1, 2. ¿Imaspitaj kausayninchej rijchʼakun Jerusalenman kutej judiospa kausayninkuman? (“ Ageojpata, Zacariaspata, Esdraspatawan tiemponku” nisqa recuadrota qhawariy).

 WAKIN kutis, ¿imachus qhepaman kananmanta llakikunchejchu? Ichapis mana trabajoyoj rikhurispa “¿imaynatá familiayta uywasajri?” nispa ninchej. Politicamanta chʼajwas kasqanrayku, qhatiykachay kasqanrayku, autoridades predicacionman churanakusqankurayku, ichá familianchejmanta llakikunchej. Israelitasqa ñaupa tiempopi chayman rijchʼakoj llakiykunaspi rikukorqanku. Noqanchejpis ajina llakiykunapi rikukushanchej chayqa, Jehová imaynatachus israelitasta yanapasqan mayta kallpachawasun.

² Wakin judiosqa Babiloniapiña nacekorqanku, chaypitaj paykunaqa tukuy imayojña karqanku, ni imankutaj faltarqachu. Chayrayku sinchʼi creeyniyoj kananku karqa tukuy chayta saqepunankupaj, mana rejsisqanku jallpʼasmantaj viajanankupaj. Chayasqankumanta pisi tiemponmantaj qolqemanta pisichikorqanku, chantapis chʼajwas karqa, enemigosninkupis paykunaman churanakorqanku. Tukuy chay llakiykunapi rikukusqankurayku, wakin judiosqa Diospa templonta watejmanta sayarichiypi, mana tukuy atisqankuta yanapakuyta aterqankuchu. Chayrayku 520 wata chaynejta Jesús niraj jamushajtin, Jehovaqa profeta Ageota, Zacariastawan kacharqa llajtanta yanapanankupaj (Ageo 1:1; Zac. 1:1). Kay yachaqanapi yachakusun jina, chay profetasqa maytapuni paykunata yanaparqanku. Jinapis 50 watasninman jina, judiosqa watejmanta desanimakorqanku. Esdrastaj chaypacha Babiloniamanta Jerusalenman rerqa, chaypi kaj judiosta kallpachananpaj, yanapananpaj ima, ajinamanta Jehovata yupaychayta kausayninkupi ñaupajman churanankupaj. Esdrasqa Leyta sumajta copiayta yachaj (Esd. 7:1, 6).

3. ¿Ima tapuykunamantaj kay yachaqanapi kutichisun? (Proverbios 22:19).

 ³ Ageojpatawan Zacariaspatawan profeciasninkoqa, ñaupa tiempomanta Diospa kamachisninta yanaparqa, churanakuy kajtinpis Jehovapi atienekunallankupajpuni. Noqanchejtapis yanapallawasunmantaj ima kajtinpis Jehovapi atienekunallanchejpajpuni (Proverbios 22:19 leey). Kay yachaqanapi yachakusun imatachus Dios Ageonejta, Zacariasnejta llajtanman nisqanta, Esdrasmantataj parlarisun. Chayqa yanapawasun kay tapuykunaman kutichinapaj: Judíos llajtankuman kutipusqankutawan, ¿imaynataj kasharqanku llakiykunapi rikukuspa? ¿Imajtintaj llakiykunapi rikukuspa Diospa munayninta ruwayta ñaupajman churananchej tiyan? ¿Imataj yanapawasun ima kajtinpis astawan Jehovapi atienekunapaj?

4, 5. ¿Imasraykutaj ichapis judíos desanimakorqanku?

⁴ Judiosqa Jerusalenman chayasqankutawan ashkha ruwanasniyoj karqanku. Paykunaqa usqhayllata Jehovaj altarninta watejmanta sayaricherqanku, temploj cimientosnintapis churarqanku (Esd. 3:1-3, 10). Jinapis niraj imapi desanimakaporqanku. ¿Imataj pasarqa? Paykunaqa mana Diospa templonta ruwayllapichu trabajananku karqa, manaqa wasista ruwakunanku karqa, tarpunanku karqa, familiankumanpis mikhuchinanku karqa (Esd. 2:68, 70). Chantapis enemigosninkoqa mana jinallachu kakorqanku. Paykunaqa yuyaychakorqanku Diospa templonta ruwashasqankuta saqechinankupaj (Esd. 4:1-5).

