KAY Watch Tower Bible and Tract Society of Pennsylvania nisqamanta, watapi uj kuti tantakuy ruwakusqanqa, may suyasqa. Chayrayku 127 tantakuy may suyasqa karqa. Chaytaj Nueva Jersey llajtapi (Estados Unidos) Jatun Tantakuna Wasipi, 1 octubre 2011 watapi ruwakorqa. Jallpʼantinmanta chay tantakuyman wajyarisqa karqanku.

Diospa Llajtanta Kamachejkunamanta hermano Gerrit Lösch, chay tantakuyta qallarerqa. Chaypi kajkunaqa, 85 suyusmanta jina karqanku. Paykunatataj yuyaricherqa Jallpʼantinpi ujchasqa kasqanchej allinpaj qhawachiwasqanchejta, Jehovatataj jatunchasqanta. Chay tantakuypeqa, ujchasqa kaymanta ashkhata parlakorqa.

MEXICOMANTA ALLIN WILLAYKUNA

Chay tantakuypaj wakichikusqanmanta ñaupaj kajqa, Jehovaj llajtan ujchasqa kasqanta rikucherqa. México Betelmanta hermano Baltasar Perla, chay sucursalpi llankʼaj kinsa hermanosta, centroamericamanta sojta sucursales Mexicoman ujchakusqanpi imaynachus rishasqanmanta tapurerqa. Paykunataj, Betel familiapi ashkha suyusmanta tukuy laya hermanos kasqankuta, kallpachanakusqankuta ima nerqanku. Diospis jatun borradorwan fronterasta chinkachinman jina.

Ujchakusqantawanqa, sapa qotuchakuypaj Internetpi correo electrónico nisqata churakorqa. Chayrayku may karupi kaj qotuchakuykunapis México sucursalman parlayta atinku. Ajinamanta niña sucursales kanchu chay suyuspi tiyakoj hermanos, Diospa llajtanmanta mana karupichu sientekunku.

JAPONPI JALLPʼA IKHAKUY KASQAN

Japón sucursalmanta hermano James Linton, marzo 2011 watapi chay suyupi jallpʼa ikhakuy, pʼampaj yakus (tsunamis) ima kasqanmanta parlarqa. Ashkha hermanostaj mana familiaresniyoj, mana kapuyniyoj ima rikhurerqanku. Mana chay llakiypi rikukoj hermanosqa, 3.100 kuraj wasista, ashkha autosta ima qorqanku. Comités Regionales de Construcción nisqamantapis, hermanospa wasisninkuta allinchaypi yanapayta munajkunata kacharqanku, paykunataj mana samarispa llankʼarqanku. Tukuyninkutaj 1.700 kuraj karqanku, maypichus necesitakusqanpitaj llankʼarqanku. Chantapis Tantakuna Wasista, 575 yanapajkuna allincharqanku, chaykunamanta uj qotoqa Estados Unidosmanta karqa.

Chay ñakʼariypi rikukojkunaqa, creeyninkupi kallpachasqa, sonqochasqa ima karqanku. Kallpachaj rej ancianostaj 400 kuraj karqanku. Diospa Llajtanta Kamachejkunapis, iskay superintendentes de zona nisqasta kallpachanankupaj kacharqanku. Chantapis Jallpʼantinmanta hermanos, munakuyninkuta rikuchisqankoqa paykunata sonqochallarqataj.

TRIBUNALESPI ATIPAKUSQAN

Gran Bretaña sucursalmanta hermano Stephen Hardy, waj hermanos ima, tribunalespi atipakusqanmanta parlarqanku. Chay tantakuypi kajkunataj tʼukulla chayta uyarerqanku. Franciamanta  gobiernoqa, chay suyupi Jehovaj testigosninta demandasharqa, 82 millones dolaresta impuestosta pagananpaj. Chay demandapitaj atipakorqa, imaraykuchus Tribunal Europeo de Derechos Humanos nisqa, Convenio Europeomanta 9 Articulota pʼakisqanta nerqa. Chaypeqa, tukuy runas religionniyoj kayta atisqankuta nin. Sentenciaqa, mana qolqeraykuchu demandasqanta rikuchin. Arí, Franciamanta gobiernoqa, Jehovaj testigosnin chay suyupi religión jina kanankuta mana saqerqachu, chinkachiyta munarqa, nitaj paykunamanta allintachu parlarqa. Chaytaj, Conveniomanta 9 Articulota pʼakisqanta rikuchin.

Chantapis Tribunal Europeo nisqaqa, Armeniapi atipanapaj yanapallawarqanchejtaj. Chay tribunalqa 1965 watamantapacha, cuartelman tukuy rinankuta nej. Chaywanpis, Tribunal Europeo nisqamanta aswan kuraj autoridad Gran Sala nisqaqa, religionninkurayku cuartelman mana riyta munajkunata, Convenio Europeo jarkʼasqanta nerqa. Kunantaj Armenia, Azerbaiyán, Turquía ima, chayman jinallataj ruwananku tiyan.

