SUMAJ amigonchej uj cartata apachimuwajtinchejqa, mayta kusirikunchej, ¿icharí? Apóstol Pablopis amigon Timoteoman uj sumaj cartata apacherqa. Chay cartaqa Bibliapi kashan, sutikuntaj Iskay kaj Timoteo. Timoteoqa munasqa amigonpa cartanta japʼispa, chay ratochá leeriyta munarqa. Chaypajtaj ichá chʼinnejman rerqa. Chantapis Timoteoqa ichá kay jinata piensarerqa: “Imaynachus amigoy kashan ari. Ichá imallatapis yuyaycharishawan Diospaj ruwanasniyta juntʼanaypaj. Ichá kay cartaqa, Diosmanta aswan sumajta willanaypaj yanapawanqa, wajkunata yanaparinaypajpis”, nispa. Pablotaj chay imasmantapuni Timoteoman qhelqarqa. Chantapis chay cartapeqa, waj sumaj yuyaychaykuna kallarqataj. Wakin yuyaychaykunamanta parlarina.

Timoteoqa chay cartata leeyta qallarisqanmantapacha, Pablo mayta munakusqanta repararqa. Imajtinchus Pabloqa Timoteoman nerqa: “Munasqa wawáy”, nispa (2 Tim. 1:2). Pabloqa chay cartata 65 wata chaynejpi qhelqarqa. Timoteotaj chaypacha ichapis 30 watas kurajniyoj kasharqa. Jinapis payqa experienciayoj ancianoña karqa. Imajtinchus chunka watas kurajta jinaña Pablowan khuska llankʼarqa, paymantataj maytachá yachakorqa.

Pabloqa Timoteoman qhelqasqan cartapi nerqa, llakiykunapi kaspapis sinchʼita sayashasqanta. Chayta yachaytaj, maytachá Timoteota kallpacharqa. Pabloqa chaypacha Romapi carcelpi kasharqa, wañuchinanku pʼunchaytaj qayllapiña kasharqa (2 Tim. 1:15, 16; 4:6-8). Jinapis payqa kusiywan nerqa: “Tukuy imata aguantashani”, nispa. Timoteoqa chaypi repararqa Pablo wapu kasqanta (2 Tim. 2:8-13). Pabloj kausaynenqa maytachá Timoteota kallpacharqa. Noqanchejtapis kallpachallawasunmantaj.

Pabloqa Timoteoman nerqa Diosmanta japʼisqan llankʼayta jatunpaj qhawananta. Chayrayku payman nerqa: ‘Diosmanta ruwanapaj japʼisqayki atiyta, ninata jina kʼajarichiy’, nispa (2 Tim. 1:6). Pabloqa “ruwanapaj japʼisqayki atiyta” ninanpaj, griego parlaypi khárisma palabrata oqharerqa. Chay palabraqa niyta munan, uj regalota japʼiy chayri imatapis qhasillamanta japʼiy. ¿Maykʼajtaj Timoteo ‘Diosmanta ruwanapaj atiyta japʼerqa’? Congregacionpi uj sumaj llankʼayta ruwananpaj ajllasqa kashajtin (1 Tim. 4:14).

Pabloqa Timoteoman nerqa, chay japʼisqan atiyta ninata jina kʼajarichinanta. Timoteoqa chayta  leespa, ichapis piensarerqa imaynatachus runas wasisninkupi ninata japʼichisqankupi. Chay tiempopi runasqa, carbonllawan ninata japʼichikoj kanku. Nina wañupushajtinñataj, brasasta kuyurichiytawan phukoj kanku. Chaymanta parlaspa uj libro nin: “Pabloqa ‘kʼajarichiy’ ninanpaj, griego parlaypi anazōpyréō palabrata oqharerqa. Chaytaj niyta munan, ‘ninata watejmanta japʼichiy chayri brasasta phukuspa laurarichiy’”. Pabloqa chaywan niyta munasharqa, imatapis sonqo kʼajaywan ruwanata. ¿Imatá chay yachachiwanchej? Pabloqa Timoteoman waj parlaypi kay jinata nisharqa: “Diosmanta japʼisqayki llankʼayta tukuy sonqo ruway”, nispa. Chaytaqa noqanchejpis ruwanallanchejtaj tiyan.

