1, 2. ¿Pitaj Sadoc karqa? (1 Crónicas 12:22, 26-28).

 KAYPI tʼukuriy: 340.000 runasmanta astawan tantasqas kasharqanku Davidta tukuynin Israelta kamachinanpaj reyta jina churanankupaj. Chay runasqa Hebrón qaylla orqospi kinsa diasta qhepakorqanku. Paykunaqa asirisharqanku, kusiywan parlarikusharqanku, Jehovapajpis alabanzasta takirisharqanku (1 Cró. 12:39). Paykuna ukhupitaj Sadoc sutiyoj joven kasharqa, paytaj nisina ancha rejsisqachu karqa. Jinapis Jehovaqa payta qhawamusharqa, munarqataj paypis chaypi kashasqanta yachananchejta (1 Crónicas 12:22, 26-28 leey). Chanta, ¿pitaj Sadoc karqa?

² Sadocqa uj sacerdote karqa, kuraj kaj sacerdote Abiatarwan khuskataj llankʼaj. Chantapis Diosqa Sadocman yachayninta qorqa, imachus munaynin kasqanta entiendenanpajpis yanaparqa, chayrayku payqa Diospa sutinpi parlaj (2 Sam. 15:27). Runastaj paywan yuyaychachikoj kanku. Chantapis Sadocqa mana manchachikoj karqa, kay yachaqanapitaj chaymanta astawan parlarisunchej.

3. 1) ¿Imaraykutaj mana manchachikojkuna kana tiyan? 2) ¿Imatataj kay yachaqanapi yachakusunchej?

³ Kay qhepa pʼunchaykunapi Satanasqa ni jaykʼaj jina tukuy imata ruwashan Jehovapi manaña creenanchejpaj (1 Ped. 5:8). Chayrayku Jehovaqa Satanasta, kay sajra mundontawan chinkachenqa, chaykamataj mana manchachikojkuna kananchej tiyan (Sal. 31:24). Kunantaj kinsa imaspi Sadoc jina mana manchachikojkuna kayta atisqanchejta yachakuna.

DIOSPA GOBIERNONTA APOYANA

4. ¿Imaraykutaj mana manchachikojkuna kana tiyan Diospa Gobiernonta apoyanapaj? (Fototawan qhawariy).

⁴ Jehovaj kamachisnenqa Diospa Gobiernollanta tukuy sonqo  apoyanchej, jinapis chaypajqa mana manchachikojkuna kana tiyan (Mat. 6:33). Kay sajra mundopi kausakusqanchejrayku mana manchachikojkuna kana tiyan Jehovaj kamachiykunasninta kasukunapaj, Diospa Gobiernonmanta sumaj willaykunatapis willanapaj (1 Tes. 2:2). Kay mundo aswan tʼaqanasqa kasqanraykutaj, sonqonchej aysawasunman uj partidota apoyanapaj (Juan 18:36). Ashkha Jehovaj testigosnenqa qolqemanta pisichikunku, wakintaj politicaman mana satʼikusqankurayku, guerrasman mana risqankurayku maqasqas, carcelpi wisqʼasqas kanku.

5. ¿Imaraykutaj Sadoc mana manchachikoj kanan karqa?

⁵ Sadocqa mana Davidta reyta churasqankuta qhawarikojllachu Hebronman rerqa. Payqa armasninwan kasharqa, maqanakupaj sumaj wakichisqa (1 Cró. 12:38). Payqa listo kasharqa Davidwan ima maqanakumanpis rinanpaj, Israeltataj enemigosninmanta jarkʼananpaj. Sadocqa ichapis guerrapi maqanakuyman mana sumaj yachasqarajchu karqa, jinapis payqa ni imata manchachikojchu.

6. ¿Imatá Sadoc Davidmanta yachakorqa? (Salmo 138:3).

⁶ ¿Imataj Sadocta yanaparqa mana manchachikoj kananpaj? Payqa mana manchachikoj wapu runasmanta yachakorqa, paykunamanta ujnenqa David karqa. Davidqa mana manchachikuspa “israelitasta guerraspi pusaykachaj”, chayrayku tukuy israelitas de acuerdo kasharqanku reyta churanankupaj (1 Cró. 11:1, 2). Davidqa Jehovapi atienekoj, paymantataj yanapata mañakoj enemigosnin qhatiykachajtinku (Sal. 28:7; Salmo 138:3 leey). Chantapis Sadocqa waj mana manchachikoj runasmanta yachakullarqataj, paykunamanta wakintaj karqanku Jehoiadá, wawan Benaya, pichus wapu soldado karqa chay, chantá ñaupa tatasninkoj familiasninkumanta 22 umas kajkuna ima, pikunachus Davidta apoyarqanku chaykuna (1 Cró. 11:22-25; 12:26-28). Tukuy chay runastaj Davidta reyta jina tukuy sonqo apoyarqanku.

