¿Imaynatá solteros kusisqa kawsakuyta atinkuman?

“CASARAKUYTAWAN wiñaypaq kusisqas kawsakurqanku”. Ajinata achkha cuentos tukukunku. Kunan tiempopis kikillantataq, peliculaspi, novelaspi ima, casarakuqkunamanta rikuchinku. Chantapis, yaqha tukuyniqpi kuraq waynasta, sipaskunata ima, casarakunankupaq anchata tanqanku. Debby 25 watasniyuq kachkaspa, llakisqa ajinata nirqa: “Runasqa sipaskunapaq casarakuyta maskʼaylla aswan sumaq kasqanta ninku, chantapis sipaskunataqa casarakuy pʼunchaymanta kawsay qallarisqanta yuyachinku”, nispa.

Diosmanta sumaqta yachaq runaqa, mana chay runasjinachu yuyan. Yachanchikjina israelitaspis casarakullarqankutaq, chaywanpis Bibliaqa, solteros, solteras ima kaqkunapis, kusisqa kawsakusqankuta nin. Kunan tiempopi wakin cristianosqa, solterosjina qhipakuyta akllanku, wakinkunataq ima chʼampaypi kasqankurayku mana casarakunkuchu. Chaywanpis, kay tapuypi tʼukurina: ¿atinkumanchu soltero cristianos, cristianas ima, kusisqa kawsakuyta?

Jesusqa juk jatun llamkʼayta japʼisqanrayku, mana casarakurqachu. Chantapis discipulosninman nirqa, paypa qhipanta riqkunamanta wakinkuna, solteros qhipakuyta akllanankuta (Mat. 19:10-12). Chantá nillarqataq, soltero kachkaspa sumaqta llamkʼanankupaqqa, yuyayninkupi, sunqunkupi ima, soltero kasqankuta japʼinanku kasqanta.

Wakinkunaqa Diospaq astawan llamkʼayta munasqankurayku, solteros qhipakuyta akllanku. Jesuspa yuyaychasqan, ¿paykunallapaqchu allin kanman? (1 Cor. 7:34, 35.) Mana. Tʼukurina juk cristiano chayri juk cristiana casarakuyta munaqpi, chaywanpis casarakunanpaqjina qharita chayri warmita mana tarinchu. Juk soltera hermana, Ana sutiyuq 30 watasniyuqjina nirqa: “Llamkʼayniypi juk compañeroy mana suyasqallay munakuwasqanta niwarqa. Chay ratoqa allin rikchʼawarqa, chaywanpis pichus astawan Jehovaman qayllanaypaq yanapanawanpaqjina kaqllawan casarakuyta munasqayrayku, chay yuyayniyta qhisacharqani”.

Anajina achkha hermanaspis cristianosllawan casarakuyta munanku, chayrayku Diosta mana yupaychaq runawanqa, mana casarakunkuchu (1 Cor. 7:39; 2 Cor. 6:14). * Diospa yuyaychasqanta jatunpaq qhawasqankurayku, solteraslla qhipakunku juk tiempota. Ajina kaptin, ¿imaynatataq solteras kusisqa kawsakuyta atinkuman?

Imachus kusichiwasqanchikpi astawan tʼukurina

Wakin kuti mana allin sientekuspa, ¿imatá ruwasunman? Achkha kutispiqa, imatachus yuyasqanchik yanapawasunman. Juk soltera hermana, Carmen 40 watasniyuq nin: “Imaynatachus kawsakusqaywan kusisqa kawsakuni”, nispa. Yachanchikjinataq wakin kutiqa, sapanchik kasqanchikmanta anchata llakikusunman. Chaywanpis achkha hermanos ñuqanchikjina chʼampaykunapi kachkasqankuta  yachayqa, ñawpaqman rinallapaqpuni kallpachawanchik. Jehovaqa, achkha soltero kamachisninta kusisqa payta yupaychanankupaq, ima chʼampaykunatapis atipanankupaq ima yanaparqa (1 Ped. 5:9, 10).

Achkha cristianos, cristianas ima, soltero kayqa allin kasqanta reparanku. Juk soltera hermana, Ester 35 watasniyuq nin: “Ñuqaqa imayna kawsayllapipis kusiyta tariy atikusqanta yuyani”, nispa. Carmen nillantaq: “Mana casarasqa kaspapis, Diospa Reinonta ñawpaqman churaptiy, Jehovaqa tukuy allin imasta quwanqapuni” (Sal. 84:11). Chantá nillantaq: “Kawsayniyqa, mana ñuqa suyasqay jinapunichu, chaywanpis kusisqa kani, kusisqallapunitaq kasaq”, nispa.

Bibliaqa solterosmanta parlan

Jeftep ususinqa, mana soltera kayta yuyarqachu, chaywanpis tatanpa parlasqan juntʼakunanrayku, sipasmantapacha Jehovap wasinpi llamkʼarqa mana casarakuspa. Arí, chay llamkʼayqa mana munayninmanjinachu karqa, nitaq familiayuq kayta atinmanchu karqa, chayraykuchá iskay killatapuni waqarqa. Chaywanpis, Jehovapaq kusisqa tukuy kawsayninpi llamkʼarqa. Bibliaqa, watapi juk kutita Israelmanta achkha warmis, Jeftep ususinta sunquchaq risqankuta nin (Jue. 11:36-40).

