1. ¿Imatá ruwananchej tiyan Jehová Diospa pʼunchayninpi salvakunapaj?

 BIBLIAQA ‘Jehová Diospa pʼunchaynin’ palabrasta oqharin Jehová ima ratochus enemigosninta chinkachenqa, llajtantataj salvanqa chaymanta parlananpaj. Ñaupa tiempopi Jehovaqa wakin nacionesta castigarqaña (Isa. 13:1, 6; Eze. 13:5; Sof. 1:8). Jehová Diospa pʼunchaynenqa Jatun Babilonia chinkachisqa kajtin qallarenqa, Armagedón guerrapitaj tukukonqa. Chay pʼunchaypi salvakunapajtaj kunanmantapacha wakichikunanchej tiyan. Jesusqa “manchay ñakʼariy” tiempopaj ‘wakichisqapuni kanata’ yachacherqa. Chaywanqa nisharqa wakichisqa kanapaj kallpachakunallatapuni (Mat. 24:21; Luc. 12:40).

2. ¿Imaraykutaj allin kanman Tesalonicensesman Ñaupaj kaj Cartata qhawaykurinanchej?

² Apóstol Pabloqa Tesalonicensesman Ñaupaj kaj Cartapi ashkha kikinchaykunata oqharerqa. Chaywantaj cristianosta yanaparqa Jehovaj jatun pʼunchayninpaj wakichisqa kanankupaj. Pabloqa yacharqa chay pʼunchay chayamunanpaj unayraj faltasqanta (2 Tes. 2:1-3). Jinapis payqa cristianosta kallpacharqa chay diapaj may qayllitapiñapis kashanman jina wakichikunankuta. Noqanchejpis chay nisqanman jina ruwasunman. ¿Imaynatá Jehová Diospa pʼunchaynin jamonqa? ¿Pikunataj chay pʼunchaypi mana salvakonqankuchu? ¿Imatá ruwasunman wakichikunapaj? Qhawarina imatachus apóstol Pablo chay imasmanta nisqanta.

3. ¿Imaynatataj Jehová Diospa pʼunchaynin imaynatachus suwa tuta jamun ajinata jamonqa? (Dibujotawan qhawariy).

³ ‘Imaynatachus uj suwa tuta jamun ajinata jamonqa’ (1 Tes. 5:2). Apóstol Pabloqa Jehová Diospa pʼunchaynin imaynatachus jamunanta kinsa kikinchaykunawan sutʼincharqa. Suwawan kikinchasqantaj ñaupaj kaj kashan. Suwasqa tutan suwayta yachanku, runas mana suyashajtillanku, usqhayllatataj. Ajinallatataj Jehová Diospa  pʼunchaynenqa usqhayllata chayamonqa, casi tukuy runastaj titipacha qhepakonqanku. Ichá wakin cristianospis tʼukulla qhepakusunchej wakin imas usqhayllata pasasqanmanta. Jinapis noqanchejqa mana chinkachisqachu kasunchej, sajra runaslla chinkachisqa kanqanku.

4. ¿Imajtintaj ninchej Jehová Diospa pʼunchaynin onqoj warmej nanaynin jina chayamunanta?

⁴ “Imaynatachus nacechikoj warmiman nanaynin chayarparimun ajinata” (1 Tes. 5:3). Wawanta nacechikunanpajña kashan chay warmeqa, mana yachanchu ima ratopunichus nacechikunanpaj nanaynin chayamunanta. Jinapis sutʼita yachan chay día chayamunantapuni. Chay diataj mana yuyashajtillan chayarpamun, manchay nanaywan, mana aguantayta atinanpaj jinataj. Ajinallatataj mana yachanchejchu ima diachus, ima horachus Jehovaj pʼunchaynin qallarinanta. Jinapis sutʼita yachanchej chay día chayamunantapuni. Chantapis Jehovaqa sajra runasta mana yuyashajtillanku juzganqa, nitaj maymanpis ayqeyta atenqankuchu.

5. ¿Imajtintaj manchay ñakʼariy tiempo waj pʼunchay sutʼiyasqan jina?

