Diosninchik quwasqanchik tʼinkasta ¿jatunpaqchu qhawanchik?

JEHOVAQA, israelitasta Egiptomanta tʼukunapaqjina kacharichirqa. Diosta yupaychanankupaq ni ima jarkʼasqanmanta, ¡maytachá kusikurqanku! (Éxo. 14:29–15:1, 20, 21.) Chaywanpis, Diospa ruwasqanta usqhayllata qunqaspa, contranpi rimayta qallarirqanku. Chʼin pampapi imasmantachus pisichikuchkasqankupitaq, astawan yuyarqanku. Chayrayku Moisesman nirqanku: “Imapajtaj Egiptomanta orqhomuwarqayku; kay chʼimpi wañurachinawaykupajchu pusamuwarqayku? Kaypi mana mikhuna, nitaj yaku ujyanapaj kanchu. Kay Maná nisqa tʼantapis amisqataña amiwayku”, nispa (Núm. 21:5).

Aswan qhipaman, Davidqa Diosman takirqa: “Noqarí munakuyniykipi atienekuni, sonqoytaj kusikun, imaraykuchus qan salvawanki. Tata Diosman takisaj allinta ruwawasqanmanta”, nispa (Sal. 13:5, 6). Davidqa, Dios munakuyninta achkha kutispi payman rikuchisqanmanta, mana qunqakuqchu. Astawanpis, chaypi sapa kuti tʼukuriq (Sal. 103:2). Jehovaqa, ñuqanchikmanpis achkha tʼinkasta quwanchik, chaywanpis ichá chaykunata pisipaq qhawayta qallarisunman. Chayta mana ruwanapaq, Dios kay tiempopi ima tʼinkastachus quwasqanchikta yuyarina.

Jehovap amigosnin kanchik

Salmista takirqa: “Diosqa payta manchachikojkunamanta ni imata pakanchu; tratontapis paykunaman rejsichenqa”, nispa (Sal. 25:14). Pantaq runas kaspapis, Diospa amigon kayta atisqanchikqa, ¡may sumaq! Chaywanpis, sapa pʼunchay achkha ruwanasniyuq kasqanchikrayku, Dioswan mañakuyniqta parlarinapaq, pisi tiempolla kapuwasunman. Jina kaptintaq, ichapis Diosmanta karunchakuyta qallarisunman. Jehovaqa, amigonchik kasqanrayku, paypi atienekunanchikta, imachus sunqunchikpi kasqanta ima, willakunanchikta munan (Pro. 3:5, 6; Fili. 4:6, 7).  Chayrayku, imaynatachus Diosmanta mañakuchkasqanchikpi tʼukuriyqa, may allin.

Juk wayna Pablo sutiyuq, imaynatachus Diosmanta mañakuchkasqanpi tʼukurirqa, reparasqataq astawan sumaqta mañakunan kasqanta. * Pay nin: “Kutipakuspa kikin rimaykunallawan mañakuchkasqayta repararqani”, nispa. Chayrayku, Índice de las publicaciones Watch Tower nisqapi, mañakuymanta maskʼasqa, rikusqataq Bibliapi yaqha 180 mañakuykuna kasqanta. Chantapis, ñawpa tiempopi Diospa kamachisnin, sunqumantapacha mañakusqankuta reparasqa. Pablo nillantaq: “Chay mañakuykunapi tʼukurispaqa, Diosmanta mañakuchkaspa, imapichus yanapanawanta necesitasqayta, sutʼita willakunay kasqanta repararqani. Chaytaq, Dioswan sunqumantapacha parlarinaypaq yanapawan. Kunanqa, Dioswan mañakuyniqta parlarispa, miskʼichikuni”.

“Horampi mikhunata” japʼinchik

Jehová, yachachiykunasninta mikhunatajina achkhata quwasqanchikqa, may sumaq tʼinka. Chayraykutaq, “tukuy sonqowan sumajta takiri[kunchik]” (Isa. 65:13, 14). Chaywanpis, chiqa kaqmanta ni ima karunchanawanchikpaq, allinta qhawakuna tiyan. Sutʼincharinapaq, Diospa llaqtanta wasanchaqkuna nisqankuta kasusunman chayqa, Jehová “allin kamachi, yuyayniyoj[niqta]” “horampi mikhunata” quwasqanchikta, pisipaq qhawayta qallarisunman (Mat. 24:45-47).

Andrés, jina chʼampaypi rikukusqa, payqa unaytaña Jehovamanta sutʼinchaq karqa. Diosta wasanchaqkuna Internetpi churasqankuta qhaway, mana pantachinanta yuyasqanrayku, paykunawan chʼawkiyachikurqa. Pay nin: “Internetpi churasqankuta ñawiriyta qallarichkaspaqa, Jehovamanta sutʼinchaqkunamanta nisqanku, chiqachus manachus kasqanta yachayta munarqani. Astawan ñawirisqaymanjina, manaña Jehovamanta sutʼinchaq kayta munarqanichu. Chaywanpis, Jehovamanta sutʼinchaqkunamanta nisqankuta aswan sumaqta ukhuncharqani; repararqanitaq chay runas, llulla yachachiqkuna, chʼawkiyaqkuna ima kasqankuta. Chay mana iskayrayanapaqjina nisqankuqa, mana chiqachu kasqa, manaqa munasqankumanjina qʼiwisqa willaykunalla kasqanku. Chayrayku, publicacionesninchikta watiqmanta ñawiriyta qallarirqani, tantakuykunamanpis kutirqani. ¡Mayjina kʼacha yachachiykunata mana japʼikuchkasqanichu!”, nispa. Waliqtachá Andrés qutuchakuyman kutinpurqa.

