1-3. 1) ¿Imaynatá yachanchej cristianos tantakuykunata may jatunpaj qhawasqankuta? (Patapi kaj dibujota qhawariy.) 2) ¿Ima tapuykunamantaj kutichisunchej?

CORINNAQA 17 watasniyoj kasharqa mamanta presochashajtinku. May karumantaj mamantaqa aparqanku sinchʼita llankʼachinankupaj. Aswan qhepamantaj Corinnatapis Siberiaman aparqanku, chaytaj wasinmanta may karupi kashan. Chaypitaj uj haciendapi uj esclavata jina llankʼacherqanku. Wakin kutistaj munajta mana munajta wasimanta jawapi manchay chiripi llankʼachej kanku, mana abrigasqata. Jinapis Corinnaqa, waj hermana ima mayta kallpachakorqanku uj tantakuyman rinankupaj.

² Corinna nin: “Uj tarde estación de trenkama 25 kilometrosta chakipi rerqayku. Trentaj llojserqa dos de la mañanata, sojta horastataj viajarqayku. Trenmanta uraykuspataj 10 kilometrostawan rerqayku tantakuykuna ruwakun chaykama”, nispa. Corinnaqa mayta kusikorqa chay tantakuyman risqanmanta. Pay nillanpuni: “Tantakuypeqa Torremanta Qhawaj revistata estudiarqayku, Reinomanta takiykunatapis takerqayku. Chay tantakoyqa maytapuni creeyniykuta kallpacharqa”, nispa. Kinsa pʼunchaymantataj  haciendaman kutiporqanku. Haciendamanta encargadotaj tantakuyman risqankuta ni reparallasqapischu.

³ Diospa kamachisnenqa tantakuykunata may jatunpaj qhawanku. Sutʼincharinapaj, ñaupa tiempomanta cristianosqa mayta munaj kanku tantakuyta Jehovata yupaychanankupaj, paymanta yachakunankupaj ima (Hech. 2:46). Noqanchejpis tantakuykunaman riyta mayta munanchej. Chaywanpis ichá noqanchejmanta wakenqa ashkha horasta llankʼasqanchejrayku, ashkha ruwanasniyoj kashasqanchejrayku chayri may saykʼusqas kashasqanchejrayku tantakuykunaman riyta mana atillanchejchu. ¿Imataj yanapawasun tantakuykunaman mana faltakuspa rinapaj? ^[1] ¿Imaynatataj Bibliamanta yachakojkunata, waj runasta ima yanapasunman tantakuykunaman rinankupaj? Kay yachaqanapeqa kay kinsa tapuykunaman kutichisunchej: ¿Imaraykú tantakuykunaman risqanchej yanapawanchej? ¿Imaraykú tantakuykunaman risqanchej wajkunata yanapan? ¿Imaraykú Jehová kusikun tantakuykunaman rejtinchej? ^[2]

4. ¿Imaynatá tantakuykuna yanapawanchej Jehovamanta astawan yachakunapaj?

⁴ Tantakuykunapi Jehová yachachiwanchej. Tantakuykunaqa Jehovamanta astawan yachakunapaj yanapawanchej. Sutʼincharinapaj, casi tukuy congregacionespi Bibliamanta Yachaqanapaj tantakuypi Jehovaman qayllaykuna nisqa librota estudiarqanchej. Jehová Diospa kʼacha kaykunasninmanta yachakuspa, hermanosninchej tapuykunaman kutichisqanku imaqa, Jehovata astawan munakunapaj yanapawarqanchej, ¿icharí? Chantapis tantakuykunapi Bibliamanta astawan yachakullanchejtaj, umallirichiykunata, rikuchiykunata, Biblia leekusqanta ima sumajta uyarispa (Neh. 8:8). Sapa semanataj Bibliamanta wakin allin yachachiykuna nisqa umallirichiypaj wakichikushaspa allin yachachiykunata tarinchej, hermanosninchej kutichisqankutapis uyarinchej.