⁵ Waj pʼunchay sutʼiyasqan jina. Pabloqa kinsa kaj kikinchayninpi tutanpi suwaj runasmanta parlallarqataj. Jinapis Jehová Diospa pʼunchaynin chayamunantaqa, waj pʼunchay sutʼiyasqanwansina kikincharqa (1 Tes. 5:4). Ichapis uj suwaqa tukuy imata apakapuyllapi yuyashasqanrayku, mana reparakunchu ima horasñachus kasqanta. Ichá mana reparallankupischu sutʼiyaykushasqantaña, sutʼiyaykojtintaj japʼichikunankuta. Manchay ñakʼariy tiempopipis ajinallataj kanqa. Kay tiempomanta runasqa chay suwas jina Diospa chejnisqan imasta tutapi jina ruwashallankupuni. Jinapis Jehovaj pʼunchayninwan japʼichikonqanku. Noqanchejqa mana chay runas jinachu kanchej. Astawanpis sutʼita rikuchinchej Jehovaj pʼunchayninta wakichisqa suyashasqanchejta. ¿Imaynamanta? Imastachus Jehová chejnikun chay imasta mana ruwaspa, kallpachakuspataj ‘tukuy imapi kʼacha kanapaj, cheqan kajta ruwanapaj, cheqa kajman jinataj kausakunapaj’  (Efe. 5:8-12). Chaymantataj Pabloqa iskay kikinchaykunatawan oqharerqa, pikunachus Jehovaj pʼunchayninpi mana salvakonqankuchu chaykunamanta parlananpaj.

6. ¿Imaraykutaj casi tukuy runas puñusqas jina kashanku? (1 Tesalonicenses 5:6, 7).

⁶ ‘Puñojkuna’ (1 Tesalonicenses 5:6, 7 leey). Pabloqa nerqa Jehová Diospa pʼunchayninpi mana salvakojkunaqa puñusqas jina kashasqankuta. Puñuspaqa mana reparakunchejchu imaschus muyuyninchejpi kasqanta, ni tiempo pasasqantapis. Chayrayku ima pasajtinpis mana reparanchejchu, nitaj imatapis ruwayta atinchejchu. Kay tiempomanta casi tukuy runaspis puñushankumanpis jina kashanku (Rom. 11:8). Qhepa pʼunchaykunapi kausakushasqanchej sutʼi reparakojtinpis, paykunaqa mana chaypi creenkuchu. Manallataj creenkuchu manchay ñakʼariy tiempo qayllitapiña kashasqanta. Kay mundopi jatuchaj imas pasajtinraj, wakin runasqa Bibliamanta yachakuyta munanku. Chaytaj tumpatapis ñawisninkuta kicharishankuman jina. Jinapis ashkhasqa chay rato saqepunku, watejmantapis puñurpankuman jina. Wakin runastaj juicio pʼunchay kananpi creenku, jinapis unayraj faltasqanta yuyanku (2 Ped. 3:3, 4). Noqanchejtaj yachanchej, días pasasqanman jina astawanraj rijchʼarisqas kananchej kasqanta.

7. ¿Imajtintaj machasqa jina kanku Dios chinkachenqa chay runas?

⁷ ‘Machajkuna’. Apóstol Pabloqa Dios chinkachenqa chay runasta machasqaswan kikincharqa. Machasqa runaqa yuyay chinkasqa, nitaj imatapis allinta ruwayta atinchu. Ajinallataj sajra runaswanpis. Paykunaqa Diospa nisqasninta mana kasukunkuchu, wañuyman apaj ñanpitaj kausanku. Apóstol Pablotaj cristianosman yuyaycharqa yuyayninkupi kanankuta, amataj machasqas jinachu, manaqa chʼaki sonqos (1 Tes. 5:6). Bibliamanta yachayniyoj runa nisqanman jina chʼaki sonqo kajqa “sonqo tiyasqa, yuyayninpitaj, imata ruwananpajpis allinta qhawarikun chayri tʼukurin, ajinamantataj imatapis allinta ajllan”. ¿Imaraykutaj sonqo tiyasqa kananchej tiyan, manataj manchikuywan atipachikunanchejchu tiyan? Imaraykuchus facilta chhapuykukusunman politicaman, kay mundomanta waj imasmanpis. Jehová Diospa pʼunchaynin qayllaykamusqanman jinataj astawan tanqasqas kasunchej chay imasman chhapukunapaj. Jinapis mana llakikunachu tiyan ajina tanqasqa kaspa imatachus ruwanamanta. Imajtinchus Dios yanapawasun espíritu santonwan sonqo tiyasqa kanapaj, manchikuywan mana atipachikunapaj, allin yuyaywantaj imatapis ajllanapaj (Luc. 12:11, 12).

