1. ¿Ima pruebapitaj José rikukorqa, chanta imatataj ruwarqa?

 JACOBPA wawan Joseqa uj jatun pruebapi rikukorqa. Uj warmi nillajpuni: “Jamuy, puñuykuna”, nispa. Chay warmi patronnin Potifarpa warmin kajtinpis Joseqa mana kasojchu. Ichapis wakenqa ninkuman: “¿Imajtintaj José mana chay warmiwan puñuykorqachuri?”, nispa. Potifarqa mana chaypichu kasharqa, Josetaj chay wasipi esclavolla karqa. Chantapis chay warmeqa mana kasojtin, Joseta imastachus mana ruwanman karqa. Josetaj chay warmi sapa día paywan puñuykunanta nejtinpis, nipuni kasorqachu. ¿Imarayku? Payllataj nerqa: “¿Imaynatataj ruwayman kasqa chay millaytari, juchallikuymantaj Diospa contrantari?”, nispa (Gén. 39:7-12).

2. ¿Imaynapitaj José yacharqa Jehová qhenchachakuyta jatun juchapaj qhawasqanta?

² ¿Imaynapitaj José yacharqa Jehová qhenchachakuyta jatun juchapaj qhawasqanta? Chaypachaqa manaraj Moisespa Leynin karqarajchu, manaqa 200 watasninman jinaraj qhelqakorqa. Chaypitaj sutʼita nerqa: “Ama qhenchachakunkichu”, nispa (Éxo. 20:14). Jinapis Joseqa Jehovata sumajtaña rejsisqanrayku repararqa imatachus Jehová khuchichakuy juchamanta yuyasqanta. Payqa yacharqachá Jehovaqa qhariwarmi kausayta uj qharipaj, uj warmipajwan rikhurichisqanta. Chantapis payqa ichá uyarerqa iskay reyes awelonpa maman Sarawan puñuykuyta munajtinku, chay iskaynin kutispi Jehová payta jarkʼasqanta. Yuyarikullarqatajchá Jehovaqa ajinallatataj Isaacpa warmin Rebecata jarkʼasqanta (Gén. 2:24; 12:14-20; 20:2-7; 26:6-11). Joseqa chay imaspi piensarispa reparayta aterqa Jehovaj qhawayninman jina imachus allin, imatajchus mana allin kasqanta. Payqa Jehovata maytapuni munakorqa, chayraykutaj cheqan kamachiykunasnintapis munakullarqataj, kasukuytapunitaj munarqa.

3. ¿Imastá kay yachaqanapi yachakusun?

 ³ Diospa justiciantaqa maytachá munakunchej. Jinapis tukuy pantaj runas kanchej. Chayrayku mana allinta qhawarikusunman chayqa, imachus allin, imatajchus mana allin kasqanmanta facilta kay mundomanta runas jina yuyayta qallarisunman (Isa. 5:20; Rom. 12:2). Kay yachaqanapi qhawarisun imachus Diospa justician kasqanta, chayta munakuytaj imaynatachus yanapawasqanchejta. Chantapis kinsa imasta ruwanata yachakusun, chaytaj yanapawasun Jehovaj kamachiykunasninta astawan munakunapaj.

4. ¿Imastataj kay tiempopi runas mana Jehovaj justicianman jinachu ruwanku?

⁴ Jesús kay jallpʼapi kashajtin chay tiempomanta religionta kamachejkunaqa, cheqan runas kasqankuta, cheqan kajta ruwasqankutataj yuyakoj kanku. Jinapis Jesusqa paykunata sinchʼita kʼamerqa, imaraykuchus mana wajkunata khuyakojchu kanku, munayninkuman jinallataj imachus allin, imatajchus mana allin kasqanta nej kanku (Ecl. 7:16; Luc. 16:15). Kay tiempomanta wakin runaspis paykunaman rijchʼakunku. Paykuna yuyasqankuman jinaqa, mana ima sajratapis ruwankuchu. Chay runasqa wajkunata qhawaranku, aswan sumaj kasqankutataj yuyakunku. Jehovaqa ajinata ruwaj runasta manapuni allinpajchu qhawan, mana justicianman jinachu ruwasqankurayku.

