1, 2. 1) ¿Imatataj Roberto reparakusqa? 2) ¿Imatataj chanta Roberto ruwasqa?

HERMANO Robertoqa 15 watasniyoj kashaspa bautizakorqa. Pay nin: “Jehová Diosman astawan qayllaykunaypaj mana kallpachakojchu kani. Nitaj ima sajratapis ruwajchu kani. Reunionesmantaj rillajpuni kani. Wakin kutitaj precursor auxiliar karqani. Chaykunata ruwaspapis mana sonqo juntʼasqachu kasharqani”, nispa.

² Robertoqa casarakusparaj reparakorqa, imajtinchus mana sonqo juntʼasqachu kashasqanta. Payqa señoranwan Bibliamanta tapunakuspa pujllayta yachaj. Roberto Bibliamanta tapojtin, señoranqa chay rato kutichej. Robertorí mana yachajchu imatachus kutichinanta. Chayrayku Roberto sonqonpi nikusqa: “Kayqa pʼenqay, ¿imaynatataj qosa jina señorayta yanapasajri? Bibliata sumajta estudianay tiyan”, nispa. Chayrayku Robertoqa Bibliata sumajta estudiarqa. Pay nin: “Bibliata mayta estudiasqayrayku, sumajtaña entienderqani. Jehová Diosmanpis astawan qayllaykorqani”, nispa.

3. 1) ¿Imatataj Robertoj experiencianmanta yachakusunman? 2) ¿Imastataj kay yachaqanapi yachakusunchej?

³ Robertoj experiencianmantaqa, mayta yachakusunman. Ichá noqanchejpis Roberto jina Bibliamanta wakin imasta yachanchej, tantakuykunaman, predicacionmanpis rinchej. Jinapis, ichá  Jehová Diosman astawan qayllaykunapaj mana kallpachakushanchejchu. Chayri ichá Jehová Diosman astawan qayllaykunapaj tukuy imataña ruwarqanchej. Jinapis ichá reparakunchej wakin cambiosta ruwananchejraj kasqanta (Fili. 3:16). Chayrayku kay yachaqanapeqa, yachakusunchej Dios jinachus manachus yuyashasqanchejta. Yachakullasuntaj imastachus ruwanata astawan Diosman qayllaykunapaj. Chantapis yachakusunchej, Jehová Dios jina yuyay kausayninchejpi mayta yanapanawanchejta.

4. ¿Pikunataj Efesios 4:23, 24 versiculosta kasukunanku kasqa?

⁴ Diosmanta yachakushaspaqa, ñaupa kausayninchejta pisimanta pisi saqeporqanchej. Chantataj bautizakorqanchej. Jinapis Bibliaqa niwanchej: “Qankunaqa yuyayniykichejta mosojyachinallaykichejpuni tiyan”, nispa (Efe. 4:23, 24). Juchasapa runas kasqanchejrayku, kʼacha runas kanapaj cambiosta ruwanallanchejpuni tiyan. Jehová Diosta unaytaña sirvispapis, Diosman astawan qayllaykunapaj kallpachakunallanchejpuni tiyan (Fili. 3:12, 13).

5. Creeypi sumaj sayasqachus manachus kashasqanchejta yachanapaj, ¿imastataj tapurikusunman?

⁵ Jóvenes chayri machitus kaspapis, sumajta qhawarikunanchej tiyan, creeypi sumaj sayasqachus manachus kashasqanchejta. Chaypajqa kaykunata tapurikusunman: “¿Imaynatachus kausakusqaypi yachakunchu Diospa munayninman jina kausakushasqay? ¿Kallpachakushanichu Jesucristo jina yuyanaypaj? ¿Tantakuykunapi kusisqachu kani chayri phiñasqallachu? ¿Parlasqaypi reparakunchu Diospa Gobiernonta ñaupajman churashasqayta? ¿Bibliata estudianipunichu? Bibliaj nisqanman jina, ¿maychus kajtachu vestikuni, kʼachanchakuni ima? ¿Pillapis yuyaychariwajtin kasukunichu? Juchaman tanqasqa kashaspa, ¿imatataj ruwani? ¿Wiñay tukusqa cristiano jinachu imatapis ruwani?”, nispa (Efe. 4:13).

6. ¿Pikunataj yanapawasunman Dios jinachus manachus yuyashasqanchejta reparakunanchejpaj?