5. ¿Imaynatá tantakuykuna yanapawanchej Bibliaj yuyaychaykunasninman jina kausakunapaj, sumajta runasman willamunapaj ima?

⁵ Tantakuykunaqa Bibliaj yuyaychaykunasninman jina kausakunapaj yanapallawanchejtaj (1 Tes. 4:9, 10). Sutʼincharinapaj, Torremanta Qhawaj revistaqa Diospa llajtan imatachus necesitasqanman jina wakichikun. Ichá maykʼajllapis uj yachaqanata estudiarqanchej, mayqenchus yanapawarqanchej Jehovapaj astawan llankʼanapaj, aswan sumajta mañakunapaj, hermanosta perdonanapaj ima. Cristiano Kausayninchej nisqa tantakuytaj runasman willamunapaj, Bibliaj yachachiyninta sumajta yachachinapaj ima yanapawanchej (Mat. 28:19, 20).

6. ¿Imaynatá tantakuykuna sonqochawanchej, kallpachawanchej ima?

⁶ Tantakuykunaqa kallpachawanchej. Satanaspa pachanqa creeyninchejta pisiyachiyta, llakichiyta ima munawanchej. Tantakuykunataj sonqochawanchej, Jehovata sirvinallapajpunitaj kallpachawanchej (Hechos 15:30-32 leey). Tantakuykunapeqa sapa kuti parlakun imaynatachus Bibliaj profeciasnin juntʼakusqanmanta. Chaytaj yanapawanchej Jehovaj nisqasnin juntʼakunanpi atienekunapaj. Chantapis hermanosqa umallirichiyninkuwan, tapuykunaman kutichisqankuwan, tukuy sonqo takisqankuwan ima mayta kallpachallawanchejtaj (1 Cor. 14:26). Niraj tantakuykuna qallarikushajtin, tukukojtin ima, hermanoswan parlariypis mayta kallpachallawanchejtaj, imaraykuchus ashkha amigosniyoj kasqanchejta rikunchej, mayqenkunachus noqanchejmanta llakikunku (1 Cor. 16:17, 18).

7. ¿Imaraykú tantakuykunaman rinanchejpuni tiyan?

 ⁷ Tantakuykunapeqa Jehová atiyninwan yanapawanchej. Jesusqa Diospa atiyninwan congregacionesta ñaupajman apashan. Pay nerqa: “Ninriyoj kajqa uyarichun imatachus Espiritoqa [congregacionesman] nisqanta”, nispa (Apo. 2:7). Diospa atiynenqa yanapawanchej juchaman mana urmanapaj, mana manchachikuspa willanapaj, sumaj imasta ajllanapaj ima. Chayrayku mayta kallpachakunanchej tiyan tantakuymanta mana faltakunapaj. Ajinamanta Jehová atiyninwan yanapawasun.

8. ¿Imaynatá hermanosta yanapan tantakuykunaman risqanchej, tapuykunaman kutichisqanchej, takisqanchej ima? (“Wasinman allinpuni kutipun” nisqa recuadrota leey.)

⁸ Tantakuykunaqa hermanosninchejman munakuyninchejta rikuchinapaj yanapawanchej. Ashkha hermanos sinchʼi llakiykunapi kashanku. Apóstol Pablo nerqa: “Purajmanta kallpachanakuspa yanaparinakunachej”, nispa (Heb. 10:24, 25). Hermanosninchejta munakusqanchejta rikuchinchej, paykunawan tantakuspa purajmanta kallpachanakunapaj. Tantakuykunaman rispaqa hermanosninchejwan khuska kayta, paykunawan parlariyta, imaynachus kashasqankuta yachayta ima munasqanchejta rikuchinchej. Chantapis hermanosninchejta kallpachallanchejtaj tapuykunaman kutichispa, tukuy sonqo takispa ima (Col. 3:16).

