1935 watapi Inglaterramanta Darlastonpi nacekorqani, Black Country llajtapi. Chaytaj niyta munan “yana suyu”. Chay lugarpeqa ashkha fábricas kasqanrayku yana qʼoshñi juntʼa kaj. Chayrayku chay sutiwan rejsisqa kaj. Tawa watasniyoj jina kashajtiytaj, tatasneyqa Jehovaj testigosninwan Bibliamanta yachakuyta qallarerqanku. 15 watasniyoj kashaspataj repararqani cheqa religionmantapuni kasqankuta, bautizakorqanitaj 1952 watapi 16 watasniyoj kashaspa.

Chay tiempollapitaj uj fabricapi trabajayta qallarerqani. Chaypeqa autospaj herramientasta, waj imastawan ruwaj kanku. Chaymantataj chay empresapi secretario jina trabajanaypaj yachachiwarqanku. Noqataj manchay kusisqa kasharqani.

Uj pʼunchay congregacionesta waturej hermano niwarqa: “Willenhall congregacionpi, ¿Libromanta Yachaqanapaj Tantakuyta apaykachawajchu?”, nispa. Noqataj ni imanakuyta aterqanichu. Chaypachaqa iskay congregacionesman risharqani. Trabajanay diasqa trabajoymanta qayllapi Bromsgrove congregacionman rej kani, wasiymantataj 32 kilometrospi kasharqa. Semana tukukuytataj tatasniywan Willenhall congregacionman rej kayku.

Jehovaj llajtanpi yanapakuyta munasqayrayku congregacionesta waturej hermanota kasorqani, mayta gustawasqan trabajoyta saqenay kajtinpis. Chay kutipi Jehová ñanninta pusanawanta saqesqayrayku sumaj kusisqa kausakorqani, nitaj chaymanta arrepientekunichu.

Bromsgrove congregacionman risqaypi Anne sutiyoj may kʼachita hermanata rejserqani. Payqa Jehovata sirviyta kausayninpi ñaupajman churasharqa. 1957 watapitaj casarakorqayku. Chaymantapachataj khuska sirverqayku precursores regulares jina, precursores especiales jina, congregacionesta waturispa, Betelpipis. Kunankama señoraywanqa kusisqa kausakuyku.

1966 watapi Galaad Escuelaman rerqayku. Chaytaj karqa clase número 42. May sumajpuni karqa. Chaymantaqa Malauiman kachawarqayku. Chaypi runasqa kʼachas kanku, wajyarikunkupunitaj. Chayrayku runasqa ninku Africamanta aswan kʼacha  runas chaypi tiyakusqankuta. Jinapis chaypeqa pisi tiempollata karqayku.

Malauimanqa 1967 watapi 1 de febrerota chayarqayku. Killantintapuni mayta estudiarqayku chay lugarmanta parlayta yachakunaykupaj. Chaymantataj superintendente de distrito kanaykuta niwarqayku. Modelo Kaiser camionetitapi viajaj kayku. Chay camionetapi tukuynejman rinayku karqa, mayusninta pasaspa. Jinapis mana aterqaykuchu, imajtinchus ashkha yakustaqa mana pasayta aterqachu. Wakin kuteqa ichhu wasisituspi qhepakoj kayku. Paray tiempotaj techoj uranman carpata churaj kayku yaku mana chʼaqamunanpaj. Misioneros jina qallarishajtiykoqa mana facilchu karqa. Jinapis kusisqas kasharqayku.

Abril killapi repararqani chay suyupi problemas rikhurishasqanta. Radiopi uyarerqani Malauimanta presidente doctor Hastings Bandaj parlasqanta. Pay nerqa Jehovaj testigosnin mana impuestosta pagasqanchejta, gobiernoj contranpitaj kashasqanchejta. Chaytaj llulla karqa. Tukuypis yacharqayku paykuna phiñakusqankuta mana politicaman chhapukusqaykumanta, astawanraj partidonkuta apoyanaykupaj mana tarjetasta rantikusqaykumanta.