⁶ Wakin kuteqa hermanosninchej yanapawasunman, Dios jinachus manachus yuyashasqanchejta reparakunapaj. Apóstol Pablo nisqanman jina, runa jinalla yuyajqa Diospa atiyninmanta jamoj imasta qhesachan. Kausayninpis allillan kasqanta yuyan. Dios jina yuyaj runarí tukuy imata allinta reparayta atin. Chantapis yachan sajra runaspa ruwasqasninkuta Jehová Dios chejnisqanta (1 Cor. 2:14-16; 3:1-3). Mayqen hermanochus mana allintachu purishasqantapis, Cristo jina yuyaj ancianosqa reparankupacha. Chayrayku ancianosqa paykunata yanapankupacha. Noqanchejtapis ancianos yanapawajtinchej, yuyaychariwajtinchej ima, kasukunapacha. Ancianosta kasukuspaqa, Jehová Diosman astawan qayllaykusunchej (Ecl. 7:5, 9).

7. ¿Dios jina yuyanapaj Bibliallatachu rejsina kasqa?

⁷ Dios jina yuyanapajqa, mana Bibliallatachu rejsinanchej tiyan. Rey Salomonmanta parlarina. Payqa Jehová Diosmanta sumajta yacharqa. May yachayniyojtaj karqa. Wakin nisqasninpis Bibliapi qhelqasqa kashan. Jinapis Jehová Diosmanta karunchakorqa, sajra imastataj ruwarqa (1 Rey. 4:29, 30; 11:4-6). Chayrayku Dios jina yuyanapajqa, mana Bibliallatachu rejsinanchej tiyan, manaqa creeypi sinchʼi sayasqa kananchej tiyan (Col. 2:6, 7). Kunantaj yachakuna imaynatachus creeyninchejta sinchʼiyachinata.

8, 9. 1) ¿Imastaj yanapawasunman wiñay tukusqa cristianos kanapaj? 2) ¿Ima yuyaywantaj Bibliata estudiananchej kanman? (23 paginapi fotosta qhawariy).

⁸ Apóstol Pabloqa, tiemponmanta cristianosman jinata nerqa: “Ñaupajman rinallapuni wiñay tukusqa runasman tukunapaj”, nispa  (Heb. 6:1). Wiñay tukusqa cristianos kanapajqa, ‘Diospa munakuyninpi kallaychikpuni’ nisqa librota estudiasunman. Kay libroqa, yanapawasunchej Bibliaj yuyaychaykunasninman jina kausakunapaj. Chay librota estudiarqanchejña chaytaj, waj publicacionesta estudiasunman, creeypi sinchʼita sayanallapajpuni (Col. 1:23). Chantapis tʼukurinanchej tiyan imaynatachus yachakusqanchejman jina kausakunanchejpi. Chaypajtaj Jehová Diospa yanapayninta mañakuna.

⁹ Bibliataqa, Diospa munayninta ruwayta munasqanchejrayku estudiananchej tiyan (Sal. 40:8; 119:97). Chayta ruwaspaqa, “Diospa munayninpa contranpi kaj imasta, kay mundoj sajra imasninta munapayayta ima” qhesachayta atillasunchej (Tito 2:11, 12).

10. ¿Imatataj jóvenes tapurikunanku kanman?

¹⁰ Betelpi sirvej hermanomanta parlarina. Payqa uj pʼunchaypaj jatun tantakuyman rispa, bautizakunankupajña kashanku chay joveneswan parlariyta yachan. Tapuriytataj yachan bautizakuytawan imastachus ruwayta munasqankuta. Pay nin: “Reparani chay jóvenes bautizakuytawan Jehová Diospaj astawan llankʼayta munasqankuta. Wakenqa precursores kayta munanku. Wakintaj Betelman riyta munanku, wakinrí Tantakuna Wasista ruwaysikuspa yanapakuyta munanku. Wakin jovenestaj pisi hermanoslla tiyanku chayman yanapakoj ripuyta munanku. Jinapis wakin jovenesqa, mana yachankuchu imatachus ruwanankuta”, nispa. Chayrayku allin kanman jóvenes kayta tapurikunanku: “¿Tantakuykunaman, predicacionmanpis tatasniyta kusichinayraykullachu rini, chayri Jehová Diosta munakusqayraykuchu?”, nispa. Arí, jóvenes chayri machitus kaspapis, Diospaj astawan llankʼananchejpaj kallpachakunanchej tiyan. Diospaj astawan llankʼajtinchejqa, creeypi sinchʼi sayasqa kasunchej (Ecl. 12:1, 13).

