Diospa Gobiernonmanta willajkuna willariwanchej

Kusiy kausayta tarerqa

JESUSQA ovejasninta rejsisqanta nin (Juan 10:14). Llampʼu sonqoyoj runastaj, Jesuspa discipulosninman kʼaskakuyta munanku. Paykunaqa allinta kausakuyta munanku, cheqan kajtataj munakunku. Chay jina runas kusiy kausayta tarinku. Ajina karqa Belgicamanta uj warmiwan. Pay nin:

“Jehovaj testigosnin wasiyman chayamojtinku, manchay llakisqa kasharqani, wañuchikuytataj munasharqani. Testigosqa kay mundomanta tukuy llakiykuna chinkananta niwarqanku, chaytaj mayta kusichiwarqa. Chay problemasta Dios allinchananta niwasqankulla, mana allinchu rijchʼawarqa. Imajtinchus Diospaj phiñasqa kasharqani. Noqaqa pusaj watastaña iglesiaman mana risharqanichu, chayman rejkuna puraj uyas kasqankurayku. Jinapis testigosqa cheqallanta nisharqanku. Mana Dioswanqa manapuni allinta kausayta atisunmanchu.

“Chay hermanosqa uj mashkha kutistawan visitawarqanku, chaymantaqa chinkaporqanku. Mayta llakikorqani. Drogakuyta qallarerqani, cigarrotapis pitaj kani. Sapa día iskay cajastapuni tukoj kani. Chantapis awelituy wañuporqa, paywan parlayta munaspataj, layqeriosmanta librosta rantikorqani. Amallapis chayta ruwaymanchu karqa. Supaykunaqa sapa chʼisi molestawaj kanku. Killasta ajinata manchachiwarqanku.Chayrayku tutasnin sapitay kayta manchachikoj kani.

“Uj pʼunchay puriykacharej rerqani. Jinapis chay kuteqa waj ñanta rerqani. Jinallapi ashkha runasta uj jatun wasita ruwashajta rikorqani. Imatachus ruwashasqankuta qhawariyta munaspataj, paykunaman qayllaykorqani. Chay runasqa Jehovaj testigosnin kasqanku, uj salontataj ruwashasqanku. Chayllapi yuyarikorqani wasiyman jamoj testigosmanta. Sonqoypi nerqani: ‘Kusa kanman tukuy runas paykuna jina kanankoqa’, nispa.

“Mayta munarqani testigos watejmanta visitanawankuta. Chayrayku trabajasharqanku chay hermanoswan parlarerqani. Chantá Diosmanta mañakorqani. Chunka diasninmantaj ñaupaj kutipi parlariwarqa chay hermano, watejmanta wasiyman chamorqa. Pay niwarqa: ‘Bibliata watejmanta estudiayta munawajchu’, nispa. Noqataj tukuy sonqo ‘arí’ nerqani. Hermanoqa reunionesmanpis invitawarqa, noqataj rerqanipacha. ¡Manchay sumajpuni kasqa! Chaypi kajkunaqa may kusisqas kasharqanku, purajmantataj munanakoj kanku. Noqaqa chay jina runasta tariytapuni munarqani.

“Chay diamantapacha reunionesman mana faltakuspa rini. Chaymanta kinsa semananmantaj cigarrotapis qonqaporqani. Layqeriosmanta librosniyta, Satanasmanta musicasniytapis wijchʼuporqani. Demoniostaj niña molestawarqankuchu. Chantá Jehovaj munayninman jina kausakuyta qallarerqani, kinsa killanmantaj predicayta qallarerqani. Chaymanta sojta killanman bautizakorqani, iskay dianmantaj precursora auxiliar kayta qallarerqani.

“Jehová Diosman mayta agradecekuni, ashkhatapuni yanapawasqanmanta. Kunanqa kusisqa kausakuni. ‘Jehová Diospa sutenqa sumaj jarkʼachasqa torre jinapuni’. Chayman ayqekuspa pakakuyta tarini (Proverbios 18:10). Salmo 84:10 versiculota qhelqaj jinataj nini: ‘Uj diallatapis patiosniykipi kayqa aswan sumaj waranqa diasta waj lugarpi kanamantaqa. Noqaqa ajllakuni Diosniypa wasi punkullanpipis kakuyta payta sirvispa, sajra runaspa wasinkupi tiyakunaymantaqa’”.

Kay llampʼu sonqoyoj warmeqa, kusiy kausayta tarerqa. Tukuy pikunachus Jehovata llampʼu sonqowan maskʼajkunapis, kusiy kausayta tarillanqankutaj.