Septiembre killapaj periodicospi nerqa, presidenteqa hermanosninchej tukuy lugarespi chʼajwasta rikhurichishasqankuta nisqanta. Presidenteqa uj reunionpi nerqa Jehovaj testigosninta prohibinanpajña kashasqanta. 1967 watapi 20 de octubrepitaj prohiberqapuni. Pisi tiemponmantaj policías, inmigracionpi trabajajkuna ima sucursalman rerqanku wisqʼarpanankupaj, tukuynin misionerostataj chay suyumanta wijchʼunankupaj.

Kinsa diasta carcelpi kasqaykutawan Mauricio suyuman wijchʼuwarqayku. Chay suyoqa Gran Bretañaj atiyninpi kasharqa. Autoridadesqa  mana saqewarqaykuchu chaypi misioneros jina qhepakunaykuta. Chayrayku Jehovaj llajtanqa Rodesiaman kachawarqayku (kunantaj sutikun Zimbabue). Chayman chayajtiykutaj inmigracionpi trabajaj uj phiña runa mana yaykuchiyta munawarqaykuchu, niwarqaykutaj: “Malauimanta qharqomusunkichej, mana Mauriciopi qhepakojta saqesorqachejchu. Kunan, ¿chayraykullachu kay suyuman yaykumushankichej?”, nispa. Chayrayku señorayqa waqarikorqa. Tukuy ladopi chejnikuspa jinawarqayku. Chay kutipeqa Inglaterraman kutipuyllataña munarqani. Autoridadesqa chay chʼisi sucursalpi qhepakojta saqewarqayku, jinapis qʼayantenqa watejmanta presentakunayku karqa. Saykʼusqaña kasharqayku, jinapis tukuy imata Jehovaj makisnillanmanpuni saqerqayku. Tʼukunapaj jinataj qʼayantenqa Zimbabuepi qhepakunaykuta saqellawarqayku. Imaynachus chay día kashasqayta ni jaykʼaj qonqakusajchu. Sutʼita repararqani Jehová ñanninta pusashawasqaykuta.

Zimbabue sucursalpeqa Departamento de Servicioman churawarqanku Malauimanta, Mozambiquemantawan encargakunaypaj. Malauimanta hermanosqa sinchʼi qhatiykachasqas kasharqanku. Chantapis yanapakorqani congregacionesta waturej hermanos chay suyumanta willaykunata apachimusqankuta traducispa. Uj chʼiseqa tutakama qhepakorqani ujnin willayta tukunaypaj. Chay lugarmanta hermanosniy mayta sufrishasqankuta yachaspa waqarikorqanipuni. * Jinapis mayta kallpachakorqani Jehovata kasukushasqankuta yachaspa, sinchʼi creeyniyoj kasqankuta yachaspa, aguantashasqankuta yachaspa ima (2 Cor. 6:4, 5).

Tukuy imata ruwarqayku Malauipi qhepakoj hermanosman, Mozambiqueman ayqekoj hermanosmanpis mana publicaciones faltananpaj. Malauipeqa chichewata astawan parlanku. Chay idiomaman traducej hermanostaj Zimbabueman riporqanku, chaypi uj hermano jatun jallpʼata qosqanman. Chay hermanoqa manchay kʼachapuni karqa. Payqa traducinapaj uj oficinata, traductorespaj wasista ima ruwachiporqa. Ajinamanta traductoresqa publicacionesta traducillarqankupuni.

Tukuy imata wakicherqanku Malauimanta congregacionesta waturej hermanos sapa wata Zimbabueman rinankupaj, chichewa parlaypi jatun tantakuyta uyarej. Chaypeqa jatun tantakuymanta bosquejosta paykunaman jaywaj kayku. Malauiman kutipoj jinataj jatun tantakuypi yachakusqankuta tukuy atisqankuta hermanosman willaj kanku. Uj watataj Zimbabuepi Ñaupajman Apajkunapaj Escuelata wakicherqayku, congregacionesta waturejkunata kallpachanaykupaj.