11. 1) Wiñay tukusqa cristianos kanapaj, ¿imatataj ruwanallanchejpuni kasqa? 2) ¿Pi jinataj kallpachakunanchej kasqa?

¹¹ Wiñay tukusqa cristianos kanapajqa, kallpachakunallanchejpuni tiyan. Imajtinchus Bibliaqa niwanchej: “Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan”, nispa (Rom. 8:6-8). Chayrayku Jehová Diosqa atiyninwan sapa ujninchejta yanapawanchej. Nitaj suyanchu ni imapi pantananchejta. Jinapis creeypi sumaj sayasqa kanapajqa, kallpachakunallanchejpuni tiyan. Hermanonchej John Barrmanta parlarina. Payqa Diospa Llajtanta Kamachejkunamanta ujnin karqa. Uj kutipi Lucas 13:24 versiculomanta parlashaspa, jinata nerqa: “Ashkha hermanosqa Diosmanta karunchakunku, creeypi sinchʼi sayasqa kanankupaj mana kallpachakusqankurayku”, nispa. Chayrayku noqanchejqa, Diospa kamachin Jacob jina kallpachakunanchej tiyan. Payqa uj angelta mana kacharerqachu bendecichikunankama (Gén. 32:26-28). Chantapis Bibliataqa, mana cuentota jinallachu leenanchej tiyan. Astawanqa Bibliapi sumaj yachachiykunata maskʼanapaj kallpachakunanchej tiyan. Chaykunataj yanapawasunchej Diospa qayllallanpipuni kanapaj.

12. 1) ¿Cristo jina yuyanapaj Diospa atiynin yanapawasunmanchu? 2) ¿Imatataj apóstol Pedromanta yachakusunman?

¹² Wiñay tukusqa cristianos kanapaj kallpachakojtinchejqa, Diospa atiynin yanapawasunchej Cristo jina yuyanapaj (Rom. 15:5). Diospa atiynenqa, yanapawasunchej sajra munayninchejwan mana atipachikunapaj. Yanapallawasunchejtaj Diospa munayninman jina kausakunanchejpaj (Gál. 5:16, 22, 23). Kay mundoj imasnillanta maskʼashasqanchejta reparakunchej chayqa, Jehová Diospa atiyninta mañakunapacha allin imaspi yuyanapaj (Luc. 11:13). Apóstol Pedromanta parlarinachej. Payqa mana Cristo jinapunichu yuyaj (Mat. 16:22, 23;  Luc. 22:34, 54-62; Gál. 2:11-14). Jinapis mayta kallpachakorqa Cristo jina yuyananpaj. Jehová Diospa yanapayninwantaj, pisimanta pisi Cristo jina yuyayta qallarerqa. Noqanchejpis Cristo jina yuyayta atisunman.

13. 1) ¿Imastataj apóstol Pedro ruwananchejta nisqa? 2) ¿Imatataj ruwasunman Diosman astawan qayllaykunapaj? (“ ¿Imatataj ruwasunman astawan Diosman qayllaykunapaj?”, nisqata qhawariy).

¹³ Apóstol Pedropis nerqa, imastachus ruwanata Diosman astawan qayllaykunapaj (2 Pedro 1:5-8 leey). Pay nerqa, tukuy atisqanchejta kallpachakunanchejta, munayninchejwan mana atipachikunapaj, sinchʼita sayanapaj, familia jina munanakunapaj, waj imastawan ruwanapaj. Chayrayku sapa día piensarinanchej tiyan, imastachus ruwananchejpi Diosman astawan qayllaykunapaj.

14. Cristo jina yuyasunchej chay, ¿imatataj ruwasunchej?

¹⁴ Cristo jina yuyasunchej chayqa, trabajopi kashaspa, escuelapi kashaspa ima, Diospa munayninman jinapuni imatapis ruwasunchej. Chantapis Cristo jina yuyasqanchej, parlasqanchejpi, ruwasqanchejpi ima yachakonqa. Tukuy runastaj reparanqanku Jesuspa yachachisqasnin kasqanchejta. Jesús jina yuyasqanchejraykutaj, ni imarayku Jehová Diospa contranpi imatapis ruwasunchu. Juchaman urmanapaj tanqasqa kashajtinchejpis, mana chay juchapi urmasunchu Jesús jina yuyasqanchejrayku. Chantá imata ruwanapajpis, ñaupajtaqa piensarisunchej Bibliaj yuyaychaykunasninpi, imatachus Jesús ruwananpi, imachus Jehová Diosta kusichisqanpipis. Ajinatapuni piensarinanchej tiyan niraj imata ruwashaspapis. Chayrayku kunan yachakunachej, imaynatachus Bibliaj yuyaychaykunasnin yanapawasqanchejta imatapis sumajta ruwanapaj.

