Wawasniykita chʼampayninkuta atipanankupaq yanapay

WAYNUCHUS, sipaskuna ima, achkha chʼampaykunawan tinkunku. Satanaspa pachanpi kasqankuraykutaq, ‘waynaspaq imaymana saqra munayninkuta’ atipanankupaq, mayta kallpachakunanku tiyan (2 Tim. 2:22; 1 Juan 5:19). Astawanpis, ‘Ruwaqninku Diosmanta yuyarikunankupaq’ kallpachakusqankurayku, wakkunaqa asipayanku, pʼinqachiyta ima, maskʼanku (Ecl. 12:1). Víctor sutiyuq hermano, yachaywasipi kasqanmanta, jinata yuyarikun: “Jehovamanta sutʼinchaq kasqayrayku, tukuy imata niwaq kanku, pʼinqachiyta chayri phiñachiyta munawaq kanku. Ajinata ruwawasqankurayku wakin kutiqa, manaña yachaywasiman riyta munaqchu kani”, nispa. *

Waynuchus, sipaskuna ima, kay pachapi chʼampaykunata atipanankupaq, wakjina kanankupaq ima, mayta kallpachakunanku tiyan. Jehovamanta sutʼinchaq Katy sutiyuq sipasqa, ajinata nin: “Tukuypis, wakkuna allinpaq  qhawanawanchikta munanchik”, nispa. Alan sutiyuq cristiano waynuchu, nillantaq: “Compañerosniyqa, semana tukukuyta paykunawan rinaypaq waqyariwaq kanku, ñuqataq riyta munaq kani”, nispa. Wakinkunataq, yachaywasipi atipanaku pukllaypi mayta pukllayta munankuman, chaywanpis, saqra runaswan kaspa kʼacha kaykunasninkuta mana chinkachinankurayku, mana pukllankuchu. Juk sipas hermana Tania sutiyuq, nillantaq: “Yachaywasipi yachachiqkunaqa, atipanaku pukllaypi mayta pukllanayta munaq kanku. Ñuqataq mayta munaspapis, mana niq kani”, nispa.

Tatas, ¿imaynatá wawasniykichikta chʼampaykunata atipanankupaq yanapawaqchik? Jehovaqa, yanapanaykichikta kamachisunkichik (Pro. 22:6; Efe. 6:4). Chayrayku, wawasniykichik Jehovata tukuy sunqu kasukunankupaq, yachachinaykichik tiyan (Pro. 6:20-23). Ajinamanta kay saqra pachapi chʼampaykunata sapallankumanta atipayta yachanqanku.

Llamkʼay, familiata uyway, qutuchakuypi ruwaykunata juntʼay imaqa, mana atikullanchu. Astawanraq, qusayki chayri warmiyki mana yanapasuptinqa, chayri iñiyniykiman churanakuptinqa. Mana chayllachu: Jehovaqa, tatamama wawasninkuta yanapanankupaq tiempochakunankuta munan. Ajina kaptin, wawasniykichikta saqra ruwayman tanqaptinku, pʼinqaypi qhawachiyta munaptinku, wak saqra ruwaykunawan tinkuptinku ima, mana urmanankupaq, ¿imaynamantá yanapawaqchik?

Jehovata rikuchkankumanpisjina qhawanankuqa may allin

Qallarinapaq, waynuchus, sipaskuna ima, ‘mana rikukuq Jehová Diosta rikuchkankumanpisjina’ qhawananku tiyan. Chaypaqtaq, qamkuna yanapanaykichik tiyan (Heb. 11:27). Víctor, pimantachus parlarqanchikña, imaynatachus tatasnin Jehovaman astawan qayllananpaq yanapasqankumanta, jinata nin: “Jehovamanta mañakuypuni may allin kasqanta yachachiwarqanku. Ñuqaqa juchʼuysitumantapacha, niraq puñukapuchkaspa Jehovamanta mañakuq kani. Paytaqa, rikuchkaymanpisjina qhawaq kani”, nispa.  Tatas, ¿wawasniykichikwan khuska Diosmanta mañakunkichikchu? Imamantachus mañakusqankuta, ¿uyarinkichikchu? Jehovata munakusqankuta, ¿rikuchinkuchu? Wawasniykichikta Diosmanta mañakuqta uyarispaqa, cristianojina wiñachkasqankutachus manachus reparankichik.

Bibliata ñawiriyqa, Jehovaman qayllanapaq yanapakullantaq. Katy, nillantaq: “Juchʼuyllaraq kachkaspa tukuynin Bibliata ñawirisqayrayku, wakkuna churanakuwaptinkupis, Jehová yanapawasqanta yachani”, nispa. ¿Wawasniyki, Bibliata ñawirinankupaq tiemponkuta tʼaqankuchu? (Sal. 1:1-3; 77:12.)