9, 10. 1) Jesús kay Juan 10:16 nisqan, ¿imaynatá yanapawanchej imaraykuchus tantakuykunaman rinapuni kasqanta yachanapaj? 2) Tantakuykunaman risqanchej, ¿imaynatá yanapanman Jehovaj testigosnin kasqankurayku chejnisqa hermanosta?

⁹ Tantakuykunaqa hermanosninchejwan ujchasqa kanapaj yanapawanchej (Juan 10:16 leey). Jesús nerqa pay uj michej jina kasqanta, yachachisqasnintaj uj tropa ovejitas jina kasqankuta. Uj tropa ovejitasqa ujchasqapuni kanku, michejninkoj qhepantataj rinku. Iskay ovejitas uj orqopi, iskay ovejitastaj uj vallepi, uj ovejitataj waj ladopi kashankuman chay, ¿nisunmanchu chay phishqa ovejitas uj tropalla kasqankuta? Mana. Jinallataj noqanchejwanpis, “uj tropalla[manta]” kanapaj, uj michejpa qhepallanta rinapaj ima, hermanosninchejwan khuska tantakunanchej tiyan.

¹⁰ Tantakuykunaman rispaqa congregación ujchasqa kananpaj yanapanchej (Sal. 133:1). Wakin hermanostaqa Jehovaj testigosnin kasqankurayku tatasninku, hermanosninku ima chejnikunku. Chaywanpis Jesús nerqa uj familiata qonanta, mayqenchus paykunata munakunkuman, qhawankuman ima (Mar. 10:29, 30). Tantakuykunaman rispaqa, ichapis chay hermanospaj tatasninku jina, hermanosninku jinataj kasun. Chaypi tʼukurispaqa, tukuy  tantakuykunaman rinapaj mayta kallpachakusun.

11. ¿Imaynatá tantakuykuna Jehovata jatunchanapaj yanapawanchej?

¹¹ Tantakuykunaman rispaqa Jehovata jatunchanchej. Pay ruwawasqanchejrayku, payllata jatunchananchej tiyan, yupaychananchej tiyan, agradecekunanchej ima tiyan (Apocalipsis 7:12 leey). Tantakuykunapi mañakuspa, takispa, Jehovamanta parlaspa ima payta yupaychanchej. Tukuy imata noqanchejrayku ruwasqanmanta jatunchayqa ni imawan kikinchakunchu.

12. ¿Jehová kusikunchu tantakuykunaman rejtinchej?

¹² Jehovata kasukunanchej tiyan pay ruwawasqanchejrayku. Pay kamachiwanchej tantakunanchejta, astawanraj kay pachaj tukukuynin qayllapiña kasqanrayku. Chay kamachiyta kasukojtinchejtaj Jehovaqa mayta kusikun (1 Juan 3:22). Payqa tantakuykunaman rinapaj kallpachakusqanchejta yachan, jatunpajtaj qhawan (Heb. 6:10).

13, 14. ¿Imaynatá tantakuykuna Jehovaman, Jesusman ima qayllaykunapaj yanapawanchej?

¹³ Tantakuykunaman rispaqa Jehovaman rikuchinchej, payman wawanmanwan qayllaykuyta munasqanchejta. Tantakuykunapeqa Bibliata estudianchej, imatachus Jehová ruwananchejta munasqantataj yachakunchej (Isa. 30:20, 21). Jehovata mana yupaychajkunapis tantakuykunaman jamuspa, reparanku ‘cheqamantapuni Dios noqanchej ukhupi kashasqanta’ (1 Cor. 14:23-25). Jehová tantakuykunata atiyninwan ñaupajman apashasqanrayku, tantakuykunapi yachakusqanchejqa paymanta jamun. Chayrayku tantakuykunaman rispaqa imatachus Jehová niwasqanchejta uyarinchej, reparanchejtaj mayta munakuwasqanchejta. Ajinamanta payman astawan qayllaykunchej.

