13 watasniyoj jina kashaspa, Jehová Diosmanta karunchakapuyta qallarerqani. Reparasqayman jina, escuelamanta compañerosneyqa imatapis ruwallaj kanku. Noqapis paykuna jina ruwayta munarqani. Yuyaj kani tatasniywan, Bibliaj nisqanwanqa, ni imata ruwajta saqewasqankuta. Nikorqanitaj: “Jehová Diostaqa niñasina sirviyta atiymanchu”, nispa. Yacharqani Jehová Dios kasqantapuni. Jinapis niña ñaupajta jinachu payta munakusharqani.

Predicacionmanqa informeyta jaywanayraykulla llojsej kani, nitaj wakichikojchu kani. Chayrayku ni imamanta runaswan parlayta atejchu kani. Mana wakichikusqayrayku mana revisitasta tariyta atejchu kani, ni estudiosniypis kapuwajchu. Chayrayku niñapuni predicaj riyta munarqanichu. Astawanpis piensarerqani: “Chanta, ¿imaynatataj wajkuna kay jinata sapa semana, sapa killa predicankuri?”, nispa.

17 watasniyoj kashaspa, sapallayña tiyakunaymanta wañurisharqani. Chayrayku cosasniyta oqharikuytawan, Australia suyuman riporqani.  Tatasneyqa llakisqa kasharqanku. Jinapis Jehová Diosta sirvinallaytapuni yuyarqanku.

Australiapeqa astawanraj Jehová Diosmanta karunchakaporqani. Chaypeqa niña tukuynin reunionesmanchu rej kani. Amigosniypis wakin kutislla reunionesman rej kanku. Jinapis fiestasman machakoj, tusukoj ima rillajtaj kanku. Noqapis paykunawan khuska rej kani. Chayta ruwaspaqa puraj uya karqani, nitaj kusisqachu karqani. Chaytaqa kunanraj reparakuni.

Iskay watasninman jina, phishqa soltera hermanaswan tiyakusharqani. Uj kutitaj wasiykuman wajyarerqayku congregacionesta waturej hermanota, señorantawan, uj semanata noqaykuwan qhepakunankupaj. Hermanoj señoranqa, Tamara sutikorqa. Tamaraqa qosan congregacionpi ruwanasninta ruwanankama, noqaykuwan qhepakoj. Payqa noqaykuwan mayta kusirikoj. Chayta rikuspaqa mayta tʼukorqani. Nipuni yuyarqanichu, Jehová Diospaj tukuy atisqanta llankʼaj hermana, noqaykuwan khuska kusirikunanpaj tiempochakunanta. Payta rejsispa kausayniyta cambiarqani.

Tamaraqa Bibliaj nisqanman jina kusisqa kausakoj. Runasmanpis Diosmanta sonqo kʼajaywan willaj. Chayta rikuspataj, noqapis pay jina kayta munarqani. Payqa Jehovapaj tukuy atisqanta llankʼaspa, kusisqa kasharqa. Noqarí llakiyta kakusharqani ni imata allinta ruwaspa. Paypa kausaynenqa maytapuni yanapawarqa. Chantapis yuyarikorqani, Jehovaqa kusiywan, tukuy sonqotaj sirvinanchejta munasqanta (Sal. 100:2).

Tamara jina kusisqa kayta munarqani. Chaypajtaj kausayniyta cambianay karqa. Qallariypeqa mana facilchu karqa. Jinapis pisimanta pisi cambiarqanipuni. Predicacionman rinaypaj wakichikuyta qallarerqani, wakin kutistaj precursora auxiliar kaj kani. Chaytaj yanapawarqa, predicayta manaña anchata manchachikunaypaj. Runasman Bibliamanta leeripuspa, astawan kusisqa karqani. Chayrayku  sapa killa precursora auxiliar kanaypaj kallpachakorqani.

Congregacionpeqa ashkha hermanos Jehovapaj tukuy atisqankuta llankʼasharqanku, kusisqastaj kasharqanku. Noqataj paykunawan amigos ruwakorqani. Paykunaqa kausayninkuwan yanapawarqanku Jehovatapuni kausayniypi ñaupajman churanaypaj, Bibliatapis sumajta estudianaypaj. Pisimanta pisi, aswan kusisqa predicarqani. Chayraykutaj precursora regular kayta qallarerqani. Unaymanta congregacionpi watejmanta kusisqa kasharqani.

Tamarata rejsisqaymanta watanmantaj, Alexta rejserqani. Payqa kʼacha karqa, Jehovata mayta munakoj, sonqo kʼajaywantaj predicaj. Payqa siervo ministerial karqa, sojta watastañataj precursor kasqa. Chantapis uj tiempota Malauiman yanapakoj risqa. Chaypeqa wakin misioneroswan predicasqa, paykunamantataj mayta yachakusqa. Chay misionerosqa payta kallpacharisqanku, Diostapuni kausayninpi ñaupajman churananpaj.