7. 1) ¿Pikunamantataj mana manchachikoj kayta kay tiempopi yachakusunman? 2) ¿Imatataj yachakunki videopi rikhurej hermano Nsilumanta?

 ⁷ Jehovaj Gobiernonta apoyajkunamanta yachakoyqa kallpata qowanchej mana manchachikunapaj. Reyninchej Jesucristoqa ni imapi Satanaspa mundonman satʼikuyta munarqachu (Mat. 4:8-11; Juan 6:14, 15). Payqa kallpata japʼinanpaj Jehovapipuni atienekoj. Chantapis mayta yachakullasunmantaj kay tiempopi jovenesmanta. Paykunaqa mana cuartelman rinankupaj, nitaj politicaman satʼikunankupaj sinchʼita sayanku. Paykunamanta astawan yachakunapaj jw.org paginapi maskʼasunman. a

HERMANOSTA YANAPANA

8. ¿Ima kutispitaj ancianos Sadoc jina mana manchachikojkuna kananku tiyan?

⁸ Jehovaj kamachisnenqa purajmanta tukuy sonqo yanapanakunku (2 Cor. 8:4). Wakin kutitaj chayta ruwanapajqa mana manchachikojkuna kana tiyan. Uj guerra qallarejtin, ancianosqa yachanku hermanos kallpachanata, yanapata, publicacionesta, Bibliata, ropata, mikhunata, wasita ima necesitasqankuta. Hermanosta munakusqankuraykutaj, ancianosqa chay necesitasqanku imasta apapunku kausayninkuta wañuy pataman churaspapis (Juan 15:12, 13). Ajinamanta Sadoc jina mana manchachikojkuna kasqankuta rikuchinku.

9. 2 Samuel 15:27-29 nisqanman jina, ¿imata ruwanantataj David Sadocman nerqa? (Dibujotawan qhawariy).

⁹ Davidqa wañuy patapi rikukorqa wawan Absalón gobiernonta qhechuyta munasqanrayku (2 Sam. 15:12, 13). Chayrayku Davidqa usqhayllata Jerusalenmanta ayqenan karqa. Payqa kamachisninman nerqa: “Ayqenachej kaymanta. Mana ayqejtinchejqa niñapuni Absalonmanta ayqeyta atisunchu”, nispa (2 Sam. 15:14). Khuskan ñanpiña kashajtinkutaj, Davidqa cuentata qokorqa Jerusalenpi  pillatapis saqenan kasqanta, ajinamanta Absalón imatachus wakichishasqanta payman willananpaj. Chayrayku Sadoctawan waj sacerdotestawan Jerusalenman kuticherqa wateqamunankupaj (2 Samuel 15:27-29 leey). Paykunataj sumajta cuidakunanku karqa Davidpa kamachisqanta juntʼanankupaj, mana cuidakojtinkoqa wañuchisqa kankuman karqa. Absalonqa payllapi yuyaj, mana khuyakuyniyoj, wasanchaj runataj karqa. Paychus yachanman karqa chay runas Davidta jarkʼanankupaj wateqashasqankuta chayqa, imananmanchus karqapis paykunataqa.

10. ¿Imaynatá Sadocwan paywan kaj runaswan Davidta jarkʼarqanku?

¹⁰ Davidqa Sadocta kachaytawanña, sumaj amigon Husaitañataj Jerusalenman kacharqa (2 Sam. 15:32-37). Husaiqa Davidpa kamachisqanta kasuspa, Absalonwan allinpaj qhawachikorqa, paymantaj yuyaycharqa imaynatachus Davidta japʼinankuta. Chay yuyaychasqantaj Davidman tiempota qorqa maqanakupaj wakichikunanpaj. Husaiqa chay yuyaychasqanta Sadocman, Abiatarmanwan willachimorqa (2 Sam. 17:8-16). Paykunataj chayta Davidman willacherqanku (2 Sam. 17:17). Jehová yanapasqanrayku, Sadocwan chay waj sacerdoteswanqa David mana wañuchisqa kananpaj yanapakorqanku (2 Sam. 17:21, 22).

