1-3. 1) ¿Imaynataj israelitas kasharqanku Babiloniamanta kacharichisqa kasqankutawan? 2) ¿Imajtintaj Jehová Dios Zacariasta israelitasman kachasqa?

UJ KUTI Jehová Diosqa, Zacariasman mosqoypi jina rikuchisqa, uj qhelqasqa kʼuyuna librota phawaykachashajta, uj medina canasta ukhupitaj uj warmi tiyashajta. Chantá rikuchisqa iskay warmista phawaykachashajta. Chay iskay warmispaj lijrasnintaj, cigüeñaj lijrasnin jina kasqanku (Zac. 5:1, 7-9). Kunantaj yachakusunchej imaraykuchus Jehová Dios, Zacariasman chaykunata mosqoypi jina rikuchisqanta. Imapitajchus israelitas, Zacariaspa tiemponpi rikukusqankutapis. Chantá yachakullasuntaj imaspichus Zacarías capítulo 5 yanapawasqanchejta.

² Israelitasqa Babiloniapi 70 watastapuni esclavos jina karqanku. Kay 537 watapitaj Jesús niraj jamushajtin, israelitasqa Babiloniamanta kacharichisqas karqanku. Chayrayku paykunaqa may kusisqas kasharqanku. Chantá sonqonku mayta kʼajarisharqa, Jerusalenman kutispa Diospa templonta  ruwanankupaj, Diostataj yupaychanankupaj. Kay 536 watapitaj, Diospa templonta ruwayta qallarerqanku. Chayta rikuspataj israelitasqa, kusiymanta qhaparerqanku, chay qhaparisqankutaj karuman uyarikorqa (Esd. 3:10-13). Jinapis israelitaspa enemigosninkoqa, templota mana ruwanankupaj mayta churanakorqanku. Ashkha watasta churanakusqankuraykutaj israelitasqa manchachikorqanku, templota ruwaytataj saqeporqanku. Templota ruwanankumantaqa wasisninkuta ruwaj, jallpʼasninkutataj tarpoj churakorqanku. Templota ruwayta qallarisqankumantapachataj 16 watas pasajtinñapis, israelitasqa nipuni tukuchasqankuchu. Chayrayku Diosqa payman israelitas kutirikunankupaj Zacariasta kacharqa.

³ Israelitasqa Jehová Dios paykunapaj, imatachus ruwasqanta qonqapusqanku. Kay 520 watapitaj, Jehová Diosqa Zacariasnejta israelitasta yuyaricherqa, templonta ruwanankupaj Babiloniamanta kacharichisqas kasqankuta. Chayraykuchá Zacariaspa sutenqa “Jehová yuyarikusqa”, niyta munan (Zacarías 1:3, 4 leey). Zacariasqa israelitasman nerqa, templota ruwajtinku Jehová Dios yanapananta. Chantá nillarqataj Jehová Dios allin ñawiwan paykunata qhawananta, tukuy sonqo yupaychajtinku. Kunantaj yachakusunchej, Jehová Dios imastachus Zacariasman mosqoypi jina rikuchisqanta. Yachakullasuntaj imaynatachus Jehová Dios israelitasta yanapasqanta, imaynatatajchus noqanchejtapis yanapawasqanchejta.

4. 1) ¿Imatataj Zacarías mosqoypi jina rikusqa? 2) ¿Imataj chay kʼuyuna libropi qhelqasqa kasqa? (21 paginapi, 1 kaj dibujota qhawariy).

⁴ (Zacarías 5:1, 2 leey). Diosqa Zacariasman mosqoypi jina, uj kʼuyuna librota phawaykachashajta rikuchisqa. Chay libroqa largonman 9 metrosniyoj kasqa, anchonmantaj tawa metros phishqa chunka centimetrosniyoj. Chay libropeqa uj maldición qhelqasqa kasqa puraj ladopi (Zac. 5:3). Puraj ladopi qhelqasqa kasqantaj rikucherqa, chay maldicionmanta ni pi lluspʼiyta atinanta.

5, 6. ¿Jehová Dios suwakuyta allinpajchu qhawan?

⁵ (Zacarías 5:3, 4 leey). Tukuyninchej ruwasqasninchejmanta Diosman cuentata qosunchej. Noqanchejqa Jehová Diospa sutinpi purisqanchejrayku, mana suwakunachu tiyan. Suwakusunman chayqa, Diospa sutinta chʼichichasunman (Pro. 30:8, 9). Wakin runasqa ninku necesitasqanchejrayku chayri waj imasrayku suwakoyqa, allillan kasqanta. Jinapis Jehová Diosqa, ni imarayku suwakunanchejta munanchu.

⁶ Zacarías 5:3, 4 versiculospi nin: ‘Pipis suwajqa mana lluspʼenqachu castigomantaqa, maldiciontaj wasinkuman yaykonqa chaypitaj qhepakonqa, wasejpa kʼullusnin, jinataj rumisninpis mana kanankama’, nispa. Kay versículos reparachiwanchej, Jehová Diospa qhawayninpi tukuy ima qhatarasqa kasqanta. Ichapis uj hermanoqa suwakuspa mana reparachikunmanchu policiawan, patronninwan, ancianoswan chayri familiaresninwan. Jinapis Diospa qhawayninmantaqa, ni imata pakayta atinmanchu (Heb. 4:13). Noqanchejqa kusisqa kanchej, ‘tukuy imapi allinta puriyta munaj’ hermanoswan kaspa (Heb. 13:18).