5. Bibliaj nisqanman jina, ¿imataj niyta munan justicia? Sutʼinchariy.

⁵ Justiciaqa may sumajpuni. ¿Imataj justicia niyta munan? Imachus Diospa qhawayninman jina allin chayta ruway. Bibliapi ima palabrasmantachus “justicia” traducikun chay palabrasqa, niyta munan Jehovaj cheqan kamachiykunasninman jina kausakuy. Jehovaqa kamacherqa comerciantespa ‘pesasninkoqa maychus kaj kanan kasqanta, cabalta pesanankupaj’ (Deu. 25:15). Chayrayku uj cristiano Jehovaj ñaupaqenpi cheqan runapaj qhawasqa kayta munaspaqa, negociosninpi maychus kajtapuni ruwanqa. Chantapis Jehovaj justicianta munakoj runaqa, ni imarayku allinpajchu qhawan wajkuna qhasimanta ñakʼarichisqa kasqankuta. Diosta tukuy imapi kusichinanpajtaj niraj imatapis ruwashaspa Diospirajpuni piensarin (Col. 1:10).

6. ¿Imajtintaj nisunman Jehovaj kamachiykunasnin sumajpuni kasqanta? (Isaías 55:8, 9).

⁶ Bibliapeqa nin Jehová ‘justicia wasi’ kasqanta. Chaytaj niyta munan cheqan kaj justiciaqa Jehovamanta jamusqanta (Jer. 50:7). Ruwawajninchej kasqanraykutaj paylla derechoyoj imachus allin, imatajchus mana allin kasqanta ninanpaj. Noqanchejqa pantaj runas kasqanchejrayku, juchaj atiyninpitaj kasqanchejrayku mana yachayta atillasunmanchu imachus allin, imatajchus mana allin kasqanta. Jehovatajrí mana pantayniyoj kasqanrayku, sutʼita yachan imachus allin, imatajchus mana allin kasqanta (Pro. 14:12; Isaías 55:8, 9 leey). Jinapis cheqan kamachiykunasninman jina kausakuyta atisunman, imajtinchus Diosqa “payman rijchʼakojta” ruwawarqanchej (Gén. 1:27). Chantapis cheqan kamachiykunasninta tukuy sonqo kasukunchej. Tatanchej Jehovata munakusqanchejrayku, pay jinapuni ruwayta munanchej (Efe. 5:1).

7. ¿Imajtintaj kamachiykunata necesitanchej? Sutʼinchariy.

⁷ Imachus allin, imatajchus mana allin kajmanta Jehovaj kamachiykunasninta kasukunchejpuni chayqa, kausayninchejpi allin riwanchej. Qhawarina imajtinchus chayta nisqanchejta. Construccionpi trabajaj empresasmanta sapa uj empresa munayninman jina waj jina medidasta apaykachanman chayqa, manapuni allinchu kanman. Uj hospitalpi sapa doctor munayninman jina onqosqasta atiendenman  chaytaj, wakin onqosqas wañupunkuman. Sutʼita reparanchej imatapis kamachiykunaman jina ruwayqa, allinninchejpajpuni kasqanta. Jehová Diospa kamachiykunasninpis allinnillanchejpajtaj.

8. ¿Ima bendicionestataj japʼenqanku Diospa justicianta munakojkuna?

⁸ Jehovaqa kamachiykunasninman jina ruwanankupaj kallpachakojkunata bendecin. Pay nin: “Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku”, nispa (Sal. 37:29). ¿Imaynataj kausay kanqa tukuypis Jehovaj kamachiykunasninta kasukojtinku? Kusisqas kausakusun, sonqo tiyasqas, ujchasqastaj. Jehovaqa chay bendicionesta japʼinanchejta munan. Chayrayku justicianta munakunchej. ¿Imatá ruwasunman justicianta astawan munakunapaj? Kinsa imasta qhawarina.

9. ¿Imataj yanapawasun cheqan kajta munakunapaj?

⁹ Ñaupaj kaj: Kamachiykunata churajta munakuna. Imachus allin, imatajchus mana allin kasqanmanta kamachiykunataqa Dios churapuwanchej. Chayrayku cheqan kajta munakunapajqa, payta astawan munakunanchej tiyan. Jehovata astawan munakuspaqa, cheqan kamachiykunasninman jina kausakunapaj sonqonchej astawan aysawasun. Adanpiwan Evapiwan piensarina. Jehovatachus munakunkuman karqa chayqa, Jehovata kasukunkumanpuni karqa (Gén. 3:1-6, 16-19).

10. ¿Imatá Abrahán ruwarqa Jehovaj yuyasqanta aswan sumajta entiendenanpaj?

