1. ¿Imatataj Jehová Diosninchej munan?

JEHOVÁ DIOSTAQA munakuy kusichin (Ose. 6:6). Payqa munan kamachisnintapis munakuy kusichinallantataj. Diosninchejqa profeta Miqueasnejta jatun munakuyniyoj kananchejta kamachiwanchej (Miq. 6:8). ¿Imaynatá Jehovaj munakuynin kamachisninta yanapan? Chayta kasukunapajqa ñaupajta yachananchej tiyan imachus munakuy kasqanta.

2. ¿Imataj munakuy?

² ¿Imataj munakuy? Bibliaj glosarionpeqa kay jinata sutʼinchan: “Hebreo parlaymanta jésedh palabraqa niyta munan mana tukukoj munakuy, mana tukukoj kʼacha kay. Bibliaqa kay palabrata oqharispa kay jinata munakojmanta parlan: nisqanta juntʼayta munaspa munakojmanta, tukuy sonqo munakojmanta, mana wasanchaspa munakojmanta, pitachus munakun chayman sumaj kʼaskasqa kajmanta ima. Kay jésedh palabrataqa traducikun ‘munakuy’, ‘khuyakuy’, ‘kʼacha’ nispa. Bibliaqa kay jina palabrasta astawan oqharin Dios runasta munakusqanmanta, khuyakusqanmanta chayri runaswan kʼacha kasqanmanta parlananpaj. Kay jina palabrasta oqharillantaj uj runa waj runata munakusqanmanta, khuyakusqanmanta, chayri waj runawan kʼacha kasqanmanta parlananpaj”. Jehová Diosqa ni pi jina chay jina munakuyta rikuchin. Kay yachaqanapeqa yachakusun imaynatachus Jehová runasta munakusqanta. Qhepan yachaqanapitaj yachakusunchej imaynatachus noqanchejpis pay jina munanakunanchejta.

3. ¿Imatá Jehová Moisesman nerqa?

³ Israelitas Egiptomanta llojsimusqankumanta pisi tiemponman, Jehová Diosqa paypa sutinmanta, imaynachus kasqanmantawan  Moiseswan parlarqa. Nerqataj: “Jehová Dios, Jehová Dios, khuyakoj Dios, kʼacha sonqoyoj, pacienciayoj, may jina munakuyniyoj, nisqantapis juntʼanpuni. Munakuynenqa waranqa waranqa runaspaj, perdonantaj runaspa pantasqasninkuta, mana kasukuspa imatapis ruwasqankuta, juchasninkuta ima”, nispa (Éxo. 34:6, 7). Chay kʼacha palabraswan Jehová Diosqa, munakuynin imaynachus kasqanta sutʼincharqa. Astawan chaymanta yachakuna.

4, 5. 1) ¿Imatá Jehová pay kikinmanta nerqa? 2) ¿Ima tapuykunatá kutichisun?

⁴ Jehová Diosqa mana munakuyniyoj kasqallantachu nerqa, manachayqa “may jina munakuyniyoj” kasqanta. “May jina munakuyniyoj” palabrasqa Bibliapi sojta kutistawan rikhurin (Núm. 14:18; Neh. 9:17; Sal. 86:15; 103:8; Joel 2:13; Jon. 4:2). Chay tukuyninpitaj Jehovaj munakuyninmanta parlan, manataj runaspa munakuyninkumantachu. Chaypi reparanchej Jehová Diosqa may jina munakuyniyoj kasqanta. Munakoyqa paypaj may importante. * Chayraykuchá rey Davidqa ajinata nerqa: ‘Jehová Diosníy, munakuyniykeqa cielokamapuni chayan. Diosníy, munakuyniykeqa may sumajpuni. Lijrasniykej llanthunpi runasqa pakakunku’, nispa (Sal. 36:5, 7). Noqanchejrí, ¿David jinachu Diospa munakuyninta may sumajpaj qhawanchej?

⁵ Imapunichus munakuy kasqanta entiendenapajqa, kay iskay tapuykunaman kutichisun. ¿Pikunamantaj Jehová mana tukukuyniyoj munakuyninta rikuchin? Jehová Dios munakuywan imastachus ruwasqan, ¿imaynatá yanapawanchej?

6. ¿Pikunamantaj Jehová mana tukukuyniyoj munakuyninta rikuchin?