7. ¿Imata ruwajtinchejtaj mana chinkachisqachu kasun?

⁷ Jehová Diosqa chejnikun suwakojkunata. Noqanchejqa Diosman may agradecesqa kashanchej, Palabranta qowasqanchejmanta. Palabranpeqa reparachiwanchej  imachus allin imatajchus mana allin kasqanta. Yanapawanchejtaj Diosta kusichinapaj jina kausakunapaj. Diospa Palabranman jina kausakojtinchejqa, Diosqa mana sajra runaswan chinkachiwasunchu.

8. ¿Imatataj juramentota ruwaj runa nin?

⁸ Zacarías 5:4 versiculopi Diosqa nin: ‘Noqa kachamuni kay maldiciontaqa, pischus qhasimanta sutiypi juranku, chaykunapaj’, nispa. Uj juramentota ruwaj runaqa, imatachus ruwananta chayri mana ruwananta nin.

9, 10. Sedequías, ¿Diospa sutinpi tratota ruwasqanta juntʼasqachu?

⁹ Jehová Diosman imatachus nisqanchejtaqa, juntʼananchejpuni tiyan. Sedequiasmanta parlarina. Payqa Jerusalenpi qhepa kaj rey karqa. Uj kutitaj payqa, Diospa sutinpi Babiloniaj reyninta kasukunanta jurasqa. Jinapis Sedequiasqa nisqanta mana juntʼarqachu. Chayrayku Jehová Diosqa, Sedequías Babiloniapi wañunanta nerqa (Eze. 17:16).

¹⁰ Sedequías Babiloniamanta reyta kasukunanmantaqa, Egiptowan ujchaykukorqa, Babiloniamanta librakunanpaj (2 Cró. 36:13). Chayta ruwaspa Sedequiasqa, Diospa sutinpi tratota ruwasqanta pʼakerqa (Eze. 17:11-15, 17, 18).

11. Niraj bautizakushaspa, ¿imatataj Jehová Diosman nerqanchej?

¹¹ ¿Imatataj Sedequiasmanta yachakusunman? Yachakunchej Jehová Diosqa tukuy ima nisqanchejta uyariwasqanchejta. Dios allin ñawiwan qhawanawanchejpajtaj, nisqanchejta juntʼananchej tiyan (Sal. 76:11). Noqanchejqa niraj bautizakushaspa Jehová Diosman nerqanchej, “qanpaj munasqaykiman jina kausakusaj” nispa. Chaywanqa Diosman nerqanchej, imapi rikukuspapis payta sirvinallanchejtapuni.

12. ¿Imaspi rikukuspataj Diosta kasukusqanchejta rikuchisunman?

 ¹² ¿Imaynatataj Jehová Diosman nisqanchejta juntʼasunman? Jehová Diospa munayninman jina kausakunapaj sapa día kallpachakuspa, juchaman tanqasqa kaspapis (Sal. 61:8). Ichapis trabajopi chayri colegiopi pillapis coqueteawasunman. Ajinapi rikukuspaqa, Jehová Diospa nisqanta kasukuna (Pro. 23:26). Ichapis familianchejmanta noqallanchej Jehová Diosta yupaychashanchej. Ajina kajtenqa Diospa yanapanta mañakuna, nisqanman jinallapuni kausakunapaj. Imapi rikukuspapis Jehová Diosmanta mañakunapuni. Agradecekunataj Palabranwan yuyaychawasqanchejmanta, mayta munakuwasqanchejmantapis. Bibliata leenapajtaj sapa día kallpachakunanchej tiyan. Chaykunatataj ruwananchejta nerqanchejña niraj bautizakushaspa, “Dios munasqaykiman jina kausakusaj”, nishaspa. Chantapis Diospa wawan kasqanchejta rikuchinchej payta kasukuspa, munakuspa, payta sirvinapajtaj kallpachakuspa. Chantá imaynatachus kausakusqanchejwan Diosta jatunchallanchejtaj. Diosta kasukusunchej chayqa, uj paraisopi tiyakusunchej (Deu. 10:12, 13).

13. Zacarías mosqoypi jina uj kʼuyuna librota rikusqanmanta, ¿imatataj yachakusunman?

¹³ Zacarías mosqoypi jina uj kʼuyuna librota rikusqanmanta yachakunchej, mana suwakunata, Diosman imatachus nisqanchejtataj juntʼanata. Jehová Diospis nisqanta juntʼanpuni. Payqa nisqanta juntʼananpaj israelitasta yanapallarqapuni, ashkha kutista pantajtinkupis. Jehová Diosqa yacharqa, israelitas sajra runaswan muyurisqa kasqankurayku pantasqankuta. Jinapis Jehová Diosqa, nisqanta mana pʼakerqachu. Noqanchejpis Dios jina nisqanchejta juntʼananchejpuni tiyan. Diostaj yanapawasunchej nisqanchejta juntʼanapaj. Jehová Diosqa nin, tumpamantawan uj sumaj kausayta qonawanchejta, sajra runastataj chinkachinanta.