8. Kay 1 Tesalonicenses 5:8 nisqanman jina, ¿imatá necesitanchej rijchʼarisqas, yuyayninchejpipunitaj kanapaj? (Dibujotawan qhawariy).

⁸ ‘Pecherata, monteratawan churakuna’. Apóstol Pabloqa maqanakuna pʼachayoj sumaj wakichisqa soldadowan kikinchawarqanchej (1 Tesalonicenses 5:8 leey). Guerra kajtin uj soldadoqa maqanakunanpaj wakichisqapuni kanan tiyan. Noqanchejwanpis kikillantaj. Wakichisqa kanapajtaj creeytawan munakuytawan pecherata jina churakuna, suyakusqanchej salvaciontataj monterata jina. Chaykunaqa mayta yanapawanchej.

9. ¿Imaynatá creeyninchej jarkʼawanchej?

⁹ Imaynatachus pechera soldadoj corazonninta jarkʼan, ajinallatataj creeywan munakuywanpis sonqonchejta jarkʼan. Chaykunaqa yanapawanchej Jehovata sirvikunallapajpuni, Jesustapis qhatikunallapajpuni. Creeyniyoj kasqanchejrayku, yachanchej Jehovaqa sonqo kʼajaywan payta maskʼajkunata tʼinkasqanta (Heb. 11:6). Chantapis creeyqa llakiykuna kajtinpis, sonqonchejta aysan Kamachejninchej Jesusta mana wasanchanapaj. Reparayta yachana qhatiykachasqa kaj hermanos, qolqemanta pisisqa hermanos imaynatachus Jehovata kasukullasqankutapuni.  Chayqa yanapawasun creeyninchejta astawan sinchʼiyachinapaj, problemasninchejtapis aguantanapaj. Tukuy imayoj kayta munapayaypi mana urmanapajtaj, pisi imasllawan kausakoj hermanos jina, Diospa Gobiernontataj ñaupajman churaj hermanos jina ruwasunman. b

10. ¿Imatá ruwanchej Diosta munakusqanchejrayku, runa masinchejtapis munakusqanchejrayku?

¹⁰ Chantapis rijchʼarisqas kanapaj, yuyaynillanchejpipunitaj kanapaj munakuyniyoj kayta necesitanchej (Mat. 22:37-39). Diosta munakoyqa chʼampaykuna kajtinpis predicanallapajpuni yanapawanchej (2 Tim. 1:7, 8). Tukuy runasta munakusqanchejraykutaj, tukuy atisqanchejta ruwanchej paykunaman predicanapaj telefononejta, cartanejtapis. Nitaj yuyanchejchu ni jaykʼaj cambianankuta, allin kajtataj ruwanankuta (Eze. 18:27, 28).

11. ¿Imatá ruwanchej hermanosninchejta munakusqanchejrayku? (1 Tesalonicenses 5:11).