‘Hermanosninchik’

Jallpʼantinpi hermanoswan juk sunqulla kʼachata kawsakusqanchikqa, Diosmanta sumaq tʼinka (Sal. 133:1). Chayraykuchá Pedro nirqa: “Hermanosta munakuychej”, nispa (1 Ped. 2:17). Arí, Diospa llaqtanpiqa, tatas, mamas, wawqis, ñañas ima, kapuwanchik. Paykunataq munakuyninkuta, yanapayninkuta ima, rikuchiwanchik (Mar. 10:29, 30).

 Chaywanpis, ichá imaraykullapis hermanosninchikwan sientechinakusunman. Sutʼincharinapaq, juk hermano pantaptin, phiñarikusunman chayri paymanta rimarakusunman. Chayta ruwachkasqanchikta reparanchik chayqa, Jehová, kamachisninta pantaq runas kaptinkupis munakusqanta yuyarikuna. Chantapis, “mana juchayoj kasqanchejta ninchej chayqa, noqallanchejtaj chʼawkiyakunchej, cheqa kajtaj mana noqanchejpichu kashan” (1 Juan 1:8). Astawanpis, Pablop kay nisqanta kasukuna: “Ujkuna ujkunawan paciencianakuspa, purajmanta perdonanakuychej” (Col. 3:13).

Ana sutiyuq sipasqa, hermanosninchik may valorniyuq kasqankuta, ñakʼarisparaq yachakurqa. Payqa, Jesuspa rikchʼanachinanpi herencianta usuchiq waynajina, Diospa llaqtanmanta lluqsipurqa, chaywanpis yuyayninman churakuspa, qutuchakuyman kutinpurqa (Luc. 15:11-24). ¿Imatá yachakurqa? Pay nin: “Kutimusqaymantapacha, hermanosta pantaptinkupis munakuywan qhawani. Ñawpaqtaqa, usqhayllata paykunamanta rimarakuq kani. Chaywanpis kunanqa, ni imarayku paykunamanta karunchakusaqchu. Diospa llaqtanpiqa, kusisqa, sunqu tiyasqastaq kawsakunchik. Chaymanta lluqsipuspaqa, wampuschá kasunman, imaptinchus kay saqra pachapta tukuy imanqa, qhasi mana kaqlla”.

Dios quwasqanchik tʼinkasta agradecekuna

Diospa Reinon, tukuy chʼampaykunasninchikta chinkachinanta suyakusqanchikqa, ni imawan kikinchakunchu. Chay Reino imatachus ruwananta yachakuchkaspaqa, ¡mayta agradecekurqanchik! Jesuspa rikchʼanachinanmanta ranqhaq runajinataq ruwarqanchik. Chay runaqa, “uj sumaj perlata taris[pa], tukuy kapusqanta vende[rqa]” (Mat. 13:45, 46). Chay ruwasqanmanta, ¿maykʼaqllapis pesachikurqachu? Jesuspa ni ima nisqanpis, chayta rikuchiwanchikchu. Ñuqanchikpis, Jehová chay sumaq suyakuyta quwasqanchikmanta agradecekunanchikpuni tiyan (1 Tes. 5:8; Heb. 6:19, 20).

Juanapi tʼukurina, payqa 60 watas kuraqtaña Diosta yupaychachkan. Pay nin: “Diospa Reinonmanta runaswan parlariptiyqa, chay suyakuy sunquypi ninajina kʼajarin. Runas, Diospa Reinonmanta yachakuspa mayta kusikusqankuta rikuspataq, sunquy qhallallariwan. Chantá, Bibliamanta yachakuq kawsayninta tikrachisqanta rikuspa, sunquypi nikuni: ‘¡May sumaq willaykunatapuni willachkanchik!’, nispa”.

Arí, Diosqa achkha tʼinkasta quwanchik, chayraykutaq agradecekunanchik tiyan. Kay tiempopi imaymana chʼampaykunawan tinkunchik, nisunman churanakuywan, unquykunawan, machuyaywan, sinchi llakiykunawan, familiamanta pillapis wañupusqanmanta llakiywan, qullqita pisichikuywan ima. Chaywanpis chay chʼampaykunaqa, mana wiñaypaqchu kanqa. Imaraykuchus yachanchikjina, tumpamantawan Diospa Reinonqa, tukuy ñakʼariykunata musuq pachapi wiñaypaq chinkachinqa. Chay tiempopitaq, mana kay tiempopi rikusqanchik tʼinkasllachu kanqa, manaqa astawanraq (Apo. 21:4).

Chaykamaqa, kapuwasqanchik tʼinkasta jatunpaq qhawana. Salmistajinataq tukuy sunqu nina: “Diosníy, ashkha tʼukuna imasta noqaykupaj ruwarqanki, maytataj noqaykumanta yuyarikuwayku. Ni imapis qanwanqa ninakunchu. Sichus chaykunamanta willayman, parlaymantaj chayqa, mana tukuchiyta atiymanchu”, nispa (Sal. 40:5).

[Sutʼinchaynin]

[18 paginapi dibujo/foto]

Jehovaqa, chʼampaykunata atipanapaq achkha tʼinkasta quwanchik