RUWAKUNANPAJ WAKICHIKUSHASQAN

Chantaqa, Diospa Llajtanta Kamachejkunamanta hermano Guy Pierce parlarerqa. Payqa, Nueva York llajtapi, wasis ruwakushasqanpi imaynachus rishasqanmanta, tukuy yachayta munasqankuta nerqa. Uj videopitaj, Wallkillpi, Pattersonpi ima, imaynachus llankʼaykuna kashasqanta, chantá kunallanraj Warwickpi, Tuxedopi (Nueva York) ima, jallpʼasta rantikusqanta rikucherqa. Wallkillpeqa, 300 cuartosniyoj wasita ruwakushan, 2014 watapajtaj tukuyta yuyakun.

Chantapis, Warwickpi 100 hectareaspi wasista ruwakunanpaj wakichikushan. Hermano Pierce nerqa: “Warwickpi, imatachus Jehová ruwakunanta munasqanta niraj sutʼita yachaykuchu, jinapis chay jallpʼata wakichiyta qallarishayku, Jehovaj testigosninpa centralninku chayman astakapunanpaj”, nispa. Warwickmanta 10 kilometrosninman, 20 hectareaspi maquinasta, materialesta ima, jallchʼayta yuyakushan. Hermano Pierce nillarqataj: “Ruwakunanpaj permisoyojña kaspa, chay llankʼayta tawa watapi tukuchayta yuyashayku. Chantataj Brooklynpi kapuwasqanchejta vendeyta atisun”, nispa.

Chantá taporqa: “¿Diospa Llajtanta Kamachejkuna jatun ñakʼariy niraj chamunanta yuyasqankutachu, chay ninayan?”. Payllataj kuticherqa: “Mana. Jatun ñakʼariy llankʼay patapi japʼiwasun chayqa, ¡sumaj kanman!”, nispa.

PHIÑA LEONMANTA ALLINTA QHAWAKUNA

Chantá Diospa Llajtanta Kamachejkunamanta hermano Stephen Lett, 1 Pedro 5:8 textomanta parlarqa, chaypi nin: “Allinta qhawaychej, imaraykuchus enemigoykichej Kuraj Supayqa, phiña león jina qhaparirispa muyuykachasunkichej, mayqellantapis oqoykunampaj”, nispa. Payqa, Satanasta leoneswan Pedro kikinchasqan sumaj kasqanta nerqa.

Leonesqa aswan kallpayoj kanku, usqhaytataj correnku, Satanaspis ajinallataj. Chayrayku mana sapallanchejmanta sayaykuyta chayri ayqeyta munanachu. Jehovaj yanapayninta necesitanchej (Isa. 40:31). Chantapis leonesqa, animalesta ujllata japʼerqonku, Satanás mana japʼerqonawanchejpajqa, imaynasmantachus urmachiyta munawasqanchejta reparananchej tiyan. Uj leonqa, tarukitata chayri puñushaj kʼita burro uñitata qʼalata mitharan, Kuraj Supaypis kikinta ruwayta munawanchej. Chantapis leonpa mitharasqan animalesqa, mana rejsiy qhepakunku. Satanaspa makinpi urmaj cristianospis, “ñawpa kayninkumanta nisqaqa”, nisunman niraj cristiano kashasqankumanta, aswan mana  allin qhepakunku (2 Ped. 2:20). Chayrayku, Bibliaj yuyaychaykunasninman jina ruwaspa, Satanasman sinchʼita sayaykuna (1 Ped. 5:9).

DIOSPA WASINPI KAYTA JATUNPAJ QHAWANA

Diospa Llajtanta Kamachejkunamanta hermano Samuel Herd nerqa: “Jehovaj wasinpi tukuy uj lugarniyoj jina kanchej”, nispa. Arí, tukuy cristianos Diospa “wasinpi” nisunman mana rikukoj templonpi, uj lugarniyoj kanchej. Chay templotaj, Jesuspa wañuyninnejta Dios llajtanpaj cheqa yupaychayta Jallpʼapi sayarichisqanwan ninakun. Chaypi kasqanchejmanta agradecekuna. David jinataj Jehovaj “wasimpi kakuyllatapuni” munanchej “tukuy kawsayni[nchej]pi” (Sal. 27:4).

Hermano Samuelqa, Salmo 92:12-14 versiculosmanta parlaytawan taporqa: “¿Imaynatá Jehová ‘tʼikarichiwanchej’?”, nispa. Chantá kayta sutʼincharqa: “Diosqa, llajtanta allin rinanpaj yanapan, sonqochawanchej, jarkʼawanchej, cheqa yachaytataj qowanchej. Jehovaj wasinpi kasqanchejmanta mayta agradecekuna, wiñaypaj yupaychayta atisqanchejmantataj kusikuna”.

