin hermanos llakikunku? 2) ¿Pitaj creeyninchejta llauchʼiyachiyta munan, imaraykutaj?

¹³ Ashkha hermanos wakin kutis llakisqas, sonqo pʼakisqas ima sientekunku. Wakin kutistaj pisipaj qhawakunku. Sonqo kʼajaywan willaj Débora sutiyoj precursora nin: “Pantasqasniypi sapa kuti yuyasqayrayku mayta llakikuni. Chaykunapi tʼukurispataj, ni pi munakuyninta rikuchinawanpaj jina kasqayta yuyani, ni Jehová Diospis”, nispa.

 ¹⁴ ¿Imaraykú wakin hermanos Débora jina sientekunku? Ashkha imasrayku. Sutʼincharinapaj, ichá wakinkunaqa paykunamanta, kausayninkumanta ima, mana allintachu yuyanku (Pro. 15:15). Wakinkunatajrí, onqosqa kasqankurayku llakisqallapuni kanku. Imayna kajtinpis, Satanasqa llakisqallapuni kanata munan, pay jina ni ima suyakuyniyoj kasqanchejtataj yuyachiyta munawanchej (Apo. 20:10). Chantapis llakiywan atipachikunanchejta munan. Tukuy imatataj ruwan llakichinawanchejpaj, sonqo pʼakisqa kanapaj ima, ajinamanta Diosmanta karunchanawanchejpaj. Ama qonqaychu Diosman cheqa sonqo kanapaj mayta kallpachakuna kasqanta.

15. ¿Imata ruwanapajtaj mayta kallpachakuna tiyan?

¹⁵ Diosman cheqa sonqollapuni kananchejpaj kallpachakunallapuni. Jehová bendecinawanchejpitaj tʼukurina. Pablo Corintomanta cristianosman nerqa: “Chayrayku mana llawchʼiyaykuchu; kay aycha cuerpoyku astawan mawkʼayashan chaypis, ukhuykupi espirituykoqa sapa pʼunchay astawan kallpachakun. Kay kunan ñakʼarisqaykoqa mana imapischu, uj ratollapajtaj, imaraykuchus chaynejta noqaykupaj kanqa may sumaj wiñay kusiymin”, nispa (2 Cor. 4:16, 17).

16. ¿Imaraykutaj wakichikunanchej tiyan?

¹⁶ Rikunchej jina Satanasqa tukuy imaymana tojllasta churawanchej (Efe. 6:11). Chayrayku Pedroj yuyaychasqanta kasukuna. Pay nerqa: “Payman sinchʼita sayaykuychej creesqaykichejpi”, nispa (1 Ped. 5:9). Kayqa niyta munan sonqonchejta, yuyayninchejtawan allin kajta ruwanapaj wakichinanchej kasqanta. Sutʼincharinapaj, soldadosqa niraj maqanaku qallarishajtin mayta wakichikunku. Noqanchejpis chay  soldados jina wakichikunanchej tiyan. Imaraykuchus mana yachanchejchu aswan qhepaman imapichus rikukunanchejta. Pabloqa Dios yuyaychasqanman jina, Corintomanta cristianosman nerqa: “Qankuna kikiykichej qhawarikuychej, yachanaykichejpaj creeypi sinchʼitachus sayashankichej, chayri manachus, chayta”, nispa (2 Cor. 13:5).

17-19. 1) ¿Imaynatá yachasunman imaynatachus creeypi sayashasqanchejta? 2) ¿Imaynatá waynas, sipaskuna ima, creeyninkumanta sutʼinchankuman?

¹⁷ Pabloj yuyaychasqanman jina ruwanapaj, tapurikusunman: “¿Diosmanta mañakunipunichu? ¿Imapichus creesqayta mana manchachikuspachu sutʼinchani? Sajra ruwayman tanqasqa kajtiy, ¿Diostachu chayri runastachu astawan kasukuni? ¿Tantakuykunaman rinipunichu? Hermanos contraypi juchallikojtinku, ¿usqhayllatachu perdonani, imaynatachus perdonanawankuta suyani ajinata? ¿Ancianosta kasukunichu? ¿Diospa Llajtanta Kamachejkunata kasukunichu?”, nispa

¹⁸ Satanaspa pachanpi tiyakusqanchejrayku, sajra ruwayman tanqasqa kanchej. Ashkha waynas, sipaskuna imaqa, yachaywasipi imapichus creesqankuta mana manchachikuspa, nitaj pʼenqakuspa sutʼinchananku tiyan. ¿Imaynatá paykuna mana manchikuspa sutʼinchankuman? Revistasninchejpi yuyaychakusqanman jina ruwaspa. Sutʼincharinapaj, 2009 julio ¡Despertad! revistapi sumaj yuyaychay llojserqa. Uj cristiano waynata: “¿Imaraykú kausay jinallamanta rikhurisqanpi mana creenkichu?”, nispa compañeron tapojtin, kayta kutichinanta yuyaychakorqa: “¿Imaraykú chaypi creenay tiyan?, ni cientificospis may yachayniyoj kashaspa chaymanta parlaspa uj yuyayllaman chayayta atinkuchu”, nispa. Tatas wawasniykichejta ajina tapuykunaman kutichinankupaj wakichiychej.

¹⁹ Imapichus creesqanchejta sutʼinchayta, Jehová imastachus ruwananchejta kamachiwasqanchejta juntʼayta ima mana atillanchejchu. Sutʼincharinapaj, diantinta llankʼaytawan saykʼusqa kaspa tantakuyman rinapaj mayta kallpachakuna tiyan. Willayman rinapajpis, sutʼiyayta jatarikunapaj kallpachakunallataj tiyan. Chay imasta kausayninchejpi ñaupajman churasunchej chayqa, llakiykunata atipanapaj sumaj wakichisqas kasunchej.

20, 21. 1) Jesuspa wañuyninpi tʼukuriy, ¿imaraykú llakiyninchejta atipanapaj yanapawanchej? 2) ¿Imapajtaj kallpachakunanchej tiyan?

²⁰ ¿Imaynatá Satanaspa tojllasninta atipasunman? ¿Imaynatá llakiykunata atipasunman? Apóstol Pablo jina Jesús noqanchejrayku wañusqanpi tʼukurispa. Pabloqa juchasapa kasqanrayku, wakin kutis ni imapaj valesqanta yuyarqa. Yacharqataj Jesús mana juntʼa runasraykuchu wañusqanta, manaqa juchasapa runasrayku. Chayrayku nerqa: “Diospa Churimpi creesqayraykulla kawsashani. Paymin munakuwarqa, noqaraykutaj wañuchisqa kanampaj jaywaykukorqa”, nispa (Gál. 2:20). Pabloqa Jesuspa wañuyninpi creerqa, yacharqataj paynejllata salvasqa kananta.

²¹ Jesuspa wañuynin sapa ujninchejta yanapawasqanchejpi tʼukureyqa mayta yanapawasunman. Chaytaj mana ninayanchu, llakiyninchej chay rato chinkananta. Wakenqa ichá llakiykunasninchejta atipanapaj paraíso chayamunankama kallpachakuna kanqa. Chayrayku, ¡mayta kallpachakunallapuni! Imaraykuchus tukukuykama sinchʼita sayajlla salvasqa kanqa. Tumpamantawantaj Diospa Reinon allin kausayta apamonqa. Cheqa sonqo runastataj juntʼa runaman tukuchenqa. Chayrayku ñakʼariykunata atipanayki kajtinpis, Diospa Reinonpa kamachiyninpi kausakunaykipaj, ¡mayta kallpachakuy!