1. ¿Imatá Jesús Jerusalenmanta nerqa?

 JESUSQA wañuchinankupaj pisi diasllaña kashajtin, discipulosninman uj profeciata willarqa. Chay profeciataj primera vez juntʼakorqa maypachachus Jerusalenwan templonwan thuñisqa karqanku chaypacha. Jesusqa chay profeciapi nerqa “Jerusalenta soldadoswan muyurisqata” rikunankuta (Luc. 21:20). Chayta rikuspataj usqhayllata ayqekunankuta nerqa. Chay nisqantaj juntʼakorqa Romano soldados Jerusalenta muyuykojtinku (Luc. 21:21, 22).

2. ¿Imatataj apóstol Pablo Judeamanta, Jerusalenmantawan cristianosman yuyaycharqa?

² Romano soldados Jerusalenta muyuykunankupaj pisi watasllaña faltashajtin, apóstol Pabloqa chay llajtayoj cristianosman, tukuynin Judeamanta cristianosmanpis uj sumaj cartata apacherqa. Chaytaj kunan sutikun Hebreosman Carta. Chay cartapi Pabloqa yuyaycharqa Jerusalén thuñisqa kananpaj wakichikunankuta. Chaypi mana wañunankupaj cristianosqa wakichisqas kananku karqa wasisninkuta, qhatusninkutapis saqeranankupaj. Chayrayku Pabloqa Jerusalenmanta parlaspa nerqa: “Kaypeqa mana kapuwanchejchu kikillanpipuni kaj llajtaqa. Astawanpis jamoj llajtata mayta suyakushanchej”, nispa (Heb. 13:14).

3. ¿Imataj ‘sumaj cimientosniyoj llajta’, chanta imaraykutaj chayta suyakushanchej?

³ Jerusalenmanta, Judeamanta cristianos ayqekojtinku runasqa paykunamanta burlakorqankuchá, jinapis ayqekusqankurayku salvakorqanku. Kay tiempopipis runasqa noqanchejmanta burlakullawanchejtaj mana qolqepichu atienekusqanchejrayku,  nitaj runas problemasta allinchanankupichu atienekusqanchejrayku. ¿Imajtín mana chay imaspichu atienekunchej? Yachanchej kay mundo tukukapunanta, ‘sumaj cimientosniyoj llajtatataj suyakushanchej’, “jamoj llajtata”. Chay llajtaqa Diospa Gobiernon (Heb. 11:10; Mat. 6:33). a Kay yachaqanapi kay kinsa imasta yachakusun: 1) Imaynatachus Pabloj yuyaychaykunasnin ñaupa tiempomanta cristianosta yanapasqanta “jamoj llajtata” suyakunallankupajpuni. 2) Imaynatachus Pablo chay cristianosta wakichisqanta Jerusalén thuñisqa kananpaj. 3) Imaynatachus Pabloj yuyaychaykunasnin noqanchejtapis yanapanawanchejta.

JEHOVÁ NI JAYKʼAJ SAQERPARINAWANCHEJPI ATIENEKUNA

4. ¿Imajtintaj Jerusalén cristianospaj may munasqa llajta karqa?

⁴ Jerusalenqa cristianospaj may munasqa llajta karqa. ¿Imajtín? Ñaupaj kaj congregacionqa chay llajtapi rikhurerqa, 33 watapi. Diospa llajtanta kamachejkunapis chay llajtallapitaj kasharqanku. Chantapis ashkha cristianosqa chay llajtapi wasisniyoj, tukuy imasniyoj karqanku. Jinapis Jesusqa discipulosninta nerqa Jerusalenmanta, Judeamantawan ayqenanku kasqanta (Mat. 24:16).

5. ¿Imaynatá Pablo cristianosta yanaparqa wakichisqas kanankupaj?

⁵ Pabloqa cristianos Jerusalenmanta ayqekunankupaj wakichisqa kanankuta munasqanrayku, paykunata reparacherqa Jehovaqa manaña ñaupajta jinachu chay llajtata qhawasqanta. Yuyaricherqa Jehová templota, sacerdotesta, uywa wañuchisqasta jaywakusqantapis manaña allinpajchu qhawasqanta (Heb. 8:13). Chay llajtayojkunaqa casi tukuyninku Mesiasta qhesacharqanku. Chantapis runasqa manaña Jerusalenmanchu Jehovata yupaychaj rinanku karqa. Jerusalenwan templowanqa thuñisqa kanan karqa (Luc. 13:34, 35).