Mana tukuy waynuchituschu chayri sipasitaschu, tatasninku yanapasqankumanjina ruwanku. Chantapis, wiñasqankumanjina Diospa llaqtanpi ñawpaqman rinqanku. Chaywanpis, Jehová Diosta rikuchkankumanpisjina qhawanankupaqqa, yanapata necesitanku. Chayrayku tatas, wawasniykichikta, Diospa munayninmanjinapuni maypi kachkaspapis ruwanankupaq yachachinaykichik tiyan (Deu. 6:6-9). Jinamanta, Jehová paykunata munakusqanmanta mana iskaychakunqankuchu.

Wawasniykiwan sumaqta parlariy

Wawasniykiwan parlarispaqa, paykunata yanapallankitaq. Chaypaqtaq tapuriy, kutichiyninku qampaq mana allin kaptinpis, pacienciawan uyariy. Anne, iskay yuqallitusniyuq, jinata nin: “Ñuqaqa, chʼampaykunasninkuta, yuyayninkuta ima, allinta yachanaykama tapurini”, nispa. Wawasniykichik, ¿parlasqankuta uyarinaykichikta yachankuchu? Tania, nillantaq: “Tatasniyqa, sumaqta uyariwaq kanku, imatachus willasqaytapis yuyariq kanku. Compañerosniypa sutisnintapis yuyarikuq kanku, paykunamantataq tapuriwaq kanku, imasmantachus parlarisqaykumantapis yuyarikullaqtaq kanku”, nispa. Rikunchikjina, wawasniykiwan parlasqayki sumaq  kananpaqqa, uyariyta, yuyariyta ima, yachanayki tiyan.

Achkha familiasqa, mikhuchkaspa sumaqta parlarikunku. Víctor nillantaq: “Familiaypiqa khuska mikhunayku, may allin karqa. Mikhuchkaspaqa, teleta, radiota ima, mana japʼichikchu kayku, nitaq ñawiriqchu kayku. Manaqa, sumaqta parlarikuq kayku, chaytaq sunqu tiyasqa kanaypaq, yachaywasipi chʼampaykunata atipanaypaq ima, yanapawarqa. Chantapis, tatasniywan khuska mikhuspa parlariyman yachasqa kasqayrayku, ima chʼampayta atipanaypaqpis, yanapanawankuta mañakuyta atillaq kani”, nispa.

Tapurikuychik: “¿Familiaywan, machkha kutitataq semanapi khuska mikhurikuyku?”, nispa. Semanapi astawan achkha kutista khuska mikhuspaqa, wawasniykichikwan sumaqta parlarinkichik.

Rikuchiykunaqa may allin

Familiapi Diosta yupaychanapaq sapa semana tantakuptiykichikqa, wawasniykichikwan allinta parlariyta atinkichik, chaytaq paykunata chʼampaykunasninkuta atipanankupaq yanapanqa. Alan, nillantaq: “Tatasniyqa, familiapi Bibliata ukhunchachkaptiyku, imaynachus kachkasqaykuta yachayta maskʼaq kanku. Chantapis, chʼampaykunasniykupi yanapanawaykupaqjina, yachachiykunata akllaq kanku”, nispa. Alanpa maman nin: “Familiapi Bibliata ukhunchachkaptiykuqa, wawasniyku chʼampaykunasninkuta atipanankupaq, imaynatachus ruwanankuta rikuchiq kayku. Chaytaq, paykunata iñiyninkuta sutʼinchayta atinankupaq wakichirqa. Chantapis, chʼampaykunapi sinchita sayanankupaq kallpacharqa”, nispa.

Waynuchus chayri sipaskuna, compañerosninku mana allin ruwayman tanqaptinku, wakin kutiqa, imaraykuchus mana kasusqankuta sutʼinchanankupuni kanqa. Chaypaqtaq wakichisqa kananku tiyan. Imaptinchus mana jinata ruwayta atiptinkuqa, chiqa yupaychaypi mana sinchita sayanqankuchu. Chantapis, Jehovamanta sutʼinchaq kasqankurayku asipayaptinku, imatachus ruwanankuta yachananku tiyan. Imaynatachus  kutichinata rikuchiyqa, mana manchachikunankupaq yanapanqa.

Familiapi Diosta Yupaychanapaq Chʼisipi, kay  18 paginapi rikhuriq recuadro nisqanmanjina rikuchiykunata ruwawaqchik. Chʼampaykunata atipanankupaqjinapuni kananpaqtaq, kutichiptinkupis astawan tapuriychik. Chantapis, Bibliapi chiqan runas imaynatachus chayman rikchʼakuq chʼampaykunata atipasqankuta ukhunchariyqa, may allin. Wawasniykichikta wasipi ajinata wakichiptiykichikqa, yachaywasipi chayri mayllapipis, ima chʼampaytapis atipanankupaq yanapankichik.

¿Wasiyki samariyta tarinapaqjinachu?

