APÓSTOL Pabloqa, ‘Diospa atiyninpa poqoyninʼ  * kaykuna kasqanta nerqa: munakuyniyoj kay, kusikuyniyoj kay, sonqo tiyaykusqa kay, pacienciayoj kay, kʼacha sonqoyoj kay, kʼacha kay, creeyniyoj kay, llampʼu sonqoyoj kay, munayninchejwan mana atipachikoj kay ima (Gál. 5:22, 23). Mosoj kausaywan pʼachallikojkunaqa, chaykunata rikuchinku (Col. 3:10). Imaynatachus uj sachʼa sumaj qarpasqa kajtin sumajta poqon, ajinallatataj uj cristianoqa, Diospa yanapaynillanwan, paypa atiyninpa poqoyninta sumajta rikuchinman (Sal. 1:1-3).

Apóstol Pabloqa, munakuymanta parlarispa qallarerqa. Munakuyniyoj runa kananchejqa, may sumajpuni. Imaraykuchus Pablo nisqanman jina, mana munakuyniyoj kajtinchej, tukuy ima ruwasqanchej “qhasillapaj kanman” (1 Cor. 13:2). ¿Imaynataj munakuyniyoj runa? Munakuyniyoj runa kanapaj, ¿imatataj ruwasunman? ¿Imaynatá wajkunata munakusqanchejta rikuchisunman?

Bibliaj nisqanman jina, munakuyniyoj runaqa “pacienciayoj, kʼachataj”, “kusikun cheqa kajmanta”, “tukuy imata aguantan, tukuy imata creen, tukuy imata suyan, tukuy imapi sinchʼita sayan”. Chantapis munakuyniyoj runaqa, wajkunamanta llakikun, allinninkutataj maskʼan, nitaj paykunata saqerparinchu. Mana munakuyniyoj runatajrí, envidiakun, may kasqanta yuyakun, pʼenqay imasta ruwan, imatapis payllapaj maskʼan, usqhayllata phiñakun, contranpi ima sajrata ruwasqankutapis yuyarikullanpuni. Noqanchejqa munakuyniyoj runa kayta munanchej, imaraykuchus munakuyniyoj runaqa, “mana payllapajchu imatapis maskʼan” (1 Cor. 13:4-8).

Jehová Diosqa “munakuymin” (1 Juan 4:8). Chaytaj sutʼi rikukun tukuy ruwasqasninpi. Payqa chay jinatapuni munakuwasqanchejrayku kʼata Wawanta kay mundoman kachamorqa, noqanchejrayku wañunanpaj. Apóstol Juan nerqa: “Kay jinamanta Diosqa munakuyninta rikuchiwarqanchej: Diosqa kʼata Wawanta kay mundoman kachamorqa paynejta kausayta japʼinanchejpaj. Diosqa Wawanta kachamorqa juchasninchejrayku jaywasqa kananpaj, ajinamanta Dioswan allinyakunanchejpaj. Payqa chayta ruwarqa munakuwasqanchejrayku, manataj payta munakusqanchejraykuchu”, nispa (1 Juan 4:9, 10). Jehová Dios munakuwasqanchejrayku perdonasqa kayta atinchej, wiñaypajtaj kausakuyta suyakunchej.

Jesuspis mayta munakuwanchej. Chayrayku kay jallpʼaman jamorqa Diospa munayninta ruwananpaj. Apóstol Pablo nerqa: “Diospa ‘munayninrayku’ paypaj tʼaqasqa kanchej, Jesucristo cuerponta uj kutillata, wiñaypajtaj jaywasqannejta”, nispa (Heb. 10:9, 10). Mana pipis Jesús jina astawan munakuwasunmanchu. Jesús nerqa: “Mana pipis aswan munakuyniyojqa kanchu, amigosninrayku wañojmanta nisqaqa”, nispa (Juan 15:13). Noqanchejqa juchasapa  kajtinchejpis Jehová jina, Jesús jinataj munakuyniyoj kasunman. Qhawarina imaynatachus.