6. Pablo Hebreos 13:5, 6 versiculospi yuyaychasqanta, ¿imajtintaj cristianos necesitarqanku?

⁶ Pablo hebreosman cartanta qhelqashajtin, Jerusalenqa sumaj llajta karqa. Ñaupa tiempomanta qhelqaj romano nerqa Jerusalenqa chay lugarespi llajtasmanta aswan rejsisqa llajta kasqanta. Sapa wata ashkha lugaresmanta judíos chayman rej kanku fiestasninkuta ruwaj, chayrayku ashkha qolqe chay llajtaman yaykoj. Chaynejta wakin cristianospis sumajtachá ganaj kanku. Ichapis chayrayku Pablo paykunata nerqa: “Kausayniykichejpi amapuni qolqemanta wañusqa kaychejchu. Astawanpis imaschus kapusunkichej chaywan kusisqa kaychej”, nispa. Chaymantataj Diosmanta Qhelqasqamanta yuyaricherqa Jehová kikin kayta nisqanta: “Mana jaykʼajpis saqerparisqaykichu. Nitaj jaykʼajpis wijchʼurparisqaykichu”, nispa (Hebreos 13:5, 6 leey; Deu. 31:6; Sal. 118:6). Aswan qhepaman Jerusalenmanta, Judeamantawan cristianosqa chay nisqanta yuyarikunankupuni karqa. ¿Imarayku? Imaraykuchus chay cartata japʼisqankumanta pisi tiemponman wasisninkuta, qhatusninkuta, casi tukuy imasninkuta saqespa, waj ladopi kausayta maskʼakunanku karqa. Chayta ruwaytaj mana facilchu kanman karqa.

7. ¿Imajtintaj kunanmantaña Jehovapi tukuy sonqo atienekunanchej tiyan?

⁷ ¿Imatá yachakunchej? Ñaupa tiempomanta cristianos jinallataj rijchʼarisqas, wakichisqas kananchejta (Luc. 21:34-36). ¿Imapaj? “Manchay ñakʼariy” tiempopaj, maypichus kay sajra mundo tukuchisqa kanqa  chaypaj (Mat. 24:21). Chay tiempopi ichapis wakin imasninchejta, chayri tukuy imasninchejtapuni saqerananchej kanqa, tukuy sonqotaj atienekunanchej kanqa Jehová ni jaykʼaj saqerparinawanchejpi. Chaywanpis kunanña, niraj manchay ñakʼariy tiempo qallarishajtin mashkhatachus Jehovapi atienekusqanchejta rikuchisunman. Kayta tapurikuna: “Imastachus ruwayta munasqay, ajllasqaypis, ¿imatá rikuchin? ¿Qolqellapi atienekusqaytachu, Jehová cuidanawanpi atienekusqaytachu?” (1 Tim. 6:17). Ñaupa tiempo cristianosmanta sumaj imasta yachakojtinchejpis, “manchay ñakʼariy” tiempoqa aswan sinchʼiraj kanqa. Chayrayku chay ñakʼariy tiempo qallarejtin, ¿imaynatá yachasun imatachus ruwananchejta?

ÑAUPAJMAN PUSAJKUNATA KASUKUNA

8. ¿Imatataj Jesús discipulosninta kamacherqa?

⁸ Pablo hebreosman cartanta apachisqanmanta uj mashkha watasnillanman, romano soldadosqa Jerusalén llajtata muyuykorqanku, cristianostaj repararqanku ayqekunanku tiempo chayamusqanta, Jerusalén thuñisqa kananta yachasqankurayku (Mat. 24:3; Luc. 21:20, 24). Jinapis, ¿maymantaj ayqekunkuman karqa? Jesusqa “Judeapi kajkunaqa orqosman ayqechunku” nispalla nisqa (Luc. 21:21). Chaywanpis ashkha orqos karqa, ¿mayqenmantaj ayqekunkuman karqa?

9. ¿Imaraykutaj cristianos yachayta munankuman karqa maymanchus ayqekunankuta? (Mapatawan qhawariy).