15. Cristo jina yuyasunchej chay, ¿piwanpis casarakullasunchu?

¹⁵ Casarakuyta munajtinchej. Piwanchus casarakunata yachanapajqa, 2 Corintios capítulo 6 versículos 14, 15 yanapawasunchej (2 Corintios 6:14, 15 leey). Chay versiculospi Pabloqa sutʼita nerqa, cheqan kajta ruwajqa mana kikinchu kasqanta Diospi mana creejwan. Diospi mana creej runasqa, imatapis ruwarpallanku. Kay yuyaychayta kasukuspaqa, Jehová Diosta yupaychajllawan casarakusunchej.

16. Cristo jina yuyasunchej chay, ¿piwanpis masichakullasunchu?

¹⁶ Amigosninchejta sumajta ajllana. Amigosninchejta sumajta ajllanapajqa, 1 Corintios capítulo 15 versículo 33 yanapawasunchej (1 Corintios 15:33 leey). Dios jina yuyasunchej chayqa, allinta purej runawan masichakusunchej. Chantapis kay yuyaychayqa, maytapuni yanapawasunchej Internetnejta mana pillawanpis masichakunapaj. Nitaj Internetnejta pillawanpis pujllanapaj.

17. ¿Qhasi manakaj imasta ruwanachu kanman?

¹⁷ Wakin ruwaykunaqa Diosmanta karunchawasunman. Hebreos capítulo 6 versículo 1 niwanchej, qhasi manakaj ruwaykunata amapuni ruwanata (Hebreos 6:1 leey). Chay qhasi manakaj imasta ruwayqa, Diosmanta karunchawasunman. Kay yuyaychayqa, reparachiwasunchej  kusirikunapaj imastachus ruwasqanchej, allinninchejpajchus manachus kasqanta yachanapaj. Reparachillawasunchejtaj ama ima organizacionman satʼikunapaj chʼajwasta chinkachiyta munaspa. Chantapis yanapawasun ama trabajollaman qokunapaj.

18. Jesús jina yuyasunchej chay, ¿imatataj ruwasunchej?

¹⁸ Diospaj astawan llankʼana. Jesusqa nerqa ñaupajta Diospa Gobiernonta maskʼanata (Mat. 6:33). Jesús jina yuyasunchej chayqa, Diospa Gobiernonta ñaupajmanpuni churasunchej. Chantapis Diospaj astawan llankʼanapaj kallpachakusunchej. Jesús imatachus Mateo 6:33 versiculopi nisqanqa, yanapallawasuntaj colegiota tukuytawan universidadman rinanchejtachus manachus yachanapaj. Chantá yanapallawasuntaj trabajota allinta ajllanapaj.

19. Jesús jina yuyasunchej chay, ¿imatataj maskʼasunchej pillawanpis phiñanakuspa?

¹⁹ Tukuywan allinpi kausakuna. Pillawanpis phiñanakojtinchej allinyakunapajqa, Romanos capítulo 12 versículo 18 yanapawasunchej (Rom. 12:18). Cristo jina yuyasunchej chayqa, ‘tukuywan allinpi kausakuyta’ maskʼasunchej. Chayrayku allin kanman piensarinanchej pillawanpis phiñanakuspa, allinyakuyta maskʼashasqanchejpichus manachus. Chantapis ama allinnillanchejtachu maskʼana. Astawanqa wajkunaj allinninkuta maskʼanapaj kallpachakuna (Sant. 3:18).

20. ¿Imaraykutaj Dios jina yuyanapaj kallpachakunallapuni?

²⁰ Reparanchej jina, Bibliaj yuyaychaykunasnenqa, mayta yanapawasunchej Diospa munayninman jinapuni imatapis ruwanapaj. Chayrayku Dios jina yuyanapaj kallpachakusunchej chayqa, kusisqas, sonqo juntʼasqastaj kasunchej. Chaymanta parlaspa, Roberto jinata nerqa: “Diosman astawan qayllaykusqayrayku, qosa jina, tata jinataj familiayta aswan sumajta yanapayta atini. Aswan kusisqataj kani”, nispa. Dios jina yuyanapaj kallpachakullasunpuni chayqa, may chhika bendicionesta japʼisunchej. Chantapis kusisqa kausakusunchej kay tiempopi, jinallataj paraisopipis (1 Tim. 6:19).