Febrero de 1975 watapitaj Mozambiqueman viajarqani, maypichus Malauimanta ayqekoj hermanos kasharqanku chayman. Chay hermanosqa Jehovaj llajtan imastachus chay tiempopi ruwaj chayman jina ruwashasqanku, ancianostapis churasqanku. Chay mosoj ancianosqa wakichisqanku tukuypaj discursosta ruwanankupaj, sapa día estudianapaj textota ukhunchanankupaj, Torremanta Qhawaj revistata estudianankupaj, jatun tantakuykunatapis ruwanankupaj. Maypichus Malauimanta ayqekamoj hermanos kasharqanku chay lugaresqa, jatun tantakuykunata ruwakun chay lugaresman rijchʼakorqa. Chaypeqa departamentosta wakichisqanku limpiezata ruwanankupaj, mikhunata jaywanankupaj, guardiata ruwanankupaj ima. Chay hermanosqa Jehovaj yanapaynillanwan chay tʼukuna imasta ruwarqanku. Chayta rikuspa may kallpachasqa kutiporqani.

1980 watas qayllataqa Malauita Zambiamanta sucursal atiendeyta qallarerqa. Jinapis Malauimanta hermanostaqa mana qonqakorqanichu, paykunapajtaj orapullarqanipuni. Yacharqanitaj ashkha hermanospis noqa jinallataj sientekusqankuta. Zimbabuepi Sucursalta Kamachejkunamanta ujnin kasqayrayku, Centralninchejpa sutinpi jamojkunawan ashkha kutispi tantakorqani, Malauipi, Sudafricapi, Zambiapi Diospa llajtanta ñaupajman apajkunawan khuska. Noqaykoqa nillajpuni kayku: “¿Imatawantaj ruwasunman Malauimanta hermanosta yanapanapaj?”, nispa.

Tiempo pasasqanman jina hermanostaqa manaña anchata qhatiykachasharqankuchu, Malauimanta ayqekoj hermanospis pisimanta pisi kutipusharqanku. Chay suyupi qhepakoj hermanostaj  manaña anchata sufrerqankuchu. Chantapis chay ladosmanta suyusqa religionta jina pisimanta pisi reconoceshawarqanchej, Diosta yupaychanapaj ruwanasninchejta ruwajtapis saqeshallawarqanchejña. Mozambiquepipis 1991 watapi chayllatataj ruwarqanku. Jinapis nillarqaykupuni: “¿Maykʼajtaj Malauimanta hermanosta ajinata ruwajta saqenqankuri?”, nispa.

Aswan qhepamantaj Malauimanta gobiernoqa manaña ñaupajta jinachu karqa. 1993 watapitaj hermanosta Diosta yupaychajta saqellarqaña. Pisi tiemponmantaj uj misionero tapuriwarqa: “¿Malauiman kutiwajchu?”, nispa. 59 watasniyojña kasqayraykutaj nerqani: “Imatañá atiyman, viejitoña kani”, nispa. Jinapis chay diallataj uj correo chayamuwarqayku Diospa Llajtanta Kamachejkunamanta, chaypi nishawarqayku Malauiman kutinaykuta.

Zimbabuepi sirviyqa mayta gustawarqayku. Chayrayku mana chay ratochu “ya” nerqayku. Zimbabuepeqa yachaykukorqaykuña, watas pasasqanman jinataj sumaj amigosniyoj karqayku. Diospa Llajtanta Kamachejkunaqa may kʼachaspuni noqaykuwan karqanku. Chayrayku Zimbabuepi qhepakuyta munaspaqa qhepakunallaykuta niwarqayku. Aswan fácil kanman karqa chayllapi qhepakunayku. Jinapis yuyarikorqani Abrahanmantawan Saramantawan. Paykunaqa mayorcitosña kaspapis, Jehovata kasukusqankurayku tukuy imata saqespa riporqanku (Gén. 12:1-5).

Jehovaj llajtanta kasukusqaykurayku Malauiman kuterqayku 1 de febrero de 1995 watapi. Chay kutipajqa Malauiman chayasqaykumanta 28 watasña pasarqa. Chaypitaj sucursalta kamachejkunata churakorqa, karqaykutaj noqawan iskay hermanoswan. Pisi tiemponmantaj wakichisharqaykuña hermanos Jehovata yupaychaypi ruwanasninkuta ruwanankupaj.

Jehovaqa Malauipi llajtanta usqhayllata wiñacherqa. Chayta rikuytaj may sumajpuni karqa. 1993 watamanta 1998 watakama, tʼukunapaj jinapuni 30.000 willajkunamanta 42.000 willajkunaman chayarqanku. * Chay suyupi ashkha ruwana kasqanrayku Diospa Llajtanta Kamachejkunaqa nerqanku uj mosoj sucursalta ruwakunanta. Lilongüepi 12 hectáreas jallpʼata ranterqayku, Comité de Construccionmanta kanaypajtaj churawarqanku.