⁶ ¿Pikunamantaj Jehová mana tukukuyniyoj munakuyninta rikuchin? Bibliaqa nin ashkha imasta munakuyta atisqanchejta: ‘chajrata’, ‘yuyaychayta’, “yachayta”, ‘vinota’, ‘aceiteta’, “yachayniyoj kayta”, waj imastawan (2 Cró. 26:10; Pro. 12:1; 21:17; 29:3). Mana tukukoj munakuytaj mana chay imaspaj kanmanchu. Chayqa runasllapaj. Chaywan, ¿nishanchejchu Jehová Dios pi runallatapis ajinata munakusqanta? Mana. Chay munakuytaqa paywan allinpi kajkunallaman rikuchin. Diosninchejpa mana tukukuyniyoj munakuynenqa amigosnillanpaj. Diosqa paykunapaj allin imasta ruwananta ninña. Nitaj jaykʼajpis paykunata saqerparenqachu.

7. ¿Imaynatá Jehová tukuy runasta munakusqanta rikucherqa?

 ⁷ Jehová Diosqa tukuy runasman munakuyninta rikuchin. Jesusqa Nicodemo sutiyoj runaman nerqa: “Diosqa chay jinatapuni kay mundomanta runasta munakusqanrayku, uj kʼata Wawanta qorqa, ajinamanta pillapis paypi creejqa mana wañunanpaj, manachayqa wiñay kausayniyoj kananpaj”, nispa (Juan 3:1, 16; Mat. 5:44, 45).

8, 9. 1) ¿Imajtintaj Jehová mana tukukuyniyoj munakuyninta kamachisninman rikuchin? 2) ¿Imasmantá kunan parlarisun?

⁸ Nerqanchej jina, Jehová Diosqa mana tukukuyniyoj munakuyninta paywan allinpi kajkunallaman rikuchin, nisunman kamachisnillanman. Chayqa sutʼita rikukun rey Davidwan profeta Danielwan Dios yuyaychasqanman jina qhelqasqankupi. David nerqa: ‘Rejsisojkunataqa munakullaypuni. Jehová Diospa munakuynenqa wiñaypaj wiñaynintinpaj payta manchachikojkunapaj’, nispa. Danieltaj nerqa: ‘Cheqa Dios Jehová, qanqa aswan jatun Dios kanki, manchay tʼukunataj. Munakusojkunata, kamachisqasniykita kasukojkunatapis munakunki’, nispa (Sal. 36:10; 103:17; Dan. 9:4). Jehová Diosqa mana tukukuyniyoj munakuyninta kamachisninman rikuchin payta rejsisqankurayku, manchachikusqankurayku, munakusqankurayku, kamachisqasnintapis kasukusqankurayku. Chay munakuynenqa kamachisnillanpaj, pikunachus maychus kajta yupaychanku chaykunallapaj.

⁹ Niraj Jehová Diosta sirviyta qallarishajtinchej, payqa tukuy runasta jina munakuwarqanchejña (Sal. 104:14). Payta yupaychayta qallarisqanchejmantapachataj mana tukukoj munakuyninta rikuchillawarqanchejtaj. Jehová Diosqa llajtanta nin: “Qantaqa munakullasqaykipuni”, nispa (Isa. 54:10). Davidpis kausayninpi rikorqa kay palabrasqa cheqapuni kasqanta: “Jehová Diosqa payta kasukoj runata allinpaj qhawanqa” (Sal. 4:3). ¿Imatá ruwananchej tiyan Jehová chay jinata munakuwasqanchejta yachaspa? Uj salmista nerqa: “Yachayniyoj runaqa chay imasta sumajta reparanqa. Allinta tʼukurispataj tantearenqa imastachus Jehová Dios munakuywan ruwasqanta”, nispa (Sal. 107:43). Chaytaqa Dios yuyaychawanchej. Chayrayku kinsa imasmanta  parlarina imaynasmantachus Jehová munakuwasqanchejta, imaynatachus chay yanapawasqanchejtapis yachanapaj.

10. ¿Imaynatá yanapawanchej Diospa munakuynin wiñaypaj kasqanta yachay? (Salmo 31:7).

¹⁰ Diospa munakuynenqa wiñaypaj kallanqapuni. Salmo 136 capitulopeqa 26 kutista chayta nin. Ñaupaj versiculopeqa nin: “Jehová Diosman graciasta qoychej, kʼacha kasqanrayku. Munakuynenqa wiñaypaj kallanqapuni”, nispa (Sal. 136:1). Iskay versiculomanta 26 versiculokamaqa sapa versiculopi nin: “Munakuynin wiñaypaj kasqanrayku”, nispa. Chay salmota leespaqa reparanchej Jehová Diosqa tukuy imaymanamanta, tukuy tiempotaj munakuyninta rikuchisqanta. “Munakuynin wiñaypaj kasqanrayku” nisqanqa, noqanchejpaj uj garantía jina. Chayqa reparachiwanchej Diosqa llajtanta munakunallantapuni. Jehová kamachisninta mana saqerparinanta yachayqa mayta kallpachawanchej. Diosqa payta sirvejkunaj ladonkupipuni kashan, astawanraj llakiy tiempospeqa. ¿Imaynatá yanapawanchej? Jehová ladonchejpipuni kasqanta yachayqa mayta kusichiwanchej, kallpachawanchejtaj problemaswan mana atipachikunapaj, kausayman apaj ñanpitaj purinallapajpuni (Salmo 31:7 leey).