¹¹ Hermanosninchejtapis munakullanchejtaj. Chaytataj rikuchinchej purajmanta ‘sonqochanakuspa, kallpachanakuspataj’ (1 Tesalonicenses 5:11 leey). Soldadosqa soldado masisninkuwan purajmanta yanapanakunku. Jinapis guerrapi kashaspaqa, ichapis ujnin compañeronkuta mana munashaspalla imanarpankuman, nitaj jaykʼajpis sajra sonqowan chayta ruwankumanchu. Noqanchejpis ni jaykʼaj hermanosninchejta imatapis sajra sonqowan ruwasunmanchu, nitaj sajrata ruwawasqanchejmanta sajrallawantaj kutichisunmanchu (1 Tes. 5:13, 15). Chantapis hermanosninchejta munakusqanchejta rikuchillanchejtaj congregacionta ñaupajman apajkunata respetaspa (1 Tes. 5:12). Tesalonicamanta congregacionpi piensarina. Chay congregacionqa Pablo paykunaman cartanta qhelqashajtin, niraj uj watayojpischu karqa. Ichapis ancianosqa manaraj chaykama experienciayojchu karqanku, pantarqankutaj, jinapis hermanosqa respetananku karqa. Noqanchejpis manchay ñakʼariy tiempo qayllaykamusqanman jina, astawanrajchá ancianospi atienekunanchej kanqa. Ichapis centralninchejmanta, chayri sucursalmanta hermanospa kamachiykunasninkutaqa mana japʼiyta atisunchu. Chayrayku kunanmantapachaña congregacionninchejmanta ancianosta munakuna, respetanataj. Ima kajtinpis  yuyaynillanchejpipuni kana, nitaj pantasqasnillankuta qhawanachu. Ama qonqanachu Jehovaqa Cristonejta chay hermanosta ñaupajman pusashasqanta.

12. ¿Imaynatá suyakuyninchej yuyayninchejta jarkʼan?

¹² Imaynatachus monteraqa soldadoj umanta jarkʼan, ajinallatataj suyakusqanchej salvacionpis yuyayninchejta jarkʼan. Chay suyakuyninchejmanta mana qonqapusqanchejrayku sutʼita yachanchej kay mundopi imaschus kasqanqa qhasi manakajlla kasqanta (Fili. 3:8). Chantapis suyakuyninchejqa sonqonchejta tiyaykuchin, manchikuywan mana atipachikunapajtaj yanapawanchej. Hermanosninchej Wallacemanta, Laurindamantawan parlarina. Paykunaqa Africapi sirvinku. Ujninpataqa tatan wañuporqa, ujninpatataj maman. Chaytaj kinsa semanasllapi pasarqa. Nitaj nacionninkuman familiankuwan kanankupaj kutipuyta aterqankuchu coronavirus onqoy kasqanrayku. Wallace qhelqarqa: “Kausarimuy kananta suyakusqanchejqa maytapuni yanapawan. Niraj wañupushaspa imaynachus kasharqanku chaypi yuyanaymantaqa, paraisopi kausarimuytawan imayna kusisqachus kanankupi yuyani. Chayta suyakushasqayrayku aswan sonqo tiyasqa kani, nitaj llakiywan atipachikunichu”, nispa.

13. ¿Imatá ruwasunman Jehová espíritu santonta qonawanchejpaj?

¹³ “Ama jarkʼaychejchu Diospa espiritun qankunapi trabajananta” (1 Tes. 5:19). Pabloqa nerqa espíritu santota noqanchejpi trabajajta ama jarkʼananchejta. Mana jarkʼanchejchu chayqa, sonqo kʼajaywan allin kajta ruwayta munanchej, Jehovapaj sinchʼita trabajanapajtaj kallpata japʼinchej (Rom. 12:11). ¿Imatá ruwasunman Jehová espíritu santonta qonawanchejpaj? Paymanta mañakuna, Palabranta estudiana, llajtanmantataj ama karunchakunachu. Chayta ruwasun chayqa, ‘Diospa espiritunpa poqoyninta’ kausayninchejpi rikuchisun (Gál. 5:22, 23).

14. ¿Imatataj ruwananchej tiyan Diospa espiritunta japʼinallapajpuni? (Fototawan qhawariy).