11. ¿Imatataj ruwana tiyan Sadoc jina mana manchachikojkuna kanapaj?

¹¹ Wakin kutis hermanosninchejta yanapashaspa ichapis wañuy patapi rikukusunman. Chay kutispi, ¿imaynatataj Sadoc jina mana manchachikojkuna kasunman? 1) Kamachiykunata kasukuna. Chay kutispeqa ujchasqasllapuni kananchejpaj kasukunanchejpuni tiyan. Chayrayku sucursal kamachisqanman jinapuni imatapis ruwana (Heb. 13:17). Kamachiykuna tiyan niraj uj desastre kashajtin imatachus ruwanamanta, chantá uj desastre kajtinña imatachus ruwanamantapis. Ancianostaj chayta sapa kuti qhawaykurinanku tiyan (1 Cor. 14:33, 40). 2) Ama manchachikunachu,  allin yuyaywantaj imatapis ruwana (Pro. 22:3). Sumajta qhawarikuspa imatapis ruwana. Ama qhasita wañuy pataman churakunachu. 3) Jehovapi atienekuna. Payqa tukuyninchejmanta llakikun, nitaj munanchu imapis pasanawanchejta. Pay yanapawasunman hermanosta yanaparishaspa kausayninchejta mana wañuy pataman churanapaj.

12, 13. ¿Imatataj yachakunki Viktormanta, Vitalimantawan? (Fototawan qhawariy).

¹² Viktormanta, Vitalimantawan parlarina. Paykunaqa ancianos kanku, Ucraniapitaj mikhunata, yakutawan hermanosman apanamanta encargakorqanku. Víktor nin: “Tukuynejta purimorqayku mikhunata maskʼaspa. Jinata maskʼashaspataj qayllaykupi disparasqankuta uyarej kayku. Uj hermanoqa ashkha mikhunata jallchʼasqa, chay jallchʼasqanmantataj hermanospaj qowarqayku. Chaywantaj ashkha hermanos uj tiempota kayta atillarqanku. Chay mikhunata automan cargashajtiyku, 20 metrosman jina uj bomba chayamorqa, nitaj phatarqachu. Chayrayku chay día entero Jehovamanta rogakorqani hermanosniyta yanapayta atinallaypajpuni kallpata qonawanpaj”, nispa.

¹³ Vitali nin: “Mana manchachikojpuni kanay karqa. Ñaupaj kutipeqa 12 horasta autopi rerqani. Tukuy chay risqaypitaj Jehovamanta mañakorqani”, nispa. Vitaliqa mana manchachikorqachu, allin yuyaywantaj imatapis ruwarqa. Pay nillanpuni: “Jehovamanta mana saykʼuspa mañakorqani yachayta qonawanta, imatachus mana ruwayta atisqaytataj reparachinawanta. May ñankunatachus gobierno purinata nerqa chaynillanta rerqani. Tukuy hermanos khuska llankʼasqankuta rikuytaj creeyniyta kallpacharqa. Hermanosqa ñanta pichaj kanku, mikhunasta tantaj kanku, automantaj cargaj kanku. Chantapis Viktormanwan noqamanwan mikhunata, alojamientota ima qowaj kayku”, nispa.

JEHOVAMANTA AMAPUNI KARUNCHAKUNACHU

14. ¿Imayná sientekunchej uj munasqa familiarninchej chayri amigonchej Jehovamanta karunchakojtin?

¹⁴ Uj familiarninchej chayri uj amigonchej Jehovamanta karunchakojtin, sonqonchej maytapuni nanawanchej (Sal. 78:40; Pro. 24:10). Paywan may ujchasqas karqanchej chaytaj, aswan sinchʼitaraj nanawasunman. Chay kutispi Sadocpa kausaynin mayta yanapawasunman.

15. ¿Imaraykú Sadoc mana manchachikoj kanan karqa Jehovamanta mana karunchakunanpaj? (1 Reyes 1:5-8).

