Jesusqa yachacherqa tukuywan allinta kausakunanchej kasqanta. Jinapis uj pacha Jesús apostolesninman nerqa: “Ama yuyaychejchu kay jallpʼaman allin kausayta apamoj jamusqayta. Mana allin kausayta apamojchu jamuni, manachayqa tʼaqanachej jamuni. Noqaqa runasta tʼaqanachej jamuni. Qhari wawaqa tatanpa contranpi kanqa, warmi wawapis mamanpa contranpi, ñojchʼapis suegranpa contranpi”, nispa (Mat. 10:34, 35). Chayta nisqan, ¿imatá niyta munan?

Jesusqa mana familiasta tʼaqanachiytachu munarqa, jinapis yacharqa yachachisqanqa wakin familiasta tʼaqanachinanta. Jesuspa discipulosnin kayta munaspa bautizakuyta munajkunaqa, yachananku tiyan ichapis familiankuman mana gustananta. Wakin kutis ichá qosanku, warminku chayri waj familiarninku churanakojtin, mana facilchu kanman Cristoj yachachisqanman jina ruwananku.

Bibliaqa cristianosman niwanchej tukuywan allinpi kausakunanchejta (Rom. 12:18). Jinapis wakin familiaspajqa Jesuspa yachachisqan uj ‘espada jina’ kanman. ¿Imarayku? Ichapis uj familiapeqa ujlla Jesuspa yachachisqanta japʼikunman, ujkunatajrí chayta qhesachankuman chayri chayman churanakunkuman. Ajina kajtin familiaresnin, nisunman “kikin wasillanmantataj” kajkuna, Jesuspa yachachisqanta japʼikojpa enemigonman tukunku (Mat. 10:36).

Waj religionmanta kaj familiaresniyoj hermanosqa, wakin kuti ajllananku tiyan pitachus kusichinankuta: Jehovatachus Jesustachus, chayri familiasninkutachus. Chayta ajllananku kanqa familiaresninku fiestasta ruwanankupaj tanqajtinku. Jesús nerqa: “Tatanta mamanta noqamanta astawan munakojqa, mana noqaypata kananpaj jinachu”, nispa (Mat. 10:37). Chaywanqa mana nisharqachu tatasninkuta pisillataña munakunanku kasqanta. Astawanqa yachachisharqa sutʼita yachananku kasqanta imachus kausayninkupi aswan importante kasqanta. Sichus mana testigo familianchej mana munanchu Jehovata yupaychananchejta chayqa, payta munakullanchejpuni. Jinapis yachanchej Jehovataraj ñaupajta astawan munakunanchej kasqanta.

Familianchej churanakuwajtinchejqa mayta llakikusunman. Jinapis Jesuspa discipulosnin kayta munaspaqa, Jesuspa nisqanta yuyarikunanchej tiyan. Pay nerqa: “Sichus pipis mana ñakʼarina kʼaspin aparisqa qhepayta jamonqa chayqa, mana noqaypata kananpaj jinachu”, nispa (Mat. 10:38). Cristianosqa yachanchej Jesuspa discipulosnin kanapajqa llakiykunata aguantananchej kasqanta. Chay llakiykuna ukhupitaj kashan familiaresninchej churanakuwasqanchej. Jinapis munanchej allin kajtapuni ruwayta. Chayta rikuspa familiaresninchej cambianankupaj, Bibliamantapis yachakuyta qallarinankupaj (1 Ped. 3:1, 2).