Imastachus Jehová Dios ruwasqanmanta Génesis libropi leespa, reparanchej imatachus ñaupaj kaj runa Adanman nisqanta: “Huertapi tukuynin kaj sachʼasmanta mikhullanki. Allin kajta mana allin kajta yachanamanta sachʼaj poqoynillanta amapuni mikhunkichu. Chay sachʼaj poqoynintachus mikhunki chayqa, wañunki”, nispa (Génesis 2:16, 17). Adán kasukunman karqa chayqa mana wañunmanchu karqa, manaqa Edén huertapi kausakullanmanpuni karqa.

Llakikunapaj jina Adanqa Diosta mana kasukorqachu, nitaj wiñaypaj kausaytapis munarqachu. Astawanpis warmin Eva sachʼaj poqoyninta jaywajtin mikhuykorqa (Génesis 3:1-6). Diosta mana kasukusqankuraykutaj ñakʼarishallanchejpuni. Apóstol Pablo nerqa: “Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Romanos 5:12). Kay versiculopi uj runanejta nispaqa, Adanmanta parlashan. Jinapis, ¿imapitaj juchallikorqa, imaraykutaj wañorqa?

Adanqa yachashaspa Diospa leyninta mana kasukuspa juchallikorqa (1 Juan 3:4). Chayraykutaj Dios nisqanman jina wañunan karqa. Jehovaj kamachisqanta kasukunman karqa chayqa, mana juchallikunmanchu karqa, nitaj wañunmanchu karqa. Nillataj wawasninpis wañunkumanchu karqa. Imaraykuchus Diosqa runasta mana wañunankupajchu ruwarqa, manaqa wiñaypaj kausakunankupaj.

Bibliaj nisqanman jina wañoyqa “tukuy runasman chayarqa”. Jinapis, ¿wañupojtinchej imallanchejpis kausashallanpunichu? Ashkha runas ninkuman imallanchejpis kausashallasqantapuni,  chaytataj alma ninku. Chay ajinapuni kanman chayqa imatachus Dios Adanman nisqanqa llulla kanman. Wañojtinchej imallanchejpis kausashallanmanpuni chayqa, mana juchasapas kasqanchejraykuchu wañushasunman. Biblia nin jina Diosqa “mana jaykʼaj llullakunchu” (Hebreos 6:18). Astawanpis Satanás llullakusharqa Evaman “mana wañunkichejchu” nispa (Génesis 3:4).

Wañupojtinchej imallanchejpis kausashallanpuni nisqa yachachiy mana cheqachu kajtin, ¿maymantaj wañuspa rinchej?

Génesis libroqa imastachus Jehová Dios ruwasqanmanta nin: “Tata Diosqa runata ruwarqa ñutʼu jallpʼamanta, senqanmantaj kawsay samayta samaykorqa. Ajinamanta runaqa kawsayta qallarerqa”, nispa (Génesis 2:7). “Kausayta qallarerqa” nisqa palabraqa hebreo parlaypi néfesch * palabramanta tijrachikun, chaytaj niyta munan samaj.

Bibliaqa sutʼita nin tukuyninchej ‘samaj runas ruwasqa kasqanchejta’, manataj mana wañuyta atej almayoj ruwasqa kasqanchejtachu. Chayrayku Bibliapi ni mayqen versiculosnin ninchu wañojtinchej imallanchejpis kausashallasqantapuni.

Runasqa ninku wañupojtinchej imallanchejpis kausashallasqantapuni. Bibliataj mana chayta yachachinchu. ¿Imaraykutaj ashkha religiones wañupojtinchej imallanchejpis kausashallasqantapuni yachachinku? Chayta yachanapajqa ñaupa tiempopi Egipto llajtamanta parlarina.

Greciamanta qhelqaj Heródoto nerqa: “Ñaupajtaqa egipciosraj wañupojtinchej imallanchejpis kausashallasqanpipuni creerqanku”, nispa.  Chay runa kausasqanmanta 2.500 watas jinaña pasashan. Ñaupa tiempomanta babiloniospis chay yachachiypi creeyta qallarillarqankutaj. Alejandro Magno 332 watapi Jesús niraj jamushajtin, Asiaj wakin lugaresninta japʼikaporqa. Chay tiempopitaj Greciamanta yachayniyoj runasqa chay llulla yachachiyta tukuynejmanña juntʼacherqanku. Pisi tiempollapitaj chay yachachiy tukuynejman chayarqa.

Ñaupa tiempopi judíos ukhupi kay iskay may rejsisqa llulla religiones karqanku: esenios, fariseos ima. Yachacherqankutaj wañupojtinchej imallanchejpis kausashasqanta. Uj libro nin: “Judiosqa creerqanku runa wañupojtin imallanpis kausashasqanpi, griegoswan masichakuspa kikinta yuyayta qallarisqankurayku, astawantaj Platón sutiyoj runaj yachachiyninpi creesqankurayku”, nispa. Chay tiempomanta qhelqaj judío Josefopis nillarqataj chay yachachiy mana Bibliamantachu kasqanta, manaqa “griegospa yachachiynin” kasqanta. Josefoqa chay yachachiyta llulla cuentosta jina qhawarqa.

Grecia suyoj costumbresnin tukuynejman juntʼasqanrayku, cristianos kayku nejkunapis chay llulla yachachiypi creeyta qallarerqanku. Qhelqaj Jona Lendering nerqa: “Platonqa yachacherqa runa wañojtin imallanpis kausashallasqantapuni. Chay yachachiynintaj cristianos kayku nejkunaj yachachiyninwan ujchaykukorqa”, nispa. Ajinamanta iglesia “cristianaqa” runa wañojtin imallanpis kausashasqanta yachachiyta qallarerqa.

Apóstol Pablo nerqa: “Diosmanta jamoj palabraqa sutʼita nin, jamoj tiempopeqa wakinkuna creeymanta tʼaqakunankuta. Chaytataj ruwanqanku, chʼaukiyaj palabrasta, supaykunaj yachachiyninkuta ima uyarisqankurayku”, nispa (1 Timoteo 4:1). Chay nisqanqa cheqapuni. Runa wañojtin imallanpis kausashasqan yachacheyqa supaykunaj yachachiynin. Chaytaqa mana Biblia yachachinchu, manaqa llulla iglesiaslla yachachinku.

Kusikunapaj jina Jesús nerqa: “Cheqa kajtataj rejsinkichej, chay cheqa kajtaj kacharichisonqachej”, nispa (Juan 8:32). Bibliaj yachachiyninmanta cheqa kajta yachakoyqa, llulla yachachiykunamanta, runaj costumbresninmanta ima kacharichiwanchej. Chay llulla imasqa Diospa sonqonta nanachin, jinallataj imaymana religionesta rikhurichin. Chantapis wañusqaspaj imaymana costumbresta ruwaymanta, llulla cuentosmanta ima kacharichiwanchej (“ ¿Maypitaj wañusqas kashanku?”, nisqa recuadrota qhawariy).

Jehová Diosqa mana 70 chayri 80 watasta kausakunallanchejtachu munarqa. Nillataj wañupuytawan cieloman wiñaypaj rinanchejtachu chayri waj lugarman ñakʼarej rinanchejtachu munarqa. Astawanpis munarqa tukuy runas kay Jallpʼapi wiñaypaj kausakunankuta. Chaytaj rikuchiwanchej mayta munakuwasqanchejta, nitaj imapis jarkʼanqachu munayninta juntʼananpaj (Malaquías 3:6). Rey Davidqa Dios yuyaychasqanman jina nerqa: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa (Salmo 37:29).