Mayo de 2001 watapeqa Diospa Llajtanta Kamachejkunamanta hermano Guy Pierce, chay sucursalta Jehovaman jaywapunanpaj uj discursota qorqa. Chay tantakuymanqa chay suyumanta 2.000  kuraj hermanos rerqanku. Chay hermanosmanta ashkhasqa 40 watasmanta astawanña bautizasqas karqanku. Qhatiykachasqa kashaspa chay cheqa sonqo hermanosqa, ashkha watasta sinchʼitapuni ñakʼarerqanku. Pisi imasnillayoj kaspapis Jehovaj ñaupaqenpeqa manchay qhapaj karqanku, mosoj Betelta visitaspataj manchay kusisqas kasharqanku. Paykunaqa tukuynin sucursalta purerqanku takiyta yachasqankuman jina kʼachituta Jehovaman takirispa. Chayta rikusqayqa ni jaykʼaj jina sonqoyta mayta kuyurichiwarqa. Paykunapi repararqani Jehovaqa mayta bendecisqanta sinchʼi creeywan aguantajkunata.

Sucursal ruwakuyta tukukusqantawantaj, Tantakuna Wasista Jehovaman jaywapunapaj discursosta ruwanaypaj kachawaj kanku. Wajcha suyuspaj Tantakuna Wasista ruwakuyta qallarikusqanqa, Malauimanta congregacionespaj may sumaj karqa. Ñaupajtaqa wakin congregaciones eucalipto kʼaspismanta ruwasqa techo uritasllapi tantakoj kanku. Asientosninkutaj tʼurumanta llutʼasqa jatuchaj bancos karqa. Chaypachataj hermanosqa ruwakusqanku hornospi ladrillosta ruwarqanku. Chaywantaj kʼachitu Tantakuna Wasista ruwarqanku. Jinapis sillasmanta nisqaqa bancosnillankuta munarqanku. Paykuna niytapuni yachanku: “Bancomanqa aswan ashkha runas yaykunchej”, nispa.

Chantapis mayta kusikorqani Jehová runasta payman qayllaykunankupaj yanapasqanta rikuspa. Mayta kusikullarqanitaj Africamanta jóvenes yanapakuytapuni munasqankuta rikuspa, Diospa llajtan imatachus yachachisqanta chay rato yachakusqankuta rikuspapis. Chayrayku paykunaqa astawan ruwaykunata japʼerqanku Betelpi, congregacionespipis. Chay suyumanta hermanos congregacionesta waturispa llankʼayta qallarisqankurayku, hermanosqa sumaj kallpachasqas karqanku. Paykunamanta ashkhastaj casados karqanku. Paykunaqa Jehovata astawan sirviyta munasqankurayku mana wawasniyojchu karqanku, vecinosninku, wakin kutis familiaresninku wawasniyojpuni kanankuta nejtinkupis.

Africapi 52 watasta sirvisqaykutawan onqoykachayta qallarerqani. Malauipi sucursalta kamachejkunaqa, Diospa Llajtanta Kamachejkunaman nisqanku Gran Bretañamanta sucursalman ripunayku allinniykupaj kasqanta. Paykunataj “ya” nerqanku. Malauipi sirveyqa mayta gustawarqayku. Chayrayku chaymanta ripunaykuta yachaspa mayta sonqoyku nanawarqayku. Jinapis Gran Bretañapi sucursalmanta hermanosqa, sumajta machuyayniykupi cuidashawayku.

Jehová ñanninta pusanawanta saqesqayqa may sumajpuni karqa. Yachasqallaypi atienekuyman karqa chayqa, trabajoy maymanchus chayachiwanmanpis karqa. Jehovaqa yacharqapuni imatachus necesitasqayta allinta purinaypaj (Pro. 3:5, 6). Joven kashaspaqa maytapuni yachayta munarqani imaynatachus uj jatun empresata apaykachakusqanta. Jehovaj llajtantaj aswan sumaj llankʼaytaraj qowarqa. Kunankama Jehovata sirvispa may kusisqa kausakuni.