Wawasniyki, ¿maytachu yachaywasimanta wasiykiman jampuyta munanku? Wasiyki tukuy imamanta jarkʼakuspa, sunqu tiyasqa kawsakunapaqjina chayqa, sapa pʼunchay chʼampaykunata atipanankupaq, wasipi yanapata tarinqanku. Betelpi llamkʼaq hermana nin: “Wasiypiqa chʼampaykunamanta samarikuq kani, chaytaq yachaywasipi kachkaptiy mayta yanapawarqa. Yachaywasipi achkha chʼampaykuna kaptinpis, wasiypiqa tukuy chaykunamanta samarikuq kani”, nispa. Wasiyki, ¿samariyta tarinapaqjinachu? Chayri ‘munakuy, kusikuy, sunqu tiyaykuy’ ima, kananmanta, ¿‘phiñanakuywan, churanakuyllawanchu’ juntʼa kachkan? (Gál. 5:19-23.) Familiaykipi sunqu tiyaykuy mana kaptinqa, wawasniyki wasipi jarkʼayta tarinankupaqjina kananpaq astawan kallpachakuy.

Wawasniykichikta kallpachanankupaqjina allin amigosta maskʼapuspa, chʼampaykunata atipanankupaq yanapayta atillawaqchiktaq. Sutʼincharinapaq, familiajina sunquta kusirichinaykichikpaq, ¿chiqa sunqu hermanosta waqyariwaqchikchu? Ichapis qutuchakuykunata waturiq hermanota, chayri Diospaq astawan llamkʼaq hermanosta, ima mikhunitallatapis qurinaykichikpaq, wasiykichikman waqyariwaqchik. Wawasniykichikwan masichakunankupaqjina misionerosta, chayri betelitasta, ¿riqsinkichikchu? Ichapis paykunawan cartaniqta, internetniqta chayri telefononiqta parlariyta atinqanku. Chayjina amigosqa, Diospa llaqtanpi astawan llamkʼayta munanankupaq yanapanqanku. Timoteotaqa, Pablowan amigos kasqanku mayta yanaparqa (2 Tim. 1:13; 3:10, 11). Chayrayku Timoteoqa, Diospaq llamkʼayta ñawpaqman churarqa (1 Cor. 4:17).

Wawaykiman munakuyniykita rikuchiy

Jehovaqa, waynuchusta, sipaskunata ima, Satanaspa saqra pachanpi kaptinkupis, sinchita sayasqankuta rikuspa, mayta kusikun (Sal. 147:11; Pro. 27:11). Tatas, qamkunapis kikillantataqchá kusikunkichik (Pro. 10:1). Wawasniykichikmanqa, munakuyniykichikta rikuchiychik. Chantapis, Jehovamanta mayta yachakuwaqchik. Payqa, Jesús bautizakuchkaptin jinata nirqa: “Qanmin munasqa Churiy kanki, qanwanqa sonqo juntʼasqa kani”, nispa (Mar. 1:11). Jesusta ajinata Tatan nisqanqa, ¡maytachá kallpacharqa! Imaraykuchus achkhata ñakʼarinan kachkarqa. Tatas, qamkunapis wawasniykichikta munakusqaykichikta, paykunawan sunqu juntʼasqa kasqaykichikta ima, niychik.

Wawasniykichiktaqa, juchaman tanqanankumanta, asipayanankumanta, pʼinqaypi rikhurichinankumanta ima, mana jarkʼayta atinkichikpunichu. Chaywanpis, yanapayta atiwaqchik. Jehovaman astawan qayllanankupaq yanapaychik. Sumaqta paykunawan parlariychik, familiapi Diosta yupaychaytapis, wakichisqa kanankupaqjina ruwaychik, wasiykitaq samariyta tarinankupaqjina kachun. Ajinata ruwaptiykichikqa, wawasniykichik chʼampaykunasninkuta atipanankupaq wakichisqa kanqanku.

[Sutʼinchaynin]

[18 paginapi recuadro, dibujo/foto]

 KUTICHIYTA YACHANANKUPAQ WAKICHIYCHIK

Familiapi Diosta Yupaychanapaq Chʼisipi, kaykunata rikuchiwaqchik.

▸ Yachaywasipi yachachiq, sipas wawaykita atipanaku pukllayman yaykunanta nin.

▸ Churiyki wasiman jampuchkaptin, juknin compañeron cigarrota jaywayta munan.

▸ Wawaykita compañerosnin, juktawan willachkaqta rikuspa maqaykunankuta ninku.

▸ Ususiyki, juknin compañeronwan willaypi tinkukun.

▸ Yachaywasipi wawaykita, tukuypa ñawpaqinpi imaraykuchus banderata mana napaykusqanta sutʼinchananta mañanku.

▸ Wawayki, Jehovamanta sutʼinchaq kasqanrayku juk yuqalla asikuspa tukuy imata nin.

[17 paginapi dibujo/foto]

¿Wawasniyki Bibliata ñawirinankupaq tiemponkuta tʼaqankuchu?

[19 paginapi dibujo/foto]

Imatapis sunquta kusirichinapaq ruwachkaspa, ¿chiqa sunqu hermanosta waqyariwaqchikchu?