⁹ Cristianosqa ayqekuyta atinkuman karqa Samaria orqosman, Galilea orqosman, Hermón orqoman, Líbano orqosman, chayri Jordán mayu chimpapi kaj orqosman (mapata qhawariy). Chay orqosmanta wakin llajtasqa pakakunapaj sumaj kaspa jinarqa. Ujnenqa Gamala llajta karqa, mana chayay atina orqo patapi kasharqa. Wakin judiosqa yuyarqanku pakakunankupaj sumaj llajta kasqanta. Jinapis romanosqa Gamala llajtawan maqanakuspa thuñirparqanku, chay llajtayojkunataj ashkhas wañorqanku. b

10, 11. 1) ¿Pikunanejtataj Jehová llajtanta yanapanman karqa? (Hebreos 13:7, 17). 2) ¿Imataj karqa kasukojkunawan? (Dibujotawan qhawariy).

 ¹⁰ ¿Imaynatá cristianos yacharqanku maymanchus ayqenankuta? Jehovaqa congregacionta ñaupajman pusajkunanejtasina nerqa maymanchus ayqekunankuta. Aswan qhepaman Eusebio sutiyoj qhelqaj runa, chay tiempomanta escribispa nerqa Jerusalenmanta wakin hermanosman Dios sutʼinchasqanta, niraj guerra kashajtin cristianos llajtankuta saqespa Pella llajtaman ripunankuta, mayqenchus Pereapi kasharqa chayman. Pella chayri Pela llajtaqa cristianos ayqekunankupaj sumaj karqa. Chay llajtaqa Jerusalén qayllallapi kasharqa, rinapajtaj facillla karqa. Chantapis chay llajtapi tiyakojkunamanta ashkhasqa mana judioschu karqanku, chayrayku mana yuyallajpischu kanku romanospa contranta maqanakuyta (mapata qhawariy).

¹¹ Pabloqa cristianosta yuyaychasqa: “Qankunata ñaupajman pusasunkichej chaykunata kasukuychej”, nispa (Hebreos 13:7, 17 leey). Pabloj yuyaychayninta kasukojkunaqa orqosman ayqekorqanku, nisunman Pela llajtaman. Kasukusqankuraykutaj mana wañorqankuchu. “Sumaj cimientosniyoj llajtata”, nisunman Diospa Gobiernonta suyakusqankurayku, Jehová mana paykunata saqerparerqachu (Heb. 11:10).

12, 13. ¿Imaynatá Jehová llajtanta pusarqa llakiy tiempospi kashajtinku?

¹² ¿Imatá yachakunchej? Jehovaqa ñaupajman pusawanchej chaykunamanta valekusqanta imatachus ruwananchejta kamachinawanchejpaj. Bibliaqa sutʼita willawanchej Jehová kasukoj kamachisninmantapuni valekusqanta, llakiy tiempospi kashajtinku llajtanta pusananpaj (Deu. 31:23; Sal. 77:20). Kay tiempopipis sutʼita rikunchej Jehovaqa ñaupajman pusajkunamanta siga valekushasqanta.

¹³ Coronavirus qallarejtinkama ‘ñaupajman pusajkunaqa’ necesitasqanchej kamachiykunata qowarqanchej. Ancianosqa kamachiykunata  japʼerqanku imaynatachus tantakuykunata ruwanamanta, ajinamanta Jehovata siga yupaychanallanchejpajpuni. Uj mashkha killasninmantaj ni jaykʼaj jina kinsa pʼunchaypaj jatun tantakuyta ruwarqanchej. Chaytaj 500 kuraj parlaykunapi uyarikorqa internetnejta, telenejta, radionejta ima. Tukuy chay tiempopi necesitasqanchej kamachiykunata japʼillarqanchejpuni, chaytaj yanapawarqanchej ujchasqallapuni kanapaj. Aswan qhepaman imapis kajtin, sutʼita yachanchej Jehovaqa llajtanta ñaupajman pusajkunata yanapanallantapuni, allin yuyaywan pusanawanchejpaj. Jehovapi atienekojtinchejpis, kamachiykunasninta kasukojtinchejpis, ¿imatawán ruwananchej tiyan wakichisqas kanapaj, manchay ñakʼariy tiempo chayamojtintaj imatachus ruwanata yachanapaj?

FAMILIA JINA MUNANAKUNA, WASINCHEJMANTAJ WAJYARIKUNA

14. Hebreos 13:1-3 nisqanman jina, ¿imastataj cristianos ruwananku karqa Jerusalenpa thuñikuynin pʼunchay qayllaykamusqanman jina?