¹⁰ Noqanchejqa mana Adanman, nitaj Evamanpis rijchʼakuyta munanchejchu. Chayrayku mana paykuna jina pantanapajqa Jehovata astawan rejsinanchej tiyan, imayna Dioschus kasqanmanta agradecekunanchej tiyan, imaynatachus yuyasqanta entiendenapajtaj kallpachakunanchej tiyan. Chayta ruwasun chayqa payta astawan munakusun. Abrahanmanta parlarina. Payqa Diosninta maytapuni munakorqa. Jehová imatachus ruwasaj nisqanta mana entiendeyta atillajtinpis, mana paypa contranta oqharikorqachu. Astawanqa Diosta aswan sumajta rejsinanpaj kallpachakorqa. Sodomatawan Gomorratawan Jehová chinkarparichinanta yachaspa, qallariypeqa manchachikorqa ‘jallpʼantinmanta Juezqa’ sajra runasta chinkachishaspa cheqan runastapis chinkarparichinanta. “Diosqa ni chayta ruwanmanchu” nispachá yuyarqa, chayrayku kʼumuykukoj sonqowan Jehovata tapurerqa. Jehovataj paywan pacienciakorqa, tapusqanmantaj kuticherqa. Parlayta tukusqankutawantaj, Abrahanqa entienderqa Jehovaqa tukuy runaspa sonqosninkuta qhawasqanta. Nitaj jaykʼajpis mana juchayoj runasta, juchayoj runastawan khuska castigananta (Gén. 18:20-32).

11. ¿Imaynatataj Abrahán rikucherqa Jehovata munakusqanta, paypitaj atienekusqanta?

¹¹ Abrahanqa Jehovawan Sodomamanta, Gomorramantawan parlariytawan maytachá tʼukorqa. Chayrayku ñaupajmanta nisqa astawanchá Tatan Jehovata munakorqa, astawantajchá respetarqa. Aswan qhepamantaj Abrahanqa astawanraj rikuchinan karqa Diospi atienekusqanta. Jehovaqa Abrahanta nerqa munasqa wawan Isaacta qʼolachina jaywanata jina jaywananta. Chay kutipi Abrahanqa Diosninta aswan sumajta rejsisqanrayku niña imatapis taporqachu. Imatachus Jehová nisqanta ruwananpaj chʼinsitumanta wakichikorqa. Jinapis wakichikushajtenqa maytachá sonqon nanarqa. Tʼukurerqachá imatachus Jehovamanta yachakusqanpi. Payqa yacharqa Diosqa ni jaykʼaj mana cheqan kajta ruwananta, chayri sajra sonqowan ruwananta. Apóstol Pablo sutʼinchasqanman jina, Abrahanqa creerqa  Jehovaqa munasqa wawan Isaacta kausarichiyta atisqanta (Heb. 11:17-19). Jehovaqa nisqaña Isaacqa uj nacionpa ñaupa tatan kananta, chaypachataj Isaacqa manaraj wawasniyojchu karqa. Abrahanqa Jehovata munakorqa. Chayrayku yacharqa Diosqa cheqan kajman jinapuni ruwananta. Mana ruwayta atinanpaj jina kajtinpis, sinchʼi creeyniyoj kasqanrayku kasukorqa (Gén. 22:1-12).

12. ¿Imaynatá Abrahán jina ruwasunman? (Salmo 73:28).

¹² ¿Imaynatá Abrahán jina ruwasunman? Jehovata sapa kuti aswan sumajta rejsinanchej tiyan. Chayta ruwaspaqa payman qayllaykusun, astawantaj munakusun (Salmo 73:28 leey). Conciencianchejtapis yachachisun Diospa yuyasqanman jina yuyananpaj (Heb. 5:14). Ajinamanta pillapis juchaman urmachiyta munawajtinchej chay rato qhesachasun. Ni yuyallasunpischu Tatanchej Jehovaj sonqonta nanachinapaj jina imatapis ruwaytaqa, chayri paymanta karunchanawanchejpaj jina imatapis ruwaytaqa. ¿Imatawantaj ruwasunman Diospa justicianta munakusqanchejta rikuchinapaj?

13. ¿Imatá ruwasunman cheqan kajman jina kausakunapaj? (Proverbios 15:9).

