Kʼuchi runasqa mana trabajayta qhellakunkuchu. Astawanpis necesitasqankupaj trabajaspa kusikunku, wajkunatapis ganakusqankuwan yanaparinku. Paykunaqa ima trabajopipis trabajakullanku.

Tukuypis ashkha ruwanasniyoj kanchej. Kay tiempopitaj ashkhas manaña trabajayta munankuchu. Chayrayku walejpuni kʼuchis kananchejqa (Eclesiastés 3:13).

Renan nin: “Sinchʼita trabajaspaqa, kusisqa, sonqo juntʼasqataj kani. Chayrayku mayta trabajayta munani. Trabajayman yachasqa kanchej chayqa, wajkunapis munakuwanchej”, nispa.

BIBLIA NIWANCHEJ: “Tukuy sonqo trabajasqamantaqa ashkhata ganakunchej” (Proverbios 14:23).

Kay urapi kaj yuyaychaykunaqa, trabajayta gustachikunaykipaj yanapasonqa.

Imatapis allinta ruway. Wasiykipi ruwanasta, tareasniykita, trabajoykitapis, sumajsituta ruway. Imatapis allintaña ruwayta yachanki chayqa, aswan sumajta, aswan usqhaysitutataj ruwanaykipaj kallpachakuy. Aswan sumajta ruwaspaqa, aswan kusisqa ruwanki.

BIBLIA NIWANCHEJ: “Pichus kʼuchilla imatapis sumajta ruwajqa reyespa ñawpaqenkupi sirvillanqapuni, manataj mayqen runaspallatachu” (Proverbios 22:29).

Wajkunapi piensay. Ruwanasninchejta juntʼajtinchej, wajkunatapis yanapanchej. Wasiykipi ruwanaswan yanapakojtiyki, familiaykita samarichinki.

BIBLIA NIWANCHEJ: “Aswan kusiy wajman qoriy, qorichikunamanta nisqaqa” (Hechos 20:35).

Astawan ruwariy. Kamachisusqankumantapis astawanraj ruwariy. Ajina kajtiykeqa mana waj kamachinachu kanki. Astawan trabajaspapis, tukuy sonqo trabajanki, manataj tanqasqallachu ruwanki (Mateo 5:41).

BIBLIA NIWANCHEJ: ‘Ama tanqasqa jinachu ruway, manaqa qan munasqaykirayku’ (Filemón 14).

Trabajaspapis samarikuy. Trabajopaj kʼuchi kayqa, trabajollaman qokuywan mana kikinchu. Sumajta trabajaspapis, samarikunallataj tiyan.

BIBLIA NIWANCHEJ: ‘Uj chhikan samarinaqa aswan allinpuni, anchatapuni llankʼanamanta nisqaqa’ (Eclesiastés 4:6, Qheshwa Biblia).