11. Salmo 86:5 nisqanman jina, ¿imataj Jehovata aysan perdonananpaj?

¹¹ Diospa munakuynenqa perdonananpaj aysan. Pillapis juchasninmanta pesachikojtin, cambiananpajtaj mayta kallpachakojtin, Jehovataqa munakuynin aysan chay runata perdonananpaj. Davidqa uj salmopi Jehovamanta nerqa: “Mana juchasninchejman jinachu castigawanchej, nitaj pantasqanchejman jinachu pagachiwanchej”, nispa (Sal. 103:8-11). Davidqa yacharqa, sonqonchej mayta nanawasqanchejta imallamantapis sonqonchej juchachawajtinchej. Jinapis yachakullarqataj Jehovaqa perdonananpaj wakichisqa kasqanta. Davidqa uj mañakuypi nerqa imachus Jehovata perdonananpaj aysasqanta (Salmo 86:5 leey). Jehovaqa perdonan paymanta mañakojkunapaj munakuynin may jatun kasqanrayku.

12, 13. ¿Imataj yanapawasunman ñaupa juchanchejmanta sonqonchej juchachallawajtinchejpuni?

 ¹² Juchallikunchej chayqa, sonqonchej nanawasqanchejqa allillan. Chay yanapawasunman arrepientekunanchejpaj, cambiananchejpajtaj. Diospa kamachisninmanta wakintaqa unay juchasta ruwasqankumanta sonqonku juchachallanpuni. Chay juchasninkumanta arrepientekojtinkupis yuyanku Jehová nipuni perdonananta. Sichus qanpis ajina sientekunki chayqa, sumajta yuyarikunayki tiyan Jehová mayta munakususqanta. Chay yanapasonqa manaña ajina sientekunaykipaj.

¹³ ¿Imaynatá yanapawanchej? Juchasapas kajtinchejpis, ‘Jesuspa yawarnin tukuy juchamanta llimphuchawanchej’. Chayrayku Diostaqa kusisqa sirviyta atinchej, llimphu sonqowantaj (1 Juan 1:7). Sichus imapi pantanchej chayqa, yuyarikuna Jehovaqa arrepientekojtinchej mayta perdonayta munawasqanchejta. David nerqa Diosqa munakuwasqanchejrayku perdonawasqanchejta. Pay nerqa: “Imaynatachus cieloqa jallpʼamanta allin patapipuni kashan, ajinallataj Diospa munakuynenqa may jina jatun payta manchachikojkunapaj. Imaynatachus inti llojsimuy ladoqa may jina karupi kashan inti yaykuy ladomanta, ajinata Diosqa pantasqasninchejta noqanchejmanta may jina karuman churan”, nispa (Sal. 103:11, 12). Ajinapi reparanchej Jehová Diosqa mana michʼakuspa perdonayta munawasqanchejta (Isa. 55:7).

14. ¿Imawantaj Diospa munakuyninta David kikincharqa?

¹⁴ Diospa munakuynenqa mana paymanta karunchakunapaj jarkʼawanchej. Davidqa Jehovamanta mañakushaspa ajinata nerqa: “Qanmin pakakunay kanki. Qanmin ima llakiymantapis jarkʼawanki. Salvawasqaykirayku tukuynejpi noqapajqa kusiylla tiyan”, nispa. Chantá nillarqataj: “Jehová Diospi atienekojkunarí, paypaj munasqa kasqankuta rikonqanku”, nispa (Sal. 32:7, 10). Ñaupa tiempopi llajtasqa perqawan muyurisqa karqanku chaypi tiyakojkunata enemigosninkumanta jarkʼananpaj. Ajinallatataj Jehová Diospa munakuyninpis uj perqa jina jarkʼawanchej, paymanta ni ima karunchanawanchejpaj. Chantapis Jehová Diosqa munakuyninwan payman kʼaskaykuchiwanchej (Jer. 31:3).