⁵ Chantapis judiosqa qolqemanta pisichikusqankurayku, chʼajwas kasqanrayku ima, llakiypi rikukullarqankutaj. Chay tiempopi jallpʼasninkoqa Persiaj japʼiyninpi kasharqa. Rey Ciro 530 watapi wañupusqantawan, Cambisesñataj kamachiyta qallarerqa. Paytaj Egiptota japʼikapuyta munaspa ashkha soldadosninwan rerqa. Egiptoman rishajtinkutaj, ichapis soldadosnenqa Israelpa jallpʼasninta pasarqanku, mañakorqankutajchá yakuta, mikhunata, qhepakunankupaj uj lugartapis. Chaytaj judiosta astawan llakiypirajchá rikhuricherqa. Qhepan reyñataj, nisunman Darío I kamachiyta qallarishajtin, tukuynin Persiapi runasqa gobiernoj contranta oqharikorqanku, chantapis chʼajwas karqa. Chayraykutaj Jerusalenman kutej ashkha judiosqa, maytachá llakikorqanku imaynatachus familiankuta uywanankumanta. Tukuy chay imasrayku, wakin judiosqa yuyarqanku manaraj tiempochu kasqanta Jehovaj templonta watejmanta sayarichinankupaj (Ageo 1:2).

6. ¿Ima chʼampaypiwantaj judíos rikukorqanku, chanta imatataj Zacarías paykunaman nerqa? (Zacarías 4:6, 7).

⁶ (Zacarías 4:6, 7 leey). Judiosqa mana qolqellamantachu pisichikorqanku, nitaj chʼajwasllapichu rikukorqanku, manaqa qhatiykachasqa ima karqanku. 522 watapi enemigosninkoqa kamacherqanku Jehovaj templonta manaña ruwanankuta. Pero Zacariasqa judiosman nerqa Jehová atiyniyoj espíritu santonwan paykunata yanapanantapuni. Chayrayku 520 watapi, rey Darioqa mana chay kamachiyllatachu chinkacherqa, manaqa qolqetapis judiosman qorqa chay templota sayarichinallankupajpuni. Chay lugarmanta autoridadestataj kamacherqa paykunata yanapanankuta (Esd. 6:1, 6-10).

7. ¿Ima bendicionestataj judíos japʼerqanku Jehovaj munayninta kausayninkupi ñaupajman churasqankurayku?

 ⁷ Jehovaqa Ageonejta, Zacariasnejta llajtanman nerqa templota sayarichiyta kausayninkupi ñaupajman churajtinku, paykunawan kananta (Ageo 1:8, 13, 14; Zac. 1:3, 16). Chay profetas kallpachasqankurayku, judiosqa 520 watapi watejmanta templota sayarichiyta qallarerqanku,  niraj phishqa wataspitaj tukucharqanku. Chay llakiykunapi rikukuspapis, paykunaqa Jehovaj munayninta ruwayta ñaupajman churarqanku. Chayrayku Jehovaqa kausakunankupaj imatachus necesitasqankuta qorqa, qayllallanpipuni kanankupajtaj yanaparqa. Ajinamanta paykunaqa Jehovata kusiywan yupaycharqanku (Esd. 6:14-16, 22).

8. ¿Imaynatá Ageo 2:4 yanapawanchej Diospa munayninta ñaupajman churanapaj? (Sutʼinchaynintawan qhawariy).

⁸ Yachanchej manchay ñakʼariy tiempo may qayllitapiña kashasqanta. Chayrayku kunan ni jaykʼaj jina kasukunanchej tiyan sumaj willaykunata predicanamanta kamachiyta (Mar. 13:10). Jinapis qolqemanta pisichikushanchej chay, chayri autoridades predicacionman churanakushanku chayqa, ichapis mana atillasunmanchu predicacionta ñaupajman churayta. ¿Imataj yanapawasunman? “Angelesta kamachej Jehová” Dios noqanchejwanpuni kashasqanpi atienekunanchej tiyan. b Sichus munayninchejta ñaupajman churanamanta Diospa Gobiernonta ñaupajman churasun chayqa, Jehovaqa yanapawasunpuni. Chayrayku ni imata manchikunanchejchu tiyan (Ageo 2:4 leey).