¹⁵ David allin machituña kashajtin, wañupunanpaj jinañataj kashajtin, wawan Adoniasqa gobiernonta qhechuyta munarqa. Jehovataj munarqa wawan Salomón rey kananta (1 Cró. 22:9, 10). Chaypacha Sadocqa Jehovamanta mana karunchakorqachu, amigon Abiatartaj Adoniasman sayakorqa (1 Reyes 1:5-8 leey). Ajinamanta Abiatarqa Davidta, Jehovatapis wasancharqa. Chayta rikuspa Sadocqa may llakisqapunichá kasharqa. Paykunaqa 40 watas kurajtaña sacerdotes jina khuska llankʼarqanku (2 Sam. 8:17). Chantapis “cheqa Diospa arcanta” khuska aparqanku (2 Sam. 15:29). Paykunaqa Davidta apoyarqanku, Jehovata sirvispataj khuska ashkha imasta ruwarqanku (2 Sam. 19:11-14).

16. ¿Imataj Sadocta yanaparqa Jehovamanta mana karunchakunanpaj?

¹⁶ Abiatar Jehovamanta karunchakojtinpis, Sadocqa manapuni Jehovamanta karunchakorqachu. Davidtaj yacharqa Sadocqa ni jaykʼaj payta wasanchananta. Chayrayku Adonías imatachus ruwasaj nishasqanta willajtinku, Davidqa Sadocta, Natanta, Benayatawan kamacherqa wawan Salomonta reyta jina  churanankuta (1 Rey. 1:32-34). Sadocqa maytachá yachakorqa Jehovaj waj kamachisninmanta, pikunachus Diosta mana wasancharqankuchu, Davidtataj apoyarqanku chaykunamanta. Paykunamanta ujnintaj Natán karqa (1 Rey. 1:38, 39). Salomonqa reyña kaspa, sacerdote Sadocta “Abiatarpa cuentanmanta churarqa” (1 Rey. 2:35).

17. Pinillanchejpis Jehovamanta karunchakojtin, ¿imaynatá Sadoc jina ruwasunman?

¹⁷ ¿Imaynatá Sadoc jina ruwasunman? Pinillanchejpis Jehovamanta karunchakun chayqa, sutʼita rikuchina Jehovallatapuni sirviyta munasqanchejta (Jos. 24:15). Jehovataj kallpata qowasun, mana manchachikunapajtaj yanapawasun. Chayrayku paymanta mañakuna, amataj hermanosninchejmanta karunchakunachu. Jehovaqa payta munakusqanchejta qhawamushan, chayraykutaj bendeciwasun (2 Sam. 22:26).

18. ¿Imatataj Marcomanta Sidsemantawan yachakunki?

¹⁸ Marcomantawan Sidsemantawan parlarina. Iskaynin warmi wawasninkoqa wiñarqoytawan Jehovamanta karunchakorqanku. Marco nin: “Wawasninchejtaqa nacekusqankumantapacha mayta munakunchej, tukuy imatataj ruwayta munanchej jarkʼanapaj. Chayrayku Jehovamanta karunchakojtinku, sonqonchej maytapuni nanawanchej”, nispa. Pay nillantaj: “Jinapis Jehovaqa noqaykuwanpuni kasharqa. Jehová yanapawarqayku noqa llakisqa kashajtiy señoray Sidse kallpachanawanpaj. Pay llakisqa kashajtintaj, noqa payta kallpachanaypaj”, nispa. Señoran Sidse nin: “Jehovaj kallpallanwan aguantarqayku. Wawasniy karunchakunankupaj noqa juchayoj kasqayta yuyaspa mayta llakikorqani. Chaytataj Jehovaman willakorqani. Pisi tiemponmantaj, ashkha watasmanta uj hermanawan tinkorqani, paytaj makisninta hombrosniyman churaspa, sumajta qhawariwaspa niwarqa: ‘Sidse, mana qanchu juchayoj kanki’, nispa. Jehovaj yanapayninwan kusisqallapuni payta sirvishani”, nispa.

19. ¿Imatataj ruwayta munanki?

¹⁹ Jehovaqa munan tukuy kamachisnin Sadoc jina wapus kananchejta (2 Tim. 1:7). Jinapis mana munanchu kallpallanchejpi atienekunata, manachayqa munan paypi atienekunata. Chayrayku imapi rikukuspapis, paymanta yanapata mañakuna ama manchachikunapaj. Jehovaqa yanapawasunpuni Sadoc jina mana manchachikunapaj (1 Ped. 5:10).