Pillatapis rejsiyta munaspaqa “¿imá sutikunki?” nispa tapurinchej. Diosta ajinata tapojtinchej, ¿imatá niwasunman?

“Noqa Jehová kani. Chaymin suteyqa” (Isaías 42:8).

Diosqa sutinta oqharinanchejta munan. Ni pipis Diosman sutita churarqachu, pay Jehová sutita churakorqa. Pay nerqa: “Kay suteyqa wiñaypaj kanqa, kay sutiwantaj runas rejsiwanqanku wiñay wiñaynintinpaj”, nispa (Éxodo 3:15). Bibliapeqa Jehová sutipuni astawan rikhurin, wakin lugarespi Tukuy Atiyniyoj, Tata, Señor, Dios ima nejtinpis. Wakin runaspa sutisninkupis rikhurillantaj, Abrahán, Moisés, David, Jesús sutis jina. Jinapis Jehová sutipuni astawan ashkha kutista rikhurin. Jehová Diosqa sutinta yachananchejta munan. Biblia nin: “Runasqa yachachunku sutiyki Jehová kasqanta. Runasqa yachachunku, tukuy jallpʼantinpi qanlla Aswan Patapi kaj Dios kasqaykita”, nispa (Salmo 83:18).

Jesusqa Diospa sutinta oqharerqa. Payqa yachachisqasninman Diosmanta kay jinata mañakunankuta nerqa: “Sutiyki jatunchasqa kachun”, nispa (Mateo 6:9). Paypis Diosmanta mañakushaspa nerqa: “Tatáy, sutiykita jatunchay”, nispa (Juan 12:28). Jesusqa Diospa sutinta jatunchajpuni. Chayrayku Tatanman nerqa: “Paykunaman sutiykita rejsicherqani, rejsichillasajpunitaj”, nispa (Juan 17:26).

Diospa kamachisnenqa sutinta oqharinkupuni. Ñaupa tiempomanta kamachisnenqa yacharqanku jarkʼasqas, salvasqastaj kanankupaj Diospa sutinta oqharinankupuni kasqanta. Paykunamanta ujnenqa nerqa: “Jehová Diospa sutenqa sumaj ruwasqa  torre jina. Chayman cheqan runaqa ayqekun, chaypitaj pakakun”, nispa (Proverbios 18:10). Ujnintaj nerqa: “Jehová Diospa sutinta tukuy oqharejkunaqa salvasqa kanqanku”, nispa (Joel 2:32). Bibliaqa niwanchej Diospa kamachisnin paypa sutinwan rejsisqa kanankuta. Kay jinata nin: “Tukuy nacionesqa sapa ujpis diosninkoj sutinpi purenqanku, noqanchejtajrí Jehová Diosninchejpa sutinpi purisunchej wiñaypaj wiñaynintinpaj”, nispa (Miqueas 4:5; Hechos 15:14).

Paylla cheqa Dios kasqanta. Yachayniyoj runas nisqankuman jina, Jehová suteqa niyta munan “pay imamanpis tukuchin”. Diosqa Moiseswan rejsichikushaspa imachus sutin niyta munasqanta reparachiwanchej. Pay nerqa: “Noqa Kasaj Imachus Kayta Munani Chay”, nispa (Éxodo 3:14). Diospa sutenqa Ruwawajninchej kasqanta yachachiwanchej, pay tukuy imata rikhurichisqanta. ¿Imatawán yachachiwanchej? Munayninta juntʼananpaj pay kikin imamanpis tukuyta atisqanta, imatapis chayri pillatapis imachus necesitakusqanman tukuchiyta atisqanta. Diosman Señor chayri waj titulosta churasqankoqa maypichus kashasqanta, may jina atiyniyojchus kasqanta rikuchin. Jinapis Jehová sutilla yachachiwanchej imaynapunichus Dios kasqanta, imamanpis tukuyta atisqanta ima.

Munakuwasqanchejta. Diospa sutenqa rikuchin tukuy ima ruwasqasninta, noqanchejtapis munakuwasqanchejta. Payqa rejsinanchejta munasqanrayku, sutinta may unayña willawarqanchej. Wakin ninku: “Diostaqa ni jaykʼaj rejsisunmanchu”, nispa. Diosninchejrí niwanchej payta rejsinanchejta, payman qayllaykunanchejta ima (Salmo 73:28).

Diospa sutinta oqharispa, payta rejsiyta munasqanchejta rikuchinchej. Pipis amigoyki kananta munaspaqa, sutiykimanta parlapasunanta munanki. Sutiykita mana oqhariyta munanmanchu chay, ¿amigonta jina qhawasusqantachu niwaj? Mana, ¿icharí? Jehová Diospa sutinta mana oqharejtinchejpis ajinallataj. Payqa sutinta willawanchej, oqharinanchejtataj munan. Sutinta oqharispaqa, payman qayllaykuyta munasqanchejta rikuchinchej. Biblia nin Diosqa ‘sutinpi tʼukurejkunata’ chayri ‘sutinta jatunpaj qhawajkunata’ rejsisqanta (Malaquías 3:16, sutʼinchaynin).

Diosta rejsinapajqa, sutinta yachananchejpuni tiyan. Chantapis imayna Dioschus kasqanta yachanallanchejtaj tiyan.