9, 10. ¿Imaynatá Mateo 6:33 uj qhariwarmipi juntʼakorqa?

⁹ Olegmantawan Irinamantawan parlarina. c Paykunaqa qhariwarmi precursores kanku, waj congregacionmantaj yanapakoj rerqanku. Chay suyupi qolqe pisiyasqanraykutaj trabajonkuta pierderqanku. Uj watatapuni mana seguro trabajoyojchu kajtinkupis, kausayninkupi repararqankupuni Jehová paykunata munakusqanta, yanapasqantataj. Wakin kutistaj hermanospis yanaparillarqankutaj. ¿Imatá ruwarqanku ñaupajllamanpuni rinankupaj? Olegqa qallariypi  desanimasqa kasharqa. Jinapis pay nin: “Predicacionpi ocupasqa kasqaykoqa, aswan sumaj imaspi yuyanaykupaj yanapawarqayku”, nispa. Paykunaqa trabajota maskʼakushaspa tukuy atisqankuta predicallarqankupuni.

¹⁰ Uj pʼunchay predicacionmanta wasinkuman chayajtinku, vecinonku willarqa uj sumaj amigonku iskay bolsatapuni mikhuna imasta paykunapaj apapusqanta. Chay amigonkoqa 160 kilometrosta jina chaykama viajasqa. Oleg nillanpuni: “Chay día watejmanta repararqayku Jehová, hermanospis noqaykumanta maytapuni llakikusqankuta. Sutʼita yachayku Jehovaqa kamachisninmanta manapuni qonqakusqanta, llakiyninku mana allinchanapaj jinachu kajtinpis” (Mat. 6:33).

11. ¿Imataj kanqa Diospa munayninta ñaupajman churasun chay?

¹¹ Jehovaqa munan tukuy atisqanchejta runasta yanapananchejta payta sirvinankupaj, ajinamantataj salvakunankupaj.  7 parrafopi yachakorqanchej jina, Ageoqa judiosta kallpacharqa Diospa templonta watejmanta ruwayta qallarinankupaj. Paykunaman kaytapis nishanman jina karqa: “Cimientosta watejmanta churaykuychej, imatachus ñaupaj wataspi mana ruwasqaykichejmantataj qonqapuychej”, nispa. Arí, qonqapuspa watejmanta ruwayta qallarinanku karqa. Jehová paykunata nerqa kasukojtinku bendecinantapuni (Ageo 2:18, 19). Noqanchejpis predicacionta ñaupajman churasun chayqa, Jehová bendeciwasunpuni.

12. ¿Imajtintaj Esdraswan, paywan rejkunawan sinchʼi creeyniyoj kananku karqa?

¹² Esdrasqa 468 watapi Babiloniamanta Jerusalenman rerqa. Paywantaj waj grupo judíos rerqanku. Chayman viajanankupajqa sinchʼi creeyniyoj kananku karqa. Jerusalenman rej ñankunaqa manchikunapaj jina karqa. Paykunaqa ashkha orota, qolqetawan templopaj apasharqanku, suwastaj qhechuyta atillankuman karqa (Esd. 7:12-16; 8:31). Chantapis chayaytawankama, repararqanku Jerusalenqa mana tiyakunapaj jinachu kasqanta. Chaypeqa pisi runasllaraj tiyakusharqanku, chay llajtaj punkusnin, perqasninpis allinchanaraj karqa. ¿Imaynatá Esdraspa kausaynin yanapawanchej Jehovapi astawan atienekunapaj?

13. ¿Imataj Esdrasta yanaparqa astawan Jehovapi atienekunanpaj? (Sutʼinchaynintawan qhawariy).

