Ichá ninchej: “Kayta chayri jaqayta ruwayta munani”, nispa. Jinapis chayqa, juntʼayta atinapaj jina kanan tiyan. Chaypajqa wakichikuna, imaschus kananpi piensarina, kallpachakunataj.

Wakin ruwaykunataqa pisi tiempollapi juntʼasunman, wakintataj unaypi. Ruwayta munasqanchej unaypaj chayqa, pisi tiempollapi juntʼanapaj kashan chay ruwanastaraj juntʼana.

Imatachus ruwayta munasqaykita juntʼanki chayqa, astawan imasta ruwayta munanki, sumaj amigosta tarinki, kusisqataj kanki.

Astawan imasta ruwayta munanki. Juchʼuy ruwaykunata juntʼanki chayqa, jatun ruwaykunatapis ruwallanki. Ima llakiy rikhurisojtintaj, mana manchachikunkichu. Ichá chay kanman, waj jóvenes imatapis ruwachiyta munasusqanku.

Sumaj amigosniyoj kanki. Wakenqa mana yachankuchu, imatachus kausayninkuwan ruwanankuta. Ni pipis chay jina runaswan kayta munanchu. Chantá imapipis wajwan khuska llankʼanki chayqa, sumaj amigosman tukunkichej.

Kusisqa kanki. Imatachus ruwayta munasqaykita juntʼanki chayqa, kusisqa kanki.

Cristofer nin: “Imatapis ruwayta munanipuni. Ajinapi mana qhasillachu kani. Imatachus ruwayta munasqayta juntʼaspataj, kusisqa kani”, nispa.

BIBLIA NIWANCHEJ: “Wayrata qhawajqa mana tarpunchu, phuyusta qhawajpis mana cosechanchu” (Eclesiastés 11:4).

¿Imatá ruwayta munawaj? ¿Imaynatá chayta juntʼawaj? Kay yuyaychaykuna yanapasonqa.

Imatachus ruwanaykita ajllay. Imastachus ruwayta munasqaykita anotakuy. Chantá mayqentachus ñaupajta ruwanaykipi piensariy.

Wakichikuy. Kay jinata ruway:

• Juntʼanaykipaj fechata churakuy.

• Imaynatachus ruwanaykita anotakuy.

• Imaschus rikhurinanpi piensariy. Chantá imatachus ruwanaykipi tʼukuriy.

Ruwayta qallariy. Imatapis ruwayta qallarinaykipajqa, mana tukuy imitapunichu allin kanan tiyan. Ruwanaykita juntʼanaykipaj, imatarajchus ruwanayki kasqanpi piensariy. Chantá ruwaypacha. Ujta juntʼaytawan, imaynachus rishasusqanta qhawarikuy.

BIBLIA NIWANCHEJ: “Imatapis ruwanampaj kʼuchi runaj wakichisqanqa allimpuni llojsin” (Proverbios 21:5).