¹⁴ Manchay ñakʼariy tiempo qallarejtin, ni jaykʼaj jina purajmanta munanakunanchej kanqa. Chaypachaqa Jerusalenmanta, Judeamanta cristianos jina ruwananchej kanqa. Paykunaqa munanakuyta yachajpuni kanku (Heb. 10:32-34). Jinapis Jerusalenpa thuñikuynin pʼunchay qayllaykamusqanman jina, ni jaykʼaj jina ‘familia jina munanakunanku’ karqa, ‘wasinkumantaj wajyarikunanku’ karqa (Hebreos 13:1-3 leey). c Noqanchejpis kikillantataj ruwananchej kanqa manchay ñakʼariy tiempopi.

15. ¿Imajtintaj hebreo cristianos familia jina munanakunanku karqa, wajyarikuytataj yachananku karqa?

¹⁵ Romano soldados Jerusalenta muyuykojtinku, chaymantataj kaymanta jinalla ripojtinku, cristianosqa usqhayllata ayqekorqanku. Chayrayku wakin imitasnillankuta apakuyta aterqanku (Mat. 24:17, 18). Orqosman rishaspa, Pelaman chayaspapis purajmanta yanapanakunanku karqa chaypi kausanankupaj. Ashkha hermanoschá mikhunata, ropata, waj imastawan ‘pisichikorqanku’. Hermanosninkutaj paykunata yanaparispa, kapusqankumanta qorispa ima familiankuta jina munakusqankuta, wajyarikuytataj yachasqankuta rikuchiyta aterqanku (Tito 3:14).

16. ¿Imaynamantataj hermanosninchejman munakuyninchejta rikuchisunman? (Fototawan qhawariy).

¹⁶ ¿Imatá yachakunchej? Hermanosninchejta munakusqanchejrayku necesitajtinku yanaparisqanchejtapuni.  Ashkha hermanosqa tukuy sonqo yanaparerqanku guerramanta, desastres naturalesmanta ayqekamojkunata. Kausanankupaj necesitasqanku imasta qorqanku, yanaparerqanku, kallpacharerqankutaj Jehovata sirvinallankupajpuni. Ucraniapi guerramanta ayqekamoj hermana nerqa: “Jehovaqa hermanoswan yuyaychachiwayku, sumajta yanapachiwayku. Maytapuni tʼukuyku hermanos chay jina munakuywan japʼikuwasqaykumanta. Manchaytapuni yanapawarqayku Ucraniapi, Hungriapi, kunantaj Alemaniapi”, nispa. Wasinchejman wajyarikuyta yachajtinchej Jehovaqa noqanchejmanta valekunman hermanosninchejta cuidananpaj (Pro. 19:17; 2 Cor. 1:3, 4).

17. ¿Imajtintaj kunanña familia jina munanakunanchej tiyan, wasinchejmanpis wajyarikuyta yachananchej tiyan?

¹⁷ Kunanña purajmanta yanapanakunanchej tiyan, qhepamantaj astawanraj chayta ruwananchej kanqa (Hab. 3:16-18). Chayrayku Jehovaqa yachachishawanchej familia jina munanakuyta, wasinchejman wajyarikuytapis. Manchay ñakʼariy tiempopitaj astawanraj chayta ruwananchej kanqa.

¿IMATAJ ASWAN QHEPAMAN KANQA?

18. ¿Imaynatá hebreo cristianos jina ruwasunman?

¹⁸ Pikunachus kasukuspa orqosman ayqekorqanku chay cristianosqa Jerusalén thuñisqa kajtin salvakorqanku. Jerusalenmanta ripojtinkupis Jehovaqa mana paykuna saqerparerqachu. ¿Imaynatá paykuna jina ruwasunman? Aswan qhepamanta mana tukuy imatapunichu yachanchej. Chaywanpis Jesusqa paykunata jinallataj yuyaychawanchej kasukunapaj wakichisqa kanata (Luc. 12:40). Chantapis Pablo hebreosman qhelqasqan carta kay tiempopi yanapallawasunmantaj. Jehovataj niwanchej ni jaykʼaj saqerparinawanchejta, ni jaykʼaj wijchʼurparinawanchejta (Heb. 13:5, 6). Chayrayku kikillanpipuni kaj llajtata, nisunman Diospa Gobiernonta mayta suyakunallapuni. Chayta ruwasun chayqa, wiñaypaj sumaj bendicionesta japʼisun (Mat. 25:34).