¹³ Esdrasqa rikorqaña imaynatachus Jehová llakiy tiempospi llajtanta yanapasqanta. Aswan ñaupajta 484 watapi, rey Asueroqa kamacherqa tukuynin Persiapi tiyakoj judíos chinkachisqa kanankuta. Chaypacha ichapis Esdrasqa Babiloniapi tiyakusharqa (Est. 3:7, 13-15). Esdrasqa wañuy patapi kasharqa. Chay kamachiyta yachaytawantaj tukuynin provinciasmanta judiosqa ayunarqanku, waqarqankutaj. Chantapis maytachá Jehovaman qhaparikorqanku salvananpaj (Est. 4:3). ¿Imayná kashankuman karqa Esdras, waj judiospis paykunata wañuchinankumanta nisqaqa, wañuchinankupaj wakichikojkunaraj wañuchisqa kasqankumanta? (Est. 9:1, 2). Chay llakiy tiempospi imaspichus Esdras rikukusqanqa, yanaparqachá jamoj pruebaspaj. Ajinamanta astawanchá atienekorqa Jehová llajtanta jarkʼayta atinanpi. d

14. Hermananchej Anastasia mana trabajoyoj rikhurispa, ¿imatá yachakorqa?

¹⁴ Jehová llakiy tiempospi cuidawasqanchejta rikuspaqa, paypi astawan atienekunchej. Europa del Estepi tiyakoj Anastasia hermananchejmanta parlarina. Trabajonmanta compañerosnenqa, politicaman chhapusqa chʼampayta apoyananpaj obligayta munarqanku. Paytaj trabajonta saqeporqa mana chayman  chhapukuyta munasqanrayku. Anastasia willariwanchej: “Chay kutikamaqa ni jaykʼaj mana qolqeyoj rikhurerqanirajchu”, nispa. Nillantaj: “Chay llakiyniyta Jehovaman willarikorqani, paytaj munakuywan cuidawarqa. Maykʼajllapis watejmanta mana trabajoyoj rikhurisaj chayqa, mana manchachikusajchu. Yachani Tatay Jehová cuidanawantapuni kunan, qhepamanpis”.

15. ¿Imatataj Esdras ruwarqa Jehovapi atienekunallanpajpuni? (Esdras 7:27, 28).

¹⁵ Esdrasqa kausayninpi rikorqa Jehová paywanpuni kasqanta. Payqa ima kutispichus Jehová yanapasqanpi tʼukurerqa, chaytaj yanaparqa Jehovapi atienekunallanpajpuni. Payqa Esdras 7:27, 28 (leey) versiculospi nerqa: “Noqawan Jehová Diosniy kasqanrayku”, nispa. Esdrasqa sutinta apaj libropi chayman rijchʼakojta phishqa kutistawan nerqa (Esd. 7:6, 9; 8:18, 22, 31).

16. ¿Ima kutispitaj sutʼita reparasunman Jehová noqanchejwanpuni kasqanta? (Fotostawan qhawariy).

¹⁶ Pruebaspi rikukojtinchej Jehová yanapawasunman. Ichapis uj asambleaman rinanchejpaj jefenchejmanta permisota mañakunanchej kanqa, chayri jefenchejwan parlananchej kanqa reunionesman mana faltakunapaj horarionchejta cambianawanchejta. Chay kutispi sutʼita reparayta atisunman Jehová noqanchejwan kashasqanta. Ichapis tʼukunapaj jina may allinpuni riwasun, Jehovapitaj astawan atienekusun.

17. ¿Imaynapí yachanchej Esdras kʼumuykukoj sonqo kasqanta? (Tapapi dibujota qhawariy).

¹⁷ Esdrasqa kʼumuykukoj sonqo karqa, Jehovamantataj yanapata mañakorqa. Payqa imatapis mana ruwayta atispa, Jehovamanta kʼumuykukoj sonqowan yanapata mañakoj (Esd. 8:21-23; 9:3-5). Wajkunataj Diospi atienekusqanta rikuspa Esdrasta yanaparqanku, pay jinataj creeyniyoj karqanku (Esd. 10:1-4). Noqanchejpis qolqemanta pisisqa kasqanchejrayku, chayri familianchejmanta llakikusqanchejrayku ichá ni puñukuytapis atinchejchu. Jina kajtenqa Jehovamanta yanapata mañakuna, nitaj iskayrayanachu pay yanapanawanchejmanta.