15. Jehová Diospa munakuynin, ¿imapí rijchʼakun pakakunaman, uj jarkʼachasqa lugarmanpis?

¹⁵ Davidqa Jehová Dios jarkʼawasqanchejta waj imaswan kikinchallarqataj. Ajinata qhelqarqa: “Diosmin pakakunayqa, Diosqa mayta munakuwan”, nispa. Chantá nillarqataj: “Dios munakuwan, paymin jarkʼachasqa lugarniy, paymin pakakunay, salvawajniytaj. Paymin jarkʼakuna escudoy, paypi pakakuni”, nispa (Sal. 59:17; 144:2). ¿Imajtintaj David nerqa Diospa munakuynin pakakuna jina kasqanta, jarkʼachasqa lugar jinataj kasqanta? Jehová Diosqa maypi tiyakojtinchejpis payta sirvikojtinchejqa jarkʼawasunpuni, paymanta mana karunchakunanchejpaj. Kay 91 Salmota qhelqajpis nillarqataj: “Jehová Diosta nisaj: ‘Qanmin kanki pakakunay, qanmin kanki sumaj jarkʼachasqa lugarniy’”, nispa (Sal. 91:1-3, 9, 14). Moisespis chayman rijchʼakojllatataj nerqa (Sal. 90:1). Wañupunan qayllatataj kʼachituta kikinchaspa, ajinata nerqa: “Diosqa unay watasmantapacha pakakunayki. Payqa wiñay makisninwan japʼishasunki”, nispa (Deu. 33:27). “Wiñay makisninwan” japʼiwasqanchej, ¿imatá Jehová Diosmanta yachachiwanchej?

16. ¿Imaynasmantá Jehová bendeciwanchej? (Salmo 136:23).

¹⁶ Jehovapi pakakojtinchejqa may jarkʼasqa sientekunchej. Jinapis wakin diasqa may llakisqas, sonqo pʼakisqastaj kasunman. Chay kutispi, ¿imaynatá Jehová yanapawanchej? (Salmo 136:23 leey). Jehovaqa mayta sonqochawasun,  makinwanpis kʼachamanta sayarichiwasunman jina (Sal. 28:9; 94:18). ¿Imaynatá yanapawanchej? Jehová yanapawasqanchejtapuni yachayqa, kay iskay bendicionesta yuyarikunapaj yanapawasunchej. Ñaupa kaj, maypi tiyakojtinchejpis yachanchej Jehovaqa jarkʼanawanchejtapuni. Iskay kaj, Tatanchej Jehová Diospajqa may munasqas kanchej.

17. ¿Imamantataj mana iskayrayananchejchu tiyan? (Salmo 33:18-22).

¹⁷ Yachakunchej jina, ima pruebapi rikukojtinchejpis Jehovaqa yanapawasunpuni paymanta mana karunchakunanchejpaj (2 Cor. 4:7-9). Chayrayku profeta Jeremiasqa ajinata nerqa: “Jehová Diosqa munakuyninrayku mana chinkasqatachu chinkachiwanchej. Khuyakuynenqa ni jaykʼaj tukukunchu”, nispa (Lam. 3:22). Uj salmistataj nerqa: “Jehová Diostajrí payta manchikojkunata cuidan, munakuyninta suyakojkunata”, nispa (Salmo 33:18-22 leey). Chayrayku mana iskayrayanchejchu Jehová Dios munakunallawanchejmantapuni.

18, 19. 1) ¿Imastataj mana qonqananchejchu tiyan? 2) ¿Imatataj qhepan yachaqanapi yachakusun?

¹⁸ Kay imasta ama qonqakunachu. Jehová Diosqa payta niraj rejsishajtinchej, tukuy runasta jina munakuwarqanchejña. Jinapis payta yupaychayta qallarisqanchejmantapacha mana tukukuyniyoj munakuynintapis rikuchillawanchejtaj. Ajinata munakuwasqanchejrayku makinwan japʼiwanchej jarkʼakunawanchejpaj. Payqa ladonchejpipuni kanqa. Imatachus noqanchejpaj ruwananta nisqantapis juntʼanqapuni. Chantapis payqa munan kausayninchejpi allin rinawanchejta (Sal. 46:1, 2, 7). Chayrayku ima llakiypi rikukojtinchejpis, Jehová Diosqa kallpata qowasun paymanta mana karunchakunanchejpaj.

¹⁹ Yachakunchejña imaynatachus Jehová munakuwasqanchejta. Payqa munallantaj noqanchejpis purajmanta munanakunanchejta. Chaytataj qhepan yachaqanapi yachakusun.