Apóstol Pablo nerqa: “Diospa munasqa wawasnin kaspa, pay jina ruwaychej. Jinallataj munakuypi puriychej, imaynatachus Cristopis munakuwarqanchej, ajinata. Payqa noqanchejrayku kausayninta qorqa”, nispa (Efe. 5:1, 2). Munakuypi purinallanchejpajpuni, tukuy ima ruwasqanchejpi munakuyta rikuchina. Apóstol Juan nerqa: “Wawitasníy, hermanosninchejtaqa ama simillamantachu munakuna, astawanpis ruwasqasninchejpi munakusqanchejqa sutʼi yachakuchun, tukuy sonqotaj kachun”, nispa (1 Juan 3:18). Jehová Diosta, runa masinchejtapis munakusqanchejrayku, “Diospa Gobiernonmanta sumaj” willaykunata willamunchej (Mat. 24:14; Luc. 10:27). Chantapis runa masinchejta munakusqanchejrayku, paykunawan pacienciakunchej, paykunata perdonanchej, khuyakunchejtaj. Chayrayku Biblia nin: “Imaynatachus Jehová Dios qankunata tukuy sonqo perdonasorqachej, ajinallatataj qankunapis perdonanakuychej”, nispa (Col. 3:13).

Chantapis munakuyniyoj runaqa, pitapis kʼaminan kajtin, kʼamin. Wakin tatasqa wawankuta anchata lulusqankurayku, gustonta ruwajta saqellanku. Munakuyniyoj tatastajrí, wawasninkoj allinninkuta maskʼaspa kʼaminanku kajtin, kʼaminku. Jinallatataj Jehová Diospis ruwan. Payqa “pikunatachus munakun, chaykunata jasutʼin” (Heb. 12:6). Chayqa reparachiwanchej, pillapis kʼaminapaj jina kashajtin, munakusqanchejrayku kʼamina kasqanta (Pro. 3:11, 12). Jinapis pantaj runas kasqanchejrayku, wakin kutisqa mana munakuyta rikuchispalla imatapis ruwarparinchej. Chayrayku tukuy imapi munakuyta rikuchinapaj kallpachakunallapuni. Imaynasmantachus chayta ruwanata qhawarina.

Ñaupaj kaj: Jehová Diosmanta atiyninta mañakuna. Jesús nerqa: “Cielopi kashaj Tataykichejqa atiyninta qonqa mañakojkunaman”, nispa (Luc. 11:13). Jehovamanta atiyninta mañakusun chay, ‘atiyninman jinataj kausakusunchej’ chayqa, astawan munakuyniyoj runa kasunchej (Gál. 5:16). Congregacionpi ancianosqa, munakuywan wajkunata yuyaycharinankupaj, Jehová Diosmanta atiyninta mañakunkuman. Tataspis Jehová Diospa atiyninta mañakullankumantaj munakuywan wawasninkuta kʼaminankupaj, manataj phiñakuspachu.

Iskay kaj: Jesuspi tʼukurina. Enemigosnin ñakʼarichishajtinkupis, Jesusqa paykunata munakullarqapuni (1 Ped. 2:21, 23). Pillapis qhasimanta tumpawajtinchej, chayri sonqonchejta nanachiwajtinchej, Jesusmanta yuyarikusunman. Tapurikusunmantaj: “Jesús kay jinapi tarikunman karqa chay, ¿imatataj ruwanman karqa?”, nispa. Leigh sutiyoj hermanamanta parlarina. Payqa niraj imatapis ruwashaspa Jesús imatachus ruwananpi piensarej. Pay nin: “Uj kuti, trabajoymanta ujnin compañeray, wajkunaman uj mensajeta apachisqa. Chaypeqa noqamanta, trabajoymantapis mana allintachu parlasqa. Chaytaj sonqoyta mayta nanachiwarqa. Jinapis niraj imatapis nishaspa Jesuspi tʼukurerqani, tapurikorqanitaj: ‘Jesús kay jinapi tarikunman karqa chay, ¿imatataj ruwanman karqa?’, nispa. Chaypi tʼukuriytawan compañeray imatachus ruwawasqanta qonqayman churarqani. Chaymantaraj yacharqani compañerayqa, onqosqa kashasqanrayku, may llakisqataj kashasqanrayku chay mensajeta apachisqanta. Sonqoypitaj nikorqani: ‘Ichapis mana yuyaycharikuspalla chay mensajeta apacherqaʼ, nispa. Jesusmanta yuyarikoyqa, compañerayta munakunallaypajpuni yanapawarqa. Jesusqa, enemigosnin ñakʼarichishajtinkupis paykunata munakullarqapuni. Noqapis pay jinallataj ruwayta munarqani”, nispa. Jesús jina ruwasunchej chayqa, imatapis munakuywanpuni ruwasunchej.