CRISTIANOSQA DIOSPA PALABRANTA JATUNPAJ QHAWANKU

Diospa Llajtanta Kamachejkunamanta David Splane hermanoñataj parlarqa, paytaj cheqa cristianos Diospa Palabranta jatunpaj qhawasqankuta nerqa. Apostolespa tiemponkupeqa, circuncisionmanta chʼampayta Biblia nisqanman jina allincharqanku (Hech. 15:16, 17). Chaywanpis 101 watamanta ñaupajman, cristiano nichikojkuna, Bibliata jatunpaj qhawanankumantaqa, Griegospa yachachiynillanta jatunpaj qhawarqanku. Aswan qhepamantaj, Romapi kamachejkunaj nisqankuta, Iglesiata Jatarichejkunaj nisqankuta ima yachacherqanku, mana Bibliamantachu. Ajinamanta, ashkha llulla yachachiykuna rikhurerqa.

Hermano Davidqa, Jesuspa ujnin rijchʼanachinanmanta parlarqa. Chaytaj, jaqay tiempomantapacha cheqa kajta jarkʼaj ajllasqa cristianos Jallpʼapi kasqankutapuni rikuchin (Mat. 13:24-30). Pikunachus kasqankuta mana sutʼita niyta atisunmanchu. Chaywanpis, Bibliapi mana saphichasqa yachachiykunata, ruwaykunata ima, juchachaj runas karqankupuni.  Wakin kaykuna kanku: arzobispo Agobardo de Lyon (779-840); Pedro de Bruys, Henry de Lausana chantá Valdès (chayri Valdo) (pasaj 900 watas chaynejpi); John Wyclef (1330-1384); William Tyndale (1494-1536), Henry Grew, (1781-1862), chantá George Storrs (1796-1879). Kunanpis Jehovaj testigosnenqa, Bibliaj kamachiykunasninta jatunpaj qhawanku, cheqa yachay Diospa Palabranpi saphichasqa kasqantataj ninku. Chayrayku Diospa Llajtanta Kamachejkunaqa, 2012 watapaj texto Juan 17:17 kananta ninku, chaypi nin: “Nisqasniykeqa cheqapuni kanku”.

DIOSPA LLAJTANPI ESCUELAS NIÑA KIKINCHU

Diospa Llajtanta Kamachejkunamanta hermano Anthony Morris, misionerospaj, precursores especialespaj ima, tijraykuna kasqanta willarqa. Casarasqa Cristianospaj Escuelaqa, wakin suyuspi septiembre 2012 watapi qallarenqa. Galaad Escuelapis niña kikinchu kanqa. Pasaj octubre killamantapacha, Galaad Escuelaman rejkunaqa, chay Escuelaman mana rej misioneros, precursores especiales, qotuchakuykunata waturejkuna, superintendentes de distrito chayri betelitas kanku. Chaymanta graduakojkunaqa, sucursalesman, qotuchakuykunata chayri circuitosta waturej, chayri jatun llajtasman renqanku. Chaykunapitaj Diospa llajtanta sumajta sayachenqanku, kallpachanqanku ima.

Chantapis aswan precursores especiales, karusman renqanku. Kay 1 enero 2012 watamanta, Soltero Cristianospaj Escuelaman, Casarasqa Cristianospaj Escuelaman rejkunamanta wakin, uj tiempopaj precursores especiales sutichasqa kashanku. Paykunataj pisi willajkunalla chayri mana willajkuna kanchu, chay lugaresman kachakun. Uj watamanta kinsa watakama precursores especiales kayta atenqanku. Sumajta llankʼajkunataj precursores especialesllapuni kanqanku.

Kay 2011 watapi uj kuti tantakuy ruwakusqanqa may kusiy karqa. Ruwakuyta munakushasqanta Jehová bendecinanta mañakuyku. Chaykunaqa, Jallpʼantinpi astawan willakunanpaj, ujchasqa kananchejpaj ima kashan. Ajinamanta Jehová jatunchasqa, yupaychasqa ima kanqa.

[18, 19 paginaspi recuadro, dibujos/fotos]

CHEQA SONQO WARMIS

Chay tantakuypeqa phishqa hermanasta tapurikorqa. Pikunachus Diospa Llajtanta Kamachejkunamanta wañupoj hermanoswan casarasqa karqanku. Paykuna kanku: Marina Sydlik, Edith Suiter, Melita Jaracz, Melba Barry, Sydney Barber ima. Paykunaqa, imaynatachus cheqa kajta yachakusqankuta, Diospaj tiempo juntʼasqata llankʼayta qallarisqankuta ima nerqanku. Chantapis imastachus yuyarikusqankumanta, qosankumanta, ima bendicionestachus khuska japʼisqankumanta ima parlarerqanku. Chantataj, chaypi kajkuna may kusiywan 86 takiyta takerqanku, mayqenchus sutichakun “Chiqa sunqu warmis”.

[Dibujos/fotos]

(Patapi) Daniel, Marina Sydlikwan; Grant, Edith Suiterwan; Theodore, Melita Jaraczwan

(Urapi) Lloyd, Melba Barrywan; Carey, Sydney Barberwan

[16 paginapi mapa]

(Publicacionpi qhawariy texto originalta)

Sojta sucursales México sucursalman ujchakunku

MÉXICO

GUATEMALA

HONDURAS

EL SALVADOR

NICARAGUA

COSTA RICA

PANAMÁ

[17 paginapi dibujo/foto]

Warwickpi (Nueva York) Jehovaj testigosninpa sucursalninku ajina kanqa