¹⁴ Jehovaqa espíritu santonta qowanchej. Jinapis “ama jarkʼananchejchu tiyan Diospa espiritun noqanchejpi trabajananta”. Jehová espíritu santonta qonawanchejpajqa kausayninchej, yuyayninchejpis llimphu kanan tiyan. Sichus sajra yuyaykuna noqanchejpi saphichakunanta saqesunman, chayman jinataj ruwasunman chayqa, espíritu santota niña japʼisunmanchu (1 Tes.  4:7, 8). ¿Imatawán ruwananchej tiyan? Pablo nerqa: “Diospa sutʼinchasqantaqa ama pisipaj qhawaychejchu”, nispa (1 Tes. 5:20). Kay versiculopi ‘sutʼinchasqanta’ nispaqa, Jehová Dios espíritu santonnejta imastachus willawanchej chaymanta parlashan. Chay willaykunamanta ujtaj kashan Jehová Diospa pʼunchayninmanta, qayllitapiñataj kashasqanmanta willaykuna. Noqanchejqa mana yuyanchejchu Jehová Diospa pʼunchayninpaj ashkharaj faltasqanta, chayri Armagedonta mana rikunanchejta. Astawanpis chay pʼunchay chayamunallantaña mayta suyakushanchej chayri chay yuyaylla kashanchej. Chayrayku ‘Diosta tukuy sonqo yupaychasqanchejta ruwasqasninchejwan’ rikuchinchej, llimphu kausayniyojllapunitaj kanchej (2 Ped. 3:11, 12).

15. ¿Imatá ruwasunman ni piwan chʼaukiyachikunapaj? (1 Tesalonicenses 5:21).

¹⁵ Tumpamantawan Diospa enemigosnenqa imaynallamantapis nenqankupuni “tukuy imapis allillan, ni imamanta llakikuna kanchu” nispa (1 Tes. 5:3). Tukuynejpi supaykunaj willayninku muyuyta qallarenqa, chaywantaj casi tukuy runas engañasqa kanqanku (Apo. 16:13, 14). Noqanchejrí, ¿engañachikusunchu? ‘Tukuy imata allinta qhawaykuyta’ yachasunchej chayqa, mana engañachikusunchu (1 Tesalonicenses 5:21 leey). Griego parlaypi ‘allinta qhawaykuy’ palabraqa niyta munan metalesta sumajta qhawaykuy, valorniyoj metalchus manachus kasqanta yachanapaj. Noqanchejpis chayman rijchʼakojllatataj ruwananchej tiyan. Imatachus leesqanchej, imatachus uyarisqanchej cheqapunichus manachus kasqanta yachanapajqa allinta qhawaykunanchej tiyan. Tesalonicensesqa chayta ruwanankupuni karqa. Noqanchejtaj astawanraj chayta ruwananchej kanqa manchay ñakʼariy tiempo qayllaykamusqanman jina. Chayrayku mana ima nisqankutapis creeykullanchejchu. Astawanpis allinta piensarispa tantearinchej imatachus uyarisqanchej chayri leesqanchej Bibliaj nisqanwan, Jehovaj llajtan nisqanwanpis churanakusqantachus manachus. Ajinamanta supaykunaj willaykunasninkuwan mana chʼaukiyachikusunchu (Pro. 14:15; 1 Tim. 4:1).

16. ¿Ima sumaj suyakuytaj tiyapuwanchej, chanta imatataj ruwananchej tiyan?

¹⁶ Yachanchej Jehovaj llajtan manchay ñakʼariy tiempopi salvakunanta. Jinapis mana yachanchejchu imachus sapa ujninchejwan qʼaya kananta (Sant. 4:14). Manchay ñakʼariy tiempota kausashaj pasajtinchejpis chayri ñaupajta wañupojtinchejpis, Jehovaqa payta kasukojtillanchejpuni wiñay kausaywan tʼinkawasun. Ajllasqa cristianosqa Cristowan khuska cielopi kanqanku, waj ovejasmanta kajkunataj kay jallpʼapi paraisopi kausakonqanku. Chaykamataj amapuni qonqakunachu may sumaj suyakuyniyoj kasqanchejmanta, Jehová Diospa pʼunchayninpajtaj wakichisqapuni kana.