Kinsa kaj: Wajkunaj allinninkuta ñaupajta maskʼana. Chayta ruwajtinchejqa sutʼi rikukonqa Jesuspa yachachisqasnin kasqanchej (Juan 13:34, 35). Bibliaqa nin: “Imayna yuyaychus Cristo Jesuspi karqa, chay yuyayllataj qankunapipis kachun”, nispa. Payqa cielopi tukuy kapuyninta  saqerqa, noqanchejrayku wañunanpajtaj kay jallpʼaman jamorqa (Fili. 2:5-8). Jesús jinallataj runasta munakusunchej chayqa, pay jina yuyayta qallarisunchej. Allinnillanchejta maskʼananchejmantaqa, wajkunaj allinninkuta maskʼasunchej. Kunantaj imaynatachus munakuyniyoj kay yanapawasqanchejta qhawarina.

Munakuyniyoj kajtinchejqa ashkha bendicionesta japʼinchej. Kunanqa iskayllamanta parlarisunchej.

• MUNDONTINPI UJ FAMILIA JINA KANCHEJ. Diospa llajtanpi purajmanta munanakusqanchejrayku, mayqen congregacionllapipis hermanosqa, chunka makiwan japʼikapuwasunchej. Imaraykuchus mundontinpi uj familia jina kanchej. Chaytaj may sumajpuni (1 Ped. 5:9). Jehová Diospa llajtallanpi ajinata munanakunchej.

• TUKUYWAN ALLINTA KAUSAKUNCHEJ. Purajmanta munakuywan aguantanakojtinchejqa, ‘ujchasqallapuni kasunchej’ (Efe. 4:2, 3). Kay sajra mundopi runasqa tʼaqanasqas kashanku. Diospa llajtanpirí, ujchasqa kanchej. Chaytataj sutʼita reparanchej tantakuykunaman rispa, jatun tantakuykunaman rispapis (Sal. 119:165; Isa. 54:13). Hermanoswan allinta apanakunapaj kallpachakuspaqa, paykunata mayta munakusqanchejta rikuchinchej, Jehová Diosninchejtapis kusichinchej (Sal. 133:1-3; Mat. 5:9).

Apóstol Pablo nerqa: ‘Munakoyqa kallpachan’, nispa (1 Cor. 8:1). Pabloqa 1 Corintios 13 capitulopi chaymanta astawan sutʼincharqa. Pay nisqanman jina, munakuyniyoj runa wajkunaj allinninkuta maskʼan (1 Cor. 10:24; 13:5). Chantapis munakuyniyoj runaqa pacienciayoj, kʼachataj. Tukuypis ajina kajtinchejqa, familianchejta, congregaciontapis kallpachasunchej, ujchasqallapunitaj kasunchej (Col. 3:14).

May sumajmin Jehová Diosta munakoyqa. Chay munakoyqa mayta kallpachawanchej, yanapawanchejtaj. Jehová Diosta munakusqanchejrayku, tukuy nacionesmanta, tukuy ayllusmanta, tukuy parlayniyojkunamantawan, ujchasqas, kusisqas, ‘uj sonqollataj’ Jehová Diosta sirvinchej (Sof. 3:9). Chayrayku sapa día munakuyniyoj runa kanapaj kallpachakunallapuni.