14, 15. 1) ¿Imatataj Zacarías mosqoypi jina rikullasqataj? (21 paginapi, 2 kaj dibujota qhawariy). 2) Canasta ukhupi kaj warmi, ¿imawantaj ninakun? 3) ¿Imawantaj ninakun uj ángel chay warmita titi tapawan chay rato tapaykusqan?

¹⁴ Zacariasqa mosqoypi jina, uj medina canastata rikullarqataj (Zacarías 5:5-8 leey). Chay canastaj tapantaj, titimanta karqa. Chantá Zacariasqa chay canasta ukhupi, uj warmita tiyashajta rikullarqataj. Uj angeltaj Zacariasman nerqa, ‘chay warmi sajra ruwaywan ninakusqanta’. Zacariastaj mancharikorqachá chay warmi canastamanta llojsimuyta munajta rikuspa. Jinapis angelqa chay rato canasta ukhuman chay warmita tanqaykuspa, titi tapawan tapaykorqa. Kunanqa qhawarina Zacarías mosqoypi jina rikusqan, imachus niyta munasqanta.

¹⁵ Uj ángel chay rato canasta ukhuman chay warmita tanqaykuspa, titi tapawan tapaykusqanqa, ninakun Jehová Dios chay rato llajtanmanta qharqonanta pillapis sajrata ruwajtin. Imaraykuchus Diosqa munan llajtan llimphu kananta (1 Cor. 5:13).

16. 1) ¿Imatataj Zacarías mosqoypi jina rikullasqataj? (21 paginapi, 3 kaj dibujota qhawariy). 2) ¿Maymantaj chay iskay warmis medina canastata apakapusqanku?

¹⁶ Zacariasqa mosqoypi jina rikullarqataj, iskay warmista lijrasniyojta. Lijrasninkutaj cigüeñaj lijrasnin jina karqanku (Zacarías 5:9-11 leey). Chay iskay warmisqa, mana canasta ukhupi kaj warmi jinachu karqanku. Chay iskay warmisqa, medina canastata Babiloniaman apakaporqanku. Kunantaj qhawarinachej, imaraykuchus  chay canastata Babiloniaman apakapusqankuta.

17, 18. 1) ¿Imaraykutaj medina canasta Babiloniaman apasqa kasqa? 2) ¿Imastataj Dios manapuni ruwananchejta munanchu?

¹⁷ Zacariaspa tiemponmanta israelitasqa, sumajta entienderqanku imaraykuchus chay medina canastata Babiloniaman apakusqanta. Chay canastapeqa sajra ruwaywan ninakoj warmi kasharqa. Chay canasta Babiloniaman apasqa karqa, chay llajtapi runas sajra imasta ruwasqankurayku. Paykunaqa khuchichakoj kanku, ashkha santostataj yupaychaj kanku. Israelitasqa Babiloniapi kashajtinku mayta kallpachakunanku karqa, mana chay llajtamanta runas jina kausakunankupaj. Zacarías chay canastata Jerusalenmanta Babiloniaman apakapusqankuta rikusqanwanqa, Dios nisharqa llajtanta llimphullatapuni japʼinanta.

¹⁸ Chantapis Diosqa israelitasman yuyarichisharqa, runaspa costumbresninwan mana chhapukunankuta. Arí, Diosqa manapuni munanchu sajra imasta ruwananchejta. Diosqa llajtanman yaykupunanchejpaj yanapawarqanchej, mayta munakuwasqanchejrayku. Llajtanpitaj sajra imasmanta jarkʼawanchej. Sapa ujninchejtaj allinta qhawarikunanchej tiyan, Diospa llajtanpi ni ima sajrata ruwananchejpaj. Ajinamanta Diospa llajtanqa llimphullapuni kanqa.

19. Zacarías mosqoypi jina imastachus rikusqanmanta, ¿imastataj yachakusunman?

¹⁹ Diosqa Zacariasman mosqoypi jina rikucherqa uj kʼuyuna librota, medina canasta uhkhupi uj warmita, iskay warmistataj cigüeña lijrasniyojta. Chaykunawan yachachiwanchej, Jehová Dios sajra imasta ruwaj runasta, mana allinpajchu qhawasqanta. Arí, Diosqa sajra runasta chinkachenqa. Noqanchejqa Jehová Dios jina, sajra imasta chejnikunanchej tiyan. Diosta kusichejtinchejqa, payqa sajra imasmanta jarkʼawasunchej, maytataj bendeciwasunchej. Sajra runaspa chaupinpi tiyakojtinchejpis, Diosta kusichiyta atinchej. Chaytaqa Diospa yanapaynillanwan atinchej. Qhepan yachaqanapitaj, yachakusunchej jatun ñakʼariy tiempopi, imaynatachus Dios llajtanta jarkʼananta.