¹³ Iskay kaj: Sapa día kallpachakuna cheqan kajta astawan munakunapaj. Cuerponchej sumaj duro kananpajqa, sapa día ejerciciosta ruwanapaj kallpachakunanchej tiyan. Jehovaj cheqan kamachiykunasninta astawan munakunapajpis, sapa día kallpachakunallanchejtaj tiyan. Jehovaqa imatachus atisqallanchejta mañawanchej, ni jaykʼaj suyanchu mana atisqanchejta ruwananchejtaqa (Sal. 103:14). Payqa niwanchej ‘cheqan kajman jina kausakoj runasta munakusqanta’ (Proverbios 15:9 leey). Diosta yupaychaypi imatapis ruwayta munanchej chayqa, ruwananchejkamapuni kallpachakunchej, ¿icharí? Cheqan kajta munakunapajpis ajinallatataj kallpachakunanchej tiyan. Jehovataj pacienciawan yanapawasun, tiempo pasasqanman jina cheqan kajta astawan munakunapaj (Sal. 84:5, 7).

14. ¿Imawantaj ninakun pecherawan ninakoj ‘justicia’, chanta imaraykutaj kapunawanchejpuni tiyan?

¹⁴ Jehovaqa munakuywan yuyarichiwanchej cheqan kajta ruwayqa atina jinalla kasqanta (1 Juan 5:3). Astawanpis chayqa jarkʼawanchej,  sapa diataj chayta necesitanchej. Piensarina apóstol Pablo Diospa qosqan maqanakuna ropamanta parlasqanpi (Efe. 6:14-18). Chay ropamanta, ¿mayqentaj sonqota jarkʼan? Pecherawan ninakoj ‘justicia’. Chaytaj Jehovaj cheqan kamachiykunasninwan ninakun. Imaynatachus uj pechera sonqota jarkʼan, ajinallatataj Jehovaj kamachiykunasninpis sonqonchejta jarkʼan, nisunman imatachus munasqanchejta, imaynachus kasqanchejta, yuyasqanchejtapis. Chayrayku Diospa qosqan maqanakuna ropanchejpeqa, pecherawan ninakoj justicia kananpuni tiyan (Pro. 4:23).

15. ¿Imaynatataj pecherawan ninakoj justiciata churakusunman?

¹⁵ ¿Imaynatataj pecherawan ninakoj justiciata churakusunman? Sapa día imatapis ruwanapajqa piensarinaraj Diospa kamachiykunasninpi. Imamantapis parlanapaj, musicata uyarinapaj, imatapis qhawanapaj chayri uj librota leenapaj kaykunapiraj piensarina: “¿Imataj sonqoyman yaykonqa? ¿Kayta allinpajchu Jehová qhawan? Chayri, ¿Jehová mana allinpajchu qhawan chaykunata ruwaymanchu tanqawanman: khuchichakuy juchaman, maqanakuyman, munapayayman chayri noqallapaj imatapis munayman?” (Fili. 4:8). Jehovaj munayninman jinapuni imatapis ruwayta ajllasun chayqa, Diospa cheqan kamachiykunasnenqa mana allin imasmanta sonqonchejta jarkʼanqa.

16, 17. Isaías 48:18 nisqanman jina, ¿imaynapitaj yachanchej Jehovaj kamachiykunasninta wiñaypaj kasukuyta atisqanchejta?

¹⁶ Mana Jehovaj kamachiykunasninman jina sapa día, sapa wata kausakuyta atinanchejta yuyajtinchejqa, piensarina ima kikinchaytachus Jehová Isaías 48:18 (leey) versiculopi oqharisqanta. Chaypi Jehovaqa nin ‘cheqan kayninchejqa mar qochaj qhollchoqeyasqan jina kayta’ atisqanta. Mar kantupi chukuykuspaqa, rikunchej yakoqa mana sayaspa qhollchoqeyasqanta. Chayta rikuspa, ¿chay qhollchoqeyasqan maykʼajllapis sayapunanpirajchu piensasunman? Mana, ¿icharí? Yachanchej yakoqa may chhika watastaña mar kantupi qhollchoqeyashasqanta, qhollchoqeyallanqapunitaj.

¹⁷ Noqanchejrí, ¿imatá ruwananchej tiyan cheqan kayninchej mar qochaj qhollchoqeyasqan jina kananpaj? Imatapis ruwayta ajllanapajqa, piensarinaraj imatachus Jehová ruwananchejta munasqanpi, chaymantaraj ruwana. Imatapis ruwayta mana ajllayta atillajtinchejqa, Tatanchej Jehovaqa kallpata qowasunpuni, yanapawasuntaj sapa día cheqan kamachiykunasninta kasukunallapajpuni (Isa. 40:29-31).

18. ¿Imajtintaj wajkunata mana yuyasqanchejman jinallachu juzgananchej tiyan?