18. ¿Imataj yanapawasun Jehovapi astawan atienekunapaj?

¹⁸ Jehovapi astawan atienekunapajqa paymanta kʼumuykukoj sonqowan yanapata mañakuna, hermanosninchejwantaj yanapachikuna. Hermananchej Erikamanta parlarina. Payqa kinsa wawasniyoj, llakiykunapi rikukuspataj Jehovapi atienekullarqapuni. Pisi tiempollapi uj warmi wawitan manaraj nacekushaspa wañuporqa, munasqa qosanpis wañupullarqataj. Chay llakiykunasta pasasqanpi piensarispa nin: “Mana yachanchejchu imaynatachus Jehová yanapanawanchejta. Wakin kuteqa tʼukunapaj jina yanapawanchej. Jehovaqa ashkha kutispi amigosniy imatachus ruwasqankunejta, imatachus  niwasqankunejta mañakuykunasniyman kutichiwarqa. Paykunaman llakiyniyta willarejtiy, aswan facilta yanapayta atiwanku”, nispa.

19, 20. Jerusalenman mana kutiyta atej judiosmanta, ¿imatá yachakunchej?

¹⁹ Wakin judiosqa mana Jerusalenman kutiyta aterqankuchu ichapis machitusña kasqankurayku, onqosqa kasqankurayku chayri familiankuta cuidanankurayku. Paykunamantapis mayta yachakullasunmantaj. Paykunaqa mana riyta atispapis, Jerusalenman kutej judiosta tukuy sonqo yanaparqanku ashkha imasta apachispa (Esd. 1:5, 6). Ñaupaj kaj grupo judíos Jerusalenman kutisqankumanta 19 watasninman jina, Babiloniapi qhepakoj judiosqa kapuyninkumanta yanapata apachishallarqankupunisina (Zac. 6:10).

²⁰ Jehovapaj mana munasqanchejman jinapunichu tukuy imata ruwayta atejtinchejpis, Jehovaqa imatachus paypaj ruwasqanchejta may valorniyojpaj qhawan. ¿Imaynapí chayta yachanchej? Imatachus Jehová profeta Zacariasman nisqanpi. Paymanqa nerqa Babiloniapi qhepakoj judiospa apachisqanku orowan qolqewan uj coronata ruwananta (Zac. 6:11). “Chay allin sumaj coronaqa” yanapasqankuta ‘yuyarikunankupaj’ karqa (Zac. 6:14, sutʼinchaynin). Chayrayku sutʼita yachanchej llakiykunapi rikukojtinchejpis, Jehovaqa payta tukuy atisqanchejta sirvinapaj kallpachakusqanchejta ni jaykʼaj qonqananta (Heb. 6:10).

21. ¿Imataj yanapawasun qhepaman imachus kananmanta mana manchachikunapaj?

²¹ Yachanchej kay qhepa pʼunchaykunapi llakiykunallapipuni rikukunanchejta, aswan mana allin imasraj pasanantapis (2 Tim. 3:1, 13). Jinapis ama llakiywan atipachikunachu. Yuyarikuna imatachus Jehová Ageoj tiemponpi kamachisninman nisqanta. Pay nerqa: “‘Noqa qankunawan kashani. […] Ama manchachikuychejchu’”, nispa (Ageo 2:4, 5). Noqanchejpis yachanchej munayninta ruwanapaj tukuy atisqanchejta kallpachakojtinchej, Jehovaqa noqanchejwanpuni kananta. Kay yachaqanapi sumaj imasta yachakunchej Ageojpata, Zacariaspatawan profeciasninkumanta, Esdrasmantapis. Chay yachakusqanchejman jina ruwasun chayqa, ima kajtinpis Jehovapipuni atienekusun.