Timoteoqa Pabloj apachisqan cartapi waj imastawan yachakorqa. Chaytaj Diospaj llankʼayninta allinta juntʼananpaj yanaparqa. Pablo qhelqarqa: “Chay valorniyoj japʼisqayki imastaqa, allinta waqaychay Diospa atiyninpa yanapayninwan, mayqenchus noqanchejpi kashan, chaywan”, nispa (2 Tim. 1:14). ¿Imataj chay valorniyoj imas karqa? ¿Imatataj Timoteo japʼerqa? Pablollataj nerqa ‘cheqa yachachiykuna’ kasqanta. Chay yachachiykunaqa, Diospa Palabranpi kashan (2 Tim. 1:13). Timoteoqa Diospa kamachin kasqanrayku, chay cheqa yachachiykunata cristianosman, waj runasmanpis yachachinan karqa (2 Tim. 4:1-5). Chantapis payqa anciano kasqanrayku, Diospa ovejitasninta qhawanan karqa (1 Ped. 5:2). Timoteoqa Diospa atiyninman jina, Palabranman jinataj yachachinan karqa. Chayta ruwaspaqa, cheqa yachachiykunata jatunpaj qhawasqanta rikuchinman karqa (2 Tim. 3:14-17).

Diosqa noqanchejmanpis cheqa yachachiykunata qowanchej, chaytataj wajkunaman yachachimunchej (Mat. 28:19, 20). ¿Imatá ruwasunman chay yachachiykunata jatunpaj qhawasqanchejta rikuchinapaj? Mana saykʼuspa Diosmanta mañakuna, Palabrantataj sapa kuti estudiana (Rom. 12:11, 12; 1 Tim. 4:13, 15, 16). Chantapis ichá Diospa llajtanpi waj jinasmanta yanapakushanchej. Wakenqa ichá ancianos kanchej chayri Diospaj tiempo juntʼasqata llankʼashanchej. Jina kajtin, astawan kʼumuykukoj sonqo kananchej tiyan. Chantapis chay llankʼayta ruwanapaj Dioswan yanapachikunanchej tiyan. Chayta ruwaspaqa, Dios qowasqanchej llankʼayta jatunpaj qhawasqanchejta rikuchisun.

Pabloqa Timoteoman nillarqataj: “Imastachus yachachisqayta uyarerqanki chaykunataqa, [...] atienekunapaj jina kaj runasman yachachiy. Paykunataj sumaj wakichisqa kanqanku wajkunaman yachachinankupaj”, nispa. Chaywanqa Timoteoman nisharqa, congregacionpi ruwanasninta wajkunaman yachachinanta (2 Tim. 2:2). Timoteoqa waj hermanosmanta yachakunan karqa, paykunamanpis yachachinallantaj karqa. Kay tiempomanta ancianospis, chayta ruwanankupaj kallpachakunanku tiyan. Uj sumaj ancianoqa, ruwanasninta wajkunaman yacharichin, manataj chay yachasqanta payllapajchu japʼikun. Payqa mana ninchu: “Yachachejtiy, noqamanta aswan sumajta ruwanqa chayrí”, nispa. Chantapis uj sumaj ancianoqa, mana ruwanasnillantachu wajman yachachin, manachayqa chay imasta allin yuyaywan ruwananpaj yanapan. Ajinamanta chay yachachisqan hermanota, wiñay tukusqa cristiano kananpaj yanapan. Chay “atienekunapaj jina” kaj hermanotaj, congregacionpi sumajta yanapakun.

Timoteoqa Pabloj cartanta leespa, maytachá kusikorqa. Payqa chay cartata kutin kutitachá leererqa. Chantapis maytachá tʼukurerqa, imaynatachus Pabloj yuyaychasqanman jina ruwananpi.

Noqanchejpis imatachus Pablo cartanpi nisqanta ruwayta munanchej. ¿Imaynatá chayta ruwasunman? Diosmanta japʼisqanchej llankʼayta, tukuy sonqo ruwana, jatunpajtaj qhawana. Chantapis imastachus yachasqanchejta wajkunaman yachachina. Ajinamanta imatachus Pablo Timoteoman nisqanta kasukusun, nisunman ‘Diospaj llankʼayninchejta allinta juntʼasun’ (2 Tim. 4:5).