Wawita nacekusqantawan, ñaupaj horata mamanwan kananqa, may sumaj. Chayqa mamata yanapan, wawitanta astawan munakunanpaj. Ajina munasqa wawitastaj allinta, kusisqataj wiñakunku. *

¿Imaraykutaj mamas wawitanku nacekojtin mayta munakunku? Jeannette Crenshaw nisqa profesora, uj revistapi jinata nerqa: “Wawitata nacechikoj warmispi, oxitocina nisqa hormona yapakun. Chaytaj mamata yanapan, wawitanta qhawarishajtin, munarikushajtin, ñuñuchishajtin ima, astawan munakunanpaj”, nispa. Waj hormonataj mamata yanapan, wawitanman necesitasqanta qonanpaj, chayta kusiywan ruwananpaj ima. ¿Imatá chaymanta yachakunchej?

Diosninchej Jehovaqa * mamasta ruwarqa wawitankuta munakunankupaj jina. Ñaupa tiempomanta rey Davidqa, Diosman nerqa: ‘Qanqa mamaypa wijsanmanta nacechiwarqanki. Mamaypa ojllayninpi munasqata japʼiwarqanki’, nispa. Uj mañakuypitaj nerqa: “Nacekusqaymantapacha noqaqa ojllayniykipi karqani; mamaypa wijsanmantapacha qanqa Diosniy kanki”, nispa (Salmo 22:9, 10).

TʼUKURINA: Diosninchejqa mamasta ruwarqa wawitankuta munakunankupaj, necesitasqankuta qonankupaj ima. Noqanchejtaj “Diospa wawasnin kanchej”, ¿manachu Diosninchej noqanchejtapis kikillantataj munakuwasunman? (Hechos 17:29).

Jesucristoqa Diosninchej Jehovata sumajta rejsin. Paytaj nerqa: “Iskay pʼisqetustaqa pisi valorniyoj qolqellapi vendenku, ¿icharí? Chaywanpis ni uj pʼisqetullapis pampaman urmanchu mana Tataykichejpa yachanantaqa. Umaykichejmanta chujchasniykichejpis, tukuyninku yupasqa kashanku. Chayrayku ama manchachikuychejchu, qankunaqa ashkha pʼisqetusmantapis astawanraj valenkichej”, nispa (Mateo 10:29-31).

Wakin kutisqa pʼisqetusta mana qhawarillanchejpischu, nitaj yachanchejchu pampaman urmasqankutachus manachus. Dios Tatanchejrí uj pʼisqetu urmasqantapis sumajta yachan. Runastaj ashkha pʼisqetusmantapis, astawanraj paypaj valenchej. ¿Imatá chay yachachiwanchej? Diosninchejqa sapa ujninchejmanta llakikusqantapuni.

 Biblia niwanchej

• “Tata Diosqa tukuynejpi kashan, allin runasta mana allin runastapis qhawaspallapuni” (PROVERBIOS 15:3).

• “Señorqa kʼacha sonqoyoj runasta qhawan, qhaparikusqankutataj uyarin” (SALMO 34:15, Qheshwa Biblia).

• “Khuyakuyniykipi maytapuni kusikusaj. Qan rikunki llakiyniyta, yachankitaj phutikuyniyta” (SALMO 31:7).

Dios noqanchejmanta llakikusqanta yachay, ¿yanapawanchejchu? Arí. Anaj * kausaynin chayta rikuchiwanchej. Payqa Inglaterra suyumanta.

Ana nin: “Ashkha kutispi yuyarqani Jehová Dios mana munakuwasqanta, mañakusqaytapis mana uyariwasqanta. Nejtaj kani: ‘Pisi creeyniyojchá kani. Nichá Diospaj valenichu, chayraykuchá castigashawan’, nispa. Mana reparajchu kani Dios noqamanta llakikusqanta”, nispa.

Anaqa kunan niña jinatachu yuyan. ¿Imataj yanaparqa Jehová Dios munakusqanta reparananpaj? Pay nin: “Dios munakuwasqanta pisimanta pisi repararqani. Uj pacha, uj hermanota Bibliamanta parlamojta uyarerqani. Payqa nerqa Jehová Dios mayta munakuwasqanchejrayku, Wawan Jesusta noqanchejrayku wañunanpaj kachamusqanta. Chayta yachayqa sonqoyta wawayacherqa. Mañakusqayta Dios uyariwajtintaj, waqarikoj kani. Jehová Dios munakuwasqanta yacharqani. Bibliata estudiaspa, tantakuykunaman rispa ima, Jehovata astawan rejserqani, munakuwasqanchejtataj yachakorqani. Kunanqa sutʼita yachani Jehová Diosninchej sapa ujninchejmanta llakikusqanta, yanapawasqanchejtataj”, nispa.

Anaj nisqanqa mayta kallpachawanchej. Jinapis, ¿imaynatá yachasunman Diosninchej entiendewasqanchejta, imaynachus kashasqanchejtapis yachasqanta? Qhepan yachaqanapi chaymanta parlarisun.