¹⁴ Jesús cristiana congregacionta ñaupajman apashan. Pay nerqa: “Maypichá iskay, chayri kinsa, noqaj sutiypi tantakunku, chaypeqa paykunaj chawpinkupi kashani”, nispa (Mat. 18:20). Chantapis Bibliaqa congregaciones “chawpipi” Jesús kashasqanta nillantaj (Apo. 1:20–2:1). Sutʼita reparanchej tantakuykunapi noqanchejwan Jehová, Jesús ima kashasqankuta, kallpachawasqanchejta ima. ¿Imaynataj Jehová kashan payman, wawanwan ima qayllaykunanchejpaj mayta kallpachakushasqanchejta rikuspa?

15. Tantakuykunaman rispa, ¿imatataj Jehovaman rikuchinchej?

¹⁵ Tantakuykunaman rispaqa Jehovaman rikuchinchej payta kasukuyta munasqanchejta. Jehovaqa tantakuykunaman rinata kamachiwanchej, jinapis mana tanqawanchejchu kasukunapaj (Isa. 43:23). Chay kamachiyta kasukuspaqa, Jehovata mayta munakusqanchejta, paylla imatachus ruwananchejta niyta atiwasqanchejta ima rikuchinchej (Rom. 6:17). Sutʼincharinapaj, ¿imatataj ruwasun tantakuykunaman mana riyta atinapaj jina patronninchej ashkhata llankʼachiwajtinchej? ¿Imatataj ruwasun gobierno tantakojtinchej multata paganata, carcelman wisqʼanawanchejta chayri imatapis ruwanawanchejta niwajtinchej? ¿Imatataj ruwasun sonqota kusirichinanchejrayku tantakuykunaman mana riyta ajllajtinchej? Chay imaspi rikukuspa imatachus ruwananchejta ajllananchej tiyan (Hech. 5:29). Jehovata kasukuyta ajllanchej chayqa, payta kusichisun (Pro. 27:11).

16, 17. 1) ¿Imaynatá yachanchej ñaupa tiempomanta cristianospaj tantakuykuna may sumaj kasqanta? 2) ¿Imaynatataj tantakuykunaman riyta hermano George Gangas qhawaj?

¹⁶ Cristianosqa Pentecostés 33 watapi tantakusqankumanta qhepaman, Jehovata  yupaychanankupaj tantakullarqankupuni. Paykunaqa “apostolespa yachachisqankuta tukuy sonqo japʼikuspa, uj sonqolla kasharqanku” (Hech. 2:42, 46). Chay cristianosqa Romamanta gobiernos, Israelmanta kamachejkuna qhatiykachajtinkupis tantakullarqankupuni. Tantakuyta mana atillajtinkupis tantakunallankupajpuni mayta kallpachakorqanku.

¹⁷ Kay tiempopipis tantakuykuna kasqanmanta may agradecesqas kashanchej. George Gangaspi tʼukurina, payqa 22 watasmanta astawan Diospa Llajtanta Kamachejkunamanta ujnin karqa. Pay nerqa: “Hermanoswan tantakoyqa mayta kusichiwan, kallpachawan ima. Tantakuykunaman ñaupajta chayay, qhepatataj ripoyqa mayta gustawan. Hermanoswan parlarispa mayta kusikuni. Paykunawan khuska kaspaqa wasiypipis familiaywan kashayman jina, chantapis paraisopiñapis kashayman jina kani. Yuyayniypis, sonqoypis tantakuykunallapi kashan”, nispa.

18. ¿Imaynatataj tantakuykunata qhawanki, imatataj ruwayta munanki?

¹⁸ Qanrí, ¿George Gangas jinachu tantakuykunata qhawanki? Ajina kajtenqa hermanosninchejwan tantakuykunapi kanaykipaj kallpachakuy, mana atikullajtinpis. Rey David jinataj niy, pay nerqa: “Tata Dios, wasiykita noqa munakuni”, nispa (Sal. 26:8).