2003 watapi Alexwan casarakorqani. Iskayniykutaj tukuy atisqaykuta Jehovapaj llankʼashallaykupuni. Jehovapaj llankʼaspaqa ashkha imasta yachakorqayku, Jehovataj mayta bendeciwayku.

2009 watapi, Timor Oriental suyupi misioneros kanaykupaj invitawarqayku. Chay suyoqa juchʼuylla, Indonesia suyuj qayllanpitaj kashan. Chayta yachaspa kusisqastaj, mancharisqastaj kasharqayku. Chaymanta phishqa killanmantaj, Timor Oriental suyuj capitalnin Dili llajtaman chayarqayku.

Chay suyupeqa runaspaj culturankuman, parlayninkuman, mikhunankuman, imaynatachus kausakusqankuman ima yachaykukunayku karqa. Predicacionpeqa tinkoj kayku wajcha runaswan, mana leeyta yachajkunawan chayri sufrichisqa  kajkunawan. Chantapis chay suyupi aswan ñaupajta guerras, chʼajwas * ima kasqanrayku, ashkha runasqa mana sanitoschu kanku, llakisqallataj kausakunku.

Predicacionqa may sumajpuni karqa. Uj pacha predicacionpi 13 watayoj jovencitawan tinkorqani. Payqa María * sutikorqa, manchay llakisqataj kasharqa. Paypa mamanqa unayña wañupusqa, tatanwantaj maypi jinalla tinkukoj kasqa. Mariaqa edadninmanta ashkha wawas jinallataj mana yacharqachu, imatachus kausayninwan ruwananta. Payqa uj pacha waqaspa imaynachus kashasqanta willariwarqa. Jinapis parlayninta recién yachakushasqayrayku, mana allinta entienderqanichu imatachus nishawasqanta. Jehovamanta mañakorqani payta kallpacharinaypaj yanapanawanta. Chaymantataj payta sonqocharinanpaj jina textosta Bibliamanta leeriporqani. Tiemponmantaj repararqani, imaynatachus Biblia Mariata tukuy kausayninpi yanapasqanta. Chaymanta payqa bautizakorqa. Kunantaj paypis Bibliamanta runasman yachachishan. Chantapis jallpʼantinpi jatun familiayoj, may munasqataj.

Jehovaqa Timor Oriental suyupi maytapuni llajtanta bendecishan. Ashkhas kay chunka wataspi bautizakorqanku. Jinapis paykunamanta ashkhas precursores, siervos ministeriales chayri ancianosña kanku. Wakin hermanostaj publicacionesta traducinapaj oficinaspi yanapakunku. Paykunata kusisqata rikuspa, reunionespi takirejta uyarispa, Jehová Diosta yupaychaypi ñauparisqankuta rikuspa ima, mayta kusikorqani.

Timor Orientalpi kausakoyqa, mana Australiapi kausakuy jinachu karqa. Jinapis chaypi Jehová Diosta sirvispa, kusisqa kasharqani. Wakin kutisqa, runaswan khuska juntʼita autopi rej kayku. Paykunaqa mercadomanta pescado chʼarkista, verdurasta ima apakoj kanku. Wakin estudiosniykoj wasisninkoqa, juchʼuysituslla karqa, manchay qʼoñitaj, pampanpis jallpʼalla. Wallpaspis kayman jaqayman correykachaj kanku. Chay lugarpi kausay mana facilchu kajtinpis, manchay kusisqa karqani.

Wawallaraj kashasqaymanta yuyarikuspa, maytapuni tatasniyman agradecekuni Jehovamanta yachachiwasqankumanta. Paykunaqa jovencitaña kashajtiypis yanapallawarqankupuni. Proverbios 22:6 nisqanqa, noqapi juntʼakun. Mamaywan tataywanqa may kusisqapuni kashanku qosaywan khuska astawan Jehovapaj llankʼasqaykumanta. 2016 watamantapacha, Australia sucursal atienden chay lugarespi congregacionesta waturispa yanapakushayku.

Ñaupajtaqa predicay mana gustawajchu, kunanqa predicay mayta gustawan. Kausayninchejpi llakiykuna kajtinpis, Jehová Diosta tukuy sonqo sirvispaqa, kusisqa kasun. 18 watastaña qosaywan khuska Jehovata sirvispa kusisqa kashayku. Kunanqa sutʼita reparani imaraykuchus David Jehovaman kayta nisqanta: ‘Kusikuchunku qanpi pakakojkuna; kusisqapuni kachunku. Munakusojkunaqa qanrayku kusikuchunku’ (Sal. 5:11).