¹⁸ Kinsa kaj: Saqena Jehová juzgananta. Jehovaj cheqan kamachiykunasninman jina kausakunapaj kallpachakojtinchejpis, mana wajkunata juzgananchejchu tiyan, nitaj yuyananchejchu tiyan paykunamanta aswan cheqan runas kasqanchejta. Imatachus noqanchej cheqanpaj qhawanchej chayman jinalla wajkunata juzgayta atisqanchejta yuyanamantaqa, yuyarikuna tiyan Jehovalla “jallpʼantinmanta Juez” kasqanta (Gén. 18:25). Diosqa mana noqanchejtachu jueces kanapaj churawanchej. Astawanpis Jesusqa kayta kamacherqa: “Amaña wajkunata juzgaychejchu, ama qankunapis juzgasqa kanaykichejpaj”, nispa (Mat. 7:1). b

19. ¿Imaynatataj José Jehovaj justicianpi atienekusqanta rikucherqa?

¹⁹ Josemanta parlarinallapuni, payqa cheqan kajtapuni ruwarqa. Payqa mana wajkunata  juzgarqachu mayta ñakʼarichejtinkupis. Paytaqa hermanosnillantaj mayta sufricherqanku, esclavota jina vendeykorqanku, tatanmanpis wañupusqanta creeykucherqanku. Ashkha watasninmantaj Joseqa watejmanta paykunawan tinkorqa. Chaypacha payqa atiyniyoj kamachejña kasqanrayku, hermanosninta mana khuyarikuspa juzgayta atinman karqa, vengakuytapis. Hermanosnintaj chayta ruwanantapuni manchachikorqanku, imatachus payta ruwasqankumanta mayta arrepientekuspañapis. Josetajrí paykunata nerqa: “Ama chaymantaqa manchachikuychejchu. ¿Noqaqa Dioschu kasqani imatajri?”, nispa (Gén. 37:18-20, 27, 28, 31-35; 50:15-21). Joseqa kʼumuykukoj sonqo karqa, repararqataj Jehovalla hermanosninta juzgananpaj derechoyoj kasqanta.

20, 21. ¿Imataj yanapawasun mana wajkunamanta aswan cheqan runas kasqanchejta yuyakunapaj?

²⁰ Noqanchejpis José jinallataj saqenchej Jehová juzgananta. Mana niyta atisunmanchu: “Yachani imaraykuchus kay hermano kayta, jaqayta ruwasqanta”, nispa. Noqanchejqa mana yachayta atisunmanchu imachus sonqonkupi kasqanta. ‘Jehová Dioslla yachan imayna sonqowanchus imatapis ruwasqankuta’ (Pro. 16:2). Jehovaqa tukuy laya runasta munakun, maymanta kajtinkupis chayri imayna culturayoj kajtinkupis. Payqa “sonqoykichejta jatunta kichariychej” nispa kamachiwanchej (2 Cor. 6:13). Munanchej tukuy hermanosninchejta munakuyta, manataj juzgaytachu.

²¹ Waj runastapis manallataj juzganchejchu (1 Tim. 2:3, 4). Mana testigoschu kanku chay familiaresninchejtaqa mana juzganchejchu, nitaj yuyanchejchu ni jaykʼaj testigoman tukunankuta. Chaytachus ruwashasunman chayqa jatunchakushasunman, wajkunamanta aswan cheqan runas kasqanchejtataj yuyakushasunman. Jehovaqa ‘tukuynejpi, tukuy runas’ arrepientekuyta atinankupaj tiempota qoshanraj (Hech. 17:30). Kayta amapuni qonqanachu: Jehovaqa wajkunamanta aswan cheqan runas kasqankuta yuyakojkunata, mana cheqan runasta jinachu qhawan.

22. ¿Imajtintaj cheqan kajta astawan munakuyta munanchej?

²² Jehovaj justicianta munakusun chayqa kusisqa kausakusun, wajkunapis noqanchej jina ruwayta munanqanku. Ajinamanta astawan munakuwasun, Diosninchejtapis astawan munakonqanku. ‘Cheqan kaj ruwakunanta mayta munajkunallapuni’ kana (Mat. 5:6). Jehovaqa cheqan kamachiykunasninman jina kausakunapaj sapa día kallpachakusqanchejta qhawamushan, chaytaj mayta kusichin. Kay sajra mundopi justicia pisimanta pisi astawan chinkapushajtinpis, ama desanimakunachu. Yuyarikunapuni Jehovaqa ‘cheqan runasta munakusqanta’ (Sal. 146:8).