JESUSQA, yachachisqasninman nerqa kay tiempopi ashkha cosecha kananta (Mat. 9:37; 24:14). Chaytaj juntʼakushan Transcarpatia lugarpi. Chay lugarqa Ucrania suyupi kashan. Chay lugarpa kinsa llajtitasninpi 50 congregaciones tiyan, hermanostaj 5.400 kuraj. * Chantapis chay llajtitaspeqa mana ashkha runaschu tiyakunku, sapa tawa runasmantataj uj Jehovaj testigon.

Chay llajtitaspi tiyakoj runasmanta parlaspa, hermano Vasile nin: “Runasqa Bibliata respetanku, cheqan ruwayta allinpaj qhawanku, familiankuwanpis ujchasqas kausakunku, yanapanakunkutaj. Waj imaspi creespapis, Bibliata leeripojtinchejqa sumajta uyarikunku”, nispa.

Chay lugarespeqa ashkha hermanos tiyakunku. Chayrayku wakin kuteqa, karu lugaresman willaj rinku. Chaymanta parlaspa, uj congregacionqa 134 publicadoresniyoj, predicanankupajtaj 50 wasislla tiyan. Chay congregacionmanta hermanos imatachus ruwasqankuta qhawarina.

Ashkha hermanosqa, karu lugaresman predicaj rinku. Chaymanta parlaspa hermano Ionash, pichus 90 watasniyoj, jinata nin: “Congregacionniypeqa sapa hermano iskay wasisllata predicayku. Mana onqosqa kashaspaqa, 160 kilometrosta jina predicaj rej kani, húngaro parlaypi. Jinapis kunanqa niña karu lugaresman predicaj rinichu”, nispa. Karu lugaresman hermanos predicaj rinankupajqa, mayta kallpachakunanku tiyan. Ionash nin: “Karu lugarman trenpi rinaypajqa 4 de la mañanataña sayarikoj kani, 6 de la tardekama predicaj kani. Chay horasta tren kutimunankama. Karu lugarman predicaj rinaypajqa, semanapi iskay kutita chayri kinsa kutita chay horasta sayarej kani”, nispa. Chay hermano karu lugarman predicaj risqanqa, mana qhasipajchu karqa. Hermano Ionash nillantaj: “Karu lugarman rispaqa may kusisqa karqani. Chay lugarpi tiyakoj uj familiamanpis, Bibliamanta yachacherqani”, nispa.

Chay kinsa llajtitasmanta wakin hermanosqa ichá mana karu lugaresman viajayta atinkuchu. Jinapis tukuy hermanos, machitusña kajkunapis mayta kallpachakunku tukuy runasman Diosmanta willanankupaj. Chayrayku 2017 watapi Jesuspa Wañuyninta Yuyarinapaj tantakuyman, chay kinsa llajtitasmanta khuskanpuni rerqanku. Reparanchej jina, ‘Señorpa ruwayninpeqa ashkha llankʼayllapuni’ tiyan (1 Cor. 15:58).