Isaiaspa tiemponpi wakin eunucospis, ichá llakisqa sientekurqanku. Bibliaqa, imaraykuchus eunucos kasqankuta mana sutʼinchanchu, chaywanpis Israelpi Diosta yupaychaypi eunucosqa, mana qharisjinachu imatapis ruwayta atirqanku, nitaq casarakuyta, wawasniyuq kayta ima, atirqankuchu (Deu. 23:1). Chaywanpis Jehovaqa, imaynachus sunqunku kasqanta yacharqa, kasukusqankutataq may allinpaq qhawarqa. Wasinpitaq ‘juk chiqata paykunaman qunanta’, chantá ‘wiñaypaq sutita’ qunanta ima nirqa. Wak rimaykunapiqa, Jesuspa Reinonpi wiñay wiñaypaq kusisqa kawsayta qunanta nirqa. Jehovaqa, paykunamanta ni jaykʼaq qunqakunqachu (Isa. 56:3-5).

Jeremiaspa kawsaynintaq mana kikinchu karqa. Profetatajina sutichaytawan Diosqa, manchay saqra pʼunchaykuna kasqanrayku, ruwananta juntʼananpaq, solterolla kakunanta kamachirqa. Jehová nirqa: “Ama casarakuychu, nitaj kay jallpʼapi wawasniyojchu kay”, nispa (Jer. 16:1-4). Bibliaqa, Jeremías imatachus chay kamachiymanta yuyasqanta mana sutʼinchanchu, chaywanpis Jehovap nisqanta juntʼaspa mayta kusikusqanta nin (Jer. 15:16). Chantá watasman Jerusalén llaqtapi, chunka pusaqniyuq killasta may ñakʼariy kasqanmanta Jeremiasqa, solterolla qhipakuy may allin kasqanta repararqa (Lam. 4:4, 10).

Imata ruwaspataq astawan kusikusunman

Bibliaqa chay soltero runasmanta, llamkʼayninkuta juntʼanankupaqtaq Jehová yanapasqanmanta ima, parlan. Kunan tiempopipis sumaq llamkʼaykunata ruwayqa, mayta kusichiwanchik. Diospa Reinonmanta willaytaq sumaq llamkʼay, Bibliaqa achkha warmis chay sumaq willaypi llamkʼanankuta nirqaña (Sal. 68:11). Kunantaq waranqas soltera hermanas llamkʼachkanku. Chay llamkʼasqankuraykutaq may chhika hermanasqa, achkha runasta Diosman qayllanankupaq yanapanku,  chaytaq paykunapaqqa wawasninkujina, Diosmanta juk sumaq bendición (Mar. 10:29, 30; 1 Tes. 2:7, 8).

Juk soltera hermana Loli sutiyuq, 14 watastaña precursorajina llamkʼasqanmanta nin: “Precursorajina llamkʼayqa may sumaq kawsayniypaq. Imaraykuchus mana sapayakunichu achkha ruwanasniyuq kasqayrayku. Diospa Reinonmanta runasman willaspapis astawan kusikuni”, nispa.

May chhika soltera hermanasqa, wak qalluspi parlayta yachakunku, chay qalluta parlaq runasman Diosmanta willamunankupaq. Anaqa, francés qallupi parlaqkunaman willaspa mayta kusikun. Pay nin: “Maypichus tiyakuni chay llaqtapiqa, may chhika runas wak suyusmanta kanku. Wak qallupi parlayta yachakusqayqa, achkha runasman chay qallupi Diosmanta willarinaypaq yanapawan, chaytaq astawan kusichiwan”, nispa.

Solterosqa, mana achkha ruwanasniyuqchu kanku, chayrayku wakinkunaqa, maypichus Reinomanta willaqkuna pisi kanku chayman rinku. Juk hermana 35 watasniyuq, Lidiana sutiyuq, soltera kachkaspa maypichus pisi willaqkuna kanku, chay suyusman willaq risqanmanta nin: “Astawan kallpachakunchik Jehovapaq llamkʼaypi chayqa, amigosta, amigasta ima, tariyta atillanchik. Achkha suyusmanta may sumaq amisgosniy tiyan, paykunawantaq astawan kusisqa kani”, nispa.

Bibliaqa, Felipepta tawa sipas soltera ususisnin, Diospa Palabranmanta runasman sutʼinchasqankumanta parlallantaq (Hech. 21:8, 9). Paykunaqa, Diosta may kusiywan tatanjina yupaycharqanku, Diospa Palabranmanta willasqankuwantaq, Cesarea llaqtamanta cristianosta kallpacharqanku, sunqucharqanku ima (1 Cor. 14:1, 3). Kay tiempopipis achkha soltera hermanas kanku, tantakuykunapi parlarispataq, tukuy hermanosta sumaqta kallpachanku.

Chantapis ñawpa siglopi, Filipos llaqtapi tiyakuq Lidiamanta, sumaqta yachakullasunmantaq (Hech. 16:14, 15, 40). Payqa, ichá soltera chayri viuda karqa, chantapis qutuchakuyta waturikuq hermanosta, apóstol Pablota, Silasta, Lucasta ima, wasinman waqyariq, jinamanta may kusisqa kawsakuq. Kunan tiempopis, ajinata ruwaspa hermanasqa bendicionesta tarinqanku.

Imaynatataq munasqa kayta atisunman

Tukuy imata kusisqa kawsakunanchikpaq ruwaspapis, allinpaq qhawanawanchikta, munakuywan qhawanawanchikta ima munanchik. Ajinata qhawanawanchikpaq, ¿imatá solterosjina ruwasunman? Ñawpaqtaqa, Jehová munakuwasqanchikta, kallpachawasqanchikta, mañakuptinchik uyariwasqanchikta ima, ni jaykʼaq qunqakunachikchu. Rey Davidpis wakin kutispi, “sapallay kashani, phutiypitaj”, nispa nirqa, chaywanpis, Jehovaman qayllaykuyta atisqanta yacharqa (Sal. 25:16; 55:22). Chayrayku ajinata qillqarqa: “Tatay mamay saqerpariwajtinkupis, Tata Diosqa mana saqerpariwanqachu”, nispa (Sal. 27:10). Arí, Diosqa kamachisninta, sumaq amigosnin kanankupaq, payman qayllaykunankupaq ima waqyarin (Sal. 25:14; Sant. 2:23; 4:8).

Kay pachantinmanta Diospa llaqtanpiqa, tatasta, mamasta, hermanosta, hermanasta ima tarisunman, paykunap munakuyninkutaq kawsayninchikpi astawan kusichiwasunman (Mat. 19:29; 1 Ped. 2:17). Achkha soltero hermanos, hermanas imaqa, Dorcasjina ruwaspa kawsayninkupi kusiyta tarinku, pichus  “sumaj ruwanasta ruwaspapuni kaj, wajchastapis yanapaspa” (Hech. 9:36, 39). Juk hermana Loli sutiyuq sutʼinchan: “Mayqin qutuchakuyllamanpis rispaqa, allin amigasta maskʼani, llakisqa kachkaptiy munakuywan sunquchanawankupaq. Astawan sumaq amigasniy kanankupaqtaq, ñuqapis munakuyniyta paykunaman rikuchillanitaq. Pusaq qutuchakuykunapiña kasqaypitaq, may sumaq amigasta tarini. Chay amigasniymantaqa achkha abuelitas, sipasitas ima kanku”. Qutuchakuykunapiqa sapayakuqkuna tiyanku. Paykunamanta interesakusunchik chayqa, sumaqta yanapasunchik, ñuqanchikpis ajinamanta munasqa sientekusunchik (Luc. 6:38).

Diosqa ni jaykʼaq qunqawasunchu

Bibliaqa, saqra pʼunchaykunapi kawsakusqanchikrayku, wakin kuti ima munayninchiktapis qhisachaspa, cristianosjina ruwanapaq kallpachakunanchikta sutʼinchan (1 Cor. 7:29-31). Diosta yupaychaqllawan casarakuy kamachiyta kasukuspa solterolla qhipakuqkunataqa, allinpaq qhawananchik tiyan (Mat. 19:12). Ajinata ruwasqankutaq, solterosta mana llakichinanchu kanman.

Lidianaqa jinata nin: “Jehovata yupaychasqay, paypaq llamkʼasqay ima, kawsayniypi mayta kusichiwan. Chantapis wakin casarasqasta riqsini, paykunamanta wakinkunaqa kusisqas kawsakunku, wakinkunataq mana. Chaytaq mana casarasqa kawsaypichu, kusiy kasqanta rikuchiwan.” Jesusqa, wakkunaman quriypi, Diospaq llamkʼaypi, runa masinchikta yanapariypi ima, kusiy kasqanta nirqa. Chaytataq tukuy cristianos ruwayta atisunman (Juan 13:14-17; Hech. 20:35).

Jehovaqa, payta yupaychanapaq mayta kallpachakusqanchikmanta bendeciwasunchik, chayta yachaytaq kusichiwanchik. Bibliaqa kay jinata nin: “Diosqa cheqan kaspa, mana qonqaponqachu ruwasqasniykichejmanta, jinallataj Diospa sutinta munakusqaykichejmantapis”, nispa (Heb. 6:10).

[Sutʼinchaynin]

[25 paginapi sutʼinchaynin]

“Imaynatachus kawsakusqaywan kusisqa kawsakuni.” (Carmen)

[26 paginapi dibujo/foto]

Loli, Lidiana ima, maypichus Diospa Reinonmanta pisi willaqkuna kanku, chayman willaq rispa kusisqa kawsakunku

[27 paginapi dibujo/foto]

Diosqa, payman astawan qayllaykunankupaq kamachisninta waqyarin